འཇིགས་མེད་དབང་འདུས།
༄༅།། ས་ཐག་རིང་འཕགས་པའི་གྲོང་འཁྱེར་ན།།
རྗེ་སྐྱབས་མགོན་སྐུ་ཚེ་བརྟན་ནས་ཡོད།།
ཐུགས་བྱམས་བརྩེའི་འགྲོ་རྣམས་སྐྱོང་བཞིན་ཡོད།།
མཚན་སྙན་གྲགས་འཛམ་གླིང་ཀུན་ལ་ཁྱབ།།
རྗེ་བླ་མའི་བཀྲིན་བསམ་མི་ཁྱབ།།
དུས་གསུམ་སྒོ་མོ་འབྱེད་མཁན་དེ་ཁྱེད་ཡིན།།
ཤེས་བྱའི་སྒྲོན་མེ་སྤར་མཁན་དེ་ཁྱེད་ཡིན།།
བདེན་དོན་སེམས་ལ་འབྲི་མཁན་དེ་ཁྱེད་ཡིན།།
འཚེ་མེད་ཞི་བདེ་སྤེལ་མཁན་དེ་ཁྱེད་ཡིན།།
༧གོང་ས་མཆོག་བཀའ་དྲིན་ཆེ།།
འཛམ་གླིང་གི་གོ་ལ་འདིའི།།
མི་རིགས་དང་ཆོས་ལུགས་ཀུན།།
མཉམ་མཐུན་གྱིས་མཛའ་མཐུན་སྤེལ།།
སྔོན་མེད་ཀྱི་སྲོལ་བཟང་ཕྱེས།།
གདོང་དམར་གྱི་བོད་པ་ལ།།
མང་གཙོ་ཡི་གསོལ་རས་གནང།།
དམ་གཙང་གི་ལྷག་བསམ་གྱིས།།
གཉིས་ཕན་གྱིས་དབུ་ལམ་བསྟན།།
བཀའ་དྲིན་ཆེ་༧གོང་ས་མཆོག།
འབད་ཀྱང་ཟིན་པ་མེད་པ་འཇིག་རྟེན་གྱི་བདེ་བ།།
བྲོས་ཀྱང་ཐར་ས་མེད་པ་འཁོར་བ་ཡི་སྡུག་བསྔལ།།
འབད་བྲོས་རླབས་ཀྱི་བརྩོན་པའི་སྒྱུ་མ་ཡི་ཁྲོད་ནས།།
བཀྲིན་གཞལ་ཟླ་བྲལ་བ་མགོན་པོ་ཁྱེད་དྲན་ལ།།
སྐུའི་འཁྲུངས་ཚེས་ལ་་སྒོ་གསུམ་གུས་པ་ཆེན་པོས་བཀྲིས་བདེ་ལེགས་ཞུ།།
ཁེ་ཎ་ཀྲའི་བྱང་ཕྱོགས་ཁེལ་ལྒའ་རི་ནས་གུས་འཇིགས་མེད་དབང་འདུས་ཀྱིས།
༢༠༢༠ ཕྱི་ཟླ་ ༧ ཚེས་ ༣ ཕུལ།།