ལྷོ་ཕྱོགས་ཉི་ཟླ།
སྤྱིར་གསར་འགོད་པ་ཞིག་ལ་མཚོན་ན་འགན་འཁྲི་ཆེ་བ་མ་ཟད་རང་དབང་ཆ་ཚང་ངེས་པར་དུ་དགོས་བ་ཞིག་རེད། རྒྱ་ནག་གི་མཚོན་པའི་རྒྱལ་ཁབ་རིགས་ཁ་ཤས་ཞིག་གིས་སྤྱི་ཚོགས་ནང་དུ་རྫུན་གཏམ་དང་འཁྱོག་གཏམ་སྣ་ཚོགས་པ་ཞིག་སྤེལ་ཅི་ཐུབ་བྱེད་ཀྱིན་ཡོད་པ་མ་ཟད་གསར་འགོད་པ་ཚོ་ཡང་རང་དབང་དང་ཐོབ་ཐང་ཆ་ཚང་འཕྲོག་ནས་སྤྱི་ཚོགས་ནང་དུ་མི་མང་ལ་མགོ་བསྐོར་བསླུ་བྲལ་གཏོང་ཐབས་བྱེད་རྒྱུ་ནི་གཙོ་བོ་གསར་འགོད་པ་ཚོ་ལ་འགན་ཆེན་པོ་སྤྲད་འདུག
ང་ཚོའི་བོད་པའི་བཙན་བྱོལ་གྱི་སྤྱི་ཚོགས་འདི་དེ་ལྟར་མ་ཡིན་པར༸གོང་ས་མཆོག་གིས་བཀའ་དྲིན་ཉག་གཅིག་གི་རང་དབང་དང་མང་གཙོ་ཚད་དང་ལྡན་པ་ཞིག་མི་མང་ལ་གསོལ་རས་བསྩལ་བཞག་པ་ཞིག་རེད། འདི་ནི་ལོངས་སུ་སྤྱོད་རྒྱུ་འདི་མིའི་རིགས་ཚང་མ་ལ་ཆ་མཐུན་དུ་ཐོབ་ཐང་ཡོད་བསྡད་པ་ཞིག་རེད།
བཙན་བྱོལ་ཁྲོད་ཀྱི་གསར་འགོད་པ་ཞིག་ཡིན་ན་ཡང་རང་དབང་དང་ཐོབ་ཐང་ཆ་ཚང་བ་ཞིག་རང་ཉིད་ལ་དབང་བསྡད་ཡོད་པ་འདི་ངོ་ཤེས་བའི་སྟེང་ནས་དངོས་པོའི་གནས་ཚུལ་དང་དྲང་མོར་དྲང་བཞག་གི་གསར་འགོད་གསར་བསྒྲག་བྱེད་རྒྱུ་འདི་བླ་ན་མེད་པའི་འོས་འགན་དང་འཁྲི་ཆེ་ཤོས་ཞིག་རེད།
དེ་མིན་མི་ལ་ཆ་འཇོག་བྱས་ནས་དེ་ཙམ་གྱི་སྐད་ཆ་དེ་ལ་བདག་པོ་རྒྱབ་ནས་རང་ཉིད་ཀྱི་བརྟག་དཔྱད་མ་བྱས་པར་སྤྱི་ཚོགས་ནང་དུ་ཁྱབ་སྤེལ་བྱས་ན་དེ་ནི་ཆེས་མི་མཐུན་པ་མ་ཟད་སྤྱི་ཚོགས་ནང་དུ་ཡང་རྡབ་སིག་གཏོང་བའི་ཉེན་ཁ་ཆེ་བས་གསར་འགོད་པ་ཚོའི་འགན་འཁྲི་དེ་རྣམ་དཔྱོད་དང་དྲང་བདེན་གྱི་སྒོ་ནས་ཁུར་རྒྱུ་ཞེ་དྲག་དགོས་གལ་ཆེ་བར་མཐོང་།
ཁ་སྔོན་སྐབས་བཅུ་བཞི་བའི་གྲོས་ཚོགས་མཐའ་མ་ཚོགས་སྐབས་སུ་སྤྱི་ཚོགས་ནང་དུ་གླེང་གཞི་འདྲ་མིན་སྣ་ཚོགས་ཞིག་ཡོང་ཡོད་པས་དེ་ནི་གཅིག་ནས་གསར་འགོད་པ་ཚོའི་ཞན་ཆ་ཞིག་ཡིན་པ་མ་ཟད་གཉིས་ནས་རླུང་འཕྲིན་ཁང་གི་འགན་འཛིན་པ་དེ་ཚོའི་ཡང་ཉེས་སྐྱོན་ཞིག་རེད།
དེང་སང་རྗེས་ནས་སྤྱི་འཐུས་ཚོ་ས་གནས་སོ་སོར་ཕེབས་ནས་ཁ་སྔོན་གྲོས་ཆོད་ཀྱི་དགོངས་དོན་དག་མི་དམངས་ཚོར་གསར་བསྒྲག་བྱེད་དང་བྱེད་བཞིན་པ་རེད། ཁ་སྔོན་དྲ་ཚིགས་དང་རླུང་འཕྲིན་སོགས་བརྒྱུད་རིམ་མང་པོ་ཞིག་ནས་དཀྲོག་གཏམ་སྣ་ཚོགས་པ་ཞིག་སྤྱི་ཚོགས་ནང་དུ་གླེང་སློང་དང་དོགས་གཞི་ཆེ་བས་རིགས་དེ་དག་དེ་རིང་ཁ་སང་ཞི་འཇམ་ངང་འགྲོ་དགོས་བ་འདི་རྒྱུ་མཚན་ཅི་ལ་ཐུག་ཡོད་དམ། འདི་ལ་ཡང་ཐུགས་བསམ་རེ་བཞེས་དགོས་རྒྱུ་གལ།
དེ་དང་དེ་མཚོན་པའི་དངོས་བོའི་གནས་ཚུལ་ལ་ཞིབ་འཇུག་མ་བྱས་པར་གཡམ་རྒྱུག་རྐྱང་རྐྱང་བྱས་བསྡད་ན་བོད་རང་ཡིན་ན་ཡང་གྱོང་རྐྱང་རྐྱང་མ་གཏོགས་ཁེ་ཞིག་ཡོང་ཐབས་བྲལ་བས་རྒྱལ་སྤྱིའི་རྩོམ་པ་པོ་དང་གསར་འགོད་པ་དང་སྤྱི་ཚོགས་ཀྱི་བདེ་སྡུག་ལ་བསམ་བློ་གཏོང་མཁན་ཚང་མའི་ཁུར་མཉམ་ལེན་ཐོག་དྲང་བདེན་དང་དངོས་བོའི་གནས་ཚུལ་སོགས་ལ་གཞི་བཅོལ་ནས་སོ་སོའི་འགན་གཙང་མ་ཞིག་ཁུར་རྒྱུ་འདི་རང་མི་རིགས་ཀྱི་བདེ་སྡུག་ངོ་མ་ཞིག་ལ་ཐུག་ཡོད་པས་ཚང་མའི་ཐུགས་བསམ་རེ་བཞེས་རྒྱུ་གལ།
ལྷོ་ཕྱོགས་ཉི་ཟླ་འདི་དངོས་གནས་དོན་མཐུན་གྱི་ཉི་ཟླ་རང་རེད། ཁོའི་སོར་རྩེ་ལས་བབས་པའི་ཁྲག་ཐིག་རེ་རེ་ནི་འོད་དུ་འཚེར་བའི་མིའི་རིགས་ཀྱི་ལྗགས་ཕྱེ་གྱ་ནོམ་པ་རེ་རེས་གྲུབ་འདུག དེ་བས་ཀྱང་ཁོང་ནི་སྒམ་ཚུགས་ཅན་དང་བློ་མིག་ཅན་ཞེས་པའི་ཐ་སྙད་འདིའི་དོན་སྙིང་གིས་བརྟས་པའི་རྩོམ་པ་པོ་ཞིག་ཡིན་སྟབས། འོས་ཤིང་འཚམ་པའི་འགན་འཁྲིའི་ར་བ་ལས་ཅུང་ཙམ་ཡང་མི་བརྒལ་བ་དེས། ཀློག་པ་པོར་མཚོན་ན་ཆེས་གུས་བརྩི་བྱ་འོས་པ་ཞིག་རེད་སྙམ