བསྟན་འཛིན་ཀུན་མཁྱེན།
ད་རེས་སྐབས་བཅོ་ལྔ་པའི་བོད་མང་སྤྱི་འཐུས་དང་སྲིད་སྐྱོང་བཅས་ཀྱི་འོས་བསྡུའི་ལས་རིམ་ཁྲོད་སྤྱི་ཚོགས་དྲ་ལམ་ཁག་དང་འོས་བསྡུའི་བགྲོ་གླེང་གི་ལས་རིམ་ནང་བསམ་མེད་ཁག་གཅིག་གིས་ཡ་རབས་བཟང་སྤྱོད་ཀྱི་རྣམ་པ་ཙམ་ཡང་མེད་པར་ནང་ཁུལ་ཤོག་ཁག་ལྟ་བུའི་ངོ་ཚ་ཁྲལ་མེད་ཐོག་ཆོལ་ཁ་དང་ཆོས་ལུགས་དབར་འཐེན་འཁྱེར་གྱི་བསམ་སྦྱོར་ངན་པས་ད་བར་རང་ཅག་བོད་མི་ཡོངས་ཀྱི་འདི་ཕྱི་གཉིས་ཀྱི་སྐྱབས་གནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་ལམ་སྟོན་འོག་ཆོལ་ཁ་གསུམ་གྱི་རང་རིགས་སྤུན་ཟླ་འདས་གསོན་རྣམས་ནས་༧རྒྱལ་བའི་དགོངས་གཞི་ཟབ་མོ་དང་བསྟུན་ནས་ངལ་བ་ཁྱད་བསད་ཀྱིས་གཞི་ལུས་རྒྱ་ཆེ་མང་ཚོགས་ཀྱིས་རེ་བའི་ཕུགས་བསམ་བཅོལ་བའི་བཙན་བྱོལ་བོད་མིའི་སྒྲིག་འཛུགས་འདི་བཞིན་སྲ་བརྟན་དང་ཆོལ་གསུམ་གོང་བུ་གཅིག་བསྒྲིལ་ཐོག་གནས་མུས་དེ་དག་གཏོར་རླགས་ཉམས་དམས་སུ་གཏོང་བའི་བྱུས་ངན་བརྩམས་པ་ནི་ཆེས་བློ་ཕམ་གྱི་རང་བཞིན་དགྲ་དགའ་གཉེན་སྡུག་གི་གནས་སུ་གྱུར།
ད་རེས་ཀྱི་འབྱུང་རྐྱེན་དེས་ཕྱི་ལོ་ ༢༠༡༦ ཟླ་ ༣ ཚེས་ ༢༣ ཉིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་ཀྱི་སྨན་རྩིས་ཁང་ནས་བོད་ཀྱི་རྒྱལ་ས་ལྷ་སར་སྨན་རྩིས་ཁང་ཐོག་མར་དབུ་བརྙེས་ཏེ་ལོ་བརྒྱ་འཁོར་བའི་དུས་དྲན་མཛད་སྒོ་སྲུང་བརྩི་གནང་སྐབས་བཀའ་སློབ་ཕེབས་དོན། <<ང་ཚོའི་སྤྱི་ཚོགས་ནང་ཡ་རབས་བཟང་སྤྱོད་ཟེར་རྒྱུ་ཁ་ནས་བཤད་པ་མ་གཏོགས། ལག་ལེན་ངོ་མའི་ཐོག་ལ་ཚད་དམའ་རུ་འགྲོ་གི་ཡོད་པའི་བཟོ་འདྲ་འདུག་>> ཅེས་བཀའ་ཕེབས་ཡོད་པ་དང།
དེ་བཞིན་ཕྱི་ཟླ་ ༤ ཚེས་ ༡ ཉིན་བཀའ་སྤྱི་གཉིས་ནས་གནས་ཆུང་ཆོས་རྒྱལ་ཆེན་པོ་དང་བཀྲིས་ཚེ་རིང་མ་གཉིས་ལ་སྔ་བཅོལ་ལེགས་པའི་གཏང་རག་སྐུལ་གསོལ་སྤྱན་འདྲེན་ཞུས་སྐབས་གནས་ཆུང་ཆོས་རྒྱལ་ཆེན་པོས་བཀའ་ལུང་ཕེབས་པའི་ནང། <<དཔལ་ལྡན་དགའ་བ་བརྒྱ་ལྡན་པའི་ཆབ་སྲིད་གསེར་གྱི་ཡུ་བ་མང་མོས་ཁྲོད་དུ་གསོལ་སྩལ་གྱིས་ལས་གང་བྱས་ཀྱང་བསམ་ཤེས་དམན། དྲིན་མ་ཚོར་བཀའ་གསུང་མི་སྒྲུབ་པས། མགོན་ཐུགས་ཕན་ཆེ་བས་དུས་གྱུར་ཕྱིར། ཐུགས་རྟེན་འབྲེལ་མ་གཟབ་ན་ལས་གང་ཕྱིར་གྲུབ་པར་དོན་མི་གསལ། ཞེས་དང་། སྤྱིར་འཛམ་བུ་གླིང་གི་གཙུག་གི་ནོར་བུ་ངོས་ཀྱི་སློབ་དཔོན་མཐོང་བ་དོན་ལྡན་མཆོག་ཉི་ཤར་སྦར་མོས་མ་ཁེབས་པའི་དཔེ་ལྟར་མཛད་བཟང་ལེགས་པར་བསྐྱངས་ན་ཡང། ཁ་བ་ཅན་གྱི་བསོད་ནམས་དམན་པས་ནང་དུ་དམ་ཚིག་མི་ལྡན་ན་སྐུ་ཕྱྭར་འགན་ལེན་མི་བཟོད་པ་ཞིག་འདུག་པས། ད་སླད་ཕྱིན་སྤང་བླང་ཚུལ་བཞིན་ཕྱིན་ཆད་གསོལ་འདེབས་ནན་པོ་མ་མཛད་ན་སྐུ་ཕྱྭའི་འགན་ལེན་མདུན་ན་འདོན་ཁྱེད་ཀྱིས་འགན་འཁུར་གྱིས་ལ། སྔོན་ཆད་བཤགས་སྡོམ་དང་ཕྱིན་ཆད་སྤང་བླང་ཚུལ་གྱིས་མནའ་ཆུ་འདི་ནི་དུས་འདི་ནས་བཟུང་སྟེ་དམ་ཚིག་དར་གྱི་མདུད་རྒྱ་བརྟན་པོར་མཛོད་ཅིག་>> ཅེས་བཀའ་ལུང་ལྕི་མོ་ཕེབས་པ་དང་།
ཡང་བཀྲིས་ཚེ་རིང་མས་ཀྱང་བཀའ་ལུང་ཕེབས་པའི་ནང། <<ད་འདི་ཕྱིན་ཆད་ལ་བདག་ཅག་རྣམས་ཀྱིས་ཐུགས་ཀྱི་དགོངས་པ་བསྒྲུབ་དགོས་པ་འདི་ལ་ཡང། ལྷག་བསམ་ཟོལ་མེད་ངང་ནས་ལན་གཅིག་མ་ཡིན་པར་བདག་སོགས་ལྷ་མི་ཡོངས་ཀྱིས། གངས་ལྗོངས་བོད་ཀྱི་རྒྱལ་ཁབ་འདི་ལ་རྙོག་དྲ་དང་དཀའ་སྡུག་ཚད་མེད་ཡོད་པ་ལགས་ནའང། ཆོལ་ཁ་འཐེན་འཁྱེར་དང་ཆོས་ལུགས་འཐེན་འཁྱེར་འདི་ཡིས་ཁྲེལ་ཡོད་ངོ་ཚ་མེད་པ་དང། བྱ་སྤྱོད་གང་ཡང་འཁྲུག་རྩོད་ཀྱི་ནོར་འཁྲུལ་ཆེན་པོ་འདི་ལ་ཡང། བླ་མ་འོ་བརྒྱལ་ཆེ་སོང་>> ཞེས་བཀའ་ལུང་ཕེབས་ཡོད་པ་བཅས་ད་རེས་ཀྱི་འོས་བསྡུ་ཆེན་མོའི་ལས་རིམ་ཁྲོད་ཆོལ་ཁ་དང་ཆོས་བརྒྱུད་དབར་གྱི་འཐེན་འཁྱེར་ལྟ་བུ་འཁྲུག་ཆ་དོད་པོའི་གནས་ཚུལ་ལྷགས་པ་དེས་ཆོལ་གསུམ་བོད་མིའི་གོང་བུ་ཆིག་བསྒྲིལ་གྱི་ནུས་པར་སེར་ཀ་ཞིག་བཟོས་ཡོད་པས་དེ་ནི་བཙན་བྱོལ་བོད་མིའི་སྤྱིའི་ཚོགས་ཀྱི་ལོ་རྒྱུས་ནང་ཆེས་ཐབས་སྡུག་དང་མུན་ནག་གི་གནས་སྟངས་ཤིག་ཆགས་ཡོད་པས། ད་ཕྱིན་ཆད་བོད་མང་གཙོ་ཀ་བ་གསུམ་གྱི་མཛད་གཙོ་རྣམ་པས་དབུས་བོད་འབངས་རྒྱ་ཆེའི་སེར་སྐྱ་མང་ཚོགས་ནས་༧རྒྱལ་བའི་དགོངས་གཞི་དང་མཐུན་པའི་ཆོལ་གསུམ་གོང་བུ་ཆིག་ཏུ་བསྒྲིལ་ཏེ་གཞིས་ལུས་རྒྱ་ཆེ་མང་ཚོགས་ཀྱི་བཅོལ་བའི་རེ་བ་དང་བོད་ཀྱི་བདེན་དོན་འཐབ་རྩོད་ལ་ཚང་མས་ནུས་ཤུགས་མཉམ་སྤུངས་ཡོང་བའི་སྐུལ་མ་ཞུ་རྒྱུ་ཡིན།
དེ་ཡང་འདས་པའི་བཀའ་སྤྱི་གཉིས་ཀྱི་དུས་ཡུན་ལོ་བཞི་དང་ཕྱེད་ཀ་ལྷག་གི་གནས་སྟངས་ལ་ཕྱི་མིག་བལྟ་སྐབས་སྐྱོན་གནས་འགའ་ཤས་མཐོང་ཐོས་བྱུང་བ་དེ་དག་སྤྱི་སྨན་བསམ་འཆར་གྱི་ཚུལ་དུ་འདིར་བཅོས་མིན་འབྲི་རྒྱུ་ཡིན་པས་དགེ་མཚན་གཟིགས་ཚེ་ཕྱག་བསྟར་དོན་འཁྱོལ་ཡོང་བ་གནང་རོགས་ཞེས་འབོད་སྐུལ་ཞུ་རྒྱུ་ཡིན།
དེ་ཡང་བཙན་བྱོལ་བོད་མིའི་བཅའ་ཁྲིམས་དགོངས་དོན་འོས་འདེམས་བྱུང་བའི་སྲིད་སྐྱོང་གིས་ཕྱག་འབྲེལ་བཀའ་བློན་རྣམས་ཀྱི་མིང་གཞུང་བོད་མི་མང་སྤྱི་འཐུས་གྲོས་ཚོགས་སར་སྙན་སྒྲོན་གྱིས་དེར་གྲོས་ཚོགས་ནས་རྒྱབ་གཉེར་ཐོག་བསྐོ་གཞག་གནང་གི་ཡོད་པ་རེད། འོན་ཀྱང་འདས་པར་སྲིད་སྐྱོང་གིས་མཚན་འདོན་གནང་བའི་ཕྱག་འབྲེལ་བཀའ་བློན་ཚོའི་རྒྱབ་ལྗོངས་ཀྱི་གནས་སྟངས་ཇི་ཡིན་དང། བྱེ་བྲག་ཕྱག་འབྲེལ་བཀའ་བློན་གྱིས་ལྷན་ཁང་བྱེ་བྲག་པ་དེའི་ཐོག་ནུས་པ་ལྡན་པའི་ཕྱག་ལས་གནང་ཐུབ་མིན་ཐུགས་ཞིབ་ཚགས་ཚུད་གནང་ཐུབ་ཀྱི་ཨེ་ཡོད་བསམ་པའི་བློ་དོགས་ཤིག་ཡོང་གི་འདུག
དེ་ཡང་འདས་པའི་བཀའ་ཤག་གི་དུས་ཡུན་ལོ་བཞི་དང་ཕྱེད་ཀའི་རིང་འཕྲོད་བསྟེན་བཀའ་བློན་ལྟ་བུར་མཚོན་ན། ཁོང་འཕྲོད་བསྟེན་བཀའ་བློན་གྱི་མཛད་ཁུར་བཞེས་རིང་འཕྲོད་བསྟེན་དང་འབྲེལ་བའི་གྲོས་ཚོགས་ཀྱི་ལས་རིམ་སྐབས་བོད་མིའི་སྤྱི་ཚོགས་ཀྱི་འཕྲོད་བསྟེན་ཡར་རྒྱས་གཏོང་ཕྱོགས་ལས་ཁོང་སྒེར་གྱི་གླེང་རྙོག་མང་དག་གཅིག་གི་ཐོག་གྲོས་ཚོགས་ནང་གྲོས་བསྡུར་གནང་སྟེ་དུས་ཚོད་འདའ་དགོས་པའི་གནས་སྟངས་ཆགས་ཡོད་པ་དེས་བཙན་བྱོལ་བོད་མིའི་འཕྲོད་བསྟེན་གྱི་ལས་གཞིར་དོ་ཕོག་ཏན་ཏན་ཕྱིན་ཡོད། དེ་ཙམ་དུ་མ་ཟད། བཙན་བྱོལ་བོད་མིའི་སྒྲིག་འཛུགས་ཀྱི་ལྷན་ཁང་གཞན་ལས་འཕྲོད་བསྟེན་ཁྱབ་ཁོངས་ཀྱི་སྨན་ཁང་ལས་བྱེད་པ་ཚོར་ཕོགས་ཐོབ་དང་མཐུན་རྐྱེན་སོགས་དེ་སྔ་ནས་ཞན་པོ་ཡོད་ཀྱང་ཕོགས་ཐོབ་སྤར་རྒྱུ་དང་མཐུན་རྐྱེན་བཟང་དུ་བསྐྲུན་རྒྱུར་ཕྱག་བསྟར་ཙམ་ཡང་གནང་མེད་སྟབས་འཕྲོད་བསྟེན་ཁྱབ་ཁོངས་བོད་མིའི་གཞིས་ཆགས་ཁག་གི་སྨན་ཁང་གི་ལས་བྱེད་རྣམས་ལ་དཀའ་ངལ་མང་དག་ཅིག་འཕྲད་མུས་མ་ཟད། ལས་བྱེད་ཁག་ཅིག་དགོངས་ཞུ་བྱེད་དགོས་པའི་གནས་སྟངས་ལས་འཕྲོད་བསྟེན་ཁྱབ་ཁོངས་སྨན་ཁང་གི་ལས་བྱེད་དུ་འཛུལ་མཁན་དཀོན་དུ་ཕྱིན་པ་སོགས་བཙན་བྱོལ་བོད་མིའི་འཕྲོད་བསྟེན་གྱི་ལས་དོན་ཁག་འཐུས་ཤོར་འགྲོ་གི་ཡོད་པ་གདོན་མི་ཟ།
དེར་བརྟེན་འབྱུང་འགྱུར་སྲིད་སྐྱོང་གིས་ཕྱག་འབྲེལ་བཀའ་བློན་རྣམས་མཚན་འདོན་གནང་སྐབས་སྔོན་ཚུད་ནས་ངེས་པར་དུ་བཀའ་བློན་ཚོའི་རྒྱབ་ལྗོངས་ཀྱི་གནས་ཚུལ་ཡག་པོ་ཞིབ་འཇུག་གནང་སྟེ་མཚན་འདོན་གནང་དགོས་གལ་མཐོང་བར་མ་ཟད། བོད་མི་མང་སྤྱི་འཐུས་རྣམ་པས་ཀྱང་སྲིད་སྐྱོང་གིས་མཚན་བཏོན་གནང་བའི་ཕྱག་འབྲེལ་བཀའ་བློན་དེ་དང་དེས་ལས་དོན་འཐུས་ཤོར་མེད་པ་གནང་ཐུབ་མཁན་ལ་ངེས་པར་དུ་རྒྱབ་སྐྱོར་དང། དེ་མིན་འགག་བྱ་གནང་སྟེ་ཤེས་འཇོན་ལྷག་བསམ་ལྡན་པའི་བཀའ་བློན་ཚད་ལྡན་ཡོང་ཐབས་ལ་འགན་འཁུར་མཉམ་ལེན་ཡོང་བའི་འབོད་སྐུལ་ཞུ་རྒྱུ་ཡིན།
ཡང་སྐྱོན་གནས་གཞན་ཞིག་ནི། ད་ལྟའི་བོད་མི་མང་སྤྱི་འཐུས་ལྷན་ཚོགས་ཀྱི་འཐུས་མི་ཡོང་ཁུངས་ནས་མཚམས་རེ་ཤོག་ཁག་ལྟ་བུའི་ཆོལ་ཁ་དང་ཆོས་བརྒྱུད་དབར་འཐེན་འཁྱེར་གྱི་རྣམ་པ་མངོན་གྱི་འདུག་པ་དེའི་རྐྱེན་གཅིག་ད་ལྟའི་གྲོས་ཚོགས་ཀྱི་འཐུས་མི་འདེམས་ཕྱོགས་ནས་ཡོང་གི་ཡོད་ཚོད་འདུག དེ་ཡང་བོད་མི་མང་སྤྱི་འཐུས་ལྷན་ཚོགས་ནང་མདོ་དབུས་ཁམས་གསུམ་གྱི་ཆོལ་ཁ་སོ་སོ་ནས་འོས་འདེམས་བྱུང་བའི་འཐུས་མི་རྣམ་པ་དང། དེ་བཞིན་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་པའི་ཆོས་བརྒྱུད་སོ་སོས་འཐུས་མི་འདེམས་བསྐོ་གནང་སྲོལ་ཡོད་པ་དེ་དག་ཕྱོགས་གཅིག་ནས་བོད་ཕྱི་ནང་གི་ཚབ་མཚོན་པའི་ཆོལ་ཁ་གསུམ་དང་ཆོས་བརྒྱུད་བཅས་པའི་ངོ་བོ་མཚོན་པའི་དགེ་མཚན་ཡོད་ཀྱང་། ཕྱོགས་གཞན་ཞིག་ནས་ཆོལ་ཁ་དང་ཆོས་བརྒྱུད་སོ་སོ་ནས་འདེམས་ཐོན་བྱུང་བའི་འཐུས་མི་རྣམས་དོ་བདག་ཆོལ་ཁ་གང་ཞིག་དང་ཆོས་བརྒྱུད་གང་ཞིག་གི་འཐུས་མིའི་ངོ་ཚབ་མཚོན་པ་ཙམ་ལས་བོད་ཆོལ་གསུམ་མི་མང་སྤྱིའི་འཐུས་མིའམ་སྤྱི་མི་མཚོན་ཐུབ་པ་ཞིག་ཡོང་གི་མེད།
བོད་མི་མང་སྤྱི་འཐུས་ཀྱི་འཐུས་མིའི་ཡོངས་ཁུངས་ཀྱང་མང་གཙོ་ཚད་ལྡན་ལྟ་བུ་འདྲ་མཉམ་མེད་པའི་རྣམ་པ་ཞིག་ཏུ་སྣང། དེ་ཡང་ད་ལྟའི་སྤྱི་འཐུས་ཡོངས་ཁུངས་དང་འདེམས་བསྐོ་བྱ་སྟངས་ནི། རྒྱ་བལ་འབྲུག་གསུམ་ནང་ཡོད་པའི་སེར་སྐྱ་བོད་མི་ཚོས་ཆོལ་ཁ་གསུམ་སོ་སོ་ནས་འཐུས་མི་གྲངས་ ༡༠ རེ་བསྡོམས་ཆོལ་ཁའི་སྤྱི་འཐུས་གྲངས་ ༣༠ འདེམས་བསྐོ་བྱ་གི་ཡོད། དེ་བཞིན་རྒྱ་བལ་འབྲུག་གསུམ་ནས་ས་དགེ་བཀའ་རྙིང་བོན་བཅས་པའི་ཆོས་བརྒྱུད་སོ་སོའི་གྲྭ་བཙུན་སོ་སོ་ནས་ཆོས་བརྒྱུད་ཀྱི་འཐུས་མི་ ༢ རེ་བསྡོམས་ཆོས་བརྒྱུད་ཀྱི་སྤྱི་འཐུས་གྲངས་ ༡༠ འདེམས་བསྐོ་བྱ་གི་ཡོད།
འོན་ཀྱང་རྒྱ་བལ་འབྲུག་གསུམ་ནང་ཡོད་པའི་མི་སྐྱ་ཚོར་ཆོལ་ཁ་སོ་སོ་ནས་མི་བཅུ་རེ་འོས་འཕེན་གྱི་ཐོབ་ཐང་ཡོད་པ་དང། གྲྭ་བཙུན་རྣམས་ལ་ཆོལ་ཁ་སོ་སོ་ནས་འཐུས་མི་གྲངས་ ༡༠ རེ་དང་ཆོས་བརྒྱུད་སོ་སོ་ནས་འཐུས་མི་གྲངས་ ༢ རེ་བཅས་ཁྱོན་འཐུས་མི་བཅུ་གཉིས་ལ་འོས་འཕེན་གྱི་ཐོབ་ཐང་ཡོད་པ་རེད། འོན་ཏེ་བྱང་ཨ་རི་དང་ཁེ་ན་ཌར་གནས་སྡོད་སེར་སྐྱ་བོད་མི་ཚོས་ཆོལ་ཁ་དང་ཆོས་བརྒྱུད་ལྟོས་མེད་ཀྱིས་སྲིད་སྐྱོང་གི་འོས་འཕེན་ལྟར་ས་ཁུལ་དེའི་ཆོལ་གསུམ་བོད་མི་ཡོངས་ཀྱིས་སྤྱི་འཐུས་གཉིས་ལ་འོས་འཕེན་བྱེད་ཀྱི་ཡོད། དེ་བཞིན་ཡོ་རོབ་དང་། ཨོ་སོ་ཀྲོ་ལི་ཡ་དང་ཨེ་ཤི་ཡ་བཅས་ཡུལ་གྲུ་སོ་སོའི་ཆོལ་གསུམ་བོད་མི་ཡོངས་ཀྱིས་འཐུས་མི་གཉིས་དང་གཅིག་སོ་སོར་འོས་འཕེན་བྱེད་ཀྱི་ཡོད།
དེ་ལྟར་ན་རྒྱ་བལ་འབྲུག་གསུམ་ནས་འོས་འདེམས་བྱེད་པའི་སྤྱི་འཐུས་ཀྱི་ཡོངས་ཁུངས་དང། བྱང་ཨ་རི་དང་ཁེ་ན་ཌ། ཡོ་རོབ། ཨོ་སོ་ཀྲེ་ལི་དང་ཨེ་ཤི་ཡ་བཅས་སོ་སོ་ནས་འོས་འདེམས་བྱེད་པའི་སྤྱི་འཐུས་ཀྱི་ཡོངས་ཁུངས་གཉིས་ལ་ཁྱད་པར་ཆེན་པོ་ཡོད། དང་པོ་ནི་ཆོལ་ཁ་གང་ཞིག་དང་ཆོས་བརྒྱུད་གང་ཞིག་ནས་འདེམས་ཐོན་བྱུང་བའི་འཐུས་མི་ཚོས་རང་ཉིད་ཆོལ་ཁ་བྱེ་བྲག་པ་དང་ཆོས་བརྒྱུད་བྱེ་བྲག་པ་ཞིག་ནས་འོས་འདེམས་བྱུང་བ་ཞིག་ཡིིན་སྟབས་ཁོང་ཚོར་ཆོལ་ཁ་དང་ཆོས་བརྒྱུད་ཀྱི་ཞེན་ཁོག་སླེབས་པའི་ངང་ཆགས་སྡང་གྱི་བློས་འཐེན་འཁྱེར་ཡོང་གི་ཡོད། ཡང་ཆོལ་ཁ་དང་ཆོས་བརྒྱུད་ལྟོས་མེད་ཀྱི་ཆོས་གསུམ་གཅིག་གྱུར་གྱི་ངོ་བོའི་ཐོག་ནས་འདེམས་ཐོན་བྱུང་བའི་འཐུས་མི་ཚོར་ཆོལ་ཁ་དང་ཆོས་བརྒྱུས་ཀྱི་ཕྱོགས་ཞེན་མེད་པར་སྤྱི་པའི་འཐུས་མིའི་ངོ་བོ་མཚོན་པ་ཞིག་ཡོང་གི་ཡོད།
རྒྱུ་མཚན་དེ་དག་ལ་བརྟེན། ང་ཚོས་ད་ལྟའི་སྤྱི་འཐུས་ལྷན་ཚོགས་ཀྱི་འཐུས་མིའི་ཡོངས་ཁུངས་དང་འོས་འཕེན་གཅིག་གྱུར་ཞིག་ཡོང་བར་དང་ཐོག་ད་ལྟ་ཡོད་བཞིན་པའི་ཆོལ་ཁ་དང་ཆོས་བརྒྱུད་ཀྱི་ཐོག་ནས་འོས་འདེམས་བྱེད་པའི་སྤྱི་འཐུས་ཀྱི་ཡོང་ཁུངས་དེ་བོད་གཞིས་བྱེས་གཉིས་ཀྱི་ཆོལ་ཁ་གསུམ་དང་ཆོས་བརྒྱུད་ཀྱི་ངོ་བོ་མཚོན་བྱེད་ད་ལྟའི་བཙན་བྱོལ་བོད་མིའི་གནས་བབ་ལ་གཞིགས་ཏེ་དགོས་ངེས་ཀྱང་ད་ལྟ་ཡོད་བཞིན་པའི་ཆོལ་ཁ་དང་ཆོས་བརྒྱུད་ཀྱི་སྤྱི་འཐུས་ཀྱི་གྲངས་ཚད་ ༤༠ ནས་ ༢༠ བར་ཉུང་དུ་བཏང་སྟེ་གྲོས་ཚོགས་གོང་མའི་ལྷན་ཚོགས་ཀྱི་ངོ་བོར་བསྒྱུར་རྒྱུ་དང་།
ཡང་གྲོས་ཚོགས་འོག་མའི་ལྷན་ཚོགས་ཤིག་བཟོས་ཏེ་དེར་ད་ལྟའི་བྱང་ཨ་རི་དང་ཁེ་ན་ཌ། ཡོ་རོབ། ཨོ་སོ་ཀྲེ་ལི་ཡ་དང་ཨེ་ཤི་ཡ་བཅས་པར་ཆོལ་གསུམ་བོད་མི་ཡོངས་ཀྱི་གཅིག་བསྒྱུར་ཐོག་འོས་འཕེན་གྱིས་ས་གནས་ཀྱི་བོད་མིའི་མགྲིན་ཚབ་མཚོན་པའི་སྤྱི་འཐུས་འོས་འདེམས་བྱེད་མུས་ལྟར། རྒྱ་བལ་འབྲུག་གསུམ་གྱི་བོད་མིའི་གཞིས་ཆགས་ཁག་དང་ཁ་ཐོར་ས་གནས་སོོ་སོའི་ས་གནས་བོད་མིའི་མི་འབོར་གྲངས་ཚད་ལ་གཞིགས་པའི་ཆོལ་གསུམ་བོད་མི་ཡོངས་ཀྱིས་འོས་འཕེན་ཐོག་ས་གནས་ཀྱི་འཐུས་མི་འོས་འདེམས་བྱ་རྒྱུར་ཁྲིམས་བཟོ་ལྷན་ཚོགས་ནས་དེ་ལྟར་བཅོས་བསྒྱུར་ཡོང་ཐབས་གནང་གལ།
དེ་ལྟར་བྱུང་ཚེ་ས་གནས་སོ་སོ་ནས་ཆོལ་གསུམ་བོད་མི་མང་ཚོགས་ཀྱིས་འོས་འདེམས་བྱེད་པའི་འཐུས་མི་དེ་དག་ས་གནས་དེ་གའི་སྤྱི་མི་ཞིག་ཆགས་སྟེ་དེས་ས་གནས་མི་མང་གི་བདེ་དོན་རྣམས་གྲོས་ཚོགས་སུ་ཆད་ལུས་མེད་པར་གླེང་སློང་གནང་ཐུབ་རྒྱུར་མ་ཟད། ས་གནས་ཀྱི་འཐུས་མི་དེ་དག་ས་གནས་མི་མང་ལ་འགན་འཁུར་ཡོད་པའི་འཐུས་མི་ཞིག་ཆགས་རྒྱུ་ཡིན་པས་ས་གནས་མི་མང་དང་སྤྱི་འཐུས་ལྷན་ཚོགས་དབར་འབྲེལ་ཟམ་གལ་ཆེ་ཞིག་ཆགས་རྒྱུ་ཡིན།
དེ་ཡང་ས་གནས་མི་འབོར་ལ་གཞིགས་པའི་སྤྱི་འཐུས་ཀྱི་ཡོངས་ཁུངས་ནི། ད་ལྟའི་རྒྱ་བལ་འབྲུག་གསུམ་དང་། ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བཙན་བྱོལ་བོད་མིའི་གྲངས་འབོར་ཆིག་འབུམ་ལྔ་ཁྲི་ཙམ་ཡོད་པས། ས་གནས་མི་འབོར་ལ་གཞིགས་པའི་ས་གནས་ཀྱི་སྤྱི་འཐུས་རྣམས་ནི་ས་གནས་སོ་སོའི་བོད་མིའི་གྲངས་འབོར་ ༥༠༠༠ ལ་འཐུས་མི་རེ་རྩིས་བོད་མི་གྲངས་འབོར་ཆིག་འབུམ་ལྔ་ཁྲིར་འཐུས་མི་གྲངས་ ༣༠ ཆགས་ཀྱི་ཡོད་ཅིང། དེའི་ནང་ད་ལྟའི་བྱང་ཨ་རི་དང་ཁེ་ན་ཌའི་འཐུས་མི་དང། ཡོ་རོབ་འཐུས་མི། དེ་བཞིིན་ཨོ་སོ་ཀྲེ་ལི་ཡ་དང་ཨེ་ཤི་ཡའི་འཐུས་མི་བཅས་ས་གནས་མི་འབོར་ལ་གཞིགས་པའི་སྤྱི་འཐུས་འོས་འདེམས་ལྟར་མཚུངས་པས་དེའི་ཁོངས་ཚུད་རྒྱུ་ཡིན།
མདོ་དོན་འབྱུང་འགྱུར་བོད་མི་མང་སྤྱི་འཐུས་ལྷན་ཚོགས་ནང་གྲོས་ཚོགས་གོང་མའི་ཆོལ་ཁ་དང་ཆོས་བརྒྱུད་ཀྱི་སྤྱི་འཐུས་གྲངས་ ༢༠ དང་། གྲོས་ཚོགས་འོག་མའི་ས་གནས་མི་འབོར་ལ་གཞིགས་པའི་ས་གནས་ཀྱི་སྤྱི་འཐུས་གྲངས་ ༣༠ བཅས་བསྡོམས་སྤྱི་འཐུས་གྲངས་ ༥༠ ཐམ་པ་ཆགས་རྒྱུ་ཡིན། གྲོས་ཚོགས་ཀྱི་ལས་རིམ་འགྲོ་སྟངས་ནི་གྲོས་ཚོགས་གོང་འོག་གི་འཐུས་མི་ལྷན་ཚོགས་ལས་བསྒྲུབ་པའི་ད་ལྟའི་བོད་མི་མང་སྤྱི་འཐུས་ལྷན་ཚོགས་ཀྱི་འགྲོ་ལུགས་བཞིན་ཕྱག་བསྟར་གནང་ཐུབ་ངེས་ཡིན།
གྲོས་ཚོགས་གོང་མའི་འཐུས་མི་ཆོལ་ཁ་དང་ཆོས་བརྒྱུད་ཀྱི་འཐུས་མི་རྣམས་འོས་འཕེན་བྱ་རྒྱའི་ཐོབ་ཐང་རྒྱ་བལ་འབྲུག་གསུམ་ཙམ་མིན་པར་བྱང་ཨ་རི་དང་ཁེ་ན་ཌ་སོགས་ཕྱི་རྒྱལ་ཡུལ་གྲུ་གཞན་ཁག་ལའང་གཅིག་མཚུངས་ཀྱི་ཐོབ་ཐང་སྤྲོད་དགོས་པ་དང། དེ་བཞིན་གྲོས་ཚོགས་འོག་མའི་འཐུས་མི་ཡོང་ཁུངས་ནི་གོང་དུ་བརྗོད་པ་ལྟར་ས་གནས་མི་འབོར་ལ་གཞིགས་པའི་ས་གནས་དེ་གའི་ཆོས་གསུམ་མི་མང་ཡོངས་ཀྱིས་འོས་འཕེན་གྱིས་འཐུས་མི་འདེམས་བསྐོ་བྱ་རྒྱུ་བཅས་འོས་འཕེན་གྱི་ཐོབ་ཐང་འདྲ་མཉམ་བྱུང་སྟེ་བཙན་བྱོལ་བོད་མིའི་མང་གཙོ་མཚན་ཉིད་ལྡན་པ་ཞིག་ཡོང་རྒྱུར་མ་ཟད། དེས་བཙན་བྱོལ་བོད་མིའི་སྤྱི་ཚོགས་ནང་ཆོལ་གསུམ་གོང་བུ་གཅིག་བསྒྲིལ་གྱི་ནུས་པ་གོང་མཐོར་བཏང་སྟེ་བཙན་བྱོལ་བོད་མིའི་འཚོ་རྟེན་དང། ཤེས་ཡོན། འཕྲོད་བསྟེན། དཔལ་འབྱོར་སོགས་ཀྱི་དཀའ་ངལ་མང་དག་ཅིག་སེལ་ཐབས་ལ་ཕན་ཐོགས་དགེ་མཚན་ཆེ་བར་མངོན་པའི་རྨོངས་འཆར་དུ།།
ཉེ་ལམ་གྱི་སྤྱི་སྲིད་གཉིས་ཀྱི་འོས་བསྡུའི་སྐབས་སུ་དབུས་སྨད་གཉིས་དང་མདོ་སྟོད་གཉིས་དབར་གྱི་འགྲན་རྩོད་དང་འཐེན་ཁྱེར་བྱུང་ཡོད་ན་མ་གཏོགས་དེ་མིན་ཆོས་ལུགས་ཀྱི་འཐེན་ཁྱེར་གང་ཡང་བྱུང་མེད། དཔེར་ཇ་སྲིད་སྐྱོང་གི་འོས་མི་ལྟ་བུར་ཆ་བཞག་ན་སྔོན་འགྲོའི་འོས་མི་བཞི་དང་དེ་ནས་སྔོན་འགྲོའི་འོས་མི་གཉིས་བཅས་ཚང་མ་དགེ་ལུགས་པ་ཆགས་ཡོད་པས་དེ་ལ་ཆོས་ལུགས་ཀྱི་འཐེན་ཁྱེར་གང་ཡང་བྱུང་མེད། དེ་བཞིན་སྤྱི་འཐུས་ལྟ་བུར་ཆོས་རྒྱུད་ཆོས་ལུགས་རང་རང་གི་ཕྱོགས་ནས་འོས་མི་བཏོན་ཏེ་བླུག་པ་ལས་གཞན་གྱི་ཆོས་ལུགས་ཀྱིས་ཐེ་བྱུས་བྱེད་ས་མེད། ཆོལ་ཁ་གསུམ་གྱི་སྤྱི་འཐུས་ཀྱང་ཆོས་ལུགས་ཀྱིས་འཐེན་ཁྱེར་མིན་པ་ནི་དེར་ཕལ་ཆེ་བ་དགེ་ལུགས་པ་རེད།
ཆོས་ལུགས་ཀྱི་སྤྱི་འཐུས་ཀྱི་དགོས་དབང་མིན་འདུག་། དམངས་གཙོའི་སྤྱི་ཚོགས་ཡང་དག་ཅིག་ཡིན་ན་ཆོས་ལུགས་རིས་མེད་ཀྱི་སྤྱི་ཚོགས་ཤིག་ཡིན་དགོས་། དེ་འདྲའི་སྤྱི་ཚོགས་ཤིག་ནང་ཆོས་ལུགས་ཀྱི་སྤྱི་འཐུས་ཀྱི་དགོས་མཁོ་མེད་པ་མཐོང་།
༅༅། ཆོས་ལུགས་ཀྱི་སྤྱི་འཐུས་དགོས་ཀྱི་མི་འདུག་གསུངས་པ་ནི་རྒྱབ་མདུན་གཡས་གཡོན་།
འདས་ད་་མ་འོངས་བཅས་ལ་མ་དཔྱད་པ་ཞིག་རེད་སྙམ་། ཡང་དམངས་གཙོའི་ལམ་ལུགས་ལྟར་
འགྲིགས་མིན་བརྗོད་པ་ནི་། ཨ་ཕའི་འཁྲབ་པ་དང་། ར་ཕོའི་འཁྲབ་པ་གཉིས་གཏན་ནས་མི་འདྲ།
ང་ཚོ་ག་པར་བསྡད་ཡོད་པ་རེད། ང་ཚོ་བསྡད་སའི་ལུང་པ་འདི་ཕ་ཡུལ་ངོ་མ་མ་རེད།
ད་ལོ་སྲིད་སྐྱོང་གི་འོས་བསྡུའི་སྐབས། མིའི་ལས་ཟློས་ཁྱིས་བྱས། ཁྱིས་མཇུག་མ་མེས་འཚིག་ལྟར་བྱུང་སོང་ང།
ད་ནི་མང་གཙོ་ཚད་དང་ལྡན་པ་ཞིག་ལ་འགྲོ་བསམ་ན་ཆོས་ལུགས་སྤྱི་འཐུས་འདི་དགོས་ཡག་མི་འདུག ཆོས་ལུགས་སྤྱི་འཐུས་ཡོད་པས་ཆོས་ལུགས་ཡར་རྒྱས་ལ་ཕན་ཐོགས་མེད་ལ། ཆོས་ལུགས་སྤྱི་འཐུས་མེད་པས་ཆོས་ལུགས་ཉམས་རྒུད་ལ་འགྲོ་མི་སྲིད། ལྷག་པར་ ད་ཡོད་ཆོས་ལུགས་སྤྱི་འཐུས་འདི་དག་གིས་མི་མང་ལ་མིག་དཔེ་བཟང་བོ་སྟོན་རྒྱུའི་ཚབ་ཏུ་མི་མང་ཞེ་མེར་ལངས་བཅུག་ཡོད། ཆོས་ལུགས་སྤྱི་འཐུས་འདི་མེད་ན་གྲོས་ཚོགས་ར་བ་དེ་ཞི་ཞིང་དིལ་བར་གནས་རྒྱུ་མ་ཟད། ཕྱོགས་ཞེན་འཐེན་འཁྱེར་དང་འུར་ཟིང་གི་རྙོག་མ་རྒྱུན་མི་ཆད་པ་དེའང་ལྷིང་འཇགས་ཚུལ་ལྡན་ལ་གནས་ངེས།
ད་རེས་ཀྱི་བཀའ་སྤྱིའི་འོས་བསྡུའི་ནང་གི་ཡ་མཚན་གཉིས་ནི། བོད་ནང་གི་ཨ་མདོ་སྤྱི་དང་རྔ་བའི་མི་མང་གིས་རྒྱ་གཞུང་ལ་ངོ་རྒོལ་ཤུགས་ཆེན་གནང་བཞིན་པ་ཕར་གཡུགས་ནས་བཙན་བྱོལ་ནང་གི་ཨ་མདོ་བ་ཚོའམ། འབྲས་སྤུངས་སྒོ་མང་དང་ཀརྟི་དགོན་བཅས་ཀྱིས་དར་དམར་ཅན་ཤར་ཕྱོགས་ཁུག་རྟའམ་བློ་བཟང་ཆོས་འབྱོར་སྤྱི་འཐུས་འདེམས་པ་ནི་བློ་ལ་འཁོར་དཀའ་བ་གཅིག་དང་། རྡ་རམ་ས་ལས་ལྷ་ཕབ་ནས་ཟླ་བ་ཚེ་རིང་གང་དུ་ཡོད་ཅེས་སྤྱི་རྒྱུ་སྒེར་བདག་ཅན་ལ་དམོད་མོ་བོར་ནའང་། བཙན་བྱོལ་ནང་གི་དབུས་གཙང་བས་ལྷ་མི་གཉིས་ཀྱི་དགོངས་པ་གཡུགས་ནས་ཟླ་བ་ཚེ་རིང་བསྐྱར་དུ་སྤྱི་འཐུས་འདེམས་པའང་ཡ་མཚར་དགོས་པ་ཞིག་རེད།
ཡ་མཚན་འདི་གཉིས་ཀྱི་རྒྱབ་ལོགས་སུ་གསང་བ་ཅི་ཞིག་སྦས་ཡོད་དམ།
སྤྱི་འཐུས་གྲོས་ཚོགས་དང་བཀའ་ཤག་གིས་དམིགས་བསལ་ཚོགས་ཆེན་ཚོགས་ནས། མ་འོངས་པའི་ལོ་ལྔ་དེ་འཐུས་ཤོར་གྱི་ལམ་དུ་མི་འགྲོ་བའི་ཐབས་ལམ་འཚོལ་རན་འདུག དེ་དང་ཆབས་ཅིག བོད་རྒྱ་ཆེའི་མི་མང་ལ་ཆོས་བརྒྱུད་སྤྱི་འཐུས་དགོས་དང་མི་དགོས་ཀྱི་འོས་བསྡུ་བྱེད་པའི་གོ་སྐབས་སྤྲོད་པའི་གདེང་ཚོད་ཅིག་མ་སླེབས་བར་དུ་གྲུབ་འབྲས་དང་ཆིག་སྒྲིལ་ཕྱོགས་ལ་རེ་བ་དེ་ཙམ་ཨེ་ཡོད། ད་བར་དུ་ཆོས་བརྒྱུད་སྤྱི་འཐུས་ཡོད་ནས་ང་ཚོར་ཕན་ཐོགས་འདི་བྱུང་ཟེར་བ་ཞིག་ཧ་ལམ་མེད། མི་དགོས་པའི་རྙོག་གླེང་མང་པོ་ཞིག་དེ་ཚོས་བྱས་ཡོད།
ཆོས་བརྒྱུད་སྤྱི་འཐུས་ཡོད་ནས་ང་ཚོར་ཕན་ཐོགས་འདི་བྱུང་ཟེར་བ་ཞིག་སྟོན་རྒྱུ་མྱེད་དོ། བོད་སྐྱོང་ལྷ་སྲུང་རྣམས་ཀྱིས་བསྟན་པ་ཡར་འཕེལ་ཐལ་བར་བརློག ཛཱྃ་ཧོྃ་བྷྱེ་ཏཐྱ་ཡ།
༅༅། བསྟན་འཛིན་ཀུན་མཁྱེན་ནས་རེ་འདུན་རྩོམ་དེ་གང་ལེགས་བྲིས་འདུག་ ཐུགས་རྗེ་ཆེ།
བཀའ་སྤྱི་གཉིས་ནས་ངེས་པར་དུ་ཡ་རབས་ཀུན་སྤྱོད་དམ་སྲུང་དགོས་རྒྱུ་ཁ་བཤད་ཙམ་མ་ཡིན་པར་
ལུས་ངག་ཡིད་གསུམ་ནས་ཡིད་ཟབ་དགོས་པ་གལ་གནད་ཆེ།
མགོ་འཁྲིད་མཁན་ལ་ཀུན་སྤྱོད་མེད་ན་མི་མང་དཀྱུས་མ་ལ་ཇི་ལྟར་སློབ་གསོ་བརྒྱབ།
ཡ་རབས་ཀུན་སྤྱོད་མིའི་བླ་སྲོག་རེད།
ཀུན་སྤྱོད་མེད་ན་མཐའ་ཤལ་བོང་བུ་རེད།
ཡོན་ཏན་ཡོད་མེད་ཀུན་སྤྱོད་ཉིད་ལ་ལྟོས།
ཀུན་སྤྱོད་མེད་ན་མཁས་པའི་གྲལ་མི་ཚུད།
ཆོས་ལུགས་ཀྱི་སྤྱི་འཐུས་མི་དགོས་པའི་རྒྱུ་མཚན་།
༡༽ཆོས་ལུགས་སྤྱི་འཐུས་ལ་འོས་འཕེན་མཁན་གྱི་གྲངས་འབོར་ཧང་ཅང་ཉུང་བ་།
༢༽གདན་ས་ཁག་གི་གཙོས་དགོན་སྡེ་ཁག་ནང་གྲྭ་བཙུན་གྱི་གྲངས་འབོར་ཉུང་དུ་འགྲོ་བཞིན་པ་།
༣༽གྲྭ་བཙུན་ཉུང་ཤས་ལས་མེད་པ་ཚོས་ཆོལ་ཁའི་སྤྱི་འཐུས་ལའང་འོས་འཕེན་གྱི་ཡོད་པར་མི་གཅིག་ལ་འོས་གཉིས་ཀྱི་མ་འོས་པའི་འགྲོ་ལུགས་།
༤༽བསྟན་པ་ཡར་འཕེལ་འདྲ་བའི་སྤྱི་འཐུས་ཀྱི་བྱེད་བབས་ཀྱི་གྲྭ་བཙུན་གྱི་ཆེས་མཐོང་སྲུང་སྐྱོབ་ཀྱི་ཚབ་ཏུ་མཐོང་ཚུལ་བཟོ་བཞིན་པའི་ངང་ཚུལ་།
༥༽ གྲྭ་བཙུན་བརྒྱ་གཉིས་བརྒྱས་འོས་འཕེན་པའི་མི་ཞིག་དང་མང་ཚོགས་ཁྲི་གཅིག་ཉེ་བའི་སྐུ་ཚབ་ཀྱི་དབང་ཚད་གཅིག་པའི་གནས་སྟངས་མི་དྲང་བ་དང་།
༦༽ དཔེར་མཚོན་གཞན་ཞིག་ཐོག་ནས་ཞུས་ན་དེང་དུས་ཆབ་སྲིད་ཀྱི་གོ་རྟོགས་ཡོད་པ་སྤྱི་འཐུས་ཀརྨ་ཡེ་ཤེས་ལྟ་བུར་འོས་གྲངས་སྟོང་ཕྲག་དགུ་ལྷག་པ་ཐོབ་ཀྱང་སྤྱི་འཐུས་ལ་མ་འཁོད་པ་དང་འོས་གྲངས་༢༠༠ ལྷག་ཙམ་ཐོབ་པའི་བསྟན་པ་ཡར་འཕེལ་ལྟ་བུ་སྤྱི་འཐུས་ལ་འོས་ཐོབ་པའི་གནས་སྟངས་དེ་ལྟ་བུ་གང་ནས་བལྟས་ཀྱང་ཆོས་ལུགས་སྤྱི་འཐུས་ཀྱི་དགོས་མཁོ་མ་མཐོང་།
༧༽ གལ་ཏེ་ཅི་ནི་གྲྭ་བཙུན་གང་ཞིག་ཆབ་སྲིད་ལ་འཇོན་ཐང་ཆེན་པོ་ཡོད་པ་མཐོང་བ་ཡིན་ན་གྲྭ་བཙུན་དེ་ཉིད་བོད་རིགས་ཤིག་ཡིན་ཕྱིན་་ཆོལ་ཁའི་ཐོབ་ཁུངས་ཤིག་ཡོད་པར་ཆོལ་ཁའི་སྤྱི་འཐུས་ཀྱི་ནང་འདེམས་ཆོག་པ་བཅས་སོ་།
ཆོས་ལུགས་ཀྱི་སྤྱི་འཐུས་མི་དགོས་ཟེར་ནས་ནག་ཁུང་ནས་ལྐོག་མདའ་འཕེན་མ་སྡོད། བདེན་པའི་གནས་ལུགས་བཤད་སྤོབས་ཡོད་ན་གདོང་དངོས་སུ་ཐོན་ནས་ཤོད་དང་ཕོ་ཁྱོ་ཀ་རེད། གཞན་མྱི་ཐ་མའི་ལས་ཀ་དེ་ཚོ་དུས་ཚོད་འཕྲོ་བརླགས་ལས་ཅི་ཨེ་འདུག་གམ།
ད་ལོ་འོས་བསྡུའི་ནང་ཆོལ་ཁའི་ཞེན་ཁོག་མ་གཏོགས་ཆོས་ལུགས་ཀྱི་ཞེན་ཁོག་མི་འདུག བློ་སེང་དང་སྤེན་ཚེ་གཉིས་ཆ་དགེ་ལུགས་རེད། ཞེན་ཁོག་དེ་མདོ་སྟོད་སྨད་ཀྱི་ཞེན་ཁོག་ལྟ་བུ་ཆགས་སོང་། དེའི་རྒྱུ་རྐྱེན་གཙོ་བོ་དེ་སྦིར་ཨྱོན་སྟོབས་རྒྱལ་གྱིས་དྲ་ལམ་ནང་ལ། སྤེན་ཚེ་ཁམས་པ་ལ་མི་དགའ་རབས་བཤད་སོང་། དངོས་གནས་བྱས་ན་བོད་པ་ཞིག་ཡིན་ཕྱིན་མདོ་དབུས་ཁམས་གསུམ་ལ་ཁྱད་པར་ཅི་ཡོད། ཨྱོན་སྟོབས་རྒྱལ་ཁོ་རང་ཤེས་ཡོན་དམན་པའི་དབང་གིས་དེ་ལྟར་བཤད་པ་རད།
ཆོས་ལུགས་སྤྱི་འཐུས་མི་དགོས་པའི་རྒྱུ་མཚན་ལས་ལྷག་པ་ཞིག་ཆོལ་ཁའི་སྤྱི་འཐུས་མི་དགོས་པ་ལ་ཡོད། དངོས་གནས་དགོས་པ་དེ་གཞོན་ནུ་ཚོགས་པ་དང་། དབུ་མའི་ལམ་གྱི་ཚོགས་པ་སོགས་ཆབ་སྲིད་ལངས་ཕྱོགས་མི་འདྲ་བ་ཡོད་པའི་ཆབ་སྲིད་ཚོགས་པའི་སྤྱི་འཐུས་ཡོད་དགོས་པ་རེད། མང་གཙོ་ངོ་མ་ཞིག་ཡིན་ཕྱིན་ལྟ་བ་དང་ལངས་ཕྱོགས་མི་འདྲ་བའི་རིགས་པའི་གཞུང་ལུགས་ཡོད་དགོས་པ་མ་གཏོགས་ས་ཁུལ་ལུང་ཚན་ཆོས་བརྒྱུད་སོགས་ཀྱི་སྤྱི་འཐུས་བདམས་རུང་དོན་དུ་ལུག་ཁྱུ་གཅིག་ལྟ་བུ་རེད། ཆོལ་ཁའི་སྤྱི་འཐུས་ཀྱང་མི་གྲངས་མང་ཉུང་གིས་སྟེང་ནས་བཤད་ཚེ་དབུས་གཙང་མངའ་རིས་དང་བཅས་པས་བཙན་བྱོལ་བོད་མིའི་མི་འབོར་གྱི་ཆ་ཤས་མང་ཆེ་བ་ཟིན་གྱི་ཡོད། དབུས་གཙང་དང་མངའ་རིས་སོགས་སུ་དབྱེ་དགོས་པ་དེ་ཡང་གལ་ཆེན་པོ་རེད། མདོ་སྨད་ལྟ་བུ་དེ་དང་བསྡུར་ན་སྤྱི་འཐུས་ཀྱི་གྲངས་མང་ཉུང་གིས་འགྲིགས་མེད། དབུས་གཙང་དང་མངའ་རིས་ལོགས་སུ་དབྱེ་དགོས་པ་དེ་ཡང་ལོ་རྒྱུས་ཀྱི་སྟེང་གི་གནད་དོན་ཡིན་སྟབས་སྣང་མེད་དུ་འཇོག་རུང་བ་ཞིག་མིན།
དབུས་གཙང་དང་མངའ་རིས་ལོགས་སུ་དབྱེ་དགོས་པ་དེ་ཡང་ལོ་རྒྱུས་ཀྱི་སྟེང་གི་གནད་དོན་ཡིན་སྟབས་སྣང་མེད་དུ་འཇོག་རུང་བ་ཞིག་མིན།༽ ཟེར་བ་ནང་ལྟར། རྒྱལ་རོང་་་ལའང་ཆོལ་ཁའམ་མངའ་སྡེ་ཞིག་གི་ཐོབ་ཐང་དགོས་པ་ལྟ་བུ་ཡོད་རེད། དུས་རྒྱུན་ཁ་རྒྱུན་དང་ཡིག་ཆ་རྙིང་པ་མང་པོར། སྨད་ཨ་མདོ་རྒྱལ་རོང་ཡན་ཆོད་ཞེས་གསལ་ཁ་གཏོད་ནས་བྲིས་ཡོད་པས་དེ་ལྟར་བྲིས་པ་ལ་རྒྱུ་མཚན་ངེས་ཅན་ཞིག་ཡོད་པར་སེམས། རྒྱལ་རོང་ལུང་པས་ལོ་རྒྱུས་ཐོག་བྱས་རྗེས་ཆེན་པོ་ཞེ་དྲགས་བཞག་འདུག་སྟེ། བོད་མི་མང་པོས་དེའི་སྐོར་ཤེས་མཁན་ཧ་ཅང་ཧ་ཅང་ཉུང་ཉུང་རེད། རྒྱལ་རོང་བ་ཚོ་ལོ་རྒྱུས་ཀྱི་སྟེགས་བུའི་ཐོག་རང་མི་རིགས་ཀྱི་ངོ་བོ་གསལ་པོར་སྟོན་ནས་ཡར་ལངས་ཤོག་ཨ། །
འགའ་ཞིག་གིས་ཆོས་ལུགས་སྤྱི་འཐུས་མི་དགོས་ཟེར། དེ་དག་ནི་ཆོས་རྒྱུད་བྱེ་བྲག་པ་ཞིག་གི་ཕྱོགས་གཏོགས་པ་ཞིག་ཡིན་པ་དང། ཆོས་ལུགས་སྤྱི་འཐུས་མི་དགོས་ཟེར་བ་དང་སྲིད་སྤྱི་གཉིས་ཀ་ཆོས་རྒྱུད་བྱེ་བྲག་པ་ཞིག་ནས་ཡིན་དགོས་ཟེར་བ་དང་གཅིག་པ་རེད། ཆོས་ལུགས་སྤྱི་འཐུས་མེད་པར་བྱེད་འདོད་ན་དེ་ནི་མི་འབོར་མང་བའི་ཆོས་རྒྱུད་བྱེ་བྲག་པ་ཞིག་ལ་བཙན་བྱོལ་སྒྲིག་འཛུགས་འདི་ཉིད་དབང་ཆ་ཆ་ཚང་སྤྲད་པ་དང་དོན་གཅིག་པ་རེད། ཆོས་ལུགས་སྤྱི་འཐུས་མེད་པར་བཟོས་ན། མགོ་དགའ་ལྡན་ཕོ་བྲང་ནས་བཀའ་ཤག་དང་གྲོས་ཚོགས་སོགས་བཙན་བྱོལ་སྒྲིག་འཛུགས་ཀྱི་ལྷན་ཁང་ཐམས་ཅད་དབྱིན་སྐད་དུ་བརྗོད་ན་ཆོས་ལུགས་བྱེ་བྲག་པ་ཞིག་གིས་occupay བྱས་པ་རེད། འོན་ཀྱང་རི་བོང་ཅལ་འགྲོག་གི་ཚུལ་དུ་བཟུང་བའི་མི་མང་པོ་ཞིག་གི་ཚོར་བར་དེ་འདྲ་བསམ་ཐུབ་ཀྱི་ཡོད་པ་མ་རེད།
མ་འོངས་པར། ཆོལ་ཁ་གསུམ་ལས་ལོགས་སུ། མངའ་རིས། བྱང་རིགས་ཧོར་འཚོ། སྤོ་ཀོང་གཉིས། རྒྱལ་རོང་། མི་ཉག་བཅས་ལ་སྡེ་ཚན་ལོགས་སུ་ཕྱེ་དགོས་འདུག
དྲ་གྲོགས་ཚོ་ལ་ཞུ་རྒྱུ། ཆོས་ལུགས་དང་ཆོལ་ཁ་སྐད་ཆ་མ་བཤད་གོང་དང་ཐོག་ང་ཚོ་ཡུལ་གྱར་བ་ཡིན་པ་མ་བརྗེད། དེང་སང་གཞོན་སྐྱེས་ཚོས་སྣང་བ་དར་ནས་དམངས་གཙོ་དང་རང་དབང་ཡོད་མདོག་གྱིས་གང་བྱུང་བྱ་ན་འགྲིག་འཁུལ་བསྒྲགས་བཞིན་འདུག མནོ་བསམ་ཡག་པོ་མ་བཞེས་ཚེ་ང་ཚོའི་གནས་ཚང་རྒྱ་གར་གཞུང་ནས་ཅི་བྱ་གཏོལ་མེད་བཟོ་རྒྱུ་ལས་སླ་པོ་རེད་གདའ། ཁེ་ས་རྡ་སར་ཚོགས་འདུ་ནང་རྒྱ་རིགས་ཚོགས་བཅར་བ་འགའ་ལ་ཐོག་མར་མཐོང་ཆེན་ཝི་ས་སྤྲད་ཡོད་ནའང་། རྗེས་སུ་ཕྱིར་འཐེན་བྱས་ཡོད་པ་ཀུན་གསལ་ཡིན། མདོར་བསྡུས་ནས་བཤད་ན་འགྲོ་བཟའ་འདོད་མཁས་བྱ་ན་ལས་དཀའ་ངལ་འཕྲད་སྲིད་པས་བཙན་བྱོལ་བོད་མི་ཚང་མས་དགོངས་པ་རྒྱ་ཆེ་བཞེས་དགོས་པ་ཡིན།
སྤྱི་འཐུས་གྲོས་ཚོགས་ནས་ཆོས་ལུགས་སྐུ་ཚབ་དགོས་མིན་དྲ་གྲོགས་ནས་དགོངས་འཆར་འདྲ་མིན་བཀོད་འདུག་ནའང། ངེད་བསམ་པར་ད་ལྟ་ང་ཚོ་བཙན་བྱོལ་ནང་ཡོད་སྟབས་ཆོས་ལུགས་དང་ཆོལ་ཁའི་སྐུ་ཚབ་མཚོན་དོན་ནི་ཆེས་གལ་ཆེ་ཡིན་སྟབས་རང་འཇགས་བཞག་ན་སྐྱོན་དེ་ཙམ་མ་མཐོང། འོན་ཀྱང་དགེ་འདུན་པ་ནས་ཆོས་ལུགས་དང་ཆོལ་ཁ་གཉིས་ཀར་འོས་འཕེན་པའི་ཐོབ་ཐང་དེ་དག་སྒྲིག་ཁྲིམས་བསྐྱར་བཅོས་བྱ་གལ་ཆེ། འོས་ཆོས་ཚང་བའི་བོད་མི་སུ་ཡིན་རུང་མི་གཅིག་ལ་འོས་གཅིག་ལས་གཉིས་ཐོབ་ཐང་མེད་པ་བཟོ་དགོས། དེར་བརྟེན་དགེ་འདུན་པ་སོ་སོ་ནས་ཆོས་ལུགས་སམ་ཆོལ་ཁ་གང་རུང་ནང་འོས་ཤོག་འཕེན་རྒྱུའི་འདམ་ག་སྤྲོད་ན་རྒྱུ་མཚན་དུ་མཐོང་བ་མ་ཟད། ད་ལྟའི་ཆོས་ལུགས་དང་ཆོལ་ཁའི་ཞེན་འཁོག་གི་ལབ་གླེང་ཅུང་ཉུང་དུ་འགྲོ་ངེས་ཡིན།