འཕྲོག་བྱེད་དབང་པོ།
སྲིད་སྤྱིའི་འོས་བསྡུའི་མཚམས་རེར་སླེབས་པ་ན་བཙན་བྱོལ་བོད་མིའི་སྤྱི་ཚོགས་ཆུང་ཆུང་འདིར་རྒྱུན་ལྡན་དང་མ་འདྲ་བའི་གཡོ་འགུལ་སྣ་ཚོགས་ཐེབས་ཀྱི་ཡོད། དེ་ནི་མི་མང་ཆེ་བས་རང་ཉིད་ཀྱི་ཚོར་བའི་མགོ་གནོན་མ་ཐུབ་པར་ཁུངས་མེད་ཀྱི་གཏམ་གླེང་སྣ་ཚོགས་སྤེལ་གྱི་ཡོད་པར་མ་ཟད། སྲིད་སྐྱོང་འོས་མི་འགའ་ཤས་ཀྱིས་མང་ཚོགས་ནང་འཁྲུགས་ཐེབས་པའི་གཏམ་གླེང་སྣ་ཚོགས་སྤེལ་གྱི་ཡོད་པ་དང་འབྲེལ་བ་ཆེན་པོ་ཡོད་ངེས་སྙམ། མཐའ་ན་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་ཤོག་ཀྱང་རྫུན་བཟོ་བྱས་ཏེ་རང་གི་ཤོག་ཁག་རྒྱལ་ཐབས་ཀྱིི་ལག་ཆར་བེད་སྤྱོད་བྱེད་པའི་ཚད་དུ་སླེབས་ཡོད། ང་ཚོའི་སྤྱི་ཚོགས་ནང་བྱུང་དང་འབྱུང་བཞིན་པའི་གནས་ཚུལ་མང་པོ་ཞིག་རྒྱ་གཞུང་གི་གསང་ཉུལ་བ་དང་ཤུགས་ལྡན་ཚོགས་པ་ལ་ཁག་འགེལ་བྱེད་སྲོལ་ཡོད་པ་ལྟར། ཉེ་ལམ་དཔལ་ལྡན་སྲིད་སྐྱོང་མཆོག་གིས་གསར་འགོད་གསལ་བསྒྲགས་བསྐྱངས་པའི་སྐབས། ཉེ་ཆར་གྱི་བཀའ་ཤོག་རྫུན་བཟོ་བྱེད་མཁན་དེ་རྒྱ་ནག་གཞུང་དང་འབྲེལ་བ་ཡོད་ལུགས་གསུངས་ཡོད། བཀའ་ཤོག་རྫུན་བཟོ་བྱེད་མཁན་རྒྱ་མིའི་ཕྱོགས་ནས་ཡིན་སྲིད་པར་ཡང་རྒྱུ་མཚན་སྣ་ཚོགས་ཡོད། རྒྱུ་མཚན་གཙོ་བོ་ཞིག་ནི་ད་ལྟའི་སྲིད་སྐྱོང་འོས་མི་རྣམས་ཀྱི་ནང་ནས་ཚོགས་ཟུར་སྐུ་ངོ་སྤེན་པ་ཚེ་རིང་མཆོག་རྒྱ་མིའི་ཕྱོགས་ནས་ཉེན་ཁ་ཆེ་ཤོས་སུ་མཐོང་གི་ཡོད་ངེས། ཚོགས་ཟུར་སྐུ་ངོ་སྤེན་པ་ཚེ་རིང་མཆོག་སྲིད་སྐྱོང་དུ་བདམས་ཐོན་བྱུང་ཚེ་ཁོང་གིས་༸གོང་ས་མཆོག་གི་དགོངས་གཞི་བསྒྲུབ་རྒྱུ་ཁ་ཞེ་གཉིས་མེད་ཀྱིས་རྩ་དོན་དུ་འཛིན་ངེས་པར་མ་ཟད། ཁ་འཐོར་དགུ་འཐོར་དུ་གྱུར་ཟིན་པའི་ད་ལྟའི་བཙན་བྱོལ་བོད་མིའི་སྤྱི་ཚོགས་ཀྱི་གོང་བུའི་ནུས་པ་གཅིག་ཏུ་བསྒྲིལ་ཏེ། བོད་མིའི་སྒྲིག་འཛུགས་ཀྱི་གནས་བབ་སྲ་བརྟན་གོང་འཕེལ་དུ་གཏོང་རྒྱུ་ཡིན་པ་རྒྱ་ནག་གཞུང་གིས་ཚོད་དཔག་ཐུབ་ཀྱི་ཡོད་པར་བརྟེན། རྒྱ་ནག་ཕྱོགས་ནས་དུས་ནམ་ཡིན་ཡང་སྐུ་ངོ་སྤེན་པ་ཚེ་རིང་མཆོག་གི་ལས་དོན་ལ་ཕྱོགས་སྣ་ཚོགས་ནས་བར་གཅོད་ཀྱི་བྱ་བ་རྩོམ་རྒྱུ་ཡིན་པ་སྨོས་མ་དགོས།
ཕྱོགས་གཞན་ཞིག་ནས་བཤད་ན། ད་ལྟའི་སྲིད་སྐྱོང་གི་ལས་མཇུག་སྐྱོང་མཁན་གྱི་མི་ཞིག་མ་འོངས་པའི་སྲིད་སྐྱོང་དུ་བདམས་ཐོན་བྱུང་ཚེ། བཙན་བྱོལ་བོད་མིའི་སྤྱི་ཚོགས་མུ་མཐུད་འཐོར་ཞིག་དང་ནུས་མེད་དུ་ཕྱིན་ཏེ། ལོ་ཡུན་རིང་པོར་མི་འགོ་བར་རྒྱ་ནག་གཞུང་གི་བོད་ཐོག་ལ་བཟུང་བའི་སྲིད་བྱུས་ཡོངས་རྫོགས་བདེ་བླག་ངང་འགྲུབ་རྒྱུ་ཡིན་པ་ཁོ་ཚོས་གསལ་པོར་རྟོགས་ཀྱི་ཡོད། རྒྱུ་མཚན་དེ་ལ་བརྟེན་ནས་ཁོ་ཚོས་ད་ལྟའི་སྲིད་སྐྱོང་འོས་མི་རྣམས་ཀྱི་ནང་ནས་སྐལ་རྡོར་ལགས་ད་ལྟའི་སྲིད་སྐྱོང་མཆོག་གི་ལས་མཇུག་སྐྱོང་ཞིག་ཡོང་རྒྱུ་ཡིན་པ་ཚོད་དཔག་བྱེད་ཀྱི་ཡོད་སྟབས། བཀའ་ཤོག་རྫུན་མ་འདི་ལ་བརྟེན་ནས་སྐལ་རྡོར་ལ་འོས་ཤོག་ཐོབ་རྒྱུར་རྒྱ་ནག་གཞུང་གིས་རྒྱབ་སྐྱོར་བྱས་པ་ཡིན་སྲིད།
གནས་ཚུལ་གཞན་པ་ཞིག་གི་ཐོག་ནས་བལྟས་ན་ད་ལྟའི་སྲིད་སྐྱོང་གི་འོས་མི་སྐལ་རྡོར་ལགས་ཀྱི་ཕྱོགས་ནས་བཀའ་ཤོག་རྫུན་བཟོས་བྱས་པ་ཡིན་མི་སྲིད་པ་ཡང་མིན། གང་ཡིན་ཟེར་ན་ཚོགས་ཟུར་སྐུ་ངོ་སྤེན་པ་ཚེ་རིང་མཆོག་ཤེས་ཡོན་དང། འཇོན་ཐང། ལྷག་བསམ། ཉམས་མྱོང། དྲང་ཚུགས། བློ་སྤོབས། ཆོད་སེམས་གང་ཅིའི་ཐད་ནས་བཙན་བྱོལ་བོད་མིའི་སྤྱི་ཚོགས་ནང་བརྩི་མཐོང་ཆེན་པོ་ཞུ་སའི་མི་སྣ་གཙོ་གྲས་ཤིག་ཏུ་གྱུར་ཡོད་པར་མ་ཟད། ལྷག་པར་དུ་བར་ལམ་ཁ་མཆུ་ཨང་ཉི་ཤུ་པའི་བརྒྱུད་རིམ་ནས་སྐུ་ངོ་སྤེན་པ་ལགས་མི་བབ་བརླིང་བརྟན་གསུམ་ལྡན་པ་ཞིག་དང། ཁྲིམས་དང་སྒྲིག་གཞི་རྩ་བར་བཟུང་ནས་གནས་ལུགས་ཀྱི་བདེན་པ་བརྡར་མཁན་ཞིག་ཡིན་པ་ལག་ལེན་གྱི་ཐོག་ནས་ཡོངས་གྲགས་སུ་གྱུར་ཏེ། ད་ལྟའི་སྲིད་སྐྱོང་འོས་མི་གཞན་དག་ལས་ཀྱང་སྐུ་ངོ་སྤེན་པ་ཚེ་རིང་མཆོག་བཙན་བྱོལ་བོད་མིའི་སྤྱི་ཚོགས་ནང་གཟི་བརྗིད་དང་ཆེ་མཐོང་ལྡན་པ་ཞིག་ཏུ་གྱུར་ཡོད་སྟབས། སྐལ་རྡོར་ལགས་སྲིད་སྐྱོང་ཐོབ་རྒྱུར་ཚོགས་ཟུར་སྐུ་ངོ་སྤེན་པ་ཚེ་རིང་མཆོག་འགོག་རྐྱེན་གཙོ་བོ་ཞིག་ཏུ་གྱུར་ཡོད་པ་ཁོ་ཚོས་ཤེས་ཀྱི་ཡོད། དེར་བརྟེན་ཁོ་ཚོས་༸གོང་ས་མཆོག་གི་མཚན་གནས་དང་བཀའ་ཤོག་རྫུན་མ་བེད་སྤྱོད་བྱས་ཏེ་མང་ཚོགས་ཀྱི་བསམ་བློའི་ནང་སྐུ་ངོ་སྤེན་པ་ཚེ་རིང་མཆོག་ནག་པོ་བཟོ་ཐབས་བྱས་པ་ཡང་ཡིན་སྲིད། བྱེད་ཐབས་འདི་ནི་རང་ཉིད་ནུས་པ་དང་སྟོབས་ཤུགས་ཉམས་པའི་འུ་ཐུག་ཐབས་ཟད་ཀྱི་བྱེད་ཐབས་སྡུག་ཤོས་ཤིག་ཡིན་ཡང། སྔོན་མ་རྒྱལ་ཁ་ཐོབ་མྱོང་བའི་ཐབས་ལམ་དེ་དག་བསྐྱར་དུ་བེད་སྤྱོད་བྱ་རྒྱུར་ཁོ་ཚོ་ངན་ལང་ཤོར་ཡོད་སྟབས། ད་དུང་ཡང་བྱ་སྤྱོད་ངན་པ་འདི་རིགས་བེད་སྤྱོད་གཏོང་ངེས་ཡིན་པར་ཐེ་ཚོམ་མེད་པ་ལྟ་བུ་ཡིན། གང་ལྟར་ཡང་བཀའ་ཤོག་འདི་སུ་ཞིག་གིས་རྫུན་བཟོ་བྱས་པ་ཡིན་མིན་བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་དང། དབུས་འོས་བསྡུ་ལྷན་ཁང་སོགས་འབྲེལ་ཡོད་ཁག་ནས་རྩད་གཅོད་མཐིལ་ཕྱིན་པར་གནང་སྟེ་མང་ཚོགས་ལ་ངོ་ར་འཕྲོད་པ་ཞིག་ངེས་པར་གནང་དགོས།
ད་ལྟའི་སྲིད་སྐྱོང་གི་འོས་མི་འགའ་ཤས་ཡོད་པ་སོ་སོར་ཁྱད་ཆོས་མ་འདྲ་བ་རེ་ཡོད་ངེས་པས་སུ་ལ་ཡང་སྐྱོན་བརྗོད་བྱེད་འདོད་མེད། འོན་ཀྱང་ང་ཚོའི་ཆབ་སྲིད་ནི་ལས་འབྲས་དང་བདེན་པ་གཞི་རྩར་བཞག་པ་ཞིག་ངེས་པར་ཡིན་དགོས་པས། སྲིད་སྐྱོང་འོས་མི་རྣམས་ཀྱིས་ལས་འབྲས་དང་བདེན་པ་གཞི་ལ་བཞག་སྟེ་རང་ཉིད་ཀྱི་ལངས་ཕྱོགས་དང་འཆར་གཞི་དྲིལ་བསྒྲགས་གནང་དགོས་པ་མ་གཏོགས། དེ་སྔའི་འོས་མི་འགའ་ཤས་ཀྱི་གནང་ཕྱོགས་ལྟར་རང་ཉིད་ལ་རྒྱལ་ཁབ་ཐོབ་ཐབས་ཁོ་ནའི་དོན་དུ་ཡ་ང་བག་ཚ་མེད་པར་མང་ཚོགས་ལ་སྐྱག་རྫུན་བཤད་པ་དང། མགོ་སྐོར་གཏོང་བ། རང་ཉིད་དང་ལྟ་ཕྱོགས་མི་མཐུན་པའི་རིགས་ལ་མཐོང་ཆུང་དང་དམའ་འབེབས་ཀྱི་རིགས་བྱས་ན། མང་ཚོགས་ཀྱིས་ཀྱང་ཁྱོད་ལ་དེ་དང་མཐུན་པའི་རྣམ་འགྱུར་ཞིག་མི་བསྟན་ཐུ་མེད་ཡིན་པ་ངེས་པར་མཁྱེན་དགོས།
དཔེར་ན། སྲིད་སྐྱོང་འོས་མི་སྐལ་རྡོར་ལགས་ཀྱིས་ཉེ་ཆར་དྲིལ་བསྒྲགས་ཀྱི་གཏམ་བཤད་གནང་བའི་སྐབས། དོན་གཅོད་ནང་གི་སྐུ་པར་སྐོར་དེ་སྔ་གྲོས་ཚོགས་ནང་བྱུང་བའི་གནད་དོན་གསལ་བཤད་གནང་སྐབས། གནད་དོན་དེ་སྐར་རྟགས་ཅན་གྱི་དྲི་བའི་ངོ་བོའི་ཐོག་ནས་བྱུང་བའི་དངོས་དོན་སྦས་ཏེ་འཐུས་མི་ཞིག་གི་དགོངས་འཆར་གྱི་ངོ་བོའི་ཐོག་ནས་བྱུང་ལུགས་ཀྱི་སྐྱག་རྫུན་བཤད། གྲོས་ཚོགས་གསར་ཤོག་གངས་སྐྱིད་དུ་ལྟ་ཆོག་ཆོག་ཡོད་བཞིན་དུ་འདི་ལྟར་མགོ་མཇུག་མི་མཚུངས་པའི་སྐྱག་རྫུན་སྣ་ཚོགས་གསུང་ཕོད་ན། མང་ཚོགས་ཀྱིས་མཐོང་མི་ཐུབ་པའི་གནས་ཚུལ་གནས་ཚུལ་གཞན་དག་གི་ཐོག་སྐྱག་རྫུན་ཅི་ཙམ་བཤད་དང་ཤོད་རྒྱུ་ཡིན་པ་ང་ཚོས་ཚོད་དཔག་ལས་སླ་པོས་བྱེད་ཐུབ།
དེ་ལས་ཀྱང་ཡ་མཚར་བ་ཞིག་ནི་ང་བོད་མིའི་ཆབ་སྲིད་ཀྱི་དབུ་ཁྲིད་བྱེད་ཀྱི་ཡིན་ཟེར་མཁན་ཞིག་གིས། བུད་མེད་བགྲེས་སོང་ལྷག་བསམ་ཅན་ཞིག་གི་སྐད་ཆའི་ཟུག་ངར་མ་བཟོད་པར། དགུང་ལོ་དགུ་བཅུ་ཟིན་ལ་ཉེ་བ་ཞིག་གིས་བོད་སྤྱི་པའི་རྩ་དོན་ལ་ཐུགས་འགན་བཞེས་ནས་གསུང་མོལ་གནང་བར་ཐུགས་རྗེ་ཆེ་ཞུ་རྒྱུའི་ཚབ་ཏུ། བགྲེས་སོང་ལོ་དགུ་བཅུ་ཟིན་ལ་ཉེ་བ་ཞིག་གིས་མཎི་བགྲངས་ནས་མི་འདུག་པར་ཆབ་སྲིད་ཀྱི་ལས་དོན་ནང་ཇུས་གཏོགས་བྱས་ན་མ་འགྲིག་པ་རེད་མདོག་མདོག་གིས་མཐོང་ཆུང་དང་དམའ་འབེབས་བྱས། བུད་མེད་བགྲེས་སོང་ལོ་དགུ་བཅུ་ཟིན་ལ་ཉེ་བ་ཡིན་ན་བོད་ཀྱི་འོས་བསྡུའི་ལས་རིམ་དང་འབྲེལ་ནས་རང་གི་འོས་མི་ལ་རྒྱབ་སྐྱོར་བྱེད་པའི་ཐོབ་ཐང་མ་ཡོད་པ་རེད་དམ། མོས་སྲིད་སྐྱོང་གི་འོས་བབ་མེད་པར་མཐོང་བའི་མི་དེའི་སྐྱོན་མཚང་གླེང་མ་ཆོག་པ་རེད་དམ། མོས་རང་གི་འགན་འཁྲི་དང་དུ་བླངས་ནས་དགོངས་འཆར་གསུངས་པ་འདི་ཁྲིམས་དང་སྒྲིག་གང་གི་དགོངས་དོན་དང་འགལ་ཡོད། གནང་སྟངས་འདིའི་ཐོག་ནས་སྐལ་རྡོར་ནི་ཁོ་རང་ལ་རྒྱབ་སྐྱོར་དང་རྩམ་པ་གཏོར་མཁན་གྱི་རིགས་མ་གཏོགས། གཞན་དག་ལ་སྡང་སེམས་འཛིན་མཁན་ཞིག་ཡིན་པ་གསལ་པོར་གྱུར་ཡོད། འདི་འདྲའི་མི་ཞིག་ལ་བོད་ཀྱི་སྲིད་སྐྱོང་གནང་བའི་འོས་བབ་དང་ཁོག་རྒྱ་འདུག་པ་མཐོང་གི་འདུག་གམ།
ཐེངས་སྔོན་མ་མི་མང་པོ་ཞིག་སྲིད་སྐྱོང་འོས་མིའི་དྲིལ་བསྒྲགས་ཀྱི་མགོ་སྐོར་འོག་ཏུ་ཚུད་པའི་ཉམས་མྱོང་གི་དྲོད་རླངས་མ་ཡལ་བའི་སྐབས་འདིར། བསྐྱར་དུ་སྲིད་སྐྱོང་གི་འོས་མིའི་དྲིལ་བསྒྲགས་ཀྱི་གཡོ་འོག་ཏུ་མ་ཚུད་པར་བྱས་ཏེ་ངེས་པར་སྤྱང་གྲུང་འཛོམས་པ་བྱ་དགོས། ང་ཚོ་བསྐྱར་དུ་དྲིལ་བསྒྲགས་ཀྱི་གཡོ་འོག་ཏུ་ཚུད་པའམ་ལུང་ཚན་གྱི་ཕྱོགས་འཐེན་དབང་དུ་ཕྱིན་ཏེ། སླར་ཡང་སྲིད་སྐྱོང་བདམས་ནོར་ཤོར་ན་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་མི་རབས་རྒན་པ་རྣམས་ཀྱིས་སྐུ་ངལ་ཚད་མེད་ཀྱིས་བསྐྱངས་པའི་བཙན་བྱོལ་བོད་མིའི་སྒྲིག་འཛུགས་འདིའི་ལོ་རྒྱུས་ཀྱི་མཇུག་སྒྲིལ་རྒྱུར་དུས་ཡུན་རིང་པོ་མི་དགོས་པ་ཐག་གཅོད་ཡིན།
ད་ལྟའི་སྲིད་སྐྱོང་འོས་འདེམས་ཀྱི་ལས་རིམ་འདི་མི་སུ་ཞིག་སྲིད་སྐྱོང་དུ་བདམ་མིན་གྱི་གནད་དོན་རྐྱང་པ་ཞིག་གཏན་ནས་མིན། འདི་ནི་ཁ་འཐོར་ནུས་མེད་དུ་འགྲོ་བཞིན་པའི་བོད་མིའི་སྒྲིག་འཛུགས་ཀྱི་ལས་དབང་དང་འབྲེལ་བ་གཏིང་ཟབ་ཡོད་པ་ཞིག་ཡིན་ལ། ཆོལ་ཁ་དང་ཆོས་བརྒྱུད་ཡོངས་རྫོགས་ཀྱི་གོང་བུའི་ནུས་པ་གཅིག་ཏུ་བསྒྲིལ་ཐུབ་མིན་གྱི་འགག་རྩ་ལ་ཐུག་པ་ཞིག་ཡིན་པས། ཁ་ཞེ་གཉིས་མེད་ཀྱིས་༸གོང་ས་མཆོག་གི་དགོངས་པ་རྩ་དོན་དུ་འཛིན་ཐུབ་མཁན་གྱི་དམ་ཚིག་ལྡན་པ་ཞིག་དང། བོད་མིའི་སྒྲིག་འཛུགས་ཀྱི་གནས་བབ་བརྟན་བརླིང་བབ་གསུམ་གྱི་སྒོ་ནས་རྒྱུན་འཛིན་གོང་འཕེལ་གཏོང་ཐུབ་མཁན་གྱི་ཤེས་འཇོན་དང། ལྷག་བསམ། ཐུགས་མྱོང་ལྡན་པ་ཞིག།བོད་ཀྱི་རྩ་དོན་གྱི་ཆེད་དུ་རང་ཉིད་བློས་གཏོང་ཐུབ་པའི་ཆོད་སེམས་དང་དམ་བཅའ་བརྟན་པོ་ལྡན་མཁན་ཞིག།བོད་ཀྱི་ཆོལ་ཁ་དང་ཆོས་བརྒྱུད་ཡོངས་རྫོགས་མཉམ་དུ་ཁྲིད་ཐུབ་པའི་བློ་སྤོབས་དང་འཆར་གཞི་ལྡན་པ་ཞིག་ངེས་པར་འདེམས་ཐབས་བྱ་དགོས་པ་ནི། འོས་འདེམས་ཀྱི་ཐོབ་ཐང་ཡོད་པའི་བཙན་བྱོལ་བོད་མི་ཡོངས་རྫོགས་ལ་གཅིག་མཚུངས་ཀྱིས་འགན་འཁྲི་ཡོད་པས། ད་ཐེངས་ང་ཚོས་འདེམས་ཕྱོགས་གཏན་ནས་མ་ནོར་བར་བྱ་དགོས་པ་ནི། ལོ་རྒྱུས་ཀྱིས་ང་ཚོའི་མི་རབས་འདི་ལ་སྤྲད་པའི་འགན་འཁྲི་ཆེ་ཤོས་ཤིག་ཡིན།
བཀླགས་ཟིན། དབྱེ་ཞིབ་དང་བསླབ་བྱ་གཉིས་ལྡན་རེད་འདུག
ཆོལ་ཁ་དང་ཆོས་བརྒྱུད་ཡོངས་རྫོགས་ཀྱི་གོང་བུའི་ནུས་པ་གཅིག་ཏུ་བསྒྲིལ་ཐུབ་མིན་གྱི་འགག་རྩ་ལ་ཐུག་པ་ཞིག་ཡིན་པས། ཁ་ཞེ་གཉིས་མེད་ཀྱིས་༸གོང་ས་མཆོག་གི་དགོངས་པ་རྩ་དོན་དུ་འཛིན་ཐུབ་མཁན་གྱི་དམ་ཚིག་ལྡན་པ་ཞིག་དང། བོད་མིའི་སྒྲིག་འཛུགས་ཀྱི་གནས་བབ་བརྟན་བརླིང་བབ་གསུམ་གྱི་སྒོ་ནས་རྒྱུན་འཛིན་གོང་འཕེལ་གཏོང་ཐུབ་མཁན་གྱི་ཤེས་འཇོན་དང། ལྷག་བསམ། ཐུགས་མྱོང་ལྡན་པ་ཞིག།བོད་ཀྱི་རྩ་དོན་གྱི་ཆེད་དུ་རང་ཉིད་བློས་གཏོང་ཐུབ་པའི་ཆོད་སེམས་དང་དམ་བཅའ་བརྟན་པོ་ལྡན་མཁན་ཞིག། ཅེས་སྲིད་སྐྱོང་གི་ཡོན་ཏན་ནམ་ཚང་དགོས་པའི་དཔལ་ཡིན་འདུག་པ་ངོས་ལེན་ཞུས་ནས་ད་ཡོད་སྲིད་སྐྱོང་འོས་མིའི་ཁོངས་ཆ་རྐྱེན་དེ་དག་ལྡན་པ་ཞུས་ནའང་མ་འཐུས་པ་མེད་པ་གཉིས་འདུག་པ་ནི་བཀའ་ཟུར་འབྲོང་ཆུང་ལགས་དང་བཀའ་ཟུར་རྒྱ་རི་སྒྲོལ་མ་ལགས་ཡིན་འདུག
ང་ནི་ཕལ་ཆེར་རྒྱ་རི་སྒྲོལ་མ་ལགས་སུ་འོས་ཆེ། ཁོང་ལ་སྐབས་བབ་ཀྱི་སྲིད་བྱུས་དང་འཛིན་སྐྱོང་གི་འཆར་སྣང་སོགས་འདུག་ལ་དམ་ཚིད་ལྡན་མཁན་ཞིག་ཀྱང་ཡིན་ངེས།