གོས་དུམ་སྐྲ་སེན་ཆབ་བསིལ་ཡང་དད་ཅན་ཚོས་ཁྱེར་བ་དང་བཏུང་བའི་སྐོར།

ཧི་མ་ལ་ཡའི་འཕྲུལ་སྨྱུག

ཞབས་བཀྱག་ཞུ་བ་ཞེས་རང་ཉིད་གན་རྐྱལ་དུ་འགྱེལ་བའི་ཐོག་ཏུ་བླ་མར་རྡོག་བརྫི་བྱེད་དུ་བཅུག་པ། ༼ཞེས་པ་འདི་གར་ཡོད་ཆ་མ་འཚལ་ནའང༌།༽ ཆགས་མེད་རིན་པོ་ཆེས། གོས་དུམ་སྐྲ་སེན་ཆབ་བསིལ་ཡང༌། །དད་ཅན་མང་པོས་ཁྱེར་དང་བཏུང༌། ༼།ཞེས་པ་དེ་ནི། རོ་སྙོམས་ཆེན་པོའི་སྐབས་ཀྱི་སརྒ་བཅུ་གཉིས་པའི་ནང་དུ་ཡོད་ལ།༽ ཇ་སྙིགས་ཕོས་པ་ཐམས་ཅད་ཀྱང༌། །མིག་ལ་བྱུག་དང་སྐེ་ལ་བྱུག །ཅེས་གསུངས་པ་༼དེ་ནི། རོ་སྙོམས་ཆུང་ངུའི་སྐབས་ཀྱི་སརྒ་བཅུ་པའི་ནང་དུ་འདི་༽ལྟར་༼འཁོད་ཡོད༽། འོན་ཀྱང་སྐབས་འདིའི་ཚིགས་བཅད་སྒྲིག་ཚུལ་གྱིས་གོ་རིམ་ལ་དཔག་ན། ཚ་སྨྱུག་པ་ཁོང་ནི་རྣམ་དཔྱོད་ཀྱི་ཀློག་ཞགས་འཁྱུགས་གྲགས་པའི་དབང་གི་དཔེ་ཆ་རྣམས་ལུགས་འབྱུང་དུ་མི་ཀློག་པར། ལུགས་ལྡོག་ཏུ་ཀློག་པའི་སྣང་ཚུལ་ཞིག་མངོན་པ་མ་ཟད། ཚིགས་བཅད་དེ་གཉིས་ཀྱི་འབྱུང་ཁུངས་སརྒའི་གོ་རིམ་མི་མཐུན་ཀྱང༌། གཅིག་གྱུར་དུ་སྤོམ་པར་མཛད་པའི་དགོས་ཆེད་ནི། བོད་ཆེན་པོའི་ས་ཁྱོན་ལས་ཀྱང་ལྷག་པ་ཞིག་ཡོད་པ་སྨོས་མི་དགོས་པར་སྙམ་མོ།།

རི་ཆོས་དེ་ཉིད་ཀྱི་དགོངས་པ་ལྟར། རོ་སྙོམས་ཀྱི་སྤྱོད་པ་སྤྱོད་ནུས་པའི་༽བླ་མའི་ཁ་འཁྲུད་ལག་འཁྲུད་རང་གི་མགོ་དང་ལུས་ལ་བྱུག་པ་༼དང༌།༽ རང་གི་ཁ་མིག་སྣ་གསུམ་གྱི་ནང་བླ་མར་མཆིལ་མ་འདེབ་ཏུ་བཅུག་པ། བླ་མའི་སྐྲ་སེན་བསྲེག་པའི་དུ་བར་སྣོམ་པ། ཐ་ན་བླ་མའི་གཅིན་སྐྱག་ཡན་ཆད་བྱིན་རླབས་ཀྱི་རྫས་སུ་བརྩིས་ཏེ་ཟ་ཞིང་འཐུང་བ་སོགས་ཀྱང༌། གསང་སྔགས་ཀྱི་བླ་མ་བསྟེན་ཚུལ་དྲི་མ་མེད་པ་རེད། ༼ཅེས་གསུངས་པ་ནི། དོན་ལ་གནས་པར་སེམས་ཏེ། རྟོགས་པ་དེ་ལྟ་བུ་དང་ལྡན་པའི་བླ་མ་དེའི་བྱིན་རླབས་སོགས་བེད་སྤྱོད་བྱས་པ་ཡིན་ན་ནི། དཔོན་རིག་གམ་བླ་ཆེན་ག་གེ་མོའི་རྒྱབ་སྐྱོར་གྱི་ཕྱག་བྲིས་སམ། མཐོ་སློབ་བམ་དགོན་ཆེན་ཆེ་གེ་མོ་སོགས་ནས་སློབ་ཐོན་ལག་ཁྱེར་སྟོན་རྒྱུ་ཡོད་ན། སྤྱི་ཚོགས་ཀྱི་སྟེང་དུ་མཐོང་ཆེན་ནམ་ཚད་མཐོའི་གདེང་འཇོག་བྱེད་བཞིན་པ་ལྟར་རོ།།༽

ད་དུང་དེང་སེང་ལག་ལེན་བྱེད་མཁན་མེད་པ་ཙམ་མ་གཏོགས་བླ་མ་ཡབ་ཡུམ་སྙོམས་པར་འཇུག་པའི་སྦྱོར་མཚམས་སུ་སློབ་མར་ལྕེ་ལྡག་བྱེད་དུ་བཅུག་ཅིང༌། ལྕེ་ཐོག་ཏུ་ཡོང་བའི་ཁྲག་རྣག་གི་ཐིག་པ་དེ་ཉིད་འཛམ་གླིང་ན་དཀོན་པའི་དངོས་གྲུབ་ཀྱི་རྒྱ་མཚོ་ཞིག་ཡིན་རབས་ཀྱི་བཤད་པ་བརྒྱབ་པ་སོགས་མི་ཆོས་ལས་འདས་པའི་ཆོ་ག་ཕྱག་ལེན་མང་པོ་ཡོད་པ་རེད། ༼གལ་སྲིད་མི་གཙང་བ་དེའི་རིགས་མིའི་ལྕེ་ཐོག་ཏུ་མྱོང་བ་ཐམས་ཅད་མི་ཆོས་ལས་འདས་པ་ཡིན་ན། སྨན་གྱི་བཟོ་གྲྭ་ནས་བཟོས་པའི་སྨན་མང་པོ་ཞིག་ཀྱང་དེ་འབྲེལ་དུ་ཐལ་བས། ལེགས་པར་མ་དཔྱད་པར་སྐུ་ཉིད་བཞེས་རྒྱུ་ལྟ་ཅི། རྣམ་དཔྱོད་དང་ལྡན་པའི་ཚན་རིག་པ་རྣམས་ཀྱི་ཟ་བར་དོགས་པས། ཉེས་འགོག་སླད་སྐུ་ངལ་ལྷུར་ལེན་གནང་བཞིན་ཡོད་ནི་སྨོས་མེད་རེད་སྙམ་ལ། ཆུ་ལྟ་བུ་ཞིག་ལ་མཚོན་ནའང་ས་ཆ་ག་གེ་མོ་ཐམས་ཅད་དུ་ལུང་པའི་མདོའི་ཆུ་མཐའ་དག་ཐུང་མི་ཉན་པར་གྱུར་ཏེ། རྒྱ་གར་དུ་རྒྱུ་བའི་ཆུ་མོ་གངྒཱའི་འགྲམ་དུ་སྐུ་ཉིད་ཕེབས་ནས་གཟིགས་དང༌། ཆུ་འགྲམ་ཐམས་ཅད་དུ་མི་རོ་སྲེག་བཞིན་པའི་སྟེང༌། སྲེག་ཚར་བའི་ཐལ་བ་ཆུར་སྐྱུར་ཏེ། ཆུ་བོ་ཁམས་ནག་ལྷོག་ལྷོག་ཏུ་གྱུར་ཡོད་ནའང༌། རྒྱ་གར་བའི་རིགས་རུས་ལ་མཆོག་ཏུ་རྩི་བའི་བྲམ་ཟེ་རྒད་པོ་རྣམས་ཀྱང༌། ཉམས་ང་སྤུ་ཙམ་མེད་པར་ངང་པ་མཚོ་མོར་རོལ་བ་ལྟར་ཇུག་བཞིན་པ་མ་ཟད། ཁོ་བོ་ཡང་སྤྱི་ལོ་ ༡༩༩༣ ལོར་ཐེངས་གཅིག་ཝ་ར་ཎ་སིའི་ཆུ་འགྲམ་དུ་སླེབས་སྐབས། མཁན་ཆེན་བཞན་དགའི་ཟླ་གྲགས་ཀྱི་བསྟོད་པ་ལས། དཔལ་ལྡ་ཟླ་བ་གྲགས་པ་ཡིས། །བརྡ་སྤྲོད་ཀུན་ཏུ་བཟང་པོའི་གཞུང༌། །བསྐུར་བས་གངྒཱའི་ཆུ་ཀླུང་གི །ཤེས་རབ་བསྐྱེད་པ་ངོ་མཚར་ཆེ། །ཞེས་པ་དེ་ཡིད་ལ་དྲན་བཞིན་དུ་ཆུ་ཁྱོར་མོ་གང་འཐུང་ཐལ་བ་དེ་ཡང༌། ད་གཟོད་ཕྱིར་དྲན་ཞིག་བྱས་ཚེ། འགྱོད་པ་ཁོག་དུག་ཤོར་བ་ལས་ཀྱང་ལྷག་པ་ཞིག་འདུག་ན། ཇི་དགེའི་སློབ་སྟོན་ཞིག་གནང་སྐྱོང་ཡོང་བ་ཞུ་རྒྱུ་དང་ཆབས་ཅིག
ད་དུང་དེས་མི་ཚད་ཁྱེད་ཀྱི་མིག་དཔེ་བཟང་ལྟ་བྱེད་ཡུལ་ནུབ་ཕྱོགས་རྒྱལ་ཁབ་ཁག་ཏུ་ཡང༌། ཡོང་འབབ་མཁོ་སྒྲུབ་ཀྱིས་ཆེད་དུ་དམིགས་ཏེ། མཚན་མ་འཇིབ་ལྡག་གིས་ལས་ལ་དགའ་བཞིན་སྤྲོ་བཞིན་དུ་བརྙན་འཕྲིན་ཕབ་ལེན་བྱས་ཡོད་པ་དེ་དག་ཀྱང༌། མི་ཆོས་ལས་འདས་པའི་གྲལ་དུ་ལོས་ཚུད་སྙམ་བཞིན་ཡོད་ན། ཨེ་ཚུད་མི་ཚུད་ནི་ཁྱེད་ཀྱི་གཟིགས་ཕྱོགས་ལ་རག་ལས་པར་རློམ་མོ།།༽