ཀླུ་དཀར་མོ།
རླུང་བུ་ཞིག་གི་རྒྱུ་ཕྱོགས་དང་བསྡེབས་ནས་ཁྱེད་བྱང་དུ་བསྐྱོད་ཅིང
བྱང་རླུང་ལྡོམ་པོ་དེའི་བསླུ་བྲིད་འོག་ནས་
རང་ཉིད་ཀྱི་རང་ཚུགས་བོར་ཞིང་ངོ་བོ་བརླག
དེ་ནས་བཟུང་
ཁྱེད་ནི་རླུང་གི་བྲན་གཡོག་ཏུ་གྱུར་ཅིང
ཚེ་སྲོག་ཤོར་བའི་བེམ་པོའི་སྙིང་བོ་ལས་མ་འདས་ཕྱིར་
དུས་ཚིགས་ཀྱི་མཁའ་དབུགས་ཁྲོད་ན་ཁྱེད་དར་ལྕོག་བཞིན་འདར་ཞིང
སྡོང་ལོ་བཞིན་བསྐྱོད་པས
རང་ཉིད་ལ་དབང་བའི་གོམ་འགྲོས་རེ་རེ་ཡང
གཞན་གྱིས་ཁ་ལོ་བྱེད་ཅིང་ལམ་སྣེ་འཁྲིད
འདི་ལྟར་
ཁྱེད་ཀྱིས་ཚེ་སྲོག་ཅིག་ལྷགས་རླུང་ལ་བསྐུར་རྗེས
ཁྱེད་ཀྱི་འཚོ་བ་ལ་སྐྱོ་སྣང་དང་ཞེན་པ་ལོག་ཅིང
ཡོད་ཚད་ཀྱིས་ཁྱེད་ནི་མི་རབས་ཤིག་གི་ཉེས་ཅན་དུ་བརྩི་ཞིང
རིགས་རྒྱུད་ཅིག་གི་རྐང་འདྲེན་དུ་བཞེད་
དུས་དེ་ནས་
ཁྱེད་ཀྱི་ལང་ཚོ་ལ་རུལ་དྲི་ཁ་ལ
ཁྱེད་ལ་བཞག་པའི་ཚེ་སྲོག་གི་རིན་ཐང་དེ་ཡང་བྱང་རླུང་གིས་འཁྱེར
༢༠༡༣་༤་༡༨
འདིའི་ནང་གི་མིང་ཚིག་གཅིག་རིང་སྣང་བ་འགྲོ་གི དེ་མིན་ད་་་་་་་་་་་་་་་་་་་་་་་་་་
བཀླགས་ཟིན། དགའ་ཡོད། ཡག་མིན་གང་ལྟར་ཡང། དྲ་ཚིགས་སུ་རྩོམ་འབྲི་མ་ཞིག་གིས་ཇེ་མང་དུ་སོང་བར་དངོས་གནས་དགའ་ཡོད། མུ་མཐུད་དུ་ཕྲིས་ཨ།
ཀློག་ཡོད། བུད་མེད་སྨྱུག་ཐོག་མ་དག་ལ་དགའ་བསུ་ཡོད།
ཡག་གི ཚིག་སྦྱོར་བདེ་ཞིང་བརྗོད་དོན་ཟབ་མོ་རེད། ཀློག་ཐེངས་གཅིག་གིས་ཤུགས་བསྟན་ཡིད་ལ་ལྟིགས་སེ་བབས་བྱུང་། མུ་མཐུད་ནས་རྒྱུན་བསྲིངས་ན་མདུན་ལམ་གྱི་རེ་བ་ཆེན་པོ་འདུག
མི་རིགས་ཤིག་ཡར་རྒྱས་ཀྱི་ཐེམ་སྐས་འཛེག་དགོས་ན་ཕོ་མོ་ཟུང་སྦྲེལ་གི་རྐང་བ་གཡས་གཡོན་གཉིས་ལ་མ་བརྟེན་ན་བྱ་བ་དེ་བསམ་དོན་བཞིན་འགྲུབ་མི་ཐུབ། སྤྱི་ཚོགས་ནང་བུད་མེད་རྩོམ་པ་པོ་དང་བུད་མེད་ཤེས་ཡོན་ཅན་མང་དུ་འཕེལ་རྒྱུ་དེ་ཁ་ཚ་དགོས་གཏུགས་གི་དོན་དག་ཞིག་ཡིན།
ང་ཚོས་བུད་མེད་ཤེས་ཡོན་ཅན་གཅིག་ཐོན་ན་གཅིག་དང་། གཉིས་ཐོན་ན་གཉིས་ལ་དགའ་བསུ་དང་རྒྱབ་སྐྱོར་ཞུ་དགོས་པ་ལས་ཟུར་ཟ་དང་འཕྱ་སྨོད་ནམ་ཡང་བྱེད་མི་རུང་། གནད་དོན་འདི་མི་རིགས་ཤིག་གི་འཕེལ་རྒྱས་དང་འབྲེལ་བ་ཡོད།