སད་མི།
བཙན་བྱོལ་ནང་གི་བོད་མིའི་གསར་ཁང་ཨེ་ཤ་ཡ་དང་། ཨ་རིའི་རླུང་འཕྲིན། ནོར་ཝེ་རླུང་འཕྲིན། བོད་ཀྱི་བང་ཆེན། ཕ་ཡུལ་དྲ་བ། བོད་ཀྱི་དུས་བབ། ཤམ་བྷ་ལའི་ཕོ་ཉ། བཙན་བྱོལ་བོད་གཞུང་དྲ་བ། མདོར་ན། བཙན་བྱོལ་ནང་གི་གསར་འགྱུར་དྲ་བ་འདི་དག་ཐམས་ཅད་ཀྱིས་གསར་འགྱུར་རིགས་གཅིག་སྤེལ་སྟངས་ཏན་ཏན་ནོར་གི་འདུག དཔེར་ན། བོད་ནས་རང་སྲེག་གི་རྒྱ་རྒོལ་གནས་ཚུལ་ཐོན་དུས། གསར་ཁང་འདི་དག་ཐམས་ཅད་ཀྱིས་འདི་ལྟར་འགོད་སྤེལ་བྱེད་ཀྱི་རེད། “བོད་མི་ xxxx ཡིས་རྒྱ་ནག་གཞུང་གིས་བོད་ཐོག་འཛིན་པའི་དྲག་གནོན་སྲིད་ཇུས་ལ་ངོ་རྒོལ་ཆེད་རང་སྲེག་བྱས་པ་རེད་ཟེར་ཡོང་།”
བསམ་བློ་ཞིབ་མོར་ཐོངས་དང་། བོད་མིའི་ཕྱོགས་ནས་ཁ་གཅིག་གྲག་གིས་འདི་ལྟར་གསར་འགྱུར་འགོད་སྤེལ་བྱས་པས། དོན་དུ་ 1950 ལོར་དྲག་མཚོན་ཐོགས་པའི་རྒྱ་དམག་གིས་བོད་ལ་བཙན་འཛུལ་བྱས་པ་དང་ལེན་ཡོད་པ་འདྲ་བོ། བསམ་འཆར་མེད་པ་ལྟ་བུ། ཁྲིམས་མཐུན་ཡིན་པ་ནང་བཞིན། ཡང་ན། རྒྱ་རྒན་ལིས་ཅང་ལིང་གིས་བཤད་པ་ལྟར། 1950ལོའི་ནང་བོད་དུ་ལྷག་པའི་གནད་དོན་ཡོད་ཚད་ནི་རྒྱལ་ཁབ་སྲིད་དབང་སྒྲིག་བཀོད་བྱས་པའི་ཆ་ཤས་རེད་ཟེར་བ་ཁས་ལེན་ཡོད་པའམ། ཡང་མིན་ན། རྒྱ་ནག་གཞུང་གིས་བོད་འདི་ཉིད་གནའ་སྔ་མོ་ནས་རྒྱ་ནག་གི་ཆ་ཤས་རེད་ཟེར་བར་དོན་གྱིས་ཁས་ལེན་བཞིན་ཡོད་པ་མ་རེད་དམ།
དེས་ན། བོད་མིས་རང་སྲེག་སོགས་རྒྱ་རྒོལ་ལས་འགུལ་ཅི་ཞིག་སྤེལ་བར། ང་ཚོས་ངེས་པར་དུ་རྒྱ་ནག་གིས་བོད་ལ་བཙན་འཛུལ་བྱས་པ་དང་། བོད་བཙན་བཟུང་བྱས་སྟེ་མི་སེར་སྤེལ་ནས་བོད་ཡུལ་རྒྱ་ཡུལ་དུ་བསྒྱུར་རྒྱུའི་ལས་ངན་སྤེལ་བཞིན་པ། དུས་རིང་འདིའི་ནང་བོད་མིར་གདུག་རྩུབ་དང་དྲག་གནོན་སྲིད་ཇུས་ཁོ་ན་ལག་བསྟར་བྱེད་བཞིན་ཡོད་པར་བོད་མིས་ཛ་དྲག་གི་རང་སྲེག་ངོ་རྒོལ་བྱས་པ་རེད་ཟེར་དགོས་ལ་དོན་དངོས་ལག་ལེན་ནས་ཀྱང་དེ་ག་རང་ཡིན་པའི་ཕྱིར།
ཡང་ཁ་ཤས་ཀྱིས་མཁས་མཁས་འདྲ་བོ་བྱས་ནས། རྒྱ་རྒོལ་རང་སྲེག་ལས་འགུལ་འདིར་”རང་ལུས་མེ་མཆོད”འདྲ་བོ་ཁྱད་མཚར་དེ་འདྲ་ལབ་མཁན་གཅིག་རེ་གཉིས་རེ་ཡོད། དེའང་འགྲིག་ལེ་མ་རེད། ཁྱོད་ཀྱིས་བོད་ཀྱི་དཔའ་བོ་དཔའ་མོ་ཚོས་རང་ཉིད་ཀྱི་གཅེས་པའི་ཚེ་སྲོག་ཐེད་ལ་བོར་བ་དང་། རང་གི་བུ་ཕྲུག་དང་ཕ་མ་རྒན་རྒོན། བཟའ་ཚེ་རོགས་སོགས་ཆེས་དམར་དམར་དུང་དུང་གི་མི་འདི་དག་ཅི་མི་སྙམ་པར་ཤུལ་དུ་བཞག་ནས། ཡོད་ཚད་ནས་ཡོད་ཚད། གཅིག་ཏུ་ཤི་མ་གསོན་གྱི་བོད་རྒྱལ་ཁབ་དང་མི་རིགས་འདིའི་སླད་དུ། རྒྱ་ནག་ལ་ཆབ་སྲིད་ཀྱི་ངོ་རྒོལ་བྱས་པ་འདིར། ག་རེ་བྱས་ནས། ཁྱོད་ཀྱིས་ཨུ་ཚུགས་བརྒྱབ་ནས་ཆོས་ཕྱོགས་སུ་འཁྲིད་ཀྱིན་ཡོད་པ་རེད་དམ། བོད་མི་དཔའ་བོ་དཔའ་མོ་ཚོའི་རང་སྲེག་རྒྱ་རྒོལ་འདི་ཆོས་ཕྱོགས་ཀྱི་མཆོད་པ་འདྲ་བོ་ཞིག་དང་། ཆོ་ག་ཕྱག་ལེན་ཞིག་གི་ས་རུ་བསྐྱལ་ནས་ཅི་བྱེད། སུས་འདིར་མཆོད་པ་ཞིག་དང་འབྲེལ་བ་ཡོད་པ་རེད་ཟེར།
དེ་འདྲ་ཡིན་དུས། གཤེགས་ཟིན་པའི་བོད་ཀྱི་དཔའ་བོ་དཔའ་མོ་དེ་ཚོས། འཇིག་རྟེན་ན་ཆེས་སྐྱི་གཡའ་དགོས་པའི་ལས་འགུལ་འདི་འདྲ་ཞིག་གི་སྒང་ནས་རྒྱ་རྒོལ་བྱས་ཡོང་དུས། ང་ཚོས་གདོང་ལེན་མ་ནོར་བ་དང་། ལྷག་པར་དུ་གསར་འགྱུར་སྤེལ་སྟངས། སྐད་ཆ་ཤོད་སྟངས་སོགས་ཆེས་མ་མཐའི་ལས་འགན་འདི་དག་བཙན་བྱོལ་བོད་པ་ཚང་གིས་དཔྲལ་གཉེར་བསྡུས་ནས་ངེས་པར་བསམ་བློ་ནན་མོ་གཏོང་དགོས།
2015.5.29 རྡ་རམ་ས་ལ།
དོན་ལ་གཅིག་པ་རེད།
སད་མི་ལགས་ཀྱི་དཔྱད་བརྗོད་དེར་མོས་མཐུན་ཡོད། ཡིན་ནའང་རང་སྲེག་གནང་མཁན་དག་ལ་དཔའ་བོ་དང་དཔའ་མོ་ཞེས་པའི་ཐ་སྙད་དེ་རང་འཇག་བེད་སྤྱོད་བྱས་པའང་ནོར་ཚབ་ཧ་ཅང་ཆེན་པོ་རེད་འདུག་དྲན། རང་ཤི་རྒྱབ་ཤེས་པ་ཙམ་ཞིག་ལ་དཔའ་བོ་དང་དཔའ་མོ་ག་ནས་ཡིན། ལྷག་བསམ་ཅན་གྱི་རྒྱལ་གཅེས་པ་ཟེར་ན་འཐད། དཔའ་བོ་དང་དཔའ་མོ་ཟེར་དུས་དགྲ་བོའི་མགོ་སྐེ་ལེེན་ནུས་པ་དང་། རང་སྲོག་ལྷན་དུ་གཞན་སྲོག་གཅོད་པ་ལའང་ཐེ་མི་ཚོམ་པ་ནི་འཇིག་རྟེན་ཡོངས་ལ་གྲགས་པའི་དཔའ་རྒོད་རེད། ཡང་མིན་ན་ང་ཚོ་བོད་པའི་དཔའ་བོ་དཔའ་མོ་ཟེར་དུས་རང་ཤི་རྒྱབ་ནུས་པ་ཙམ་ལ་གོ་དགོས་ཡོད་པའི་དམིགས་བསལ་བ་ཞིག་ཡིན་ན་གང་ཤེས། དེང་སང་འཛམ་གླིང་ནང་འགས་གཏོར་དང་བསད་རྨས་སོགས་ལས་གང་འཚམས་ཤིག་མ་བྱས་ན་རྒྱལ་སྤྱི་རྒྱལ་ནང་སུས་ཀྱང་དོ་སྣང་ཡོང་བ་དཀའ་མོ་རེད། འདས་པའི་བྱུང་རིམ་ལ་ཕྱི་མིག་ལྟོས་དང་དུ་བ་དང་ཐལ་བ་འགྱུར་བའི་གང་ཟག་རྒྱལ་གཅེས་པ་ཚོས་ཕུང་པོའི་པར་རིས་དག་བཙན་བྱོལ་པ་ཚོས་ངོ་དེབ་དང་ཕྲིན་ཕྲན་སོགས་ཀྱི་ནང་ནང་ཁུལ་རྒྱུད་སྤྲོད་བྱེད་པ་ཙམ་ལས་སུས་ཀྱང་དོ་སྣང་བྱེད་མཁན་མཐོང་དཀོན། རྒྱལ་གཅེས་པ་དག་གཅིག་རྗེས་གཉིས་མཐུད་རྫོགས་འགྲོ་བ་ནི་དགྲ་བོས་དགོས་འདུན་རང་བཞིན་གྱིས་འགྲུབ་ཅིང་། བོད་མི་རིགས་དང་རྒྱལ་ཁབ་ལ་གྱོང་དེ་བས་ཆེ་བ་ག་ནས་ཡོད། དེས་ང་ཚོ་བཙན་བྱོལ་པ་ཚོས་རྒྱལ་གཅེས་པ་ཁོང་རྣམ་པ་ལ་དཔའ་བོ་དང་དཔའ་མོ་རེད་ཟེར་བ་དང་། བསྔོ་སྨོན་དང་ཐུགས་སྨོན་བྱས་ཡོད་ཟེར་བའི་ཧར་སྐད་ཀྱི་གཡོ་འོག་ལ་ལྷག་བསམ་ཅན་གྱི་རྒྱལ་གཅེས་པ་མང་པོ་ཞིག་གིས་སྲོག་ཤོར་བ་ནི་སུ་ཞིག་དང་གང་ལ་གྱོང་ཡོད་ཕུག་རྒྱང་རིང་པོས་དཔྱད་པ་བྱེད་པ་གལ་ཆེ།
བཙན་བྱོལ་ནང་གི་གསར་འཕྲིན་དེ་ཚོ་ལས་བྱེད་སྒེར་གྱི་ལྟོ་གོས་འཚོལ་བྱེད་ལ་ཕ་གྱི་རེད་དོ་།