ཆང་སྐྱེས།
ཁྲ་ཆུང་མིག་གིས་ལྟ་ཕྱོགས་མ་ཡིན་ཞིང་།།
གངས་དཀར་སེམས་ཀྱི་བློ་ལ་འབབ་ཕྱོགས་ཀྱིས།།
ལྷོད་ཀྱིས་གྲོལ་བའི་འཛུམ་ཆུང་དམར་པོ་དེ།།
སྙིང་ལ་ཟུག་པའི་དྲན་ཤིང་གསོན་པོ་ཞིག།
ལས་དབང་བཙན་པོས་གོ་སྒྲིག་མ་ཡིན་ཞིང་།།
གློ་རྡེག་སྟེས་དབང་ཞིག་གིས་ཐུག་འཕྲད་ཀྱིས།།
འཛུམ་ལན་འཛུམ་གྱིས་བསུས་པའི་སྣང་བརྙན་དེ།།
སེམས་ལ་བཞག་པའི་བག་ཆགས་ཟབ་མོ་ཞིག།
ཁ་ཡག་ཚིག་གིས་བསླུ་བྲིད་མ་ཡིན་ཞིང་།།
བརྩེ་སེམས་ཁྱེད་ལ་ཞོགས་པའི་ཤེད་མོང་གིས།།
རེ་སྨོན་ལྷ་ལ་བཅོལ་བའི་ཚུགས་ཀ་འདི།།
ཁྱོད་ཀྱིས་མཐོང་ན་གད་མོ་ཤོར་ཡང་སྲིད།
ཡིད་འཕྲོག་ལྷ་མོས་སྒེག་ཉམས་བསྟན་མྱོང་ཞེས།།
ཁྱེད་ཀྱིས་བདག་ལ་ཟུར་མིག་མ་འཕངས་ཀྱང་།།
གོམ་པའི་འདེགས་འཇོག་བར་གྱི་སྟངས་སྟབས་དེ།།
ད་དུང་མཐོང་བའི་ལམ་ན་ལྡེམ་ལྡེམ་ལྡེམ།།
ཁྱེད་ཞལ་པད་མོ་བདག་གི་སྙིང་ལ་བཞད།།
བདག་སེམས་བུང་བ་ཁྱེད་ཀྱི་ཕྱོགས་སུ་འཕུར།།
ཟླ་བ་ཁེར་འགྲོ་བྱེད་པའི་འོད་ངོགས་ན།།
ཁོ་བོས་ཁྱེད་ལ་སྙན་ངག་འདི་ལྟར་བྲིས།།
༄༅། ཡང་ཡང་སེམས་ནས་མི་བརྗིད་ལྷང་ལྷང་དྲན། ལྷང་ལྷང་དྲན་པ་གཞིས་ལུས་སྤུན་ཟླ་ཡིན།
སྤུན་ཟླའི་སེམས་ཤུགས་འགྲན་ཟླ་བྲལ་བ་འདི། སུ་ལ་བཤད་ཀྱང་དོན་གནད་རྟོགས་ཤིང་དཀའ།