ཨེ་མ་ཧོ།
ན་མོ་གུ་རུ་བུདྡྷ་ཛྙྰ་ན་ཡེ།
ཨ་བ་དྷི་ཏི་ཀུན་བཟང་དགོངས་པའི་བརྒྱུད།།
འཁོར་ལོ་ཚོགས་ཆེན་རིག་འཛིན་བརྡ་ཡི་བརྒྱུད།།
དབྱངས་གསལ་རིག་གཞུང་ཞལ་ནས་སྙན་དུ་བརྒྱུད།།
བརྒྱུད་གསུམ་བརྡ་སྤྲོད་རིག་པ་རྒྱལ་གྱུར་ཅིག།
དེ་ཡང་དབང་ལུང་ཁྲིད་རྒྱུན་བོད་སྐད་ཁོ་ན་དགོས་ཞེས་པ་དེ་ཡང་རྒྱ་གར་ལེགས་སྦྱར་ལས་བཀའ་དྲིན་ཅན་ལོ་ཙྰ་བས་བསྒྱུར་ཅིང་ལོ་པཎ་དག་གིས་ཞུས་དག་བགྱིས་ཏེ་དབང་ལུང་ཁྲིད་རྒྱུན་ལྡན་པས་གཏན་ལ་ཕབས་པ་ཤར་ཏག་ཡིན་པར་ལོ་རྒྱུས་ལ་གཟིགས་དང་གསལ་བོཤེས་ཐུབ། དཔེར་ན་རྒྱ་ནག་ལ་ལུང་རྒྱུན་དང་དབང་ཁྲིད་ཀྱི་སྲོལ་རྒྱུན་བོད་ཆོས་བཞིན་མེད་པར་གསལ་བོ་ཡིན་པ་ལ་འགའ་ཞིག་གི་ཟུར་ཟ་དང་སྒྲོ་བཀུར་ཚང་མ་གཞི་མེད་ནམ་མཁའ་སྟོང་པར་མདའ་འགྲེན་བཤད་པ་དང་གཅིག་མཚུངས་རེད། འུ་ཅག་བོད་ལ་བཀའ་གཏེར་བསྟན་བཅོས་ཇི་སྙེད་བཞུགས་པ་དེ་དག་བདག་ཅག་གི་བཀའ་དྲིན་ཅན་གྱི་ཚད་ལྡན་གྱི་རྩ་བའི་བླ་མ་རྣམ་གྱིས་ཐུགས་ཀྱི་དཔལ་བེའུ་ལ་དཀྱིལ། མགུལ་གྱི་བུམ་པ་ལས་ཁྲོལ། ལྗགས་ཀྱི་པདྨ་ལས་རྒྱུད་དེ་གནང་བ་ཤར་ཏག་རེད། ཁྱད་པར་སྔ་འགྱུར་རྙིང་མ་པ་ལ་གང་ཟག་སྙན་རྒྱུད་དང་གཏེར་སྟོན་བརྒྱ་རྩའི་ཟབ་གསང་ཐམས་ཅད་བོད་རང་གིས་སྐད་ཡིག་ཁོ་ན་ལས་ཡིག་རིགས་འདྲ་བཟོ་དང་སྐད་རིགས་གཞན་དུ་ལུང་རྒྱུན་ཡོད་ཆོག་པའི་ཞུང་རིགས་གང་ཡང་དབེན་པ་ལ་གློས་བུ་འགས་ཨུ་ཚུགས་དང་རང་བཟོ་མ་བྱས་ན་བཟང་།
དེ་བཞིན་དུ་ས་སྐྱ་དང་། བཀའ་བརྒྱུད། ཇོ་ནང་དང་ཨོ་རྒྱན་པ་དང་ཞི་བྱེད་དང་སྦྱོར་དྲུག་དང་བཀའ་གདམས་གསར་རྙིང་ལ་ཡང་ལུང་ཁྲིད་ཀྱི་རྒྱུན་ཉིད་རྒྱ་དབྱིན་ཧོར་སྐད་སོགས་མིན་པར་བོད་སྐད་ཁོ་ལ་ཡོད་པར་མངོན་སུམ་རེད།
རྒྱུ་མཚན་ཡང་ཚན་རིག་པས་གསར་དུ་འཚོ་བ་ལ་འགྱུར་ལྡོག་གཏོང་བའི་ནུས་པ་ཡོད་པ་སོགས་གསང་བ་མང་པོ་ཞིག་གསར་དུ་ཤེས་རྟོགས་བྱུང་བ་རེད་ཅེས་ངོ་མཚར་ཆེ་ཆེ་བྱེད་འདུག་ཀྱང་། དེ་ལྟ་ནའང་རང་རེ་དག་ལ་ལྟོས་ན་འདི་ནི་སྐད་ཆ་གསར་བ་ཞིག་ཅི་ཡང་མ་ཡིན་ཏེ། ལོ་ངོ་སྟོང་ཕྲག་གཅིག་ལྷག་གི་སྔོན་དུ་ཨོ་རྒྱན་སངས་རྒྱས་གཉིས་པས་བོད་གངས་ཅན་གྱི་ལྗོངས་འདིར་བར་དོ་དྲུག་དང་མན་ངག་ལྟ་ཕྲེང་གི་ཉམས་ལེན་སྤྱི་དང་། བྱེ་བྲག་མན་ངག་ལག་ཁྲིད་དང་བཅས་པ་ལས་དང་སྐལ་བ་ལྡན་པའི་གང་ཟག་གི་བགོ་སྐལ་དུ་བསྩལ་ཏེ་ཤིང་རྟའི་སྲོལ་ཆེན་པོ་ཞིག་ཕྱེས་ནས་བཟུང་། གྲུབ་མཐའ་རིས་མེད་ཀྱི་མཁས་པ་དང་གྲུབ་པའི་སྐྱེས་བུ་བརྒྱུད་མར་བྱུང་བ་རྣམས་ཀྱིས་ཟབ་ལ་ངོ་མཚར་ཆེ་བའི་གདམས་པ་མང་པོ་གནང་སྟེ་ད་ལྟའི་བར་ཉམས་ལེན་གྱི་བརྒྱུད་པ་མར་མ་ཆད་པར་བྱུང་བ་ཡིན་ཞིང་། ཁོང་རྣམས་ཀྱིས་ཟབ་ཆོས་དེ་དག་གི་འཆད་ཉན་གྱི་རྒྱུན་བསྐྱངས་པ་ཙམ་དུ་མ་ཟད་པར་མི་རབས་ནས་མི་རབས་བར་སྒོ་དུ་མ་ནས་ལག་ལེན་དངོས་ཀྱི་ཐོག་ནས་ཉམས་མྱོང་མང་པོ་བསགས་ཡོད་པས་ཕྱོགས་འདིར་རང་རང་རེ་རྣམས་གཞན་ལ་རེ་མི་དགོས་པ་ཞིག་ཡོད་ཅེས་བརྗོད་ཀྱང་མི་ཆོག་པ་གང་ཡང་མེད། དེ་ལྟ་ནའང་གངས་རིའི་ར་བ་དཀར་པོས་ཡོངས་སུ་བསྐོར་བའི་ཡུལ་ཁམས་འདི་གནའ་སྔ་མོ་ཞིག་ནས་འཛམ་གླིང་ལས་ལོགས་སུ་གར་བའི་ཚུལ་དུ་གནས་པས་མེས་པོ་ལོ་པན་བཀའ་དྲིན་ཅན་ཚོས་བཀའ་དྲིན་འདི་འཛམ་གླིང་གི་སྤྱི་ནོར་རེད།
ངས་བཤད་འདོད་པ་དེ་རྒྱ་དང་དབྱིན་རིགས་པ་བོད་སྐད་ཡིག་བྱང་ཆུབ་པ་བླ་བརྒྱུད་དམ་པས་རྗེས་སུ་བཟུང་བ་དབྱིན་ཇི་བ་ཞེ་ཆེན་བླ་མ་མུ་མཆོག་ལྟ་བུས་བོད་སྐད་ཐོག་ནས་ཁྲིད་ལུང་གིས་རྒྱུན་སྤེལ་ན་འོས་ཞིང་འཚམས་པ་རེད། དེ་བཞིན་དུ་རྒྱ་བླ་མ་བཀྲ་ཤིས་རྡོ་རྗེ་དང་ཟོག་པོའི་སྤྲུལ་སྐུ་བསྟན་འཛིན་རྡོ་རྗེ་ལྟ་བུའི་བོད་སྐད་ཡིག་ཐོག་ནས་རྒྱུད་འཛིན་སྤེལ་ན་སངས་རྒྱས་བསྟན་པ་འཛིན་སྐྱོང་སྤེལ་བ་རེད།
དེ་མིན་པར་དབྱིན་ཇི་དང་རྒྱ་སྐད་བསྒྱུར་ཟིན་པ་དག་ལ་ཁྲིད་རྒྱུན་མེད་པར་ཁོ་བོའི་དམ་བཅའ་དང་། ཚ་མས་དེ་ལྟར་འདོད་ན་བོད་ཡིག་འབད་བརྩོན་དང་ནང་པ་དང་རྡོ་རྗེ་ཐེག་པའི་སློབ་ཚོགས་ཡོངས་ན་གངས་ཅན་བོད་པའི་སྤྱི་སྐད་ཤེས་པའི་དགོས་པ་ཤིན་ཏུ་རྒྱ་ཆེའོ།།
དེ་མིན་རྒྱ་དང་དབྱིན་ཇི་བ་སློབ་མ་ས་ཡ་མང་པོ་ལ་སྐད་རིགས་གཞན་གྱིས་ཆོས་བཤད་ཡོད་ཀྱང་བོད་རང་གིས་སྐད་ཐོག་ནས་དབང་ལུང་དཔེ་ཁྲིད་བྱས་མེད་ན་རྒྱལ་བའི་བཀའ་ལ་རིས་ཆོད་དང་ཚོང་ལས་ཀྱི་འདི་འཛོམས་ཙམ་ལས་ཆོས་པ་ཡང་དག་དང་ཁྲིད་རྒྱུན་ཡང་དག་མེད་པར་ཤེས་དགོས།
འདི་ནི་གཞན་པ་སྒེར་མི་རེ་ཟུང་ལལ་ཟུར་ཟ་དང་མིག་སེར་དུ་བརྗོད་པ་མིན་པར་གངས་ཅན་ཕ་མེས་ཀྱི་གསང་གསུམ་ལ་ཆེ་ཆོས་ཤེས་པའི་སེངྒེའི་ངར་སྐད་ཉག་གཅིག་ལགས་སོ།།
དྲང་བདེན་རིགས་ལམ་རྒྱན་པའི་འབེལ་གཏམ་འདི།།
བསམ་མེད་བྱིས་པའི་སྙིང་ལ་ཕོག་ཀྱང་རུང་།།
བསྟན་སྲིད་ཡང་དག་འཛིན་པའི་ལམ་བཟང་ལ།།
བློ་ལྡན་གང་ཞིག་འཇུག་པ་ཅིས་མི་སྤྲོ།།
ཤྲྰི་ཨེ་མ་ཧོས་བདེན་གཏམ་དུ་ཕུལ་བར་དགེའོ།།