རྟ་ནག་སྐལ་བཟང་ལུང་རིགས།
_______རྭ་རྒྱ་ཤེས་རིག་ནོར་བུའི་སློབ་གླིང་དུ་ལོ་ངོ་བཞིའི་འཚོ་བའི་ཁྲོད་འདྲིས་པའི་གྲོགས་པོ་ཚེ་རྡོར་གཏན་དུ་གྱེས་པ།
མང་རའི་བྱེ་མའི་གཞུང་ན་ཁྱེད་ཀྱི་སེམས་རྟེན་ལུས་ཡོད།།
ར་རྒྱའི་ས་དམར་གཞུང་ན་ཁྱེད་ཀྱི་རྐང་རྗེས་ལྷག་ཡོད།།
གཤིན་རྗེ་ཞགས་པ་ནག་པོ་འཕེན་པ་ཅུང་ཙམ་སྔ་སོང་།།
མི་མཐོང་ཕྱི་མའི་འཕྲང་ལ་འགྲོ་བ་དེའུ་རེ་སྔ་སོང་།།
བྲལ་ནས་ལོ་ལྔ་འཁོར་བ་སྡུག་གི་ཁུར་བོ་མ་རེད།།
མི་མཇལ་གཏན་ནས་གྱེས་པ་ཡ་ཆུང་སྨྲེང་བའི་རྒྱུ་རེད།།
མིག་ཆུ་ཁྱོར་བར་བཏེགས་པ་མཆོད་མེད་ཀོང་བུ་གང་ཡིན།།
འདས་མཆོད་འདི་ལས་མེད་པ་ཡུལ་གྱར་འཁྱམས་པོའི་ལས་རེད།།
མདང་ནུབ་ཆར་བ་བབ་པ་ཁྱེད་ཀྱི་མིག་ཆུ་ཡིན་འདྲ།།
ད་ནངས་བ་མོ་ཆགས་པ་ཁྱེད་ཀྱི་ཞེན་ཆགས་ཡིན་འདྲ།།
དེ་རིང་བདག་སེམས་སྨྲེང་བ་ཁྱེད་རང་དྲན་པ་ཡིན་འདྲ།།
གནམ་གྱི་དགུ་ཚིགས་སྐྱ་མོ་ངེད་གཉིས་བརྩེ་བ་ཡིན་འདྲ།།
ཕྱི་མའི་འཕྲང་རིང་གཟས་ཀྱང་ཁ་ངོ་འཛུམ་ཙམ་བྱོས་དང་།།
དྲིན་ཅན་ཕ་ལོ་མ་ལོའི་སེམས་པ་བདེ་ལ་བབ་འགྲོ།།
རྣམ་ཤེས་སྐྱོ་བ་ཆེ་ཡང་ཕྱི་མིག་འཕེན་ཙམ་བྱོས་དང་།།
བུ་དང་ཆུང་མ་དག་གི་ཚེ་གཅིག་སེམས་རྟེན་ཉན་འགྲོ།།
གཤིན་ཐང་སྐྱ་བོའི་ངོགས་སུ་ལྷོད་ལྷོད་དེའུ་རེ་བྱོས་དང་།།
མཆོད་མེ་ཀོང་བུ་གང་གི་ར་མདའ་མྱུར་མོར་བསླེབས་ཡོང་།།
གཤིན་རྗེ་རྒྱ་མའི་མདུན་དུ་ཕྱི་ནུར་ཅུང་ཙམ་བྱོས་དང་།།
མ་ཎི་ཡི་གེ་དྲུག་མའི་དཔང་བོ་རིངས་པར་ཕེབས་ཡོང་།།
སྐྱོ་ཡང་སྐྱོ་སྐྱོ་མ་བྱེད་ཕོ་རྒོད་དར་མའི་སྲོལ་ཡིན།།
སྡུག་ཀྱང་མིག་ཆུ་མ་གཏོང་འཁོར་བ་འཁོར་བའི་ལུགས་ཡིན།།
ཁ་ངོ་འཛུམ་ཞིག་བྱས་ཤིང་ལུས་པོ་དྲང་ཞིག་བྱས་ཏེ།།
གཤིན་ཡུལ་སྤྲིངས་པའི་ཡི་གེ་ག་ལེར་ལྷོད་ཀྱིས་བཀླག་རོགས།།
༢༠༡༡། ༡། ༡༤། ཉིན་བྲིས།