འཇམ་གཅེས།
དྲང་བདེན་དང་གནས་ལུགས། སྤྱི་ཚོགས་དང་མཛའ་མཐུན། ལ་རྒྱལ་དང་སྤྱི་སེམས། དད་པ་དང་དམ་ཚིག མི་རིགས་དང་རྩ་དོན། མདོར་ན་ཡོད་ཚད་ཁ་ལ་འཁྱེར་བཞིན། ཡོད་ཚད་སེམས་ནས་ལོག་ཟིན་པའི་དེང་དུས་ཀྱི་གྲྭ་གཟུགས་དང་། གྲྭ་ལོག། ལྟ་བ་ལོག་པ་དང་། དམ་ཚིག་ལོག་པ། སྤྱོད་པ་ལོག་པ། བོད་པ་ལོག་པ། མི་ལོག་པ། མདོར་ན་ཡོད་ཚད་ལོག་ཟིན་པའི་ཆེས་ཐལ་ཤལ་གྱི་སྐྱེ་བོ་རེ་འགས་བྱ་སྤྱོད་དང་ལས་འགན། དམིགས་ཡུལ་དང་བསྒྲུབ་བྱ།
གང་ལྟར་ན་ཡང་དུག་གསུམ་གྱིས་ཡོངས་རྫོགས་སྦོས་ཟིན་པའི་རྐྱེན་ལས། ཆོལ་ཁ་དང་ཆོས་ལུགས་བར་དུ་དཀྲུག་ཤིང་། ཚོགས་པ་དང་སྒྲིག་འཛུགས་བར་དུ་ཕྱོགས་རིས། མདོར་ན་རང་ཉིད་དང་། རང་ཉིད་དགའ་སའི་ཕྱོགས་གཏོགས་པ་ཚོས་མི་གཙང་པའི་དྲི་ངན་ཡང་དྲི་བཟང་དུ་ཚོར་ལ། རང་ཉིད་དང་རང་གི་ཕྱོགས་གཏོགས་སུ་མ་གཏོགས་པའི་སྐྱེས་བུ་གང་ཞིག་དང་། རང་ཉིད་ཀྱིས་འགྲན་མི་བཟོད་པའི་གཟི་དཔལ་མངའ་བའི་སྐྱེ་བོ་དང་ཚོགས་སྡེ་དག་གིས་ནི། གཟུར་གནས་ཀུན་གྱིས་ཡི་རངས་ཞུ་འོས་པའི་མཛད་བཟང་ཇི་ལྟར་བསྐྲུན་རུང་། དེ་ནི་ཁྱེད་ཅག་ལ་མཚོན་ན་མིག་ནང་དུ་ཟུགས་པའི་ཚེར་མ་ཡིན་པར་ཤེས་ཀྱིན་ཡོད་ལ། སྙིང་དཀྱིལ་དུ་ཟུགས་པའི་མདའ་མོ་ཡིན་པའང་ཤེས་ཀྱིན་ཡོད།
ཚུལ་དེ་ལྟར་བུ་མཐོང་ཐོས་བྱུང་དུས་སྐབས་རེར་སྙིང་རྗེ་བ་དང་། སྐབས་རེར་ཡིད་མུག་པ། སྐབས་རེར་སེམས་དགའ་བའི་སྐྱེ་བོ་བགྲང་ཡུལ་ལས་འདས་པའི་ནང་དུ་ང་ཡང་ཡོད་ལ། ངའི་གྲོགས་པོ་དག་ཅང་ཡོད། གཞན་དང་གཞན་པའི་གཟུར་གནས་དང་། བྱམས་སྙིང་རྗེ་མངའ་བའི་སྐྱེས་བུ་དག་ཀྱང་ཡོད་ལ། བློ་རྣམ་རིག་གྲུང་པའི་ཤེས་ཡོན་པ་དང་། ལས་ལ་རྒྱལ་ཅན་གྱི་ཨ་ཕའི་བུ་རྒོད་དང་། ཁོག་ཤེས་པ་བཟང་བའི་ཨ་མའི་བུ་མོ་དག་ཀྱང་ཡོད། ད་དུང་ནམ་ཡང་བསུབ་ཐབས་བྲལ་བའི་ལོ་རྒྱས་ཀྱི་བདེན་དཔང་ཡོད་ལ། ནམ་ཡང་བསྙོན་མི་ནུས་པའི་འོད་སྟོང་འབར་ཞིང་གསེར་འོད་འཕྲོ་བའི་ལོ་རྒྱུས་ཀྱི་རྡོ་རིང་ཡང་ཡོད་དོ།།