སྐྱོ་བྲག་དགའ་དབང་།
གྲོགས་པོ་ཚོ་དགོངས་སམ། ང་ཚོའི་སྤྱོད་ཡུལ་དུ་གྱུར་པའི་དངོས་པོ་གང་ཞིག་ཡིན་ནའང་། རྒྱུ་རྐྱེན་རྟེན་འབྲེལ་འཛོམས་པ་ལས་བྱུང་བ་མ་གཏོགས་རྒྱུ་མེད་རྐྱེན་མེད་དུ་བྱུང་བ་ཞིག་ནི་མི་སྲིད་པ་ཡིན། རྒྱུ་རྐྱེན་རྟེན་འབྲེལ་འཛོམས་པ་ནི་ལས་སླ་བོ་ཞིག་མིན་ཏེ། ང་ཚོའི་སློབ་སྦྱོང་ལ་བསམ་ནའང་། ལོ་ན་གཞོན་པ་ཡིན་ཐོག །སྦྱང་བྱའི་རིག་གནས་ཡོད་དགོས་ལ། སློབ་མཁན་གྱི་དགེ་རྒན་ཡོད་དགོས། ད་དུང་ཉེར་མཁོའི་མཐུན་རྐྱེན་ཡང་ཚང་དགོས། ལོ་ན་རྒས་ན་ལུས་ཁམས་ཟད་ནས་དབང་པོ་གསལ་པོ་མེད་པས་ཤེས་བྱ་ག་རེ་ཡིན་ནའང་ཤེས་དཀའ་ལ་བརྗེད་མགྱོགས་པ་ཡིན། སྦྱང་བྱའི་རིག་གནས་མེད་ན་ཅི་ཞིག་སྦྱོང་དགོས་གང་ཡང་ཤེས་ཀྱི་མ་རེད། དགེ་རྒན་མེད་ན་ར་སྤྲོད་བྱེད་མཁན་མེད་པས་ཅི་ཡང་ཤེས་མི་ཐུབ། མཐུན་རྐྱེན་མེད་ན་ཤེས་བྱར་སྦྱོང་བའི་ལོང་སྐབས་མེད། འདི་དག་ཚང་མ་འཛོམས་པ་ཧ་ཅང་གི་དཀའ་བས་འཛོམས་པའི་གོ་སྐབས་ག་དུས་བྱུང་ནའང་གོ་སྐབས་དམ་འཛིན་བྱ་དགོས། གལ་ཏེ་འཛོམས་པའི་གོ་སྐབས་འཐུས་ཤོར་དུ་སོང་ན་སླར་རྙེད་པར་དཀའ་བ་སྟེ། གཞོན་པའི་ལོ་ཚོད་ཡོལ་དུ་བཅུག་ན་སླར་ལོག་ཏུ་མེད་པ་ལྟ་བུ་ཡིན། གོ་སྐབས་འཐུས་ཤོར་དུ་མ་བཏང་བར་དམ་འཛིན་ཐུབ་པ་ཡིན་ན་གྲུབ་འབྲས་རིམ་གསོག་གིས་ཡར་རྒྱས་སུ་སོང་བ་ཞེས་པ་ཀུན་གྱིས་ཡིད་སྨོན་ཤོར་དགོས་པ་དེ་ཡོང་གི་ཡོད། ང་ཚོ་འཇིག་རྟེན་འདིར་སྐྱེས་ཏེ་མི་ཟས་ཟོས་པའི་ལག་རྗེས་ཤིག་འཇོག་དགོས་ན་ཤེས་ཡོན་ཡོད་དགོས་ལ། ཤེས་ཡོན་ནི་སློབ་སྦྱོང་གི་གོ་སྐབས་དམ་འཛིན་བྱས་པ་ལས་བྱུང་བ་མ་གཏོགས་གཞན་ཞིག་ནས་སླེབ་ཡོང་བ་དང་གཞན་ཞིག་གིས་གནང་ཡོང་བ་ཞིག་མིན། སློབ་སྦྱོང་ཙམ་དུ་མ་ཟད་འཇིག་རྟེན་འདི་ན་བསྒྲུབ་པར་འོས་པའི་བྱ་བ་ཅི་ཞིག་ཡིན་ནའང་གོ་སྐབས་དམ་འཛིན་བྱ་མི་དགོས་པ་ཞིག་མེད་པའི་ཕྱིར་ན། གཞུང་སྒེར་གང་གི་བྱ་བ་ཡིན་ནའང་གོ་སྐབས་དམ་འཛིན་བྱ་བ་ལས་འཐུས་ཤོར་དུ་ནམ་ཡང་གཏོང་མི་རུང་བ་ཡིན་པ་ང་ཚོ་ཚང་མས་ཤེས་དགོས།
སྐྱབས་སུ་མཆི། གནད་དུ་ཁེལ་བའི་བཀའ་གདམས་ཤིག་གནང་འདུག ༧གོང་ས་ཆེན་པོའི་བཀའ་སློབ་ལས་བཏུས་པ་མིན་འགྲོ་་་་་་་་་་་་་་་་་་་་་་་་
མཁན་པོ་དགའ་དབང་ལགས། ཁྱེད་ཀྱི་གློག་འཕྲིན་ཁ་བྱང་ཞིག་ཕྲན་གྱི་ཁ་བྱང་འདི་ཐོག་ཏུ་གཏོང་གནང་ཞུ། ཁྱེད་ལ་དྲི་བ་འགའ་ཞིག་ཕུལ་རྒྱུ་ཡོད་ལགས།tenshedup@gmail.com
ཐུགས་རྗེ་ཆེ་གནད་ལ་་ཁེལ་པ་གསུང་འདུག།།