དཔལ་དགྱེས་པ་རྡོ་རྗེ།
བོད་གངས་ཅན་པའི་བསྟན་སྲིད་ཡོངས་ཀྱི་བདག་པོ་ཆོས་ཀྱི་རྒྱལ་པོ་ནི་༧གོང་ས་རྒྱལ་བ་རིན་པོ་ཆེ་བསྟན་འཛིན་རྒྱ་མཚོ་འམ་ཏཱ་ལའི་བླ་མ་རེད། འཛམ་གླིང་སྤྱི་འགྲོས་ལྟར་འགྲོ་བ་མི་མང་དམངས་གཙོ་གཞིར་བཟུང་ནས་ཆོས་སྲིད་བསྟན་སྐྱོང་གི་འདེམས་སྒྲིག་ད་ལྟ་གནང་བཞིན་པའོ།།
དང་པོ་ནི་སྔོན་འགྲོའི་ཆ་རྐྱེན་གྱི་མེ་ལོང་རབ་གསལ་དགོས། སྲིད་སྐྱོང་ཞིག་ལ་དགོས་ངེས་དེ་དྲང་བདེན་དང་ལྷག་བསམ་ཤེས་ཡོན་གྱི་ཕྱུག་པའི་མི་གཤིས་གསེར་དང་འདྲ་བ་ནི་དེང་དུས་རབས་ཉེར་གཅིག་པའི་ཤིང་རྟ་འདྲེན་པའི་ཡིད་བཞིན་ནོར་བུ་ལྟ་བུས་གཞན་ཕན་དང་རང་ཡུལ་སྐྱོང་བའི་སྲིད་པའི་གངས་རྒན་ནོར་འཛིན་མཛེས་པའི་རྒྱན་དང་གནས་པའི་སྲོག་རྩ་རེད། གངས་ལྗོངས་ཀྱི་ཆོས་དང་སྲིད་ཀྱི་ཉི་ཟླ་ནམ་ཡང་ནུབ་པ་མེད་དོ།
གཉིས་པ་ནི་དངོས་གཞི་གདན་འཛོམས་གྱི་རྒྱ་མ་དང་རྒྱ་རྡོ་དགོས། གངས་ཅན་པའི་སྲིད་སྐྱོང་བ་རང་བཙན་གཙང་མའི་བདག་པོ་ཀླུ་མཁར་བྱམས་པའི་གཡུ་འབྲུག་སྔོན་མོའི་སྒྲ་དབྱངས་དང་། རྣམ་དཔྱོད་ཆོས་མཐུན་དང་དབུ་མའི་ལམ་དུ་བསྒྱུར་ཅིང་འཚེ་མེད་ཞི་བདེའི་སྒྲ་སྙན་སྒྲོག་ནའི་གངས་སེང་དཀར་མོའི་བདེན་གཏམ་རྣམས་བསྟན་སྲིད་སྨྲ་བའི་མི་རིགས་ཀྱི་བདག་པོ་བསྟན་པའི་རྒྱལ་མཚན་དང་སྲིད་པའི་བ་དན་གཡོ་བ་མེད་པར་ཕོ་བྲང་དམར་པོའི་རྒྱན་ཏུ་འཆར་བའི་དམིགས་ཡུལ་ལས་གཞན་མེད་མོད། ཆོས་ལུགས་དང་ཆོལ་ཁའི་དུག་རུལ་དང་རང་གཤིས་ངན་པའི་ཞེན་ཆགས་ཀྱིས་ཨང་སྟེགས་ལ་རྔམས་པ་དག་ནི་ཕ་བསད་ཀྱི་རྒྱལ་རྔ་རྡུང་བའི་དཔེ་ལས་མི་འདུག་པས་མི་ལོ་དྲུག་བཅུའི་འབད་འབུས་ཀྱི་རྒྱལ་གཞུང་དེ་དམར་པོ་མེ་དང་སྔོན་མོ་ཆུ་ལ་མི་སྐྱུར་བའི་རེ་འདུན་དང་རྒྱལ་དབང་རིན་པོ་ཆེའི་དགོངས་དོན་མཐར་ཕྱིན་པའི་གྲུབ་འབྲས་དགོས།
གསུམ་པ་ནི་མཐར་དོན་གངས་ཅན་རྒྱལ་བའི་རྒྱལ་རྔ་གྲགས་དགོས། ཉིང་དགོས་མཐར་ཐུག་པ་ནི་གངས་ཅན་བོད་མི་གཞིས་བྱེས་མཉམ་འཛོམས་ཀྱི་འདུ་རར་ཁྲ་མོར་གླིང་བྲོ་བདེ་ཆེན་རྡོ་རྗེའི་རོལ་མོའི་དགའ་སྟོན་ལ་རོལ་ཞིང་མི་ཆོས་དང་དམ་ཆོས་གཙང་མའི་རྒྱལ་འབངས་དགེ་བཅུའི་ཁྲིམས་བཟང་གིས་མདོ་དབུས་ཁམས་པའི་ཤི་གསོན་ཀུན་གྱི་རང་དབང་འཛམ་གླིང་མི་དམངས་སྤྱི་མཚུངས་ཀྱི་ཡུལ་སྐྱོང་སྲུང་སྐྱོབ་དང་དམག་སྲིད་ཚོགས་པ། རྒྱལ་དར་དང་ཡིག་སྒམ། རླངས་འཁོར་དང་གནམ་གྲུ། སློབ་གྲྭ་དང་ཉེན་རྟོག སྨན་ཁང་དང་དགོན་སྡེ། དངུལ་སྒོར་དང་ཕྱག་ཁྱེར།སྤྱི་སྤྱོད་རླངས་འཁོར་བཅས་པ་གངས་ཅན་བོད་མིའི་སྡེ་བཞི་མཛའ་གྲོགས་སུ་ལོངས་སུ་སྤྱོད་པ་ཞིག་འབྱུང་བའི་ཡུལ་གངས་ཅན་པ་ཀུན་གྱི་སེམས་ནང་གི་རྨི་ལམ་དེ་མངོན་དུ་འགྱུར་བ་ན་འགྲོ་བ་མིའི་བདེ་སྐྱིད་སྲིད་འདིར་མི་ཉམས་པར་ཞི་བདེའི་འོད་སྣང་ས་གསུམ་ཁྱབ་པའི་རྟེན་འབྲེལ་རྒྱ་ཆེན་པོ་ཡོད་པར་ལགས་སོ།།
ཞེས་པ་འདི་ཡང་རབ་གནས་ཟླ་ཚེས་དགེ་བར་རྒྱལ་ཁབ་ཉེར་དྲུག་གི་ཚོགས་མི་འདུས་པའི་དབུས་སུ་ཁ་ཆེ་ཨ་ས་ལ་དང་ཡེ་ཤུ་པ་ཧོ་སེ་སོགས་གྲོགས་ཕོ་མོ་འགས་བོད་དོན་སྐོར་ལ་དྲི་བ་དང་བོད་གངས་ཅན་པའི་སྲིད་སྐྱོང་དང་རྒྱལ་ཁབ་གླེང་བའི་སྐོར་མདོར་ཙམ་བརྗོད་པ་བོད་རང་གི་ཡིག་ཐོག་ཏུ་དབྱིན་ཡུལ་བྷན་གྷོར་གཙུག་ལག་སློབ་ཁང་གི་དཔེ་མཛོད་ཁང་དུ་རིག་འཛིན་དཔལ་དགྱེས་པ་རྡོ་རྗེས་སྦྱར་བ་དགེའོ།། །། ཕྱི་ཚེས་༡་ཟླ་༢་ལའོ།། །།
འབྲུག་མཐོང་མྱོང་དང་གངས་སེང་མཐོང་མྱོང་ཡོད་མཁན་ཡོད་
ན་མི་མིང་དང་དུས་ཚེས་ལོ་དུས་ལུང་པ་སོགས་གསལ་འདིར་
བཀོད་ཐུབ་ན་མི་མང་པོ་ཕན་ཐོག་ཡོང་ས་རེད་།
ཀླུ་བྱམས་གཡུ་འབྲུག་སྔོན་མོར་གཞོན་ནས། སྲིད་སྐྱོང་འོས་མི་ལས་ཐར་སོང་། སྤེན་ཚེ་ཡང་གངས་སེང་མེད་མཁན་ཅིག་ལ་གཞོན་ནས། ལས་ཀ་གསར་པ་ཅིག་འཚོལ་བཞིན་པ་རེད་འདུག བློ་སེང་རྟ་མ་རག་ན་ཡང་གཡག་ལ་གཡོན་སྲིད་སྟེགས་སུ་འཛེགས་རྒྱུར་གཏན་ཁེལ་འདུག དཔལ་དགྱེས་ལགས།
གངས་སེང་མེད་པའི་གངས་སེང་དང་།
གཡུ་འབྲུག་མེད་པའི་གཡུ་འབྲུག་དེ་།
རྗེས་ལུས་སྤྱི་ཚོགས་མངོན་འདོད་རེད་།
སྲིད་སྤྱིའི་འོས་འདྲན་སེང་འབྲུག་འདྲ་།
སྟོང་གཏམ་ཁ་དམག་སྤྱི་ཚོགས་འཐོམ་།
མཐའ་མའི་རྒྱལ་ཕམ་མི་མང་ལག་།
ཕྱོགས་གཏོགས་རྒྱང་ནས་བལྟ་མོ་བལྟ་།