ལུང་རྟོགས།
བོད་ཀྱི་རང་དབང་དང་ཐོབ་ཐང་ནི་མ་འོངས་པའི་མི་རིགས་འདིའི་ཤ་རྒྱུད་ཁྲག་རྒྱུད་ལས་བྱུང་བའི་མི་བུ་ས་ཡ་མང་པོའི་བདེ་སྐྱིད་ཀྱི་འབྱུང་རྩ་ངོ་མ་དེ་རེད་ལ། བོད་ཀྱི་ཆོས་དང་རིག་གཞུང་འདིས་བོད་མི་ས་ཡ་དྲུག་དང་། དེ་ལས་ཀྱང་རྒྱ་བསྐྱེད་ན་འཛམ་གླིང་མི་མང་དུང་ཕྱུར་མང་པོ་ལ་ཕན་བདེ་བསྒྲུབ་ཐུབ་པའི་ཡིད་ཆེས་ཡོད། དེས་ན་ང་ལ་བོད་གངས་ཅན་པའི་རང་དབང་དང་ཐོབ་ཐང་། རྩ་ཆེའི་ཆོས་དང་རིག་གཞུང་ཆེད་དུ་རང་ལུས་མེར་བསྲེགས་གཏོང་ནུས་པའི་བློ་སྟོབས་མི་འདུག་ཀྱང་། འདི་དག་གི་དོན་དུ་རང་སྲོག་ཤོར་རུང་འགྱོད་སེམས་གཏན་ནས་སྐྱེ་མི་སྲིད། རྒྱུ་མཚན་དེའི་ཕྱིར་ན་ངས་འདས་དུས་ཀྱི་དྲ་ལམ་ལ་ཞུགས་པའི་ལོ་ཤས་དེའི་རིང་ལ་དྲ་རྒྱའི་ནང་དུ་བོད་ཀྱི་སྐད་ཡིག་སྲུང་སྐྱོབ་དང་བོད་དོན་ལས་འགུལ་གང་ཤེས་གང་ནུས་རེ་སྤེལ་བ་ཡིན་ལ། ལྡོག་ཕྱོགས་ཀྱི་ལྟ་ཚུལ་འཛིན་མཁན་ཏེ་དཔེར་ན་བོད་ནང་གི་བོད་དོན་ཆེད་རང་ལུས་མེར་བསྲེགས་ཀྱི་ལས་འགུལ་འདི་འཚེ་བ་ཡིན་པ་དང་། མཚམས་འཇོག་བྱེད་དགོས་པར་བཤད་མཁན་ཚོར་ཁ་རྩོད་ཡང་གང་མང་ཞིག་བྱས་པ་ཡིན། ངས་རང་ལུས་མེར་སྲེག་གཏོང་མཁན་ཚོའི་ལུས་ཀྱི་ན་ཚ་དང་། ཤུལ་ལུས་ཕ་མ་སྤུན་མཆེད་ཚོའི་སེམས་ཀྱི་སྡུག་བསྔལ་མ་རྟོགས་པ་མིན་ལ། ངའི་སེམས་ལ་ཡང་མེ་སྲེག་ལས་འགུལ་མཚམས་འཇོག་དགོས་པར་བཤད་མཁན་ཁྱེད་ཚོ་ལས་མ་ཆེ་ཡང་མི་ཆུང་བའི་ན་ཟུག་ཡོད། འོན་ཀྱང་ཁོང་ཚོའི་བློས་བཏང་འདི་ནི་རྩྭ་ས་རྩོད་གླེང་ངམ་ཕུ་ནུ་ནང་འཛིང་ལྟ་བུ་དོན་ཆུང་ཞིག་གི་ཆེད་དུ་མ་ཡིན་པར། བོད་མི་ས་ཡ་དྲུག་གི་རང་དབང་དང་དམངས་གཙོ་འགྲོ་བ་མིའི་ཐོབ་ཐང་གི་ཆེད་དང་། བོད་ཀྱི་རྩ་ཆེའི་ཆོས་དང་རིག་གཞུང་མི་རིགས་བཅས་པའི་འཚོ་གནས་ཀྱི་ཆེད་དུ་ཡིན་པས། ང་དང་ང་ལྟ་བུ་དག་ལ་ཁོང་ཚོའི་རྗེས་སུ་རང་ལུས་མེར་སྲེག་གཏོང་ནུས་པའི་སྙིང་སྟོབས་མེད་ཀྱང་། ཁོང་ཚོའི་རླབས་ཆེ་བའི་ལས་འགུལ་འདི་ལ་རྗེས་སུ་ཡི་རང་ཞུ་བ་ལས་བཀག་འགོག་བྱེད་རྒྱུའི་ཐོབ་ཐང་དང་འོས་བབ་གཉིས་ཀ་མེད་པའི་ལྟ་ཚུལ་བཟུང་ཡོད། ཁོང་ཚོའི་བློས་བཏང་འདི་ལ་ཁོང་ཚོའི་འབོད་ཚིག་ནང་གསལ་བ་ལྟ་བུའི་གྲུབ་འབྲས་ཤིག་ཐོབ་སོང་ན་བཤད་མ་དགོས། གལ་ཏེ་གྲུབ་འབྲས་གང་ཡང་མ་ཐོབ་ཀྱང་ཁོང་ཚོས་ཚེ་སྲོག་གཏོང་འོས་པ་ཞིག་གི་ཆེད་དུ་བཏང་བ་ལས་མི་འོས་པ་ཞིག་གི་ཆེད་དུ་བཏང་བ་མིན་པས་ཚེ་སྲོག་འཕྲོ་བརླག་ཏུ་སོང་བ་ཞིག་ལ་ནམ་ཡང་ངོས་འཛིན་བྱེད་ཀྱི་མེད། ངས་འདི་ལྟར་བཤད་པ་ནི་བོད་དོན་དཀའ་རྙོག་སེལ་བའི་ཐབས་ལམ་གཞན་གང་ཡང་བསྟན་རྒྱུ་མེད་པའམ་ནུས་མེད་ཀྱི་ཐབས་ལམ་རེ་བཤད་ནས། རང་ལུས་མེར་བསྲེགས་ཀྱི་རླབས་ཆེ་བའི་ལས་འགུལ་འདི་མཚམས་འཇོག་དགོས་རབས་བཤད་མཁན་དག་ལ། ཁྱེད་ཚོ་ལ་དེ་ལྟར་བཤད་རྒྱུའི་ཐོབ་ཐང་དང་འོས་བབ་མེད་ཅེས་རྒོལ་བ་ཡིན་གྱི། ལས་འགུལ་འདི་མུ་མཐུད་དགོས་པའི་སྐུལ་མ་བྱས་པ་གཏན་ནས་མིན་པས་གོ་བ་མ་ལོག་པ་གྱིས། གཞན་ཡང་༧གོང་ས་མཆོག་ལ་ཟུར་ཟ་དང་སྐུར་འདེབས་བྱེད་མཁན་དང་། བོད་མིའི་སྒྲིག་འཛུགས་དང་སྲིད་སྐྱོང་སོགས་རང་གཞུང་གི་གནད་ཡོད་མི་སྣར་རྒྱུ་མཚན་མེད་པའི་སྐྱོན་འཛུགས་དང་སྒྲོ་སྐུར་བྱེད་མཁན་ཚོ་ལ་ཡང་ཁ་རྩོད་དང་ཐ་ན་ཚིག་ངན་རེ་ཟུང་ཡང་བེད་སྤྱོད་བྱས་པ་ཡིན། འོན་ཀྱང་འདི་ཐམས་ཅད་རང་ཉིད་ཀྱི་ཤ་ཁྲག་གང་ལས་མཆེད་པའི་བོད་གངས་ཅན་ཞེས་པའི་རྒྱལ་ཁབ་འདི་ལ་དགའ་ཞེན་དང་། འདི་ལ་རང་དབང་ཞིག་ཐོབ་པའི་རེ་བ་དང་སེམས་ཤུགས། བོད་འབངས་དཀྱུས་མ་ཞིག་གིས་རང་གི་གཞུང་དང་དབུ་ཁྲིད་ལ་རྒྱབ་སྐྱོར་བྱེད་རྒྱུ་ནི་ལས་འགན་དུ་བསམ་ནས་བྱས་པ་ལས། ང་གཞུང་གི་ལས་བྱེད་པ་ལྟ་བུའམ་སྲིད་སྐྱོང་སོགས་གཞུང་གི་གནད་ཡོད་མི་སྣ་དག་དང་སྒེར་གྱི་འབྲེལ་བ་གང་ཡང་མེད་ལ། ཁ་རྩོད་བྱེད་སའི་དྲ་གྲོགས་ཚོ་དང་ཡང་སྒེར་གྱི་ཞེ་འཁོན་རྩོད་རྒྱུ་ཅི་ཡང་མེད་ཅིང་། ཆོས་རྒྱུད་དང་ཆོལ་ཁ་སོགས་ཀྱི་ཕྱོགས་ཞེན་བྱས་བཞག་པ་གཏན་ནས་མེད་ཅེས། རང་བློ་རང་ལ་ལྐོག་ཏུ་མ་གྱུར་བས་ངས་དྲ་གྲོགས་ཚོར་ཐེ་ཚོམ་གང་ཡང་མེད་པར་ཞུ་སྤོབས།
“བོད་འབངས་དཀྱུས་མ་ཞིག་གིས་རང་གི་གཞུང་དང་དབུ་ཁྲིད་ལ་རྒྱབ་སྐྱོར་བྱེད་རྒྱུ་ནི་ལས་འགན་དུ་བསམ” དེ་ལོས་ཡིན།