སྐྱོ་བྲག་དགའ་དབང་།
ང་ཚོའི་འཛམ་གླིང་འདིར་སྲོག་ཆགས་ཀྱི་རིགས་དུ་མ་འཕེལ་ནུབ་བྱུང་བ་ལས་འགྲོ་བ་མི་རྣམས་ལ་གཞན་དང་ཐུན་མིན་གྱི་ནུས་པ་དམིགས་བསལ་ཡོད་པ་ནི་སོ་སོའི་བསམ་སྤྱོད་ཕན་ཚུན་དུ་བསྟན་ཏེ་ལེགས་སྤེལ་ཉེས་འགོག་ལ་འཇུག་ཐུབ་པ་དེ་ཡིན། ནུས་པ་དེ་ཉིད་བེད་སྤྱོད་ཀྱིས་ཉེར་མཁོའི་ཆ་རྐྱེན་དུ་མ་བཟོ་སྐྲུན་བྱས་པའི་ཆ་ཤས་སུ་ཆེས་ཉེན་ཁ་ཆེ་བའི་དེང་དུས་ཀྱི་མཚོན་ཆ་རྣམས་བྱུང་ཡོད། གལ་ཏེ་ང་ཚོའི་རྒྱུད་ལ་ལྷན་སྐྱེས་སུ་ཡོད་པའི་བྱམས་པ་དང་སྙིང་རྗེ། གུ་ཡངས་དང་བསམ་ཤེས་དག་ལ་གཅེས་འཛིན་དང་ནན་ཏན་གྱི་སྒོ་ནས་བསམ་སྤྱོད་བཟང་པོ་གོང་སྤེལ་གྱི་ཐབས་ཇུས་མ་བསྟེན་ན་འཇིག་རྟེན་འདིའི་སྣོད་བཅུད་རྩ་གཏོར་དུ་འགྲོ་བ་ལ་དཀའ་ཚེགས་གང་ཡང་མེད། དེ་དག་གོང་སྤེལ་དུ་འགྲོ་བའི་ཐབས་ལམ་བཟང་ཤོས་དང་ཟབ་ཤོས་དེ་ནི་ནང་པ་སངས་རྒྱས་པའི་ཆོས་ལུགས་ཡིན་པའི་དངོས་ར་འཕྲོད་དེ་འཛམ་གླིང་ཤར་ནུབ་ཀྱི་མི་རིགས་ཡོངས་ནས་སློབ་སྦྱོང་དང་ཉམས་ལེན། གཅེས་འཛིན་དང་དར་སྤེལ་ཧ་ལས་པ་བྱེད་ཀྱིན་ཡོད།
ང་ཚོ་བོད་ལ་ཆ་མཚོན་ན་སྔར་གྱི་རྒྱལ་བློན་ལོ་པཎ་དག་གི་བཀའ་དྲིན་ལ་བརྟེན་ནས་འཛམ་གླིང་གི་རིག་གཞུང་འགྲན་རྩོད་ཁྲོད་ནས་ཆེས་ཡང་རྩེར་སོན་པའི་ནང་ཆོས་དར་ཁྱབ་བྱུང་སྟེ། སྤྱི་ཚོགས་དང་སྒེར་པའི་མི་ཚེ་འདི་དང་མ་འོངས་སྐྱེ་བ་རྣམས་སུ་ཕན་ཐོགས་ཡོད་པའི་དོན་གནད་དུ་མ་ཞིག་ཉིན་རེའི་འཚོ་བའི་ནང་དུ་བེད་སྤྱོད་བྱ་བཞིན་ཡོད་པ་དེ་ནི་ཆེས་དགའ་མོས་དང་མིག་ལྟོས་བྱ་སར་གྱུར་ཏེ་འཛམ་གླིང་སྐྱེ་བོ་མང་པོས་ང་ཚོ་བོད་ཀྱི་མི་རིགས་དང་རིག་གཞུང་ལ་མིག་གདངས་ནས་བལྟས་ཡོད། ང་ཚོ་འདི་བཞིན་དགའ་མོས་དང་མིག་ལྟོས་བྱ་ས་ཞིག་དང་། སྣོད་བཅུད་ཉམས་ཆག་མེད་པར་བདེ་སྐྱིད་ངང་འཚོ་གནས་ཐུབ་དགོས་ན། ང་ཚོས་ངེས་པར་དུ་རིག་གཞུང་དང་ལེགས་བྱང་དག་རྒྱུད་འཛིན་བྱེད་ཐུབ་པ་བྱ་དགོས། རྒྱུད་འཛིན་བྱ་བར་ཐབས་ལམ་དུ་མ་ཡོད་པ་ལས་གལ་ཆེ་ཤོས་ཤིག་ནི་སློབ་སྦྱོང་དཔྱིས་ཕྱིན་དུ་བྱས་ཏེ་གལ་གནད་ཆེ་བའི་དོན་དག་རྣམས་ཁ་གསལ་གོ་བདེའི་སྙན་རྩོམ་གྱི་ལམ་ནས་ཁྱབ་སྤེལ་བྱ་བ་དེ་ཡིན།
ཐེངས་འདིར་ཁོ་བོའི་ཆོས་མཆེད་དམ་པ་མཁས་མཆོག་བསོད་ནམས་ཆོས་དབྱིངས་ལགས་ཀྱིས་གསེར་མདོག་གི་ལང་ཚོ་ཞེས་པའི་དེབ་ཅིག་པར་སྐྲུན་གནང་བ་ནི་ཆེས་དགའ་འོས་པ་ཞིག་རེད། གང་ཡིན་ཞེ་ན། སྐྱེ་བ་དང་ཚེ་རབས་དུ་མའི་བག་ཆགས་ལྟ་བུས་ཚིག་རྒྱན་རིག་པ་ལ་ཧ་ཅང་དགའ་ཞིང་དུངས་པའི་བརྩོན་པ་ལྷུར་བླངས་པའི་གོམས་གཤིས་རྒྱུན་ཆགས་སུ་ཡོད་སྟབས་སྙན་ཞིང་འཇེབ་པའི་ཚིག་སྦྱོར་བཟང་བ་མ་ཚད་དོན་གྱི་ཆ་ནས་ཀྱང་ཕན་ཐོགས་ཆེན་པོ་འབྱུང་ངེས་ཡོད་དེ། སྤྱི་ཚོགས་ཐོག་ཡར་རྒྱས་མེད་པ་དང་། ནོར་འཁྲུལ་ཤོར་བ་ནི་མ་ཤེས་པ་ལས་བྱུང་ཞིང་། མི་ཤེས་པའི་གཉེན་པོ་ངོ་མ་ནི་དངོས་ཡོད་གནས་ཚུལ་གྱི་ཤེས་བྱ་ལ་སྦྱོང་བརྩོན་བྱེད་པ་དེ་ཡིན། བུད་མེད་ཤེས་རབ་ཀྱི་རང་བཞིན་རྣམ་རིག་ཧ་ཅང་བཀྲ་བ་ཡོད་པ་དེ་འཁུམས་སུ་མ་བཅུག་པར་ཤེས་བྱའི་ཐང་ཆེན་ལ་ཁ་ཕྱོགས་ན་འཛམ་གླིང་གི་བུད་མེད་སྤྱི་དང་མཚུངས་པར་ང་ཚོའི་བཙུན་མ་ཚོས་ཀྱང་ཆོས་དང་འཇིག་རྟེན་གང་ཐད་ནས་ལེགས་སྐྱེས་འབུལ་ཐུབ་ཀྱི་ཡོད། རང་ཉིད་ཀྱིས་ཆོས་རྣམ་དག་བྱེད་པ་དང་བླ་མ་ཡང་དག་ཅིག་ལ་བསྟེན་དགོས་ན། བྱ་བ་གང་ཞིག་བྱེད་དགོས་པ་དང་ཁྱད་ཆོས་གང་ཞིག་ཚང་དགོས་པ་གསལ་བོར་སྟོན་བྱེད་ཀྱི་མེ་ལོང་ལྟ་བུ་ནི་རྗེ་བཙུན་མི་ལའི་དངོས་བྱུང་གི་ལོ་རྒྱུས་དེ་རེད། དོན་གནད་དེ་དག་གསལ་སྟོན་བྱས་ཡོད་སྟབས་དེབ་འདི་ནི། སྙན་ཚིག་གི་སྡེབ་སྦྱོར་བཟང་བའི་གསེར་མདོག་གི་ལང་ཚོ། དྲང་བདེན་གྱི་གནས་ཚུལ་བརྗོད་པའི་གསེར་མདོག་གི་ལང་ཚོ། སྤྱི་ཚོགས་ཀྱི་སློབ་སྟོན་ཡིན་པའི་གསེར་མདོག་གི་ལང་ཚོ། ནང་ཆོས་ཀྱི་དོན་སྙིང་ལྡན་པའི་གསེར་མདོག་གི་ལང་ཚོ་ཞིག་ཡིན་པ་མ་ཚད། རྩོམ་པ་པོའི་ཐད་ནས་གཞིག་ན་འཛམ་གླིང་ཡང་རྩེར་གོམ་པ་སྤོས་པའི་རྐང་རྗེས་ཀྱི་ཟུར་ཁ་ཞིག་དང་། ཀློག་པ་པོའི་ཐད་ནས་གཞིག་ན་གཤིས་སྤྱོད་བཟང་ཕྱོགས་སུ་སྒྱུར་ཐབས་གསལ་སྟོན་བྱས་པའི་བསླབ་བྱ་ཞིག་ཀྱང་ཡིན་པ་རེད།
འཕོ་འགྱུར་ཧ་ཅང་ཆེ་བའི་དུས་རབས་འདིར་ང་ཚོའི་རྒན་པ་ཚོས་འཕྲལ་དང་ཕུགས་ཀྱི་ཁེ་ཕན་གྱི་གདམ་ག་མ་ནོར་བར་བྱས་ཏེ་སློབ་སྦྱོང་གི་དུས་སྐབས་བཟང་ཤོས་གཞོན་ནུའི་མི་ཚེ་ཆུད་ཟོས་སུ་མ་བཏང་བར་ཤེས་ཡོན་གྱི་ར་བར་བཙུད་དེ་སློབ་སྦྱོང་གི་སྐུལ་ལྕག་ནན་མོ་བྱ་བ་དང་། གཞོན་པ་ཚོས་ཀྱང་ཕ་མས་ཁྲག་གསོག་རྣག་གསོག་བྱས་པའི་ཟས་གོས་གྱི་ན་ལ་ལོངས་སྤྱད་དེ་དྲོ་འཇམ་གྱི་ཉི་མའི་འོག་ཏུ་སོས་དལ་དུ་སྡོད་པ་དང་། རང་རིགས་སྤུན་ཟླའི་བར་དུ་འཕྲོག་བཅོམ་དང་འཁྲུགས་རྩོད་བྱས་པར་དཔའ་བོ་བླ་མེད་དུ་བརྩི་བའི་རང་གཞན་གཉིས་ཕུང་གི་ལྐུགས་ལས་དུད་འགྲོ་ལས་ཀྱང་དམན་པ་དེ་དག་ལ་མགོ་མི་འཁོར་བར་སྔ་དེང་གི་ཤེས་བྱ་རྣམས་ལ་སློབ་སྦྱོང་ཧུར་ཐག་བྱས་ཏེ་སྤྱི་ཚོགས་ལ་ལེགས་སྐྱེས་འབུལ་ཐུབ་པ་བྱེད་པ་ནི་མི་ཚེའི་དོན་སྙིང་ལྡན་པ་ཞིག་ཡིན་པ་ཤེས་པར་བྱ་དགོས་སོ། །
རྒྱལ་ཁམས་པ་དགའ་དབང་ནུབ་ཕྱོགས་ཨ་རིའི་ཡུལ་དུ་སྡོད་པ་ན་སྦྱར་རོ། །