ཚེར་མ།
ཀུན་དང་མཚུངས་མེད་བཤེས་གཉེན་དམ་པ་ཡིས།།
རྗེས་བཟུང་སློབ་མ་ཀུན་ལ་བརྩེ་གཟིགས་ནས།།
མ་འོངས་མདུན་ལམ་མ་ལུས་གསལ་བ་ཡི།།
སློབ་གསོ་སྣང་བ་བསྩལ་བའི་བཀའ་དྲིན་ལྕི།།
རྟག་པར་འཛིན་ཁང་གཙང་མའི་དབུས་ཁྲིད་དུ།།
བརྗིད་ཉམས་ལུས་ལ་ཆོས་གོས་བཀླུབས་པ་དང་།།
བག་ཡོད་ངང་ནས་མདོ་རྒྱུད་འཆད་མཁས་པའི།།
བཤེས་བཉེན་འཛུམ་ལྡན་མཇལ་དུས་སྤྲོ་བ་བརྟས།།
ཕ་མའི་དྲིན་ལན་འཇལ་བར་དཀའ་མོད་ཀྱང་།།
འཇལ་དགོས་ཤེས་པའི་མི་སྣ་ཉུང་བའི་དབུས།།
ཅུང་ཙམ་འཇལ་ཤེས་རྐང་གཉིས་གྱུར་པ་ཡང་།།
བཤེས་གཉེན་ཁྱེད་ཉིད་ངེས་པར་སོམ་ཉི་དབེན།།
འཕྲལ་ཕུགས་གནས་རྟོགས་ཚན་རིག་ནང་ཆོས་ཀྱི།།
རང་ཉིད་གནས་གཞི་སྐྱིད་སྡུག་འབྱུང་གནས་དུ།།
དབང་བསྒྱུར་བྱེད་སྟངས་མ་འདྲེས་གསལ་ལྷང་ངེ།།
ཤེས་པའི་སློབ་གསོའང་ཁྱེད་ཀྱིས་བསླབས་པ་ཡིན།།
ཉིན་རེ་ལྷག་བསམ་ཅུང་ཙམ་འབུས་ནས་ནི།།
རང་གཞན་དོན་ལ་བསམ་པའི་རྣམ་དཔྱོད་ཀྱིས།།
བླང་དོར་མ་ནོར་ཅུང་ཙམ་ཤེས་པ་ཡང་།།
སློབ་གསོ་གནང་མཁས་ཁྱེད་ལས་འབྱུང་བ་གཤིས།།
རིགས་མཐུན་སྤུན་ཟླའི་ཞལ་རས་ཡངས་པ་ལ།།
མཛུམ་མདངས་སྤྲས་ཤིང་བག་ཕེབས་ངང་ཉིད་ལས།།
ཆོག་ཤེས་འཚོ་བར་རོལ་ནས་འདོད་རྔམས་ཀྱི།།
བཀྲེས་སྐོམ་བསལ་ནས་མཐུན་འབྲེལ་སློབ་གསོ་དང་།།
བློ་ལ་འཚམ་པའི་སློབ་གསོ་ཆུ་བོའི་རྒྱུན།།
རྟག་ཏུ་བབས་ནས་རྣམ་དཔྱོད་ས་གཞི་ལ།།
འབྲས་བུ་ཇི་བཞིན་སྨིན་ནས་ལས་སྤྱི་ལ།།
ཚུལ་མཐུན་སྤྱོད་པའི་འབྱུང་ཁུངས་གང་ཉིད་ལགས།།
ཚེར་མ་ཡིས་བྲིས།
ཚེར་མ་ལེགས་ཀྱི་བོད་རྩོམ་ལེགས།
འོན་ཀྱང་། སྩལ་པ་ལ། བསྩལ་བའི། ཞེས་བྲིས་པ་ནི་བཀའ་བསྟན་གསུང་འབུམ་དག་དང་མི་མཐུན་པར་སྣང་། བསྩལ་ནི། སྩེལ་བ་སྟེ། སེལ་བའི་འདས་མ་འོངས་ལ་འཇུག སྡེ་དགེ་བཀའ་བསྟན་དག་ན། བསལ་གྱི་གནས་སུ་བསྩལ་བྲིས་པ་ད་ལྟ་ཡང་མིག་སྣང་དུ་མཆིས། བཀའ་བསྟན་གསུང་འབུམ་གྱི་དཔེ་ཆའི་དག་ཆ་དང་བསྟུན་ཏེ། སྩོལ་གྱི་འདས་མ་འོངས་གང་ལ་ཡང་། བའི་སྔོན་འཇུག་མེད་པ་འབའ་ཞིག་ཏུ། དག་ཡིག་ཟ་མ་ཏོག་དང་། ངག་སྒྲོན་དུ་ཡི་གེར་བཀོད་དོ།