དབྱིན་ཡུལ་བོད་སྐད་ལྷན་ཚོགས།
ས་ཆ་མི་འདྲ་བའི་བཀུར་འོས་དགེ་སློབ་མང་བོས་མཉམ་དུ་༼ཨ་ཁུ་སྟོན་པ་རྟགས་ཅན་གྱི་སློབ་སྦྱོང་འཕྲུལ་ཆས༽ གསར་བ་ཞིག་མགྱོགས་པོར་བོད་ཕྱི་ནང་ཀུན་ལ་དགྲམ་རྒྱུ་ཡིན་པས་རྣམ་པ་ཚོས་མཁྱེན་རྟོགས་མཛོད།
སྤྱིར་ན་འཕྲུལ་ཆས་ལག་དེབ་དེ་ལ་དགོན་སྡེའི་རིག་གནས་དང་སློབ་གྲྭའི་རིག་གནས། སྤྱི་ཚོགས་རིག་གནས་བཅས་སྐོར་གསུམ་དུ་ཕྱེས་ཡོད།
འདིར་འཕྲུལ་ཆས་གསུམ་པོ་སོ་སོའི་སྐོར་མདོ་ཙམ་བཤད་ན། འཕྲུལ་ཆས་དང་བོའི་ནང་དུ། བོད་ཀྱི་སྔོན་བྱོན་མཁས་དབང་བརྒྱ་ཕྲག་ལྷག་གིས་བརྩམས་པའི་གསུང་རྩོམ་པོ་ཏི་ཁྲི་སྐོར་ཅིག་ཡོད་པར་མ་ཟད། ད་དུང་རང་རེའི་ཆོས་བརྒྱུད་ཆེན་པོའི་གྲུབ་མཐའ་ལ་ཁག་བརྒྱད་བྱས་ཏེ་དེ་དག་གི་སྲོལ་འབྱེད་མཁན་པོ་ཚོའི་རང་རང་གི་ལྟ་བ་དང་གྲུབ་མཐའ་བསྡུས་ཡོད།
འདིར་དམིགས་བསལ་ཞིག་ལ། སྔོན་གྱི་ཡིག་རྙིང་ཀུན་ལ་བཟོ་བཅོས་གང་ཡང་མ་བགྱིས་པར་རང་འཇགས་བཀོད་ཡོད་ལ་གཞན་གྲུབ་མཐའ་རང་རང་གི་ལྟ་གྲུབ་སྐོར་ལ་དྲི་བ་དྲིས་ལན་གྱི་སྒོ་ནས་གང་ཐུབ་ཐུབ་ཀྱིས་འགྲེལ་བཤད་གསལ་བོར་གནང་ཡོད།
གཉིས་པ། འཕྲུལ་ཆས་ལག་དེབ་གཉིས་པའི་ནང་ལ་སློབ་གྲྭའི་རིག་གནས་སྐོར་དེ་རེད། སློབ་ཆུང་སློབ་འབྲིང་མཐོ་འབྲིང་གསུམ་པོའི་སློབ་དེབ་གཞིར་བཟུང་སྟེ་གོ་དཀའ་བ་དག་ལ་འགྲེལ་བརྗོད་དང་ད་དུང་བརྡ་གསར་རྙིང་གང་མང་ཞིག་འདིར་ལྷན་ཐབས་ཀྱི་ཚུལ་དུ་བཀོད་ཡོད།
འདིར་དམིགས་བསལ་ཞིག་ནི། འདི་དག་ཚང་མ་བོད་ཡིག་དང་དབྱིན་ཡིག་རྒྱ་ཡིག་གསུམ་པོ་ཕན་ཚུན་རྟེན་དང་བརྟེན་པའི་སྒོ་ནས་འགྲེལ་བཤད་ཁ་གསལ་ཡོད་པ་དེའོ།།
གསུམ་པ། སྤྱི་ཚོགས་རིག་གནས་སྐོར་རེད། འདིའི་ནང་དུ་དམིགས་བསལ་ཧ་ཅང་མང་བོ་ཡོད། དཔེར་ན། གློག་བརྙན་རིག་གནས་སོགས་ཏེ་རིག་གནས་གསར་བ་༡༥ ལྷག་ཅིག་བོད་ཡིག་ཐོག་ནས་ཡོད་པ་རེད། “ཨ་ཁུ་སྟོན་པ་རྟགས་ཅན་གྱི་འཕྲུལ་ཆས་འདིས” གངས་རིའི་ལྗོངས་སུ་སྔོན་མེད་ལེགས་སྐྱེས་གསར་བ་ཞིག་འདི་ལྟར་ང་ཚོར་གསར་གཏོད་གནང་བར་བཀའ་དྲིན་ཤིན་ཏུ་ཆེའོ།།
ཟུར་ཞུ་དགོན་སྡེའི་འཕྲུལ་ཆས་ལག་དེབ་དེ་ནི་སྤྱི་ཟླ་༩ / ༡༠ གང་རུང་ལ་དངོས་སུ་དགྲམ་རྒྱུ་ཡིན་པས་འབྲེལ་བ་གནང་རོགས། uktlsyonten@yahoo.com
ཞེས་དབྱིན་ཡུལ་བོད་སྐད་ལྷན་ཚོགས་ཀྱིས་༢༠༡༥/༨/ ༥ ཕུལ།
ཁྱེད་རྣམས་ལ་ཐུགས་རྗེ་ཆེ་ཞུ་གི་ཡོད།
ཁོང་ཚོས་བཟོས་པ་དེ་བེད་སྤྱོད་ཡོད་པ་ཞིག་ཡིན་པའི་རེ་བ་ཡོད། སྨོན་ལམ་ལགས་ཀྱིས་བོད་ཡིག་ཡིག་གཟུགས་ལྟ་བུ་ཡིན་ན་ཕལ་ཆེ་བས་ང་ལ་ནི་ཕན་ཐོགས་ཆེན་པོ་བྱུང་མ་སོང་། གློག་ཀླད་དུ་བཅུག་དུས་མཉེན་ཆས་འགག་པ་སོགས་ཀྱི་སྐྱོན་ཡང་མང་པོ་ལྷགས་སོང་། འོན་ཀྱང་ཁོང་གི་ངལ་བ་ཁྱད་བསད་ཀྱི་སྙིངས་སྟོབས་ལ་རྗེས་སུ་ཡི་རང་ཞུ་བཞིན་ཡོད།