རྐང་རྗེན་པ།
ཉེ་ལམ་གསུམ་པའི་ཚེས་བཅུ་ནས་བཟུང་སྟེ་བོད་ས་ཡོངས་སུ་ཞི་བའི་ཡར་ལངས་བྱས་ཤིང༌། ཉམ་ཆུང་བོད་རིགས་ཞིང་འབྲོག་མི་མང་ཕལ་ཆེ་བའི་ལག་ཏུ་མཚོན་ཆ་ཁབ་རྩེ་ཙམ་མེད་པར་ཁུ་ཚུར་གནམ་ལ་འཕྱར་ཏེ་རྒྱ་འོག་གི་དཀའ་སྡུག་འགྲེལ་བརྗོད་བྱེད་སྐབས། རྒྱ་གཞུང་གིས་དྲག་པོའི་དམག་དཔུང་བེད་སྤྱོད་ཀྱིས་ལྕགས་འཁྲབ་འཁོར་ལོ་དང་མེ་སྒྱོག་སོགས་དེང་རབས་མཚོན་ཆ་འཁྱེར་བའི་མི་དམངས་བཅིངས་འགྲོལ་དམག་དང་དྲག་ཆས་དམག་མི་སོགས་ཁྲི་གཉིས་ལྷག་བཏང་སྟེ་མི་མང་དམར་གསོད་དང༌། ཉེས་རྡུང༌། བཙན་འཕྲོག་དང་གཏོར་བཅོམ། བཙོན་འཇུག་བྱེད་བཞིན་པའི་དངོས་ཡོད་གནས་ཚུལ་མཐོང་དུས། གུང་ཁྲན་ཏང་གི་དམག་དཔུང་ནི་ཕྱིའི་དགྲ་བོ་འདུལ་བའི་ཐོ་བ་དང༌། ནང་མི་སེར་སྐྱོབ་པའི་དཔུང་དམག་ཅིག་མ་ཡིན་པའི་ལོ་རྒྱུས་ཀྱི་ཤོག་ལྷེ་དམར་པོ་དེ་ཡང་བསྐྱར་དྲན་འོང་བ་ཞིག་རེད།
རྒྱུན་རིང་གི་ལོ་རྒྱུས་ལ་བལྟས་ཡོང་ན། གུང་ཁྲན་ཏང་གི་དམག་དཔུང་ནི་བཀྲ་མ་ཤིས་པ་ཞིག་སྟེ། ཕྱིའི་བཙན་འཛུལ་ལ་ངོ་རྒོལ་གྱིས་རྒྱལ་སྐྱོབ་དམངས་ཕན་གྱི་བྱ་བ་ཞིག་བྱས་མྱོང་མི་འདུག་པ་མ་ཟད། ནང་དམེ་རྐྱང་རྐྱང་གི་འཐབ་ར་ལས་ལས་བརྒལ་ཐུབ་མེད། ང་ཚོས་ཆེས་གསལ་བོར་མཐོང་བ་ནི། ལོ་རབས་སུམ་ཅུ་དང་བཞི་བཅུའི་ནང་དུ་ལྐོག་གཡོ་ངན་ཇུས་ཀྱི་འཕག་འཚག་ཤིག་རྒྱབ་པ་དང༌། ལོ་རབས་བརྒྱད་ཅུ་བའི་ནང་རང་ཁྲག་ཧམ་འཐུང་དང་མི་སེར་གསོད་གཏུབ། ཉིས་སྟོང་བརྒྱད་ལོར་ཉེས་མེད་བོད་མི་སེར་སྐྱ་ཡོངས་ལ་ཁྲག་དྲི་བྲོ་བའི་གཡུལ་འཐབ་ཐེངས་གཅིག་བཤམས་པ་བཅས་རེད།
དེ་ཡང་ལོ་རབས་སུམ་ཅུ་བའི་ནང་ཉི་ཧོང་གིས་བཙན་འཛུལ་བྱེད་སྐབས་གུང་ཁྲན་ཏང་གི་དམག་མིས་དམག་ས་མདུན་མར་གོ་མིན་ཏང་གི་དམག་དཔུང་གཡོ་བཙོང་བྱས་པའི་ནག་ཉེས་དང༌། དགྲ་ཕར་རྒོལ་གྱི་དཔའ་རྟགས་རྐུ་འཁྱེར་བྱས་པ་འབའ་ཞིག་ཡོད་མོད། དེ་མིན་སྐབས་དེར་ཡུལ་དམག་དང་སྡེ་དམག་སྡེབས་ལངས་བྱས་པའི་བྱས་རྗེས་ཙམ་ཡོད་པ་ལས། གུང་ཁྲན་ཏང་གི་དམག་དཔུང་རང་ལ་སྤོབས་པ་བྱེད་འོས་པ་དང༌། ངོམ་རིན་ཡོད་པའི་དཔའ་རྟགས་དང་ལག་རྗེས་ཤིག་ལོ་རྒྱུས་ཀྱི་ཤོག་དཀར་ངོས་སུ་བདེན་གཏམ་གྱི་ཡིག་གེར་འགོད་ཐུབ་མེད། དེ་དང་མཐུད་ནས་ཤ་ཁྲག་རུས་རྒྱུད་གཅིག་པའི་གོ་མིན་ཏང་གི་དམག་དཔུང་ལ་ལྐོག་གཡོ་ངན་ཇུས་ཀྱིས་ནང་དམེ་ཁོ་ནའི་འཁོར་ལོ་བསྐོར་ཏེ་རྒྱ་རིགས་ཁྲི་ཕྲག་མང་པོའི་མགོ་བོ་ཐང་ལ་གཡུགས་མྱོང་བས་ཞིབ་ཏུ་བསམ་ན་རྒྱ་རིགས་མི་མང་ཚོ་ཡང་སྐྱུག་བྲོ་ཞིང་ཞེ་མེར་བ་ཞིག་ཡིན།
ལོ་རབས་བརྒྱད་ཅུ་བའི་ནང་ལྷ་སར་བོད་རིགས་མི་མང་གིས་རང་དབང་དང་འདྲ་མཉམ་དགོས་པའི་དགོས་འདུན་བཏོན་པའི་སྐབས་དང༌། རྒྱ་ནག་པེ་ཅིན་དུ་རྒྱ་རིགས་སློབ་མ་ཁྲི་ཕྲག་མང་པོས་མང་གཙོ་དང་འདྲ་མཉམ་དགོས་པའི་རྣམ་འགྱུར་སྟོན་སྐབས། ཡ་ང་བ་དང་བག་ཚ་བ་མེད་པར་གུང་ཁྲན་ཏང་གི་དམག་འཐབ་ཐེངས་གཅིག་བྱས་མྱོང་བ་དང༌། དེའི་སྐབས་སུ་ལྕགས་འཁྲབ་འཁོར་ལོ་དང་ཐན་ཁེ། མེ་སྒྱོགས་སོགས་དེང་རབས་ཀྱི་མཚོན་ཆ་བཟུང་བའི་རྒྱ་དམག་གི་ཁ་གཏད་དུ་ཡོད་པ་ནི་མི་དམངས་དཀྱུས་མ་དང་སློབ་མ་རྐྱང་རྐྱང་ཡིན་ལ། ཁོང་ཚོའི་ལག་པ་སྟོང་བ་ཡིན་པ་མ་ཟད། མི་རིགས་དང་མི་དམངས་ལ་ལྷག་བསམ་རྣམ་དག་ཡིན། ཡིན་ནའང་གུང་ཁྲན་ཏང་གིས་སྐད་ཅིག་དེ་ཉིད་དུ་དམར་གསོད་བཏང་ནས་རོ་ཡི་རི་བོ་བརྩིགས་ཤིང༌། ཁྲག་གི་ཡུར་ཆུ་བཞུར་ཏེ་གུང་ཁྲན་ཏང་གི་དམག་མིས་སྙིང་སྟོབས་ངོམ་ཡོད། འདི་ལྟར་བལྟས་ཡོང་ན། རྒྱ་ནག་གིས་འགྲོ་སོང་གི་བརྒྱ་ཆ་བདུན་ཅུ་བཏང་སྟེ་གསོ་སྐྱོང་དང་ཡར་རྒྱས་བཏང་བའི་དམག་མི་དག་གི་སྙིང་སྟོབས་ངོམ་ས་དང༌། དེང་རབས་མཚོན་ཆའི་ཟིལ་ཤུགས་ངོམ་ས་ཉམ་ཆུང་མི་སེར་གྱི་ཚེ་སྲོག་ཆགས་ཡོད་སྟབས། རྒྱ་ནག་གི་དབང་འཛིན་པ་ཚོ་དང་མི་སེར་གྱི་བར་དུ་ཞེ་འཁོན་དང་སྡུག་ནད་དྭངས་ཐབས་མེད་པ་མ་ཟད། ཆེས་མུན་ནག་དང་ཆེས་གདུག་རྩུབ། ཆེས་ཀླ་ཀློ་ཡིན་པའི་གུང་ཁྲན་ཏང་གི་དམག་དཔུང་གི་སྡུག་ཉེས་ནམ་མཁར་མི་ཤོང་བ་ཡིན།
དུས་རབས་ཀྱི་བང་ཁ་ཞི་བདེར་སྙེག་པའི་ཉིས་སྟོང་བརྒྱད་ཀྱི་ལོ་འདིར་ཡང༌། བོད་ཁ་བ་གངས་ཅན་གྱི་ལྗོངས་སུ་རང་དབང་དང་ཐོབ་ཐང་གི་དགོས་འདུན་འདོན་མཁན། ཞིང་གྲོང་དང་གྲོང་བརྡལ། འབྲོག་སྡེ་དང་དགོན་པ། སློབ་གྲྭ་དང་གྲོང་ཁྱེར་སོགས་བོད་ས་ཁྱོན་ཡོངས་ནས་སེར་སྐྱ་མི་མང་གིས་ཞི་བའི་འབོད་ཚིག་དང༌། ལག་པ་གནམ་དུ་བཀྱག་སྟེ་མངོན་འདོད་གསལ་བརྗོད་ཀྱིས་འོས་ལངས་བྱས་པར། རྒྱ་གཞུང་གི་དྲག་པོའི་དམག་དཔུང་གིས་གཡུལ་བཤམས་ཏེ། དེང་རབས་ཐོན་གསར་གྱི་ལྕགས་འཁྲབ་འཁོར་ལོ་དང་ཐན་ཁེ། མེ་སྒྱོག་སོགས་ཀྱི་མཚོན་ཆ་བཟུང་བའི་བཅིངས་འགྲོལ་དམག་མི་འབོར་ཆེན་བཏང་ནས་ཞིང་འབྲོག་མི་མང་གིས་མཚོན་པའི་ཉམ་ཆུང་བོད་མི་ཡོངས་ལ་དྲག་པོའི་རྒོལ་རྡུང་ཁྲོད་ཡ་ང་སྙིང་རྗེ་དང་ངོ་ཚ་ཁྲེལ་མེད་ཀྱིས་དམར་གསོད་དང༌། ཉེས་རྡུང༌། བཙོན་འཇུག་སོགས་ཉེས་མེད་ཉེས་འགེལ་བྱེད་བཞིན་པ་འཛམ་གླིང་མི་མང་གིས་དངོས་སུ་ཤེས་རྟོགས་བྱུང་ཡོད་ཀྱང༌། ད་དུང་རྒྱ་རིགས་མི་མང་དང་ཕྱིའི་རྒྱལ་ཁབ་ཁག་ཏུ་གཡོ་ཧམ་གྱིས་རྫུན་ཚིན་འབའ་ཞིག་སྒྲོག་བཞིན་པ་ནི་རྒྱ་གཞུང་གི་གདོང་རིས་ངོ་མ་དེ་རེད། འདི་ལྟ་བུའི་མི་སེར་དམར་གསོད་གཏོང་མཁན་གྱི་རྒྱལ་ཁབ་ཅིག་སུ་ལ་མཁོ། འདི་ལྟ་བུའི་རང་གི་མི་སེར་གྱི་ཐོག་ཏུ་དྲག་པོའི་དཔུང་འཇུག་བྱེད་མཁན་གྱི་དམག་མི་ཞིག་གང་དུ་ཡོད། དེ་ནི་རྒྱ་ནག་ཁོ་ན་ཡིན་ལ། འདི་ནི་རྒྱ་ནག་མི་མང་གིས་ཀྱང་ངེས་པར་དུ་ཤེས་དགོས་པ་ཞིག་རེད།
ཉེ་ལམ་ལྷ་སའི་བརྙན་འཕྲིན་ནང་དུ། རྒྱ་ཡི་དཔོན་རིགས་འགས་འཐབ་ས་དང་པོའི་སྟེང་དུ་བྱས་རྗེས་འཇོག་བཞིན་པའི་དམག་མི་ལ་གཟིགས་གསོལ་ཞེས་དམག་མི་ཁྱུ་ཞིག་ལ་བྱ་དགའ་ལེགས་སྐྱེས་སྤྲོད་བཞིན་འདུག དམག་མི་ཚང་མར་དགའ་སྣང་ཞིག་འདུག་མོད། ངའི་སེམས་ལ་གྲང་འདར་ཞིག་རྒྱབ་བྱུང༌། ཁྱེད་རང་དམག་མི་ཞིག་གི་ངོས་ནས་ཞུས་ན། རང་གི་མི་སེར་གྱི་མགོ་དང་བྲང་ཁོག་ཏུ་མེ་མདའི་ཁ་གཏད་རྒྱུ་ནི་ཁྱེད་ཀྱི་འཐབ་ས་དང་པོ་དེ་ཡིན་ནམ། མ་མཐའ་ཡང༌། ཁྱེད་ལ་དམག་འཐབ་ཇུས་འགོད་བྱེད་ས་དང༌། མཚོན་ཆ་བེད་སྤྱོད་གཏོང་ས་ཆུང་དྲག་འདུག་པའི་ཚོར་བ་ཞིག་མི་སླེབས་སམ།
དོན་དངོས་ཀྱི་རི་མོ་ས་ལ་ལྷུང་བ་འདི་དག་ལ་བལྟས་ཏེ། ངས་གུང་ཁྲན་ཏང་གི་དམག་དཔུང་ནི་བཀྲ་མ་ཤིས་པ་ཞིག་སྟེ། ཕྱིའི་བཙན་འཛུལ་ལ་ངོ་རྒོལ་གྱིས་རྒྱལ་སྐྱོབ་དམངས་ཕན་གྱི་བྱ་བ་ཞིག་བྱས་མྱོང་མི་འདུག་པ་མ་ཟད། ནང་དམེ་རྐྱང་རྐྱང་གི་འཐབ་ར་ལས་ལས་བརྒལ་ཐུབ་མི་འདུག་ཟེར་གྱི་ཡོད།