ཤེས་དགས།།
སྐྱིད་ན་སྐྱིད་པོ་དེ་ཡང་མི་གོ་ད་དུང་སྡུག་བསྔལ་ཆེ་མདོག་བཤད།།
སྡུག་བསྔལ་རང་གི་ཐོག་ཏུ་བབས་ན་ལས་རེད་ཟེར་ནས་བསམ་པ་བདེ།།
གོ་ལྡོག་འཇིག་རྟེན་འདི་ཡི་ཆོས་ཉིད་རིམ་པས་རང་གིས་མྱོང་པ་རྣམས།།
བསམ་པའི་ཚེ་ན་གཅིག་པུ་ཡིན་ཡང་དབང་མེད་གད་མོ་དི་རིར་འཆོར།།
མ་འཆོལ་དོན་རྣམས་དཀའ་བ་བརྒྱ་ཡིས་བསྒྲུབས་དགོས་ཤ་རྟག་ཉིད་དུ་མཆིས།།
ཅི་ཕྱིར་གོལ་དང་འཁྲུལ་བ་འདི་ཚོ་མི་དཀའ་བྱེད་སྙིང་འདོད་པ་ཨང་།།
བྱིས་པ་མིན་ཡང་བྱིས་བ་ལྟ་བུར་རང་ཐོག་འབབ་ན་མགོ་བོ་འཐོམས།།
གཞན་གྱིས་དེ་འདྲ་བྱས་པ་མཐོང་ན་མ་འདོད་ཁྲེལ་གད་ཁོང་ནས་འཆོར།།
རྣམ་དཔྱོད་ཡོད་ན་ཅི་ཕྱིར་ཁོ་བོས་ནོར་འཁྲུལ་རྗེས་སུ་ཁོ་ནར་གོ།
ཡང་ན་ནོར་བ་ནོར་བ་ཉིད་དུ་གཏན་ནས་མ་གོ་ཆོག་པ་ཨང་།།
ཉམས་མྱོང་ཟེར་བ་འཁྲུལ་བའི་བརྒྱུད་རིམ་རིང་ཐུང་དེད་པའི་ཐ་མ་ན།།
འཁྲུལ་བ་དག་ལ་དེ་དེ་བཞིན་དུ་གོ་བ་ཙམ་ལ་མིང་གིས་བསྙད།།
མདོར་ན་ཁྱེད་རང་དགའ་བ་དེ་ཚོ་ཧ་ལམ་ཚང་མ་ནོར་འཁྲུལ་སྟེ།།
ནམ་ཞིག་ཆ་མེད་འགྱོད་པའི་གླིང་གི་ཕལ་ཆེར་གདན་འདྲེན་ཡིན་པར་ངེས།།
འོན་ཀྱང་བློ་ཁོགས་གདེངས་ཚོད་སྤོབས་པ་ཡང་ན་ཨའུ་ཙམ་རེད་སྙམ་པས།།
ཁྱོད་ཀྱི་མ་འོངས་ད་ལྡར་མཐོང་བའི་བློ་མིག་ཡོངས་རྫོགས་དེ་ཡིས་ལྡོང་།།
དམ་པའི་ཆོས་ནས་ཇི་སྙད་གསུང་པ་རྨོངས་པ་བདག་གི་གོ་དཀའ་ཡང་།།
འདི་དག་འཇིག་རྟེན་འདི་གའི་ཐོག་ནས་རང་གི་ཉམས་སུ་མྱོང་བ་ཉིད།།
མི་ཚེ་གཅིག་གི་བྱ་བ་ཕལ་ཆེར་ཐ་མར་བེད་མེད་ཉིད་དུ་ཟད།།
ངུ་འམ་གོད་དམ་གང་ཞིག་བྱ་འོ་བསམ་ན་དེ་ཡང་འཕྱང་མོ་ཉུག།
རྩོམ་གྱི་བརྗོད་དོན་ལེགས། རྗོད་བྱེད་ཚིག་ལ་ཡིག་ནོར་མིག་ལ་ཐོགས་ཚད་གཟིགས་རོགས།
བསྒྲུབས་༼བསྒྲུབ༽དགོས་ཤ་རྟག་༼ཤ་སྟག༽ཉིད་དུ་མཆིས།།
ཁྲེལ་གད་༼དགོད༽ཁོང་ནས་འཆོར།།
མདོར་ན་ཁྱེད་རང་དགའ་བ་དེ་ཚོ་ཧ་ལམ་ཚང་མ་ནོར་འཁྲུལ་སྟེ།།༼ འདི་ལ་ཚིག་སྐྱོན་འདུག༽
བློ་ཁོགས་༼ཁོག༽ག
ཁྱོད་ཀྱི་མ་འོངས་ད་ལྡར་༼ལྟར༽མཐོང་བའི་བློ་མིག་ཡོངས་རྫོགས་དེ་ཡིས་ལྡོང་༼ལྡོངས༽།།
དམ་པའི་ཆོས་ནས་ཇི་སྙད་གསུང་པ་རྨོངས་པ་བདག་གི་༼ གིས༽གོ་དཀའ་ཡང་།།
ངུ་འམ་གོད་༼དགོད༽དམ་
ངས་གོ་ནོའི་ཚིགས་བཅད་རེད་འདུག་པས་སྙན་པོ་ཞེ་པོ་འདུག་ཞུ་བ་ཡིན།
ཐར་པར་འདོད་ན་རང་རྒྱལ་གཞན་ཕམ་བྱ་བ་ངན་པ་ཅམ་གྱིས་བཞག་སྟེ་གཞན་དོན་སྒྲུབ། །
ཞི་བདེ་འདོད་ན་དང་ཐོག་རང་སེམས་གླང་སྨྱོལ་འདུལ་བའི་ལས་ལ་བརྩོན། །
ཕུག་བསམ་ཡོད་ན་གངས་ལྗོངས་ཕ་མེས་རིགས་གཞུང་དམ་པར་གཅེས་སྤྲས་བྱོས། །
མཐོན་པོར་འདོད་ན་དམའ་ས་བཟུང་ནས་ཉམས་ཆུང་འགྲོ་ལ་བློ་བརྟེན་མཛོད།།
དྲྭ་གྲོགས་མིག་བརྒྱད་པས་ཞིབ་ཚགས་གི་དཔྱད་བརྗོད་ལ་དགའ་བསུ་ཞུ།།
དྲྭ་གྲོགས་གནམ་ཐུགས་རྗེ་ཆེ།།