བརྒྱུད་གཏོང་བ། འཇམ་དཔལ་གཞོན་ནུ།
ཐེངས་འདིར་རྒྱལ་ཁབ་ ༢༠༠ ཙམ་གྱི་དབུ་ཁྲིད་རྣམ་པས་རྒྱལ་སྤྱིའི་ཁོར་ཡུག་ལྷན་ཚོགས་ཀོབ་ ༢༡ COP21 ཚོགས་ནས་གོ་ལའི་གནམ་གཤིས་ཚ་དྲོད་ཀྱི་ཚད་གཞི་སེལ་ཤི་སི་ 2.0C ལས་མི་བརྒལ་བར་གནས་ཐུབ་ཐབས་ཆེད་གྲོས་མཐུན་བྱུང་བ་བརྒྱུད་གོ་ལའི་གནམ་གཤིས་འགྱུར་ལྡོག་ལ་གདོང་ལེན་གནང་བར་བོད་མིའི་སྒྲིག་འཛུགས་ཀྱིས་དགའ་བསུ་ཞུ་རྒྱུ་ཡིན། འོན་ཀྱང་བོད་མཐོ་སྒང་གི་ཁོར་ཡུག་གནས་སྟངས་ཐོག་བསམ་ཞིབ་མ་གནང་ཚེ་གོ་ལ་སྤྱིའི་གནམ་གཤིས་འགྱུར་ལྡོག་གི་དཀའ་ངལ་རྟོགས་ཐབས་བྲལ། གོ་ལའི་གནམ་གཤིས་འགྱུར་ལྡོག་ལ་གདོང་ལེན་བྱེད་སྐབས་འཛམ་གླིང་ཡང་ཐོག་ཏུ་གྲགས་པའི་བོད་མཐོ་སྒང་དེ་ཁོར་ཡུག་གི་ཐོག་ནས་ས་བབ་ཧ་ཅང་གནད་འགག་ཆེན་པོ་ཞིག་ཆགས་ཡོད།
དེ་ཡང་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་གསུང་དོན། པེ་རི་སིར་གྲོས་མཐུན་བྱུང་བ་དེ་ཁ་ཕྱོགས་མ་ནོར་བའི་གོམ་སྟབས་ཤིག་ཡིན། འོན་ཀྱང་དེ་གོམ་པ་དང་པོ་ལྟ་བུ་ཡིན། གལ་ཏེ་འཛམ་གླིང་དབུ་ཁྲིད་རྣམས་ལ་གོ་ལའི་ཁོར་ཡུག་སྲུང་སྐྱོབ་ཆེད་དོན་དམ་གྱི་ཐུགས་འཚབ་ཡོད་ཚེ་གོ་ལའི་ཁོར་ཡུག་གི་གནས་སྟངས་རྒྱུན་སྲིང་ཐུབ་རྒྱུར་བོད་མཐོ་སྒང་དེ་ཧ་ཅང་གནད་འགག་ཆེན་པོ་ཡིན་པར་ངོས་འཛིན་ཞུ་དགོས། ཐེངས་འདིར་པེ་རི་སིར་སྲིད་གཞུང་རྣམ་པས་གྲོས་མཐུན་བྱུང་བ་དེའི་ནང་ཤིང་ནགས་སོགས་བདག་གཅེས་ཐོག་རྒྱ་སྐྱེད་གནང་ནས་ཁ་རླུང་སྦགས་བཙོག་ལ་གདོང་ལེན་གནང་རྒྱུའི་འཆར་གཞི་གསལ་ཡོད།
བོད་ལ་མཚོན་ན་ཤིང་ནགས་ཧ་ཅང་ཕོན་ཆེ་གཅོད་འབྲེག་བྱས་པའི་ཉེར་ལེན་ལ་བརྟེན་ནས་གནམ་གཤིས་འགྱུར་ལྡོག་ལ་ཤུགས་རྐྱེན་ཆེན་པོ་བཟོས་ཡོད། བོད་ནང་སྐབས་ཤིག་ལ་ས་ཁྱོན་ཧེཀ་ཊར་ hectares ས་ཡ་ ༢༥།༢ ཙམ་ཤིང་ནགས་ཀྱིས་ཁེངས་ཡོད། རྒྱ་ནག་གཞུང་གིས་ཚོད་དཔག་བྱེད་སྐབས་བོད་ཀྱི་ཤིང་ནགས་བརྒྱ་ཆ་ ༨༠ ཙམ་རྩ་མེད་བཏང་ཟིན།
སྤྱིར་རྒྱ་ནག་གཞུང་གིས་ཕྱི་ལོ་༢༠༣༠ བར་མཁའ་དབྱིངས་ནག་རྫས་དུག་རླངས་ཚོད་འཛིན་བྱས་ནས་ཉེན་ཁ་མེད་པ་བཟོ་རྒྱུའི་ཁས་ལེན་བྱས་པ་དེར་དགའ་བསུ་ཞུ་འོས་པ་ཞིག་ཡིན། འོན་ཀྱང་ལས་དོན་དེ་བོད་ཀྱི་ཁོར་ཡུག་ཉམས་ཉེས་སུ་བཏང་ནས་སྒྲུབ་ཐབས་བྱེད་མི་རུང་ལ་རྒྱ་ནག་གཞུང་གིས་ཆུ་ཤུགས་ཐོན་ཁུངས་སྐྲུན་ཆེད་ཆུ་མཛོད་ཆེ་རུ་གཏོང་རྒྱུའི་འཆར་གཞི་དེ་ཡང་དཀའ་ངལ་སེལ་རྒྱུའི་ཐབས་ལམ་ཞིག་མ་རེད། ད་བར་རྒྱ་ནག་གཞུང་གིས་བོད་ཀྱི་རྒྱུག་ཆུ་ཆེ་ཁག་ཚང་མའི་ཐོག་ཆུ་མཛོད་བརྒྱབ་ཡོད་པ་མ་ཟད། ད་དུང་མུ་མཐུད་ཆུ་མཛོད་རྒྱག་རྒྱུའི་འཆར་གཞི་འདིང་བཞིན་ཡོད། ཆུ་མཛོད་དེ་དག་མ་རྒྱག་གོང་ཁོར་ཡུག་ལ་གནོད་སྐྱོན་ཇི་འདྲ་ཕོག་རྒྱུ་ཡིན་མིན་སོགས་ཀྱི་ཐད་གོ་བསྡུར་སྦྱང་བཤད་ཡག་པོ་ཞིག་མ་བྱས་ཚེ་ཆུ་ཤུགས་ཐོན་ཁུངས་དེ་དག་གིས་ཁོར་ཡུག་ཐོག་གསབ་ཏུ་མེད་པའི་ཉེན་ཚབས་ཧ་ཅང་ཆེན་པོ་བཟོ་སྲིད། སྤྱིར་རྩ་ཐང་ཐོག་འབྲོག་པ་ཚོས་གནས་གཅིག་ནས་གཅིག་ལ་སྤོ་རྒྱུའི་སྲོལ་རྒྱུན་དེས་སྐམ་སའི་སྲུང་སྐྱོབ་ཆེད་ཕན་ཐོགས་ཧ་ཅང་ཡོད།
འོན་ཀྱང་སྟབས་མ་ལེགས་པ་ཞིག་ལ་རྒྱ་ནག་གཞུང་གིས་བོད་མི་འབྲོག་པ་རྣམས་བཙན་དབང་འོག་གཞིས་སྤོ་བྱེད་འཇུག་བཞིན་ཡོད། དེར་བརྟེན་ད་བར་བོད་མི་འབྲོག་པ་ས་ཡ་གཉིས་ལྷག་རྩ་ཐང་ནས་གཏན་འཇགས་གྲོང་ཚོར་གནས་སྤོས་ཟིན། ང་ཚོས་རྒྱ་ནག་གཞུང་གིས་བོད་མི་འབྲོག་པ་རྣམས་གནས་སྤོ་བྱ་རྒྱུ་འཕྲལ་མར་མཚམས་འཇོག་བྱེད་དགོས་པ་མ་ཟད། དེ་སྔ་རྩ་ཐང་ནས་འབྲོག་པ་ཕྱིར་འབུད་ཟིན་པ་རྣམས་སླར་ཡང་རྩ་ཐང་དུ་འཚོ་བ་བསྐྱལ་ཆོག་པ་བཟོ་དགོས་པའི་རེ་འདུན་ཞུ་རྒྱུ་ཡིན།
དེ་ཡང་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་གསུང་དོན། བོད་མི་ཚོར་སོ་སོའི་ས་ཆའི་ཐོག་གནས་ཚུལ་གང་བྱུང་བ་དེར་ཐད་བྱུས་བྱ་རྒྱུའི་ཐོབ་ཐང་དགོས། བོད་མི་འབྲོག་པ་ཚོར་རྩ་ཐང་བདག་གཅེས་དང་སྲུང་སྐྱོབ་ཐོག་ཉམས་མྱོང་ཧ་ཅང་ཡོད། ཁོང་ཚོར་རང་གི་ཕ་མེས་ནས་བརྒྱུད་པའི་རྩ་ཐང་གི་ཉམས་མྱོང་རྣམས་ལག་བསྟར་བྱས་པ་བརྒྱུད་རྩ་ཐང་བདག་གཅེས་བྱེད་བཞིན་ཡོད། དེར་བརྟེན་གནམ་གཤིས་འགྱུར་ལྡོག་གི་དཀའ་ངལ་ལས་སྲུང་ཆེད་འབྲོག་པའི་རྩ་ཐང་ཐོག་འཚོ་བ་སྐྱེལ་རྒྱུའི་ཉམས་མྱོང་དེ་དག་ལས་བློ་སྐྱེས་ལེན་དགོས། ཞེས་གསུངས།
སྤྱིར་པེ་རི་སིའི་ལྷན་ཚོགས་སྐབས་བཞག་པའི་གྲོས་མཐུན་དེའི་མཐའ་མའི་ཟིན་བྲིས་སྐབས་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་གནད་དོན་སྐོར་འཁོད་པ་དེ་དག་སུབ་ཡོད་ཀྱང་གྲོས་མཐུན་དེའི་འོག་བོད་མིས་གཙོས་གོ་ལའི་གནམ་གཤིས་འགྱུར་ལྡོག་ལ་བརྟེན་ནས་ཐད་ཀར་དཀའ་ངལ་འཕྲད་མཁན་མི་རིགས་རྣམས་ངེས་པར་དུ་སྲུང་སྐྱོབ་བྱེད་ཐུབ་དགོས། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་སྲུང་སྐྱོབ་ཚན་པའི་འགན་འཛིན་མཆོག་གིས་གསུང་དོན། གདོད་མའི་མི་རིགས་དང་ཕྱི་མི་གནས་སྤོ་བྱས་པ། རྒས་འཁོགས། གྲངས་ཉུང་མི་རིགས། ཕྲུ་གུ། དབང་པོ་སྐྱོན་ཅན། བཙན་དབང་འོག་གནས་མཁན། བུད་མེད་སོགས་གོ་ལའི་གནམ་གཤིས་འགྱུར་ལྡོག་དཀའ་ངལ་ལས་ངེས་པར་དུ་སྲུང་སྐྱོབ་བྱེད་དགོས། ཞེས་གསུངས། །