དབྱངས་ཅན་འབངས།
ཐར་ཐོར་སྤྲིན་གྱིས་གཡོགས་པའི་གནམ་སྔོན་དེས།།
བརྟན་གཡོའི་བདག་པོ་ང་ཡིན་མི་ཟེར་གྱི།།
ལན་འགའ་འདུས་ཀྱང་མཐའ་མར་འབྲལ་ལོ་ཞེས།།
བན་རྒན་དེ་ལ་བརྡ་ཡིས་སྟོན་པར་སྙམ།།
ཉིན་བྱེད་ཆུ་ལྷའི་འཕང་བར་ཡིབ་པ་ནི།།
ཟླ་བར་གོ་སྐབས་བྱིན་པ་མ་ཡིན་གྱི།།
དུས་ཀྱི་བགྲོད་པ་འདི་ལྟར་མཐར་གཏུག་ཅེས།།
བན་རྒན་དེ་ལ་བརྡ་ཞིག་སྟོན་པ་འདྲ།།
བྲག་རི་སྐྱ་བོ་གནམ་ལ་བསྙེགས་པ་ཡང་།།
གཤམ་གྱི་ཡུལ་ལྗོངས་བལྟ་བ་མ་ཡིན་གྱི།།
མགོ་ཡི་སྤ་ལོ་འདི་ལྟར་སྐྱ་འོ་ཞེས།།
བན་རྒན་དེ་ལ་བརྡ་ཡིས་མཚོན་པར་བྱེད།།
ནགས་ཀླུང་སྟུག་པོར་མུན་པ་བབ་པ་ཡང་།།
དགའ་བས་བསུས་པའི་མགྲོན་པོ་མ་ཡིན་གྱི།།
ནམ་ཞིག་སྙིང་ལ་མུན་ནག་འཐིབ་བོ་ཞེས།།
བན་རྒན་དེ་ལ་བརྡ་ཡིས་གོ་བར་བྱེད།།
འདུ་འཛིས་དབེན་པའི་སྤྱིལ་བུ་མངོན་ཆུང་དེ།།
ལས་ལ་གཡོལ་ནས་གབ་པའི་ཕྱིར་མིན་གྱི།།
གཏན་འདུན་སྙིང་པོ་འདི་ནང་སྒྲུབས་ཤིག་ཅེས།།
བན་རྒན་དེ་ལ་བརྡ་ཡིས་བསྐུལ་བར་ངེས།།
སྙན་པོ་བྲིས་འདུག།
ལན་འགའ་འདུས་ཀྱང་མཐའ་མར་འབྲལ་ལོ་ཞེས།།ཞེས་པར།
་
སྟེངས་འགའ་འདུས་ཀྱང་མཐའ་མར་འབྲལ་ལོ་ཞེས།། ཞེས་པ་མ་ཡིན་པར་ལན་ཞེས་བཀོལ་བར་མངོན་པར་བསྟོད། དེ་ལྟ་བུའི་ཉམས་ལེན་བོད་ཚིག་མི་ནུབ་པར་ཕན་ནོ།
རྒན་འཇམ་དཔལ་ལགས། ཕྲན་གྱི་རྩོམ་ཐུང་འདིར་ལེགས་སོ་གནང་བར་བཀྲིན་ཆེ་ཞུ།