གལ་ཆེའི་གནད་དོན་གསུམ།

སྐྱོ་བྲག་དགའ་དབང་།

དིང་གི་དུས་སུ་སྔར་བོད་ཡུལ་ལ་བྱུང་མྱོང་མེད་པའི་དཀའ་ངལ་ཆེན་པོ་འཕྲད་ཀྱིན་ཡོད་པའི་གནས་སྟངས་ལ་བརྟེན་ནས། བོད་པ་རྣམས་སྲོག་བློས་གཏོང་གིས་ས་མཚམས་བརྒལ་ཏེ་རྒྱ་བལ་དུ་འབྱོར་བ་ནའང་ཁ་སོས་ནམ་ལངས་ཤིག་མ་བྱུང་བས། ཡར་རྒྱས་སུ་ཕྱིན་པ་ནུབ་ཕྱོགས་པའི་རྒྱལ་ཁབ་རྣམས་སུ་ཐབས་ཤེས་ཡོད་དགུ་རྩལ་སྤྲུགས་ཀྱིས་སྐྱབས་བཅོལ་ཞུ་ལ་བསྐྱོད་ཀྱི་ཡོད་པ་བཞིན། ངའི་སྤུན་ཟླ་ཡང་གཉན་འཕྲང་མང་པོ་བརྒྱུད་ནས་སོང་བ་རེད། ཕར་བསླེབས་པ་ན་འཇིགས་དངངས་ཆེ་ཤོས་ནི་སྐྱབས་བཅོལ་ཐོབ་མིན་ཡིན་ཞིང་། སྐྱབས་བཅོལ་ཐོབ་མིན་ནི་དྲི་བའི་ལན་ལ་རག་ལས་པ་ཡིན་ཕྱིར། ངས་ཁོ་ལ་ལམ་སྟོན་འདི་ལྟར་བྱས་པ་ཡིན།

ཐེངས་འདིའི་དྲི་བ་ནི་ཁྱོད་ཀྱི་མི་ཚེའི་འདུན་ལམ་ལེགས་ཉེས་གང་དུ་སྒྱུར་བའི་འགག་རྩ་ཡིན་པས་ན་ཤིན་ཏུ་གལ་ཆེ། གལ་ཆེ་བ་དེ་ལམ་ལྷོང་ཡོང་བར་བྱེད་པ་ལ་ཤེས་དགོས་པའི་གནད་དོན་གསུམ་ཡོད།

༡༽ སྐྲག་སྣང་མེད་པའི་སྤོབས་པ་ཡོད་ན་དྲི་བ་ཉན་པ་དང་ལན་འདེབས་པ་མ་ནོར་བ་ཡོང་གི་རེད། བྱ་བ་ལམ་ལྷོང་ཡོང་ཆེད་དུ་ཁྱོད་ཀྱིས་རྒྱུན་གཏན་སྒྲོལ་མར་གསོལ་བ་བཏབ་པ་བཞིན་སྒྲོལ་མའི་ཕྲིན་ལས་ཀྱིས་སྐྱོང་ངེས་ཤིང་། ནང་མིས་ཀྱང་རིམ་གྲོ་གང་མང་བྱས་ཡོད་ལ། ངས་ཀྱང་རིན་པོ་ཆེར་ཐུགས་སྨོན་གཟབ་ནན་ཞུས་པ་མ་ཚད། ཁོས་ཀྱང་རྒྱལ་དབང་མཆོག་ལ་སྐྱབས་འཇུག་ཞུས་ཡོད་པ་བཞིན་དགེ་བའི་རྒྱབ་དཔུང་ཡོད་པས་ན་སེམས་ཁྲལ་དང་དངངས་སྐྲག་དགོས་པ་མེད་པས་སྤོབས་པ་སྐྱེད་ཅིག །

༢༽ རང་ཚིག་མི་འགལ་བའི་བདེན་པ་སྟེ། སྔར་ཞུ་ཡིག་ཕུལ་བ་ལ་རྩ་འཛིན་གྱིས་སྐད་ཆ་སྔ་ཕྱི་འགལ་བ་ཡོད་མེད་བལྟས་ནས་སྐྱབས་བཅོལ་སྤྲད་མིན་ཐག་གཅོད་བྱེད་ངེས་པས་ན་རང་དང་འབྲེལ་བའི་སྔ་ཕྱིའི་གནས་ཚུལ་ཡོད་དོ་ཅོག་ལ་བསམ་གཞིག་བསྐྱར་ནན་གྱིས་བཤད་བྱའི་དོན་དག་གྲ་སྒྲིག་ཡག་པོ་བྱས་ཏེ་རང་ཚིག་སྔ་ཕྱི་འགལ་བ་མེད་པ་ཞིག་བྱ་དགོས་པ་ཡིན།

༣༽ བོད་རང་གི་གོམས་གཤིས་རྣམ་འགྱུར་སྟོན་པ་སྟེ། གོ་ཐོས་ལྟར་ན། གོམས་གཤིས་དང་རྣམ་འགྱུར་མི་འདྲ་བའི་ཁྱད་པར་གྱིས་གཞིས་ཆགས་དང་གསར་འབྱོར་སོ་སོར་ཕྱེ་ཡི་ཡོད་སྐད་པས། ཕ་ཡུལ་གྱི་སྐད་གདངས་དང་ལུས་ཀྱི་རྣམ་འགྱུར་ཇི་མ་ཇི་བཞིན་བསྟན་ཐོག་རང་ཡུལ་ནས་དཀའ་ངལ་འཕྲད་པའི་སྐྱོ་ཉམས་དང་སྐད་གཤིས་ཀྱང་ཡོད་པར་བྱས་པས་དྲི་བ་འདྲི་མཁན་གྱི་སེམས་ཁམས་ལ་དགའ་སྐྱོའི་ཚོར་བ་སྐྱེད་ཐུབ་པ་ཞིག་བྱ་དགོས། ད་དུང་བོད་ནས་ཡིན་པའི་ཁུངས་སྐྱེལ་ཆེད་པར་དང་ཡིག་ཆ་སོགས་གང་ཡོད་ཀྱང་འབུལ་དགོས་པ་ཡིན།

གནད་དོན་འདི་གསུམ་ལྷོད་གཡེང་དུ་མ་བཏང་ན་ཁྱོད་ཀྱི་བསམ་དོན་འགྲུབ་ངེས་པ་ཡིན་པས་ན་སེམས་དགའ་བར་གྱིས་ཤིག །
ངའི་ལམ་སྟོན་ལྟར་སྤུན་ཟླས་ཀྱང་བྱས་པས་སྐྱབས་བཅོལ་ཚེགས་མེད་ཐོབ་ཤག །བོད་རིགས་སྤུན་ཟླ་གཞན་པ་སྐྱབས་བཅོལ་ཞུ་མཁན་དག་གིས་ཀྱང་གནད་འགག་ཕྲན་བུ་རེ་ཤེས་མ་ཤེས་ཀྱིས་ཀྱང་ཕན་གནོད་ཆེན་པོ་བྱེད་ངེས་པས་ན་ལམ་སྟོན་འདིའང་ཁྱབ་སྤེལ་ཞུས་པ་ཡིན་ནོ། །