རས་པ།
སྤྲིན་པ་དཀར་པོ་ཞིག
ནག་རོག་རོག་གིས་ཐོན་དུས
ཆར་མཚམས་འཇོག་དཀའ་བའི་སྡུག་སྣང་གིས
ང་ལ་བརྙསབཅོས་བྱེད་པ་འདྲ
མལ་ཐལ་ལ་བརླན་དྲི་མཆེད་དེ
ཉི་ཟེར་གྱིས་ལེན་པར་དཀའ་ཞིང
བརྩེ་སེམས་ཀྱིས་དམ་པོར་འཇུས་ཡོད
ནང་སེམས་ཀྱི་རི་ལུང་ལ
ཡན་པོར་རྒྱུ་བའི་ངེས་མེད་ཀྱི་རི་དྭགས
མཛའ་བརྩེས་བཞད་པའི་སྐྱོ་གདུང་གི་མེ་ཏོག
ནམ་ཟླ་དགུན་ཁས་འཁྱེར་ཞིང
གཏིང་ཟབ་པའི་ཁྲི་མུན་གྱི་སྐྱོ་བ་ཟབ་མོས
ཁེར་རྐྱང ཡང་ནས་ཡང་དུ བསྐྱར་ཟློས་བྱེད་པའི་ཁེར་རྐྱང
ངས་ཅིའི་ཕྱིར་དང་ལེན་བྱེད་དགོས
ས་གཞི་ངེས་མེད་ཀྱི་འཁྱམས་པོ་ཞིག་ནང་བཞིན
ང་ལ་འཛུམ་དཀར་གྱི་རྣམ་འགྱུར་སྟོན་ཞིང
ནམ་མཁས་ང་ལ་བདེ་སྣང་གི་སློབ་ཁྲིད་ལ་སྐུལ་མ་བྱེད
ཡིན་ཡང གྲོགས་པོ་སྔར་བཞིན་རང་དང་གྱེས་པ་ཚོར་ཏེ
བརྩེ་སེམས་ཟབ་མོའི་བློ་ལ
ལྡོག་མེད་ཀྱི་གོད་ཆགས་བཞིན་སླེབས
ནམ་མཁའ
ཅི་འདྲའི་དཀྱེལ་ཡངས་ཟེར་ཡང
སྤྲིན་པ་དཀར་པོ་ཞིག་ངའི་མགོ་ཐོག་ཏུ་ལྗིད་ཤུགས་ཆེ
དེ་ནས་བཟུང
ད་དུང་ང་ལ་མཚམས་དང་མཚམས་སུ
སྤྲོ་སྣང་གང་དུ་ཡོད་པའི་དྲི་བ་སླེབས
ཕྱི་ལོ་ནམ་དང་ཚེས་པ་ག་ཚོད་ཡིན་པ་ཁྱོད་ཀྱིས་དྲན་ནམ
༢༠༡༣།༡༠།༢༥ལ།