་རང་རྟོན་གྱིས་བྲིས།
ཁ་མི་གྲགས་པའི་འདས་སོང་གི་ལོ་རྒྱུས་ཀྱི་ཉམས་རྒུད་རེ་རེས་བོད་མི་རིགས་ཀྱི་ཡོད་ཚད་འུ་ཐུག་ཐབས་ཟད་ཀྱི་གནས་བབ་དང་འཇིགས་ཡེར་བའི་འཇིག་རྟེན་འདི་ལ་གཏུགས་པས་ཁ་སང་དེ་རིང་ནི་ས་ཆེན་གོ་ལའི་སྒལ་གཞུང་འདི་ན་འགྲོ་བ་མིའི་ཡོངས་ཁྱབ་ཀྱི་རིན་ཐང་དང་ཐོབ་ཐང་།རང་དབང་མེད་པའི་གནས་ཚུལ་དག་མངོན་འགྱུར་བྱེད་སླད་རང་ཉིད་ཀྱིས་རང་ཉིད་ཀྱི་ཚེ་སྲོག་བཅད་ནས་གསལ་འདོན་བྱེད་པའི་ཧ་ཅང་ཐབས་སྡུག་གི་ལམ་ཁ་འདི་དང་གནས་བབ་འདི་ལ་ལྷུང་ཡོད་པས་མྱ་ངན་དགུ་བརྩེགས་དང་མཆུ་མ་དགུ་བཞུར་བྱེད་པའི་ཡ་ང་བའི་སྐྱོ་གར་གྱི་ཡུལ་ལས་མ་འདས།བདུན་ཕྲག་གཅིག་ལ་མི་བཞི་ཡས་མས་ཤིག་གིས་མེ་བསྲེགས་བཏང་ཟིན་པའི་གནས་བབ་འདི་ལ་བསམ་ན་འུ་ཚོ་བྱེས་འབྱོར་བ་ཚོ་གྲག་འགུལ་ཅི་ཡང་མེད་པར་ཁ་ཁུ་སིམ་མེར་འདུག་པ་དང་འདུག་ཐུབ་པའི་དུས་ཚོད་ཞིག་མ་ཡིན་པ་མངོན་གསལ་དོད་པོ་རེད།དེང་སང་ལས་འགུལ་དེར་ལྟ་སྟངས་དང་སེམས་ཚོར་དེ་སྔོན་དང་བསྡུར་ན་ལྡོག་ཕྱོགས་ཀྱི་རྣམ་འགྱུར་ཞིག་མིའི་སྤྱི་ཚོགས་སུ་མངོན་བཞིན་འདུག་ལ་དེ་ནི་རྒྱུན་ལྡན་ལྟ་བུར་གྱུར་དང་འགྱུར་བཞིན་པའི་གནས་སྟངས་ལས་མ་འདས།ཁོ་ཚོས་མེ་བསྲེགས་བཏང་ན་འུ་ཚོར་ཚོར་སྣང་ཙམ་ཡང་མེད་པའི་རྒྱུན་འཇམ་གྱི་འཚོ་སྟངས་ཤིག་ལ་འཕོས་པ་འདིས་མེ་བསྲེགས་དེ་ནི་ཁོ་ཚོའི་ལྟོ་གོས་གནས་མལ་གྱི་སླད་དུ་ཡིན་པ་ལྟ་བུ་ལས་མ་འདས།ཚོར་འདུ་མེད་པའི་སྤྱི་ཚོགས་འདིས་ཁོང་ཚོའི་བླ་མེད་ཀྱི་ལས་འགུལ་འདིའི་རིན་ཐང་ཉམས་དམུས་སུ་བཏང་བ་དང་གཉིས་སུ་མ་མཆིས།
ཁོ་ཚོར་མཁོ་བ་ནི་གྲངས་ཀ་གཏན་ནས་མ་ཡིན་ཀྱང་ད་ལྟ་བལྟས་སོང་ན་གྲངས་ཀའི་(མེ་བསྲེགས་གཏོང་མཁན་སུམ་བཅུ་ལས་བརྒལ་བཞིན་འདུག)ངོ་བོར་འཕོས་བཞིན་འདུག་ལ།དེའི་རྒྱུ་མཚན་ནི་འུ་ཚོར་ཐུག་ཡོད་པར་ཁོ་བོས་འདོད།ཅིའི་ཕྱིར་ཞེ་ན་འུ་ཚོ་འཇམ་ཐིང་ངེར་ཡང་བསྐྱར་གཅིག་འབར་བར་རེ་སྒུག་བྱེད་བཞིན་པ་ལྟ་བུའི་སྒོ་ནས་ཅི་ཡང་མི་སྨྲ་ཞིང་ཅི་ཡང་མི་བྱེད་པའི་བརྟུལ་ཞུགས་ལ་ངང་ངམ་ཤུགས་ཀྱིས་བཞུགས་པ་འདིས་གཞིས་བཞུགས་ཚོའི་སེམས་བསམ་པའི་རེ་ཐག་ཆད་ཀྱིན་མེད་འགྲོ་འདོད་པའི་དོགས་པ་ཞིག་ཀྱང་ཞོར་ནས་ཤོར་ཡོང་གི་འདུག་པས།ཁོང་ཚོས་རང་ཉིད་ཀྱི་ཚེ་སྲོག་དེའང་ཐབས་ལམ་ཁྱད་པར་བ་འདི་བརྒྱུད་ནས་མཆོད་མེར་བསྒྲོན་ཐུབ་པའི་སྙིང་སྟོབས་དེ་རིགས་ཞེན་དེ་སྤོབས་པ་དེ་གཏོང་ཕོད་དེ་ལྟ་བུ་འུ་ཚོར་མེད་ནའང་བོད་མི་རེའི་ཕྲག་ན་འགན་རེ་ཡོད་པའི་ཆ་ནས་རང་ཉིད་ཀྱིས་འཇོན་ན་མ་འཇོན་ན་ད་ནི་འཕག་འཚག་རེ་ངེས་པར་དུ་བྱེད་དགོས་པའི་དུས་ལ་བབ་ཡོད་པར་འདོད།འུ་ཚོ་བྱེས་འབྱོར་བ་བརྒྱ་ཆ་དགུ་བཅུ་གོ་དགུ་གཉིད་དུ་ཡུར་བ་བཞིན་གྲག་འགུལ་ཙམ་ཡང་མེད་པར་ཁ་ཁུ་སིམ་མེར་སྡོད་ཀྱིན་པའི་ཁ་སང་དེ་རིང་གི་གནས་ཚུལ་དེ་བསམ་ན་བོད་ནང་གི་བློས་གཏོང་དེ་དག་ཆུད་ཟོས་སུ་སོང་བ་དང་བཏང་བ་མ་ཡིན་ནམ།
ངས་བསམ་ན་ཁོང་ཚོས་བློས་གཏོང་ཁྱད་པར་བ་འདི་དང་བསྡུར་ནས་གློད་ན་ཕྱོགས་མང་བོ་ཞིག་ནས་འཐུས་ཤོར་འགྲོ་བཞིན་ཡོད་པར་འདོད།འུ་ཚོས་འཇོན་ཁོ་ཐག་ཞིག་ལ་དྲ་ལམ་གྱི་ཁྱབ་བསྒྲགས་དང་ཚགས་པར་གྱི་ཁྱབ་བསྒྲགས་ཐད་ནས་རེད།དཔེར་ན་སུད་སི་རྒྱལ་ཁབ་ཀྱི་གཞུང་སྒེར་གང་རུང་གི་ཚགས་ཤོག་གཅིག་གི་ངོས་ནའང་བོད་ནང་གི་དངོས་ཡོད་གནས་ཚུལ་གཅིག་ཀྱང་མཐོང་རྒྱུ་མེད་པ་འདིས་ཀྱང་རྒྱལ་ཁབ་རེ་ཟུང་མ་གཏོགས་བོད་དོན་ཁྱབ་བསྒྲགས་ཀྱི་ནུས་པའི་ཟིན་གྱིན་མེད་པ་རིགས་བསྒྲེ་བྱས་ན་ཤེས་རྟོགས་ཐུབ་གི།ངས་བསམ་ན་འུ་ཚོས་བྱེད་ཐུབ་པ་ཞིག་ནི་རྒྱལ་ཁབ་གང་རུང་གི་གཞུང་སྒེར་གཉིས་ལ་འབྲེལ་ལམ་བཟུང་ནས་བོད་འབྱོར་གནས་ཚུལ་རེ་རེ་བཞིན་དུས་ཐོག་ལ་བོད་དོན་ཁྱབ་བསྒྲགས་བྱེད་ཐུབ་ན་འདི་ནའང་ནུས་ཤུགས་ཁྱད་པར་བ་ཞིག་ཡོད་པར་མཐོང་།མགོ་སེར་ཚོས་ཚུར་བཤད་པ་ལྟར་ན་ཁྱེད་ཚོས་ལམ་ལུགས་སྲོལ་ལྟ་བུ་ཞིག་གི་ལམ་ཁ་ནས་ལན་རེར་སྐད་འབོད་རེ་བྱས་པ་འདིའི་བོད་དོན་ཁྱབ་བསྒྲགས་ཀྱི་ཁོར་ཡུག་རྒྱ་སྐྱེད་ལ་ཕན་ཐོག་མེད་པར་གླེང་མཁན་འདུག་ལ་ལྷག་པར་ཏུ་ཚགས་ཤོག་སོགས་སུ་བོད་དོན་ཁྱབ་བསྒྲགས་བྱེད་ཐུབ་ན་ཁ་ཡོད་ལག་ཡོད་ཀྱི་ཕན་ཐོག་མི་དམན་པ་ཞིག་འཐོབ་ངེས་ཡིན་པ་གོར་མ་ཆག་ཟེར་མཁན་ཀྱང་འདུགདེའི་རྒྱུ་མཚན་ནི་སུད་སི་ལྟ་བུར་མཚོན་ན་ཚགས་པར་མི་ཀློག་པའི་མི་ཞིག་ཕལ་ཆེར་མེད་ལ་དེ་ནི་ཁོང་ཚོིའི་གོམས་གཤིས་ལྟ་བུ་ཞིག་ཀྱང་རེད།འུ་ཚོས་ཁ་ནས་བཤད་ན་བོད་རང་བཙན་ལའང་དཀའ་ངལ་མེད་པ་ལྟ་བུ་བཤད་ནའང་དོན་དངོས་ལ་གདོང་ཐུག་དུས་ཁ་ཡོད་ལག་ཡོད་ཀྱི་ལས་འགུལ་ཙམ་ཡང་སྤེལ་མི་ཐུབ་པའི་རྒྱུ་མཚན་ཅི་ཡིན་ནམ།
གང་ལྟར་ཀྱང་ཐབ་ཆུང་ཆུང་ལ་མེ་ཚ་བོ་ཟེར་བའི་དཔེ་བཞིན་ཚང་མས་རྡོག་རྩ་གཅིག་སྒྲིལ་དང་བློ་རྩེ་གཅིག་སྒྲིམ་གྱིས་ཚོགས་པ་དང་ཚོགས་པའི་ལངས་ཕྱོགས་མི་རྩོད་པར་དབུ་མ་དང་རང་བཙན་གྱི་ལྟ་གྲུབ་མི་འཛིན་པར་དངོས་ཤུགས་རྒྱུ་གསུམ་གྱིས་བོད་ནང་གི་མེ་ལྕེ་དེ་འཛམ་གླིང་གི་ལོ་རྒྱུས་གསར་བ་ཞིག་ཏུ་བསྒྱུར་ཐུབ་པའི་ནུས་པ་དེ་འུ་ཚོར་ཡོད་པ་གདོད་མི་ཟ།བོད་ནས་མེ་འབར་ན་འུ་ཚོས་ལྟད་མོ་བལྟས་ན་རྒྱུ་འབྲས་ལ་དགའ་བའི་མི་རིགས་ཤིག་གི་བཅའ་སྲོལ་ལས་སྲོལ་ཞིག་གཏན་ནས་མ་རེད།བོད་ནས་མེ་འབར་ན་ཕྱི་ནས་དུ་བ་འཕྱུར་བར་བྱེད་ཐུབ་པའི་འཇོན་ཐང་དེ་རང་དབང་དེ་མཐུན་རྐྱེན་དེ་དག་ཡོད་པས་འགན་འཁྲི་ལྗིད་ཏིག་ཏིག་ཞིག་འུ་ཚོར་ཡོད་པས་ན་ཚང་མས་མཉམ་རུབ་ཧུར་ཐག་གིས་འགོ་ཁྲིད་མཁན་གྱིས་ལྷག་བསམ་གཙང་མས་འགོ་ཁྲིད་ན་མཇུག་སྐྱོང་མཁན་གྱིས་ཧུར་ཐག་འབད་ཐག་གིས་མཇུག་སྐྱོང་བའི་དམ་བཅའ་འཇོག་པའི་སེམས་ཤུགས་བོད་མི་ཡོད་དོ་ཅོག་ལ་ཡོད་ངེས་རེད།དེའི་ཕྱིར་བོད་གཞུང་མང་གཉིས་ཀྱིས་ནུས་ཤུགས་གཅིག་ལ་སྒྲིལ་ནས་དམིགས་ཡུལ་གཅིལ་ལ་བཟུང་ནས་གོམ་ཁ་གཅིག་ལ་ཕྱོགས་ནས་ལས་འགུལ་སྣ་མང་སྤེལ་བར་གཞིས་བཞུགས་སྤུན་ཟླ་ཚོས་གདོང་གི་མཆུ་མ་ཕྱི་བཞིན་འུ་ཚོར་ཅེར་རེར་བལྟས་འདུག་ལ་དགྱ་དམར་གྱིས་ཀྱང་ཟུར་ཟ་དང་བཅས་རྒྱང་ན་ལྟད་མོ་ལྟ་བཞིན་ཡོད་ངེས་རེད།འུ་ཚོས་ཉིན་བརྒྱ་དུས་གཅིག་ལ་ལས་འགུལ་མཚམས་རེར་སྤེལ་བ་འདིས་དེ་ཙམ་ཕན་ཐོགས་མི་འདུག་ལ་རྒྱུ་མཚན་ནི་དུས་ཚོད་མང་ཆེ་བ་ནི་གཟའ་སྤེན་པ་ཉི་མར་གཏན་འཁེལ་བྱས་པས་ཁང་སྟོངས་(གསར་འགོད་པ་མེད་ལ་ཚགས་ཤོག་ལ་འགོད་མཁན་ཀྱང་མེད།)ལ་ངོ་རྒོལ་དང་སྐད་འབོད་ག་ཚོད་བྱས་ཀྱང་ཡ་ལན་གཅིག་ཀྱང་མེད་པས་ཧ་ཅང་སེམས་སྐྱོ་གི།ང་ཡི་བཀའ་ཁྲི་ལགས་སུ་ལ་མཇལ་དགོས་ན་སུ་ལ་གསུང་དགོས་ན་གང་ལ་ཕེབས་དགོས་ན་གང་ལ་བཞུགས་དགོས་ན་གནང་རོགས་ཞུ།མཐར་དོན་ཞུ་འདོད་པ་ཞིག་ནི་ལམ་སྟོན་རྣལ་མ་ཞིག་གི་ལམ་ཁ་ནས་ཁ་ཚ་དགོས་གཏུག་གི་དུས་འདིར་ཁ་ཡོད་ལག་ཡོད་ཀྱི་ལས་འགུལ་གང་མང་སྤེལ་རོགས་གནང་ཞུ་བཞིན་ཡོད།
སྤྱི་ལོ་༢༠༡༢ལོའི་ཟླ་༣ཚེས༡༧མཚན་མོར་རང་རྟོན་གྱིས་བྲིས།
(འུ་ཚོ་བྱེས་འབྱོར་བ་བརྒྱ་ཆ་དགུ་བཅུ་གོ་དགུ་གཉིད་དུ་ཡུར་བ་བཞིན་གྲག་འགུལ་ཙམ་ཡང་མེད་པར་ཁ་ཁུ་སིམ་མེར་སྡོད་ཀྱིན་པའི་ཁ་སང་དེ་རིང་གི་གནས་ཚུལ་དེ་བསམ་ན་བོད་ནང་གི་བློས་གཏོང་དེ་དག་ཆུད་ཟོས་སུ་སོང་བ་དང་བཏང་བ་མ་ཡིན་ནམ། ) སྐད་ཆ་འདི་འདྲ་རང་ཨེ་ཡིན།
མིག་བརྒྱད་ལགས། དེང་སང་བོད་སྡོད་བོད་མིར་བསྟོད་དགོས་ན་ཕྱི་སྡོད་བོད་མིར་སྨོད་པ། བུད་མེད་ཚོགས་པར་བསྟོད་དགོས་ན གཞོན་ནུ་ཚོགས་པར་སྨད་དགོས་པ། དེ་དང་དེ་བཞིན་མི་རིགས་ལ་བསྟོད་ན་ཆོས་ལུགས་ལ་སྨོད་པ། གང་ལྟར་ཅིག་ཤོས་ལ་དངོས་ཡོད་ཡིན་མིན་ཇི་ལྟར་ཡང་མ་སྨད་པར་གཞན་ལ་བསྟོད་མི་ཤིས་པ་གཤིས་སུ་གྲུབ་པ་རྩོམ་དང་མཆན་བུ་སོགས་ལ་
གཟིགས་ན་མཁྱེན་ངེས།
མིག་བརྒྱད་པའི་ཟུར་འདོན་སྐད་ཆ་དེ་དེ་ཀ་རང་རེད་