ཆང་སྐྱེས།
ཤཀྱའི་དགེ་སློང་བསྟན་འཛིན་རྒྱལ་མཆོག་གང་།།
གང་གི་ཐུགས་བརྩེ་འོ་མའི་དཀར་རྒྱུན་དང་།།
བྱམས་བརྩེ་འཛུམ་གྱིས་ཕྱུག་པའི་འོད་སྣང་གིས།།
འགྲོ་བའི་སྡུག་བསྔལ་མུན་པ་རྨང་ནས་བཅོམ།།
ཡང་སྲིད་མཆོག་སྤྲུལ་མདོ་སྨད་ཡུལ་ནས་འཁྲུངས།།
གསེར་སྐུ་ལང་ཚོའི་དཔལ་ཡོན་དབུས་ནས་རྒྱས།།
བློ་གྲོས་རིག་གཏེར་འཕགས་པའི་ཡུལ་ན་གཏམས།།
གཟི་བྱིན་འོད་ཟེར་འཛམ་གླིང་ཡོངས་ལ་ཁྱབ།།
སྤྱན་རས་གཟིགས་དབང་སྐྱབས་མགོན་བླ་མ་མཆོག།
འགྲོ་བ་རྐང་གཉིས་མི་ཡི་མགོན་གྱི་མགོན།།
ཐུགས་རྗེ་བཀའ་དྲིན་རླབས་ཀྱི་ཟེགས་མ་ཡིས།།
བཀྲེས་སྐོམ་སྡུག་གི་གདུང་བ་རབ་ཏུ་སེལ།།
འཛམ་གླིང་ཞི་བདེའི་དེད་དཔོན་གོང་ས་མཆོག།
བོད་མི་ས་ཡ་དྲུག་པོའི་གཙུག་གི་ནོར།།
ནོལ་བྷེའི་རྟགས་མའི་དབུ་ཞྭ་ཐོད་ལ་བཞེས།།
མཚན་སྙན་བ་དན་གོ་ལའི་རྩེ་ན་གཡོ།།
རྒྱལ་བའི་དབང་བོ་ཉི་མའི་ཚུལ་དུ་བཞུགས།།
ཐུགས་རྗེ་འོད་ཟེར་ས་སྟེང་ཡོངས་ལ་ཁྱབ།།
གསུང་དབྱངས་ཟབ་མོའི་ངག་གི་བདུད་རྩི་ཡིས།།
འགྲོ་ཀུན་མ་ལུས་བདེ་བའི་དཔལ་ལ་བཀོད།།
དེ་རིང་མགོན་པོ་གང་གི་འཁྲུངས་སྐར་ལ།།
སྒོ་གསུམ་གོས་པའི་ངང་ནས་རྟེན་འབྲེལ་ཞུ།།
སྐུ་གཟུགས་ཉི་གཞོན་སྤྲིན་གྱིས་མ་གཡོག་པར།།
སྐལ་བརྒྱར་ཡང་ཡང་བཞུགས་པའི་སྨོན་ལམ་འདེབས།།