གསར་འགོད་མཐུན་ཚོགས་ནང་མཉམ་ཞུགས་བྱ་དགོས་ཀྱི་འདུག

ཨ་རིག་འགྱུར་མེད།
གསར་འགྱུར་སྙིང་བསྡུས།
ཟླ་འདིའི་ཕྱི་ཚེས་ ༡༥ ཉིན་བོད་ཀྱི་གསར་འགོད་མཐུན་ཚོགས་ཀྱི་ཚོགས་ཆེན་ཐེངས་དྲུག་པ་དེ་ཉིད། ངྷ་སའི་ཉེ་འཁོར་གྱི་ས་གནས་པ་ལམ་པུར་གྱི་ནེའུ་གྷལ་སྤྱི་གླིང་དུ་ (Neugal Park) སྐོང་འཚོག་གནང་སྟེ། ཚོགས་ཆེན་སྟེང་སྐབས་དྲུག་པའི་རྒྱུན་ལས་རྣམས་གསར་འདེམས་བྱས་ཡོད་ལ། ཐེངས་འདིར་གསར་དུ་བདམས་ཐོན་བྱུང་བའི་རྒྱུན་ལས་རྣམས་ནི།
ཨ་རིའི་རླུང་འཕྲིན་ཁང་གི་གསར་འགོད་པ་ལྷག་པ་སྐྱིད་འཛོམས། ༼ ཚོགས་གཙོ། ༽
ནོར་ཝེ་བོད་ཀྱི་རླུང་འཕྲིན་ཁང་གི་རྒྱ་སྐད་སྡེ་ཚན་གྱི་གསར་འགོད་པ་མགུར་འབུམ་རྒྱལ། ༼ ཚོགས་གཞོན། ༽
བོད་ཀྱི་ཆ་འཕྲིན་དྲ་བའི་རྩོམ་སྒྲིག་པ་ཡེ་ཤེས་ཆོས་བཟང་། ༼ དྲུང་ཆེ། ༽
ཨེ་ཤ་ཡ་རང་དབང་རླུང་འཕྲིན་ཁང་གི་ཁམས་སྐད་སྡེ་ཚན་གྱི་གསར་འགོད་པ་བསྟན་འཛིན་དབང་རྒྱལ། ༼ རྩིས་པ། ༽
བོད་ཀྱི་དུས་བབ་གསར་ཁང་གི་གསར་འགོད་པ་དོན་གོ ༼ འབྲེལ་མཐུད་པ། ༽ བཅས་ཡིན་འདུག
བཅར་འདྲི།
དྲི་བ། ཐོག་མར་ཁྱེད་རང་ངོ་སྤྲོད་ཐུང་ངུ་ཞིག་གནང་རོགས།
ལན། ངའི་མིང་ལ་ལྷག་པ་སྐྱིད་འཛོམས་ཟེར་གྱིན་ཡོད། འཛིན་རིམ་བཅུ་གཉིས་བར་དུ་ངྷ་སྟེང་བོད་ཁྱིམ་དུ་ཕྱིན་པ་དང་། མ་ངྷ་རཱ་སི་ཡི་ཤུའི་མཐོ་སློབ་ནས་མཐོ་རིམ་སློབ་སྦྱོང་བྱས་པ་ཡིན། ༢༠༠༧ ལོར་ཇི་ནེ་ (Chennai) ནས་གསར་འགྱུར་རིག་པའི་ཐོག་ M.A གཙུག་ལག་རབ་འབྱམས་པ་ཐོན་པ་ཡིན། ལོ་དེའི་ཕྱི་ཟླ་ ༡༠ ནང་འཚེ་མེད་ཞི་བའི་ལྟ་གྲུབ་སྦྱོང་བརྡར་ལྟེ་གནས་ཁང་དུ་ལས་ཀ་བྱེད་མགོ་བརྩམས་པར་མ་ཟད། འཚེ་མེད་ཞི་བའི་ལྟ་གྲུབ་སྦྱོང་བརྡར་ལྟེ་གནས་ཁང་ཐོག་མར་འཛུགས་མཁན་གྱི་གྲས་དང་། ལྟེ་གནས་ཁང་གི་གསར་འགྱུར་བརྒྱུད་ལམ་བེད་སྤྱོད་གཏོང་སྟངས་སྐོར་གྱི་སྦྱོང་བརྡར་སྤྲོད་མཁན་གྱི་གྲས་སུ་ཡོད། དེ་བཞིན་ཨ་རིའི་ Tibet Connection ཟེར་བའི་དབྱིན་ཇིའི་རླུང་འཕྲིན་ཁང་ཞིག་ཏུ་དབྱིན་སྐད་ཐོག་ལས་ཀ་བྱེད་ཀྱིན་ཡོད་ལ། ད་ལྟའང་བྱེད་མུས་མིན། ༢༠༠༨ ལོར་བོད་ནང་དུ་ཞི་རྒོལ་ཆེན་མོ་བྱུང་བ་དང་། སྐབས་དེར་རྔ་པ་ཁུལ་དུ་ཛ་དྲག་གི་དོན་རྐྱེན་བྱུང་བར་ང་དང་འཕགས་ཡུལ་ཀིརྟི་བྱེས་པ་གྲྭ་ཚང་གི་གྲྭ་ཚེ་རིང་ལགས་དང་། Tibet Connection གསར་ཁང་གི་གསར་འགོད་པ་གཉིས་བཅས་ང་ཚོས་ཐོག་མར་ཀིརྟི་དགོན་དུ་གསར་འགོད་གསལ་བསྒྲགས་བསྐྱངས་པ་ཡིན།
དེ་ལྟར་གྲྭ་ཚེ་རིང་ལགས་དང་མཉམ་དུ་བོད་ནང་དུ་འབྲེལ་བ་བྱུང་བར་བརྟེན། ཁོང་བརྒྱུད་དེ་གཞིས་ལུས་བོད་མི་རྣམས་ཀྱིས་སྐབས་དེའི་གནས་སྟངས་རྒྱལ་སྤྱིའི་སྡིངས་ཆའི་སྟེང་ཁྱབ་བསྒྲགས་ཤུགས་ཆེར་བྱེད་རོགས་ཞེས་བསྐུལ་བ་དང་། ང་རང་ཉིད་ལ་མཚོན་ན་གཅིག་ནས་རླུང་འཕྲིན་གྱི་ལས་ཀ་བྱེད་མཁན་ཞིག་དང་། གཉིས་ནས་འགན་ཞིག་ཡོད་པའི་ཆ་ནས་གང་ཡོང་ཡོང་བྱས་པ་ཡིན། དེའི་རྗེས་ཨ་རིའི་རླུང་འཕྲིན་ཁང་དུ་གསར་འགོད་པའི་ལས་ཀ་བྱེད་འགོ་བརྩམས་ཏེ། ད་ལྟའི་བར་དུ་ལས་ཀ་བྱེད་ཀྱིན་པ་ཡིན།
དྲི་བ། ཁྱེད་རང་བོད་ཀྱི་གསར་འགོད་མཐུན་ཚོགས་ཀྱི་ཚོགས་ཆེན་སྟེང་སྐབས་དྲུག་པའི་བོད་ཀྱི་གསར་འགོད་མཐུན་ཚོགས་ཀྱི་ཚོགས་གཙོར་བདམས་ཐོན་བྱུང་བ་རེད། དེར་བརྟེན་ཡོང་རྒྱུར་བསྡད་པའི་མ་འོངས་པའི་ལས་རྒྱུན་ལོ་གསུམ་རིང་ལས་དོན་གང་འདྲ་ཞིག་བྱ་འཆར་ཡོད་དམ།
ལན། ང་ལ་མཚོན་ན་བོད་ཀྱི་གསར་འགོད་མཐུན་ཚོགས་ནང་གསར་དུ་འཛུལ་ཚར་ཙམ་རེད། ཚོགས་མི་གསར་བ་ཞིག་རེད། ངས་དམིགས་བསལ་གྱིས་འདི་དང་གན་བྱ་རྒྱུ་ཡིན་ཞེས་ཞུ་ཐུབ་ཀྱི་མི་འདུག གང་ཡིན་ཟེར་ན་ཟླ་འདིའི་ཚེས་ ༢༢ ཉིན་རྩིས་སྤྲོད་རྩིས་ལེན་བྱ་རྩིས་ཡོད། དེའི་རྗེས་གཞི་ནས་འཆར་གཞི་གང་འདྲ་ཞིག་བསྒྲིག་དགོས་ཀྱི་འདུག་ལྟ་གི་ཡིན། ངས་བསམ་ཚུལ་གཙོ་བོ། བོད་ཀྱི་གསར་འགོད་པ་མང་བོ་ཞིག་ལ་ཆེད་ལས་སློབ་སྦྱོང་ཐོན་པའི་གོ་སྐབས་བྱུང་མེད་སྟབས། བོད་ཀྱི་གསར་འགོད་པ་དག་ལ་ཆེད་ལས་པའི་ཟབ་སྦྱོང་གང་མང་མང་ཞིག་སྤྲོད་ཐུབ་ན་སྙམ་གྱིན་ཡོད། ཟབ་སྦྱོང་དེ་ཡང་དངོས་གནས་ཁ་ཡོད་ལག་ཡོད་ཀྱི་ཟབ་སྦྱོང་ཞིག་དང་། དེང་སྐབས་འཕྲུལ་ཆས་མང་བོར་འགྱུར་བ་འགྲོ་གིན་ཡོད་སྟབས་དེ་ལ་དཔག་པའི་ཟབ་སྦྱོང་སྤྲོད་ཐུབ་ན་ཡག་པོ་འདུག དཔེར་ན། པར་པ་སྐད་གྲགས་ཅན་དེ་འདྲ་གདན་ཞུ་བྱས་ཏེ་པར་རྒྱག་སྟངས་ཐད་ཟབ་སྦྱོང་སྤྲོད་པ་ལྟ་བུ་བྱུང་ན་བསམ་གྱིན་ཡོད།
གཞན་ང་ཚོ་རྒྱ་གར་དུ་བསྡད་རིང་རྒྱ་གར་ཡུལ་མི་མཉམ་དུ་འབྲེལ་བ་ཤུགས་ཆེར་བྱེད་དགོས་སྟབས། ཧི་མ་ཅལ་ཙམ་མིན་པར་ལྡི་ལི་དང་ལྷོ་ཕྱོགས་སོགས་ཀྱི་ཡུལ་མིའི་གསར་འགོད་པ་མཉམ་དུ་འབྲེལ་ལམ་ཤུགས་ཆེ་རུ་བཏང་སྟེ། ཡུལ་མིའི་གསར་འགོད་པས་བོད་ཀྱི་གནད་དོན་སྟེང་དོ་སྣང་མང་ཙམ་བྱུང་ན་སྙམ་གྱིན་ཡོད། དེ་ལྟར་བྱུང་ན་བོད་ཀྱི་གནད་དོན་དེ་རྒྱལ་སྤྱིའི་གནད་དོན་ཞིག་ཏུ་འགྱུར་རྒྱུར་རེ་བ་ཡོད། གང་ལྟར་ང་ཚོ་བོད་ཀྱི་གསར་འགོད་པར་གཞན་གྱི་གསར་འགོད་པ་དང་མི་འདྲ་བའི་འགན་ཞིག་ཡོད་པ་རེད། ཡང་དེང་སྐབས་མི་མང་དཀྱུས་མའི་གསར་འགོད་པ་མང་དུ་འགྲོ་བཞིན་ཡོད་པས། ཁོང་ཚོ་མཉམ་དུ་ འབྲེལ་བ་གཏིང་ཟབ་ཏུ་གཏོང་དགོས་སྙམ། དེ་ལྟར་བྱས་ན་ཁོང་ཚོར་སློབ་སྦྱོང་ཞིག་རེག་གི་རེད་ལ་ང་ཚོར་ཡང་གནས་ཚུལ་ཞིག་རེག་གི་རེད། དེ་བས་ཀྱང་གལ་ཆེ་ཤོས་ཁོང་ཚོས་སྐབས་རེར་གསར་འགྱུར་སྤྲད་པ་ཙམ་མིན་པར་དུས་རྒྱུན་དུ་འབྲེལ་བ་ཉར་ཏེ་བོད་ཀྱི་གསར་འགོད་པ་དང་མི་མང་དཀྱུས་མའི་གསར་འགོད་པའི་བར་དུ་འབྲེལ་བ་ཟབ་ཏུ་སོང་ན་ཕན་ཚུན་གཉིས་ཀར་ཕན་ཐོགས་འབྱུང་གི་རེད།
དེ་བཞིན་རྒྱལ་སྤྱིའི་གསར་འགོད་པ་དང་རྒྱ་གར་གྱི་གསར་འགོད་པ་སུ་ཡིན་རུང་ Style book ཟེར་བ་ཞིག་འདོན་སྤེལ་བྱེད་ཀྱིན་ཡོད་སྟབས། བོད་ཀྱི་གསར་འགོད་པས་ཀྱང་དེ་ལྟ་བུའི་དམིགས་བསལ་གསར་འགོད་ལས་རིགས་དང་འབྲེལ་བའི་དེབ་པར་སྐྲུན་བྱེད་པ་སོགས་བྱ་ཐུབ་ན་བསམ་གྱིན་ཡོད།
དྲི་བ། བོད་ཀྱི་གསར་འགོད་མཐུན་ཚོགས་ཀྱིས་འདས་པའི་སྐབས་ལྔའི་རིང་གི་ལས་དོན་བྱེད་ཕྱོགས་ཐད་ལ་འདོད་པ་མ་ཁེངས་ས་དང་། ཡང་གྲུབ་འབྲས་ཡག་པོ་བྱུང་བའི་ལས་དོན་རིགས་རྒྱུན་སྐྱོང་བྱ་འདོད་པ་དེ་འདྲ་འདུག་གམ།
ལན། ད་ལྟའི་ཆར་དེ་འདྲ་གང་ཡང་བསླེབས་མ་སོང་། གང་ཡིན་ཟེར་ན་རྩིས་སྤྲོད་རྩིས་ལེན་གཞི་ནས་ཡོང་རྒྱུ་ཡིན་སྟབས། རྩིས་སྤྲོད་རྩིས་ལེན་གྲུབ་རྗེས་འདས་པའི་གྲུབ་འབྲས་དང་ལས་དོན་ལ་བལྟས་ཏེ། མ་འོངས་པར་ག་རེ་བྱེད་ཀྱི་ཡོད་མེད་ལ་ལྟ་དགོས་སྙམ། གལ་ཆེ་ཤོས་འདས་པའི་རྒྱུན་ལས་རྣམས་ཀྱིས་ད་བར་ཕྱག་ལས་གནང་བ་རེད་ལ། དེ་ཚོ་ཚང་མ་གླ་མེད་དང་བླངས་ལྟ་བུ་རེད། དེར་བརྟེན་ཁོང་ཚོས་གང་གནང་བ་དེར་རྗེས་སུ་ཡི་རངས་དང་ཁོང་ཚོས་ག་རེ་གནང་བ་དེ་ཡར་རྒྱས་ཡོང་བ་དང་། ལས་དོན་ཡག་པོ་ཡོད་རིགས་མུ་མཐུད་རྒྱུན་སྐྱོང་བྱ་རྒྱུ། ཡང་གྲུབ་འབྲས་ཐོན་མེད་རིགས་ལ་གྲུབ་འབྲས་འཐོན་རྒྱུར་ག་རེ་བྱ་རྒྱུ་ཡོད་མེད་སོགས་ལ་ལྟ་དགོས་ཀྱི་འདུག
དྲི་བ། ད་ལྟའི་ཆར་གསར་འགོད་མཐུན་ཚོགས་ནང་རྒྱ་གར་དང་བལ་ཡུལ་གྱི་གསར་འགོད་པ་ཉི་ཤུ་ལྷག་ལས་མེད་སྟབས། མ་འོངས་པར་ཨ་རི་དང་ཡུ་རོབ། ཐེ་ཝན་སོགས་སུ་ཡོད་པའི་ཕྱི་རྒྱལ་ཡུལ་གྲུ་ཁག་གི་བོད་རིགས་གསར་འགོད་པ་རྣམས་ཚོགས་མིར་བསྡུ་བ་དང་། བོད་ཀྱི་གསར་འགོད་མཐུན་ཚོགས་རྒྱ་ཆེ་རུ་གཏོང་རྒྱུར་དགོངས་པ་བཞེས་ཀྱིན་ཡོད་དམ།
ལན། དེ་གལ་ཆེན་པོ་རེད། ཕྱི་རྒྱལ་དུ་ཡོད་པའི་གསར་འགོད་པ་རྣམས་ཀྱང་བོད་ཀྱི་གསར་འགོད་མཐུན་ཚོགས་སུ་མཉམ་ཞུགས་བྱ་ངེས་རེད་སྙམ་གྱིན་འདུག དེང་སྐབས་དྲ་རྒྱའི་བརྒྱུད་ལམ་ཤུགས་ཆེ་རུ་ཕྱིན་ཡོད་ལ། ང་ཚོས་དྲ་རྒྱ་བརྒྱུད་འབྲེལ་ལམ་བྱ་ཆོག་པས་ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་རིགས་གསར་འགོད་པ་རྣམས་ལ་འབྲེལ་བ་བྱ་ཐུབ་ཀྱི་རེད་སྙམ། ཡིན་ནའང་། གལ་ཆེ་ཤོས་ ༡༩༩༧ ལོ་ནས་འགོ་བཙུགས་ཏེ་ད་བར་ལོ་བཅུ་བཞི་ཕྱིན་པའི་གསར་འགོད་མཐུན་ཚོགས་ནང་། གསར་འགོད་པ་སྒེར་ངོས་ནས་འགན་བླངས་ཏེ་འཛུལ་ཞུགས་བྱ་རྒྱུ་གལ་ཆེན་པོ་རེད་ལ། དེ་ལྟར་བྱུང་ན་བོད་ཀྱི་གསར་འགོད་མཐུན་ཚོགས་འདི་བཞིན་ཚགས་ཚུད་དང་ཡར་རྒྱས་ཡོང་གི་རེད་སྙམ་གྱིན་ཡོད། གསར་འགོད་མཐུན་ཚོགས་སུ་འཛུལ་རྒྱུར་ཆ་རྐྱེན་རེ་ཟུང་ཡོད་པ་རེད། དེ་ཚོར་དྲ་རྒྱའི་སྟེང་ནས་གཟིགས་ཏེ་གལ་ཏེ་རང་ཉིད་ལ་གསར་འགོད་མཐུན་ཚོགས་ནང་འཛུལ་རྒྱུར་ཆ་རྐྱེན་ཚང་གི་ཡོད་ན། ངེས་པར་དུ་འཛུལ་དགོས་པ་རེད་སྙམ།
དྲི་བ། ཐེངས་འདིའི་ཚོགས་ཆེན་སྟེང་རྒྱུན་ལས་སྐབས་གཅིག་རིང་འཇིགས་ཞུམ་བྲལ་བའི་སྨྲ་བརྗོད་པ་ཞེས་པའི་གཟེངས་བསྟོད་བྱ་དགའ་ཞིག་སྤྲོད་རྒྱུར་ཐག་གཅོད་བྱུང་བ་རེད། དེའི་སྐོར་ངོ་སྤྲོད་ཐུང་ངུ་ཞིག་གནང་རོགས།
ལན།འཇིགས་ཞུམ་བྲལ་བའི་སྨྲ་བརྗོད་པ་ཞེས་པའི་གཟེངས་རྟགས་དེ་བོད་ཕྱི་ནང་གི་གསར་འགོད་པ་གཙོ་བྱས་པའི་གནས་ཚུལ་མཁོ་གཏོང་བ་དང་པར་བ། བརྙན་ལེན་པ། རྩོམ་པ་པོ་སོགས་ཀྱིས་རང་སྲོག་བློས་གཏོང་གི་བསམ་བློའི་འདུ་ཤེས་བརྟན་པོའི་འོག་བོད་མི་རིགས་ལ་ཞབས་འདེགས་ཞུས་པར་གདེངས་འཇོག་དང་གུས་བཀུར་མཚོན་ཆེད་དུ་འབུལ་རྩིས་ཡོད་པ་ཞིག་རེད།
གཟེངས་རྟགས་བཞེས་མཁན་གྱི་འོས་མིར་ཆ་རྐྱེན་ག་རེ་ཚང་དགོས་པ་རེད་ཟེར་ན། གསར་འགྱུར་གྱི་ལས་ཀ་གཉེར་མཁན་ནམ། གསར་འགྱུར་ལས་རིགས་དང་འབྲེལ་བ་ཡོད་པ། དཔེར་ན། འཇིག་ཞུམ་མེད་པར་གསར་འགྱུར་མཁོ་སྤྲོད་གནང་མཁན། སྨྲ་བརྗོད་རང་དབང་དང་རྩོམ་འབྲིའི་རང་དབང་ཐད་ནུས་པ་འབུར་ཐོན་ཡོད་པ། དུས་རྒྱུན་གྱི་བསམ་བློའི་ཀུན་སྤྱོད་ལེགས་ཤིང་། སྤྱི་ཚོགས་ཁྲོད་ཚད་བརྒལ་གྱི་ལྟ་སྟངས་ངན་པ་མེད་པ། བོད་མིའི་སྤྱི་ཚོགས་ལ་ཕན་པའི་ཕྱག་ལས་དེ་བཞིན་སྐབས་འཕྲལ་ཙམ་མ་ཡིན་པར་ངང་རྒྱུན་རིང་པོར་གནས་ཐུབ་པ། འོས་མི་རྣམས་ཀྱི་མཛད་རྗེས་དང་ཕྱག་ལས་ཡོད་ཚད། དངོས་ཤུགས་བརྒྱུད་གསུམ་གང་རུང་ནས་བོད་མིའི་རྩ་དོན་དང་འབྲེལ་བ་ངེས་པར་ཏུ་ཡོད་པའམ་བྱས་རྗེས་འབུར་ཐོན་དང་ཁ་གསལ་དགོས་པ་སོགས་འོས་ཆོས་ཁག་ཅིག་ཚང་དགོས་པ་རེད།
དེ་སྔོན་གཞིས་བཞུགས་རྩོམ་པ་བོ་འོད་ཟེར་ལགས་སུ་རྒྱལ་སྤྱིའི་གསར་འགོད་པའི་ཉིན་མོར་གཟེངས་རྟགས་གནང་བ་ལྟར། མ་འོངས་པར་རྒྱལ་སྤྱིའི་གསར་འགོད་པའི་ཉིན་མོ་དང་སྟབས་བསྟུན། རྒྱུན་ལས་སྐབས་གཅིག་རིང་གོང་གསལ་འོས་ཆོས་ཁག་ཚང་བའི་གསར་འགོད་པ་ཞིག་ལ་གཟེངས་རྟགས་གནང་རྩིས་ཡོད་པ་རེད།
དྲི་བ། མཐའ་མར་སྤྱི་ཚོགས་མེ་ལོང་ཚགས་པར་བརྒྱུད་འབོད་སྐུལ་འདྲ་ཞུ་རྒྱུ་ཡོད་དམ།
ལན། གོང་ནས་ཁྱེད་རང་གིས་དྲིས་པ་ལྟར་རྒྱལ་སྤྱིའི་སྤྱི་ཚོགས་ནང་ཡོད་པའི་བོད་རིགས་གསར་འགོད་པ་རྣམས་ཀྱིས། གསར་འགོད་མཐུན་ཚོགས་ཀྱི་སྒྲིག་གཞི་ལ་གཟིགས་ཏེ། གལ་སྲིད་རང་ཉིད་ལ་གསར་འགོད་མཐུན་ཚོགས་ནང་འཛུལ་རྒྱུར་ཆ་རྐྱེན་ཚང་གི་ཡོད་ན། ངེས་པར་དུ་གསར་འགོད་མཐུན་ཚོགས་ནང་འཛུལ་རོགས་གནོངས། གང་ཡིན་ཟེར་ན་བོད་ཀྱི་གསར་འགོད་པ་རྣམས་ཕན་ཚུན་ངོ་ཤེས་དང་འཕྱར་གྲི་མཉམ་འདེགས་ཡོང་བ། བོད་ཀྱི་གནད་དོན་ཐོག་ཚང་མས་མཉམ་རུབ་ཀྱིས་ནུས་པ་འདོན་ཐུབ་པ་སོགས་རྒྱུ་མཚན་མང་བོ་ལྡན་ཡོད་ལ། ཡང་གཅིག་བཤད་ན་སྐྱིད་སྡུག་ལྟ་བུ་ཞིག་ཀྱང་ཆགས་ཡོད། དཔེར་ན་བོད་ནང་དུ་དོན་གྲུབ་དབང་ཆེན་ལྟ་བུའི་གསར་འགོད་པ་མང་བོ་ཞིག་བཙོན་དུ་ཚུད་ཡོད་པ་རེད་ལ། ང་ཚོས་ཁོང་ཚོའི་ངོ་ཚབ་ལྟ་བུ་བྱས་ཏེ་རྒྱལ་སྤྱིའི་སྤྱི་ཚོགས་ནང་ནུས་པ་འདོན་དགོས་པ་རེད་སྙམ། །

( སྤྱི་ཚོགས་མེ་ལོང་སྤྱིའི་འདོན་ཐེངས་ ༡༡༧ སྟེང་བཀོད། )