གསར་འགོད་གསལ་བསྒྲགས།

ཕྱི་དྲིལ་གསར་འགོད་འབྲེལ་མཐུད་པ།
 
༄༅།། བོད་གངས་ཅན་ལྗོངས་ཀྱི་ལྷ་སྐལ་ཕྱག་ན་པད་མོའི་རྣམ་སྤྲུལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་གྱ་ལྔར་ཕེབས་པའི་༸སྐུའི་འཁྲུངས་སྐར་དུས་བཟང་འདིར། རང་ཅག་བོད་མི་རྣམས་ནས་༸རྒྱལ་བའི་བཀའ་དྲིན་རྗེས་དྲན་གྱི་ལོར་སྲུང་བརྩི་གཟབ་རྒྱས་ཞུ་རྒྱུ་ཡིན་པ་དང་། དེ་བཞིན་བོད་ཀྱི་ཟློས་གར་ཚོགས་པ་དབུ་བརྙེས་ཏེ་མི་ལོ་ ༦༡ འཁོར་བའི་དུས་བཟང་གཉིས་འཛོམས་དང་བསྟུན། འདི་ལོར་སྐྱེ་འགྲོ་རྣམས་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ཀྱིས་གདུང་བའི་མནར་ཞིང་། སེམས་ལ་འཇིགས་སྣང་དང་དངངས་སྐྲག་སོགས་རྣམ་རྟོག་འཆར་སྒོ་ཇི་སྙེད་ཅིག་འཕྲད་བཞིན་པ་དག་ཞི་བའི་སླད། འདི་ག་བོད་ཀྱི་ཟློས་གར་ཚོགས་པའི་དབྱར་སྐྱིད་རྐང་བྲོ་གླུ་གཞས་འགྲན་སྡུར་འདི་ཉིད། ཕྱི་དྲིལ་བོད་ཀྱི་བརྙན་འཕྲིན་བརྒྱུད་རྒྱ་ཆེ་མང་ཚོགས་ལ་སེམས་ཀྱི་སྨན་མཆོག་༸རྒྱལ་བ་དགྱེས་པའི་མཆོད་སྤྲིན་དུ་གཟིགས་འབུལ་ཞུ་རྒྱུ་ལགས་ན། བོད་རྒྱལ་ལོ་ ༢༡༤༦ རབ་གནས་ལྕགས་བྱི་ལོའི་བོད་ཟླ་ ༥ ཚེས་ ༡༡ དང། ཕྱི་ལོ་ ༢༠༢༠ ཟླ་ ༧ ཚེས་ ༡ རེས་གཟའ་ལྷག་པ་སྟེ་ལྷག་དཀར་ཉིན་གྱི་ཕྱི་དྲོའི་ཆུ་ཚོད་ ༥ ཐོག་ཐད་སྲིང་ཞུ་རྒྱུ་ཡིན་པས་ལྷན་རྒྱས་གཟིགས་རྒྱུ་མ་མཉེས་པ་ཞུ། བོད་ཀྱི་ཟློས་གར་ཚོགས་པའི་དབྱར་སྐྱིད་ནི། ལོ་རབས་དྲུག་ཅུའི་སྨད་ཙམ་ནས་འགོ་འཛུགས་ཞུས་ཏེ། བྲོ་པ་རྒན་གཞོན་བར་གསུམ་གྱིས་རྣམ་དཔྱོད་ཀྱི་རྩལ་འདོན་སའི་གར་སྟེགས་ཤིག་དང་། སྲོལ་རྒྱུན་བོད་ཀྱི་ཡུལ་ལུང་ཁག་གི་རྐང་བྲོ་གླུ་གཞས་འཁྲབ་སྲོལ་བཅས་ལ་ཉམས་ཞིབ་དང་དཔྱད་བསྡུར་གནང་སྟེ། རྒྱལ་ལུ་རུ་ཁག་དང་རྔོན་པ་རུ་ཁག་བར་རྟིང་རྩོད་ཀྱིས་འགྲན་སྡུར་གནང་གི་ཡོད་ལ། གདོད་མ་ནས་བརྒྱུད་པའི་བོད་ཀྱི་བཞད་གད་གཏམ་གླེང་དང་གཏམ་བརྗོད་ཟློས་གར་སོགས་ཀྱང་འཁྲབ་ཀྱིན་ཡོད།