རླུང་དམར།
མེ་ཞོགས་ཀྱི་སྣང་བའི་གཙང་བོ་ཚ་ལུམ་ལུམ་གྱི་དུར་སྒམ་ཞིག་ཡིན་སོང
སྐྱོ་ཞིང་ན་བའི་ལུས་སེམས་ཀྱི་མནར་གཅོད་དེ
ངོ་སོ་མི་བལྟ་བའི་འདྲ་མཉམ་གྱི་ནད་འགོ་ལྕགས་ཚ་མ
གཉན་ནད་དེའི་ཕྱིར་གོ་ཧྲིལ་བོ་ནད་ཐར་དམག་འགྱེད་ལ་ཞུགས་ཏེ་འདུག
བླ་སྤྲུལ་ཚོས སེམས་གཙོ་ཞི་གནས་ལ་བརྩོན་པ་བྱོས་གསུངས
ལྷ་རྗེ་ཚོས གཙང་སྦྲ་འཕྲོད་བསྟེན་ལ་འབད་རོགས་ཟེར
དཔོན་པོ་ཚོས ནད་ཐར་ཐབས་བརྒྱ་ཇུས་འགོད་ལ་རེམ་ཞེས་གླེང
སྐྱེ་འགྲོ་ཚོས གསར་འགྱུར་ལ་བལྟ་ཉན་བྱས་ཏེ་རེ་སྒུག་བགྱི
དམག་འགྱེད་ལྟ་བུའི་ནད་ཁ
ས་ཁྱབ་རྡོ་ཁྱབ་བཞིན་གོ་ལ་ཧྲིལ་བོར་ཁྱབ་མུས་རེད
མི་སྒེར་གྱི་བདེ་ཐང་ནས་སྤྱི་བའི་བདེ་ཐང་རྨེག་མེད་ལ་གདའ
ན་ཚའི་འཇིགས་པས་རྒྱ་མཚོའི་ཚོར་ཤེས་ལ་བཟི་སྨན་བཏབ
མཐའ་ཡས་པའི་ནམ་མཁའ་ལ་སྐྱོ་གར་བྱུགས
དཔལ་ཡོན་ཆེ་བའི་གོ་ལའི་ལང་ཚོ་ལ་རྨ་དྲི་འཐུལ་འཐུལ
དམར་དྲིའི་གཉན་ནད་དེས
མི་དང་མི་མཐོང་ན་འདྲེ་མཐོང་བ་ལྟ་བུའི་ལྷ་སྒྲུང་ཞིག་བརྩམས་བྱུང
རྣམ་རྟོག་གིས་བསླངས་བའི་གཟུགས་ཀྱི་ཡན་ལག་ཐམས་ཅད་བོར་འདུག
འགྲོ་མིའི་བྱམས་བརྩེ་དང་འབྲེལ་ཐག་རིང་དུ་གཏུབ་སོང
དེ་ལྟར་ནའང དམག་འགྱེད་ནད་འཐབ་འདིའི་དཔའ་སྙིང་འཛིན་པོ་ཚོས
ནད་མནར་གྱི་སྐྱེ་འགྲོ་ཚོ་སྲུང་གཉེར་གནང་གིན་འདུག
ལག་པས་ལག་པ་འཇུས་ཏེ་རོགས་འདེགས་ཀྱི་ནད་གྲོལ་ལ་རེམ
དམག་འགྱེད་འདི་རིམས་ནད་སྔོན་འགོག་གི་འཐབ་འཛིང་ཞིག་ཡིན
ང་ཚོ་ལ་གཉན་ནད་ཀྱིས་ཇི་ལྟར་གཙེས་ཏེ་ཡོང་ན
དེ་ལྟར་ང་ཚོས་གཉན་ནད་བཟློག་འགྱུར་གྱི་དམག་འགྱེད་དེའི་ཕྱིར
ཤི་འཐབ་རོ་འཐབ་ཀྱི་གདོང་ལེན་བྱེད་འོས
སེམས་ལྷོད་ལྷོད་ཀྱི་གཞིས་ཀ་ཞིག་རེ་ཞིག་མེད་ནའང
གློ་ཚད་གཉན་རིམས་ཀྱི་མདུན་ནས་གཉའ་མི་ཞུམ་པར་རང་སེམས་ལ་ངར་བླུགས
ཟས་བཅུད་དང་འགན་སྲུང་གི་ངར་བླུགས་ཤིག
འགྲོ་འདུག་སྤྱོད་གསུམ་ལ་བདག་གཅེས་མཛོད