[སུ་ཇཱ]མགར་ཐར་མཁྱེན་རབ་འོད་གསལ་གྱིས།
དུས་ཚོད་ནི་བར་མེད་དུ་བཞུར་བའི་རྒྱུག་ཆུ་ཞིག་དང་ཀུན་ནས་མཚུངས་པར་མདུན་ནས་མདུན་དུ་བརྒྱུག་པས། ད་ནི་འུ་གཉིས་དགའ་གྲོགས་ཆགས་ཏེ་ཡུན་རིང་སོང་བ་མ་ཟད་ཁ་འཐོར་ནས་ཀྱང་ཟླ་བ་གཅིག་ཕྱིན་ཟིན། ཡིན་ནའང་། བདག་སེམས་ཀྱི་མེ་ལོང་ངོས་སུ་ད་དུང་གསལ་གྱི་ལེར་དྲན་འོང་བ་ནི་འུ་གཉིས་ཀྱིས་བསྐྱལ་བའི་མཛེས་སྡུག་གི་ནམ་ཟླ་རིང་མོ་རེད། སྔར་སོང་གི་དུས་ཚོད་ནང་ཁྱེད་རང་ངའི་སེམས་ཀྱི་སྤང་ལྗོངས་སྟེང་དུ་བཞད་པའི་མེ་ཏོག་རྐང་གཅིག་དེ་ཆགས་མྱོང་ཡོད་ལ་ངའང་ཁྱེད་སེམས་ཀྱི་སྡོང་པོའི་སྟེང་དུ་སྐྱེས་པའི་ཤིང་ཏོག་སྣ་གཅིག་དེ་ཆགས་མྱོང་ཡོད། འོན་ཀྱང་། འུ་གཉིས་བར་ཀྱི་བརྩེ་དུང་གི་ཞིང་ས་དྲོན་མོ་དེ་གཞན་གྱིས་དམག་འཐབ་བྱེད་སའི་གཡུལ་ས་རུ་བསྒྱུར་ཏེ་ཡུན་རིང་ངང་སྒུག་བྱེད་པའི་བརྩེ་དུང་གི་སྨྱུ་གུ་འབུས་མ་ཐུབ་པ་ནི་བསམ་བློ་ཇི་ཙམ་བཏང་ཡང་སྐྱོ་སེམས་འཕེལ་བའི་གཞི་མ་ཞིག་རེད།
རེད་དེ་གལ་སྲིད་འུ་གཉིས་བར་ལ་ད་དུང་བརྩེ་བ་ཟེར་བ་ཞིག་ཡོད་ན། ངས་སྔར་བཞིན་ཁྱེད་སེམས་ཀྱི་མེ་ཏོག་འཁྲིས་སུ་འཁོར་བའི་གཡུ་སྦྲང་གཞོན་ནུ་དེ་བྱེད་ཆོག་ལ་ཁྱེད་ཀྱང་སྔར་བཞིན་ངའི་སེམས་ཀྱི་ཟླ་བའི་ངོས་ཡང་ཡང་འཆར་བའི་ཟླ་བའི་ལྷ་མོ་དེ་བྱེད་ཆོག གལ་སྲིད་འུ་གཉིས་བར་ལ་ད་རུང་དུང་བ་ཟེར་བ་ཞིག་ཡོད་ན། ང་ཁྱེད་ཀྱི་ཞེན་པ་ལོག་སའི་བུ་ཕོ་མདོག་ངན་དེ་ཡིན་མི་སྲིད་ལ་ཁྱེད་ཀྱང་ངའི་རྣམ་རྟོག་ཟ་སའི་བུ་མོ་མདོག་ངན་དེ་དེ་བས་ཡིན་མི་སྲིད། གལ་སྲིད་ཁ་རྩང་ངས་ཞེ་སེམས་འཁྲེགས་པོ་ཡོད་མདོག་མདོག་གིས་ཁྱེད་ཀྱི་ཞུ་བ་དེ་ཁས་བླངས་མེད་ཚེ། གལ་སྲིད་ཉིན་དེར་ཁྱེད་ཀྱིས་ཨུ་ཚུགས་ཚ་པོ་དེ་འདྲ་བྱས་མེད་ཚེ། དེ་རིང་འུ་གཉིས་ད་དུང་སྔར་བཞིན་གཅིག་སེམས་གཅིག་ལ་ཆགས་པའི་དགའ་རོགས་ཟུང་ཞིག་ཡིན་ངེས་པ་དང་གནམ་འོག་གི་འཇིག་རྟེན་འདི་ཡང་ད་རུང་འུ་གཉིས་ཁོ་ནར་དབང་ངེས།
འོན་ཀྱང་ད་ཆ་འུ་གཉིས་བར་གྱི་བརྩེ་དུང་གི་ཞིང་ས་ལ་གཞན་གྱིས་ཁང་བཟང་བཞེངས་པའི་ཀ་བ་བཙུགས་ཟིན། འུ་གཉིས་བར་གྱི་བརྩེ་དུང་གི་སྡོང་པོ་ལ་གཞན་གྱིས་རྣོ་ངར་ལྡན་པའི་སྟ་རེ་ཕྱར་ཟིན་པས། འུ་གཉིས་ཁོ་ནར་དབང་བའི་ཡོད་ཚད་ཀྱི་ཡོད་ཚད་ད་ནི་གཞན་དབང་དུ་གྱུར་སོང་། གཞན་དབང་དུ་གྱུར་པའི་འུ་གཉིས་བར་གྱི་བརྩེ་དུང་ལ་རང་དབང་གི་འདམ་ཀ་མེད་པའི་དེ་རིང་གི་མཇུག་འབྲས་འདི་བྱུང་བ་རེད། མཇུག་འབྲས་འདི་ནི་ཡོད་ཚད་གཞན་གྱིས་བསམ་བཞིན་དུ་བཀོད་སྒྲིག་བྱས་པ་ཞིག་ལས་ཚེ་སྔོན་ལས་ཀྱིས་བསྐོས་པ་ཞིག་མ་རེད་ལ་ཚེ་ད་ལྟ་འུ་གཉིས་རང་གིས་བསྐྲུན་བཞག་པ་ཞིག་དེ་བས་མ་རེད། གལ་སྲིད་འུ་གཉིས་བར་ལ་ད་དུང་བརྩེ་དུང་ཟེར་བའི་རིན་པོ་ཆེ་ཞིག་ཡོད་ན། རིན་པོ་ཆེ་འདི་གཞན་གྱི་ཁ་ངོ་སྲུང་བའི་ཡོ་བྱད་དུ་སྤྱད་དགོས་དོན་མེད་ལ་གཞན་གྱི་མི་ཁ་འགོག་པའི་ཚོང་རྫས་སུ་སྒྱུར་དགོས་དོན་མེད། རིན་པོ་ཆེ་འདི་དཀོན་མཆོག་གིས་འུ་གཉིས་ཁོ་ནར་གནང་བའི་ལེགས་སྐྱེས་ཤིག་ཡིན། རིན་པོ་ཆེ་འདི་བརླག་སོང་ན། འུ་གཉིས་ལ་དབང་བ་ནི་གནོང་འགྱོད་དང་སྐྱོ་སྡུག་གིས་ཁེངས་པའི་འབྱུང་འགྱུར་གྱི་ནམ་ཟླ་རིང་མོ་ཉག་གཅིག་རེད། རིན་པོ་ཆེ་འདི་བརླག་སོང་ན། འུ་གཉིས་ནི་རང་དབང་བྲལ་བའི་གཞན་གྱི་དྲ་བར་ཚུད་པའི་ནེ་ཙོ་ཟུང་ཞིག་དང་འདྲ་བར་རང་དབང་གི་གནམ་འཕང་གཅོད་པའི་གཤོག་ཟུང་རྒྱས་མི་སྲིད། སྙིང་ཉེ་ལགས། གལ་སྲིད་ཁྱེད་ཀྱི་དྲན་སྣང་དུ་ང་ཡི་གཟུགས་བརྙན་ལེབ་མོ་དེ་བརླག་མེད་ན། གལ་སྲིད་ཁྱེད་ཀྱི་སེམས་ཁོངས་སུ་བདག་གི་གསང་གཏམ་རིང་མོ་དེ་བརྗེད་མེད་ན། ང་ཁྱེད་སེམས་ཀྱི་ཆུ་མོའི་ནང་དུ་ནམ་ཡང་འབྲལ་ཐབས་མེད་པའི་ཉྭ་མོ་དེ་བྱེད་ཆོག ང་ཁྱེད་སེམས་ཀྱི་ནམ་མཁའི་དབྱིངས་སུ་ནམ་ཡང་འབྲལ་ཐབས་མེད་པའི་རླུང་བུ་དེ་བྱེད་ཆོག
སྙིག་སྡུག་ལགས། གལ་སྲིད་ཁྱེད་ཀྱིས་ད་དུང་ང་ལ་དུང་སེམས་ཞིག་འཆང་ཡོད་ན། ང་ལ་ཡིད་ཆེས་ཐེངས་གཅིག་གནང་དང་། གལ་སྲིད་ཁྱེད་ཀྱིས་ད་དུང་ང་ལ་དགའ་སེམས་ཞིག་འཆང་ཡོད་ན། ང་ལ་གོ་སྐབས་གཉིས་པ་ཞིག་གནང་དང་ང་ནམ་ཡང་ཁྱེད་ཀྱིས་ཡིད་གཏད་བཅོལ་ཆོག་པའི་སྟག་ཤར་གཞོན་ནུ་དེ་བྱེད་ཆོག སྙིང་ཉེ་ལགས། གལ་སྲིད་འུ་གཉིས་ལ་བརྩེ་བ་ཡོད་ན་འུ་གཉིས་ཀྱི་བཟང་ངན་འདྲེས་པའི་འདས་སོང་གི་གཏམ་རྒྱུད་དེས་མཛེས་སྡུག་ལྡན་པའི་འུ་གཉིས་ཀྱི་མ་འོངས་པའི་ལམ་ཆེན་འགོག་པའི་རྐྱེན་དུ་བསྐྲུན་མི་ཉན། གལ་སྲིད་་་་་་་་ གལ་སྲིད་་་་་་་་་ གལ་སྲིད་་་་་་
ཕྱི་ལོ་༢༠༡༩ཟླ་བ་༩་ཚེས་༢༣ཉིན་བྲིས།