གླིང་གཅེར་བུ།
རླུང་གིས་ཁུར་བའི་ཕྱི་དྲོ་ཡངས་མོ་རེད།།
སྡོང་ལོ་འགུལ་བའི་མགོ་བོ་མཐོན་པོ་རེད།།
མི་ཚོ་ལས་ལ་བྲེལ་བ་མྱུར་མོ་རེད།།
ཉི་མའི་རྒྱང་མྱིག་ཆད་པ་གསལ་བོ་རེད།།
བྱེའུ་ཚང་ལ་བསྙེགས་པ་གཟན་མོ་རེད།།
སློབ་བུས་ཀློག་གི་སྒྲ་དེ་སྙན་མོ་རེད།།
ཁང་བརྩེགས་ངོ་གདོང་འགྲན་པའི་གྲིབ་རིས་ན།།
འུ་ཚོས་ཕུགས་མདུན་ཟེར་བ་རྨི་ལམ་རེད།།
ཤེས་བྱའི་འཕུར་ལྡིང་གཞི་ཁྱོན་དོག་མོ་རེད།།
རང་གི་མགོ་བོ་འགུལ་ས་ཆུང་ཆུང་རེད།།
འཕུང་ཚོས་ཕྲེང་ལ་བརྒྱུས་པའི་རྐུབ་སྟེགས་ན།།
སྐུ་དྲག་རྟུལ་ཞུགས་འཛིན་མཁན་ཇེ་མང་རེད།།
གསར་འབྱོར་སློབ་མའི་ཁ་གྲངས་ཇེ་རྒྱས་རེད།།
ཀླད་པའི་དྲན་འགྱུ་མངར་བ་ཁ་ཁེར་རེད།།
ཁ་དང་ལག་པ་འགལ་བའི་ལྷག་འཕྲོ་ན།།
སློབ་མའི་ལྷན་ཚོགས་ཁ་ཁུ་སིམ་པོ་རེད།།
མཐོ་རིམ་སློབ་གྲྭའི་མིང་བྱང་རྫིག་པོ་རེད།།
འཆར་ཟིན་སྒྲིག་གཞི་ཟེར་བ་ཡོམ་ཡོམ་རེད།།
ཡར་མར་ལྡིང་བའི་དུས་ཀྱི་སོ་ཁ་ན།།
ང་ཚོ་ད་དུང་ཚོད་ལྟའི་རྩེད་ཆས་རེད།།
བློ་གཏད་བཅོལ་སའི་མི་ཞིག་མེད་ས་རེད།།
མདུན་གྱི་སློབ་དེབ་དེ་ཡང་བཀག་རྡོ་རེད།།
དཔེ་ཀློག་རྩིས་ཐང་ཞ་བའི་གནས་མལ་ན།།
རེ་བ་ཆེ་ཞིག་མེད་པ་ཁོ་ཐག་རེད།།
སློབ་སྦྱོང་ཟེར་བ་ཡིག་ཚད་ཙམ་ཞིག་རེད།།
སློབ་བུའི་རིན་ཐང་སྐར་གྱིས་གཞལ་བ་རེད།།
སློབ་གསོའི་ཁ་ཕྱོགས་འཆུག་པའི་བྱས་ཉེས་ལ།།
སློབ་མ་བརྒྱ་ཆའི་ཕྱེད་ཀ་བསྐྱར་རྒྱུགས་རེད།།
དུས་དེབ་ཚགས་དེབ་ཁག་ལ་མུ་གེ་རེད།།
བྲིས་པའི་སྙན་རྩོམ་ད་དུང་འཁྱར་འཁྱོར་རེད།།
རྩོམ་སྒྲིག་དྭང་བླང་ཆོག་སའི་མཐོ་སློབ་ན།།
མགོ་བོ་སྣུམ་པོ་ཅན་ཞིག་ཡོད་ས་རེད།།
མ་གསང་དྲང་བོའི་སྐད་ཆ་འདི་མོ་རེད།།
རེ་བ་ཅན་ཚོའི་རིགས་ཀྱིས་གོ་དགོས་མེད།།
ཡོད་ཚད་འགལ་བར་གྲུབ་པའི་ཁོར་ཡུག་ན།།
དོ་ནུབ་ཕྱི་དྲོའི་སེམས་ཁམས་དེ་བཞིན་ནོ།།