འཇིགས་བྲལ་བསྟན་འཛིན། སྦེལ་ཀོབ།
གླེང་སློང་།
འདི་ལོ་༸གོང་ས་མཆོག་བོད་ཀྱི་ཆབ་སྲིད་ཀྱི་དབུ་ཁྲིད་ནས་བགྲེས་ཡོལ་གནང་བཞེད་དང་། བཙན་བྱོལ་བོད་གཞུང་གི་མཚན་བྱང་ཕྱིར་བསྡུ་བྱེད་འཆར་སོགས་ཀྱི་དབང་གིས་བཙན་བྱོལ་བོད་མིའི་བཅའ་ཁྲིམས་བསྐྱར་བཅོས་ཟིན་བྲིས་ཀྱི་དོན་ཚན་དང་པོའི་ཐོག་ནས་༸གོང་ས་མཆོག་ལ་གསོལ་འདེབས་ཞུ་ཆེད་དང་། བཅའ་ཁྲིམས་བསྐྱར་བཅོས་ཐད་བསམ་ཚུལ་བསྡུ་ལེན་གནང་ཕྱིར་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་ཚོགས་ཤིང་། དེ་རྗེས་༸གོང་ས་མཆོག་གིས་རྒྱལ་ཡོངས་ཚོགས་ཆེན་གྱི་ཚོགས་བཅར་བ་ཡོངས་ལ་༸གོང་ས་མཆོག་གིས་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་ཀྱི་མཚན་ཐོག་ནས་མཇལ་ཁ་གནང་བའི་སྐབས་སུ་བཙན་བྱོལ་བོད་གཞུང་ཞེས་པའི་མཚན་བྱང་གི་ཚབ་ཏུ་“གངས་ལྗོངས་རང་དབང་མང་གཙོའི་སྒྲིག་འཛུགས” ་ཡང་ན། “ གངས་ལྗོངས་རང་དབང་མང་གཙོའི་ལྷན་ཁང་” བཏགས་པ་ཡིན་ན།བོད་ཆོལ་ཁ་གསུམ་ལ་ཁྱབ་ཐུབ་པ་དང་། གཞིས་བྱེས་གཉིས་ཀ་མཚོན་གྱི་ཡོད་སྐོར་སོགས་གསུངས། ཡིན་ནའང་གྲོས་ཚོགས་ཀྱིས་༸གོང་ས་མཆོག་ཉིད་ཀྱི་ཞལ་དྲོན་མོ་ནས་གསུངས་པའི་བཀའ་དེ་འགྲིག་མི་འདུག་མདོག་མདོག་བྱས་ཏེ་བཙན་བྱོལ་བོད་གཞུང་གི་མཚན་བྱང་གི་ཚབ་ཏུ་མིང་བྱང་གཞན་མང་པོ་ཞིག་ཡར་ཕུལ་ཏེ་༸གོང་ས་མཆོག་གི་བཀའ་དགོངས་ལམ་དུ་འགྲོ་བཅུག་མ་སོང་། དེ་རྗེས་ཡང་༸གོང་ས་མཆོག་གིས་བཀའ་ཁྲིའི་དམ་འབུལ་མཛད་སྒོའི་ཉིན་ཡོངས་ཁྱབ་ཐོག་༸གོང་ས་མཆོག་གིས་ཆབ་སྲིད་དབང་ལུང་བརྒྱུད་སྤྲོད་ཆ་ཚང་གནང་སྟེ་ད་ལྟའི་གནས་སྟངས་འདི་སྲིད་སྐྱོང་རང་ཆགས་ཡོད་ཅེས་ནན་ཏན་གྱིས་གསུངས་པའི་དགོངས་པར་ཡང་ངོས་ལེན་ཞུས་མི་འདུག འཕེལ་རིམ་འདི་དག་གི་ཐོག་ནས་བསམ་ཚུལ་འགའ་མི་བཤད་ཐབས་མེད་ཆགས་སོང་།
༡ ༸གོང་ས་མཆོག་གི་ཞལ་གསུངས་དྲོན་མོ་དང་མཚན་རྟགས་ལ་རིན་ཐང་མེད་པ།
གོང་དུ་ཞུས་པ་ལྟར་རྒྱལ་ཡོངས་ཚོགས་ཆེན་གྱི་ཚོགས་བཅར་བ་ཡོངས་ལ་༸གོང་ས་མཆོག་གིས་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་ཀྱི་མཚན་ཐོག་ནས་ཡོངས་གྲགས་ཀྱི་མཇལ་ཁ་དང་བཀའ་སློབ་ཐའ་མ་གནང་བ་རེད། དེ་སྐབས་༸གོང་ས་མཆོག་གིས་བཙན་བྱོལ་བོད་གཞུང་ཞེས་པ་དེ་མུ་མཐུད་འཇོག་རྒྱུར་ལོ་རྒྱུས་ཀྱི་འཕེལ་རིམ་དང་གནས་སྟངས་ལ་བརྟེན་ནས་འགན་ཁུར་མི་ཐུབ་པའི་བཀའ་ནན་གནང་སོང་། དེ་བཞིན་༸གོང་ས་མཆོག་གིས་བཙན་བྱོལ་བོད་མིའི་སྒྲིག་འཛུགས་ཞེས་པའི་མིང་ཚིག་འདིས་བོད་ཕྱི་ནང་གཉིས་ཀར་ཁྱབ་མི་ཐུབ་པའི་ཞལ་བཞེས་གཙང་མ་གནང་སོང་བ་མ་ཟད། ༸གོང་ས་མཆོག་གིས་བཙན་བྱོལ་བོད་གཞུང་གི་མིང་བྱང་གི་ཚབ་ཏུ་“གངས་ལྗོངས་རང་དབང་མང་གཙོའི་སྒྲིག་འཛུགས” ཡང་ན། “ གངས་ལྗོངས་རང་དབང་མང་གཙོའི་ལྷན་ཁང་” བཏགས་པ་ཡིན་ན།བོད་ཆོལ་ཁ་གསུམ་ལ་ཁྱབ་ཐུབ་པ་དང་། གཞིས་བྱེས་གཉིས་ཀ་མཚོན་གྱི་ཡོད་སྐོར་སོགས་གསུངས་ཤིང་། གངས་ལྗོངས་ཟེར་བའི་ཚིག་འདི་ཡོད་པའི་དེབ་སྐྱེལ་བྱེད་ཐབས་དགོས་པའི་ལམ་སྟོན་ཡང་གནང་སོང་། མཚན་བྱང་འདི་༸གོང་ས་མཆོག་ལ་ཡར་ཞུ་མི་དགོས་པར་མར་གསོལ་བསྩལ་གནང་སོང་།ཡིན་ནའང་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པའི་ཐོག་གི་༸གོང་ས་མཆོག་ལ་གསོལ་འདེབས་ཞུ་རྒྱུའི་དོན་ཚན་དང་པོའི་ནང་གསེས་དོན་ཚན་དང་པོར་བོད་མིའི་སྒྲིག་འཛུགས་ཞེས་པ་ཞིག་འཁོད་ཡོད་པ་དང་། ༸གོང་ས་མཆོག་ལ་འབུལ་རྒྱུའི་གསོལ་འདེབས་སྙན་ཞུ་གསུམ་གྱི་ནང་བོད་མིའི་སྒྲིག་འཛུགས་བྲིས་གནང་འདུག་ལ། དོན་ཚན་དང་པོའི་ནང་བོད་མིའི་སྒྲིག་འཛུགས་ཟེར་བའི་ཚིག་ཅིག་བྲིས་ཡོད་པ་དེའི་ཐད་གཞུང་མང་ཚོགས་ཆེན་ཐོག་སྤྱི་འཐུས་ཚོགས་གཙོ་མཆོག་གིས་བོད་མིའི་སྒྲིག་འཛུགས་ཞེས་པ་དེ་གཞུང་ལ་གོ་རྒྱུ་མིན་པར་གཞུང་འབྲེལ་མིན་པའི་བོད་མིའི་སྡེ་ཚན་ཁག་ལ་གོ་དགོས་པར་གསུངས་སོང་། དེ་ལྟར་གསལ་བཤད་གནང་དགོས་དོན་གང་ལ་ཐུག་པ་རེད་ཟེར་ན། བཅའ་ཁྲིམས་བསྐྱར་བཅོས་ཀྱི་སྔོན་གླེང་དང་། དོན་ཚན་དང་པོའི་ནང་བཙན་བྱོལ་བོད་གཞུང་དང་བོད་མི་ཞེས་པའི་ཚིག་བརྗོད་འདི་གཉིས་མིན་པའི་ཚིག་གཞན་གྱིས་ཚིག་འདི་གཉིས་ཀྱི་ཚབ་བྱེད་རྒྱུར་ཚོགས་བཅར་བ་ཚོས་མི་འདོད་པ་ཧ་ཅང་ཆེན་པོ་གནང་གི་ཡོད་པས་རེད། མདོར་ན་བོད་མིའི་སྒྲིག་འཛུགས་ཅེས་པ་དེ་༸གོང་ས་མཆོག་ལ་གསོལ་འདེབས་ཞུ་རྒྱུའི་ཡིག་ཆའི་ནང་ཆེད་དུ་བཅུག་པ་ཞིག་དང་། ཡང་༸གོང་ས་མཆོག་གིས་བཙན་བྱོལ་བོད་གཞུང་གི་མཚན་བྱང་གི་ཚབ་ཏུ་གངས་ལྗོངས་རང་དབང་མང་གཙོའི་སྒྲིག་འཛུགས་སམ། ཡང་ན། གངས་ལྗོངས་རང་དབང་མང་གཙོའི་ལྷན་ཁང་ཅེས་ཡར་ཞུ་མི་དགོས་པར་མར་གསོལ་བསྩལ་གནང་བ་དེས་འགྲིག་མི་འདུག་མདོག་མདོག་བྱས་ནས་མཚན་བྱང་གསར་པ་ཉི་ཤུ་རྩ་བཞི་ཡར་ཕུལ་སྟབས་༸གོང་ས་མཆོག་གིས་བོད་མིའི་སྒྲིག་འཛུགས་ཅེས་འཁོད་པ་དེར་ཆོག་མཆན་མཚན་རྟགས་གནང་བ་རེད། ཡང་དེ་རྗེས་སྤྱི་འཐུས་ལྷན་ཚོགས་ནས་བོད་མིའི་སྒྲིག་འཛུགས་བསྒྱུར་གྱི་ཡིན་ཟེར་ནས་འུར་རྒྱག་གི་ཡོད་ལ། སྤྱི་ཚོགས་ནང་དེའི་ཐད་བསམ་ཚུལ་ཡོད་པ་ཤེས་རྗེས་ཡང་བསྒྱུར་གྱི་མིན་ཟེར་གྱི་ཡོད་པ་རེད། གལ་སྲིད་གཅིག་བསྒྱུར་དགོས་ཀྱི་ཡོད་པ་ཡིན་ན། ༸གོང་ས་མཆོག་གི་ཞལ་དྲོན་མོ་ནས་གསུངས་པ་ང་ཚོ་ཚང་མའི་ཧ་གོ་དོན་གསལ་བཞིན་གངས་ལྗོངས་རང་དབང་མང་གཙོའི་སྒྲིག་འཛུགས་དང་། ཡང་ན་གངས་ལྗོངས་རང་དབང་མང་གཙོའི་ལྷན་ཁང་ཅེས་པ་གང་རུང་དུ་བསྒྱུར་རོགས།
༢ བཀའ་ཁྲིའི་མིང་སྲིད་སྐྱོང་པ་རུ་མ་བསྒྱུར་ན་བོད་ཀྱི་སྲིད་སྐྱོང་གི་ཁྲིམས་མཐུན་རྒྱུན་ཆད་པ་རེད།
བཀའ་ཁྲིའི་དམ་འབུལ་མཛད་སྒོའི་ཉིན་༸གོང་ས་མཆོག་གིས། ངོས་ཀྱིས་ལོ་ཡུན་དེའི་རིང་རིམ་པས་ང་ཚོ་དངོས་གནས་མང་གཙོའི་ངོ་བོ་ཡོངས་སུ་རྫོགས་པ་ཞིག་བྱེད་དགོས་རྒྱུ་གལ་ཆེན་པོ་མཐོང་བ་དང།དེ་འདྲའི་གནས་སྟངས་ཀྱི་འོག་ནས་ང་ཚོ་འདིར་དངོས་གནས་ཕྱི་ནང་སུས་བལྟས་ཀྱང་ཐམས་ཅད་ཀྱི་མཐུན་སྣང་ལ་ང་ཚོ་བཙན་བྱོན་དུ་གནས་ཡོད་ཀྱང་ཁྲིམས་མཐུན་གྱི་མང་གཙོའི་འོས་བསྡུ་བྱས་ནས་འདེམས་ཐོན་བྱུང་བའི་ད་ལྟའི་གནས་སྟངས་འདི་སྲིད་སྐྱོང་རང་ཆགས་ཡོད། ཅེས་དང་། མི་ལོ་དྲུག་ཅུའི་སྔོན་བོད་ཀྱི་སྤྱི་ཚོགས་རྙིང་པའི་འགྲོ་སྟངས་སྲིད་སྐྱོང་གི་འགན་བཞེས་མཁན་སྟག་བྲག་རིན་པོ་ཆེའི་སྐུ་མདུན་ནས་ངས་རྩིས་ལེན་ཞུས་པ་འདི།དུས་རབས་ཉི་ཤུ་པ་དང་ཉེར་གཅིག་པའི་ནང་འཛམ་གླིང་གང་སར་དབྱར་གྱི་ཆུ་བོ་བཞིན་འཕེལ་རྒྱས་འགྲོ་བའི་མང་གཙོ་ཞེས་པ་འདི་ང་ཚོས་དངོས་གནས་ཁ་ཞེ་གཉིས་མེད་དང་སྤོབས་པའི་ཐོག་ནས་ལག་བསྟར་བྱས་ཏེ།དེ་རིང་འདིར་མི་མང་གིས་འོས་འདེམས་བྱས་པའི་སྲིད་སྐྱོང་བློ་བཟང་སེང་གེ་ལ་ངོས་ཀྱིས་རྩིས་སྤྲོད་བྱ་རྒྱུ་ཡིན། ཅེས་གསུངས་ཏེ་༸གོང་ས་མཆོག་གིས་བོད་ཀྱི་སྲིད་སྐྱོང་གི་འགན་དབང་རྩིས་སྤྲོད་གནང་བ་འཇིག་རྟེན་ཡོངས་གྲགས་ཆགས་ཡོད། ཡིན་ནའང་ཟླ་ ༩ ཚེས་ ༡༧ཉིན་སྤྱི་འཐུས་ཚོགས་གཙོ་མཆོག་གིས་གྲོས་ཚོགས་སུ་གསལ་བཤད་ཅིག་གནང་བའི་སྐབས་སུ་བཀའ་བློན་ཁྲི་པ་སྲིད་སྐྱོང་བཞེས་མཚན་བྱང་ལ་བཅོས་བསྒྱུར་གཏོང་རྒྱུའི་སྐོར་ལ། ཐེངས་འདིའི་གྲོས་ཚོགས་ནང་བགྲོ་གླེང་གི་ལས་རིམ་ཙམ་ལས། བཅའ་ཁྲིམས་དངོས་སུ་བསྐྱར་བཅོས་གཏོང་རྒྱུའི་ལས་རིམ་འགྲོ་ཐུབ་མེད་སྐོར་གསུངས་པ་གསར་འགྱུར་བརྒྱུད་ལམ་ཁག་ཏུ་ཐོན་འདུག་ལ། ༸གོང་ས་མཆོག་གིས་སྲིད་སྐྱོང་རང་དུ་ངོས་འཛིན་གནང་སྟེ་སྲིད་སྐྱོང་གི་འགན་དབང་རྩིས་སྤྲོད་གནང་ཡུལ་དུ་ངོས་འཛིན་དང་རྩིས་སྤྲོད་གནང་བའི་འཕེལ་རིམ་དེ་ལ་སྲིད་སྐྱོང་མིན་པའི་ཐག་གཅོད་ཅིག་བོད་མི་མང་སྤྱི་འཐུས་ལྷན་ཚོགས་ཀྱིས་གནང་ཡོང་དུས། བྱུང་རིམ་འདིས་གནད་དོན་ཡ་མཚན་ཅན་འགའ་ཤས་མཐོང་བ་ནི།
དང་པོ། ད་དུང་༸གོང་ས་མཆོག་གིས་བོད་ཀྱི་སྲིད་སྐྱོང་གི་འགན་དབང་ཆ་ཚང་རྩིས་སྤྲོད་གནང་མེད་པ་ཞིག་ཏུ་གོ་བ་ཡིན་ལ། དེ་ཡང་༸གོང་ས་མཆོག་གིས། ངོས་ཀྱིས་རྟག་པར་ཆབ་སྲིད་ཀྱི་དབང་ཆ་འཛིན་ནས་འགན་འཁྱེར་རྒྱུ་འདི་ཆོས་ཕྱོགས་ཀྱི་འགོ་ཁྲིད་ཀྱིས་བྱས་ན་མི་འགྲིགས་པ་ཤོད་ཀྱི་ཡོད།མི་ལ་ཆོས་ཕྱོགས་ཀྱི་འགོ་ཁྲིད་ཀྱིས་ཆབ་སྲིད་ཀྱི་འགན་འཁྱེར་ན་ཡག་པོ་མེད།ཐ་དད་དགོས་ཞེས་ཤོད་བཞིན་དུ་ང་རང་ཆོས་ཕྱོགས་ཀྱི་འགོ་ཁྲིད་ཅིག་གིས་ཆབ་སྲིད་ཀྱི་དབང་ཆ་བཟུང་སྟེ་སྡོད་སྐབས།ཁ་ནས་བཤད་པ་དང་ལག་ལེན་གཉིས་མ་མཚུངས་པ་ལྟ་བུ་ཆགས་ཏེ་སྐབས་རེ་མ་བདེ་བ་ཡོང་གི་འདུགད་ཆ་རང་ངོས་ཀྱི་སེམས་ནང་ཡིད་ཆེས་ཡོད་པ་མི་ལ་བཤད་པ་དེ་རང་གིས་དངོས་སུ་ལག་བསྟར་བྱས་པ་ཡིན། ཅེས་བཀའ་ཁྲིའི་དམ་འབུལ་མཛད་སྒོའི་ཉིན་གསུངས་པའི་གནད་ཆེའི་བཀའ་སློབ་འདི་ཞལ་རྫུན་ཡིན་པ་སྤྱི་འཐུས་ལྷན་ཚོགས་ཀྱིས་ཁས་ལེན་དགོས་པ་ཆགས་ཀྱི་ཡོད། དེ་ཡང་ད་ལན་གྲོས་ཚོགས་ཀྱི་བཞུགས་མོལ་ཚོགས་འདུའི་ཐོག་སྔོན་མ་སྟག་བྲག་གི་སྐབས་སུ་༧གོང་ས་མཆོག་ཞལ་མ་བཞུགས་པའི་སྐབས་སུ་ཆོས་སྲིད་ཀྱི་འགན་ཡོངས་རྫོགས་བཞེས་མཁན་ཞིག་ཆགས་ཡོད་པ་རེད།ད་ལྟའི་དུས་ཚོད་ལ་༧གོང་ས་མཆོག་ཞལ་བཞུགས་བཞིན་པ་ཡིན་སྟབས།སྲིད་སྐྱོང་ཞེས་བཏགས་ན་སྔ་དྲགས་པ་རེད་གསུངས་ཏེ་དགག་བྱ་གནང་སྐོར་གསལ་བ་འདིས་ད་དུང་༸གོང་ས་མཆོག་བོད་ཀྱི་སྲིད་སྐྱོང་ཡིན་པར་ངོས་འཛིན་བྱེད་ཀྱི་ཡོད་པ་ཡིན་པས་གྲོས་ཚོགས་ཀྱིས་༸གོང་ས་མཆོག་ཞལ་རྫུན་མཁན་དུ་བསྒྲུབས་འདུག མ་གཞི་ནས་༸གོང་ས་མཆོག་སྐུ་འཁྲུངས་པ་ནས་ཞལ་བཞུགས་བཞིན་པ་ཡིན་ཡང་། སྲིད་སྐྱོང་ཟེར་བ་དེ་༸གོང་ས་མཆོག་ཞལ་བཞུགས་མིན་གྱི་གནད་དོན་མིན་པར་༸གོང་ས་མཆོག་གིས་བོད་ཀྱི་སྲིད་སྐྱོང་གི་འགན་དབང་མ་བཞེས་ཕྱིན་སྲིད་སྐྱོང་བ་ཡོད་པ་ཞིག་ཡིན་ལ། སྟག་བྲག་རིན་པོ་ཆེ་མཆོག་ནི་དཔེ་མཚོན་ཐག་ཉེ་ཤོས་དེ་ཡིན།
གཉིས་པ། ཡང་ན་གྲོས་ཚོགས་ཀྱི་ཐག་གཅོད་འདིས་༸གོང་ས་མཆོག་གིས་གཞུང་འབྲེལ་གྱི་ཐོག་ནས་ང་ཚོ་བཙན་བྱོལ་དུ་གནས་ཡོད་ཀྱང་ཁྲིམས་མཐུན་གྱི་མང་གཙོའི་འོས་བསྡུ་བྱས་ནས་འདེམས་ཐོན་བྱུང་བའི་ད་ལྟའི་གནས་སྟངས་འདི་སྲིད་སྐྱོང་རང་ཆགས་ཡོད་པ་དང་། དེ་ཡང་བོད་ཀྱི་འགན་དབང་ཆ་ཚང་ཡོད་པའི་མི་མང་གིས་འོས་འདེམས་བྱས་པའི་སྲིད་སྐྱོང་ཡིན་པ་དང་། ༸གོང་ས་མཆོག་ལ་སྲིད་སྐྱོང་སྟག་བྲག་རིན་པོ་ཆེས་རྩིས་འབུལ་ཞུས་པའི་བོད་ཀྱི་སྲིད་སྐྱོང་གི་འགན་དབང་དེ་༸གོང་ས་མཆོག་གིས་སྲིད་སྐྱོང་གསར་པར་རྩིས་སྤྲོད་གནང་དུས། དབུས་བོད་མིའི་སྒྲིག་འཛུགས་ཀྱི་ཁྲིམས་ལུགས་ཀྱི་ཐོག་ནས་ངོས་ལེན་བྱེད་ཀྱི་མིན་ཅེས་བོད་མི་མང་སྤྱི་འཐུས་ལྷན་ཚོགས་ཀྱིས་གསུངས་ཀྱི་ཡོད་པར་ངོས་འཛིན་མི་བྱེད་ཐབས་མེད་ཡིན་ཏེ། ཉེ་དུས་བཀའ་ཁྲིའི་དམ་འབུལ་མ་ཞུས་པར་༸གོང་ས་མཆོག་ནི་བོད་ཀྱི་སྲིད་སྐྱོང་པ་ཡིན་ལ། ཁྲིམས་སྒྲིག་དང་སྲིད་བྱུས་སོགས་ལ་མཚན་རྟགས་སྐྱོན་རྒྱུ་ནི་ཁྲིམས་ལུགས་ཀྱི་ཐོག་ནས་༸གོང་ས་མཆོག་གི་སྲིད་སྐྱོང་གི་འགན་དབང་དེའི་མཚོན་རྟགས་བླ་ན་མེད་པ་དེ་རེད། དེ་འདྲའི་༸གོང་ས་མཆོག་གི་མཚན་རྟགས་སྐྱོན་རྒྱུའི་བླ་ན་མེད་པའི་དབང་ཆ་དེ་བཀའ་བློན་ཁྲི་པར་ཡོད་པ་ཁྲིམས་ལུགས་ཀྱི་ཐོག་ནས་གཏན་འབེབས་གནང་མཁན་སྤྱི་འཐུས་རེད། དེར་བརྟེན་ཁྲིམས་ལུགས་ཀྱི་ཐོག་ནས་བབ་དོན་ལ་འོས་འདེམས་ཞུས་པའི་བཀའ་བློན་ཁྲི་པ་དེ་བཅའ་ཁྲིམས་བསྐྱར་བཅོས་ཀྱི་ངོས་ནས་དང་། ༸གོང་ས་མཆོག་གིས་སྲིད་དབང་རྩིས་སྤྲོད་གནང་ཕྱོགས་ཀྱི་ཐོག་ནས་བོད་ཀྱི་སྲིད་སྐྱོང་པ་ཆགས་པ་རེད་ལ། ༸གོང་ས་མཆོག་གིས་བོད་ཀྱི་སྲིད་སྐྱོང་གི་འགན་དབང་དེ་བཞིན་བོད་ཀྱི་སྲིད་སྐྱོང་པའི་མིང་གནས་ཐོག་རྩིས་སྤྲོད་གནང་དགོས་པ་སྲིད་དབང་རྩིས་སྤྲོད་བྱེད་པའི་ལམ་ལུགས་ཀྱི་ཁྲིམས་མཐུན་དབང་ཆ་བརྒྱུད་སྤྲོད་གནང་ཕྱོགས་ཀྱི་རྩ་དོན་གཙོ་བོ་ཆགས་ཀྱི་ཡོད་པ་བཞིན་གནང་ཡོད་པ་དང་། བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་བཀའ་བློན་ཁྲི་པའི་འགན་དབང་དེ་བོད་ཀྱི་སྲིད་སྐྱོང་པ་ལ་ཡར་རྩིས་འབུལ་ཞུས་པ་ཞིག་ཆགས་ཡོད་པ་རེད། ཡིན་ནའང་ད་ཆ་བཀའ་བློན་ཁྲི་པའི་མིང་དེ་སྲིད་སྐྱོང་པ་རུ་མ་བསྒྱུར་བ་ཡིན་ན་༸གོང་ས་མཆོག་གིས་བོད་ཀྱི་སྲིད་སྐྱོང་གི་འགན་དབང་རྩིས་སྤྲོད་གནང་བར་ཁྲིམས་ལུགས་ཀྱི་ནང་དུ་ངོས་ལེན་བྱེད་ཀྱི་མིན་ཟེར་བ་ཆགས་ཀྱི་ཡོད་པས། ད་ཆ་༸གོང་ས་མཆོག་གིས་བོད་ཀྱི་སྲིད་སྐྱོང་གི་འགན་དབང་མུ་མཐུད་བཞེས་པར་བཅའ་ཁྲིམས་ནང་ཆ་རྐྱེན་མེད་སྟབས་༸གོང་ས་མཆོག་གི་རྗེས་ནས་སྲིད་དབང་བརྒྱུད་འཛིན་གནང་མཁན་གྱི་བོད་ཀྱི་སྲིད་སྐྱོང་པ་རྒྱུན་ཆད་སོང་བར་ངོས་འཛིན་བྱེད་རྒྱུ་མ་གཏོགས་གནས་སྟངས་གང་ཡང་ལྷག་མེད་སྟབས་བོད་ཀྱི་སྲིད་ལུགས་ཀྱི་ཁྲིམས་མཐུན་རང་བཞིན་གྱི་གནས་སྟངས་ང་ཚོའི་མདུན་དུ་ལྷགས་མེད་པ་གསལ་པོ་ཆགས་པ་ཡིན་ལ། འདི་ནི་སྐབས་བཅོ་ལྔ་པའི་སྤྱི་འཐུས་ཀྱིས་ཐག་གཅོད་འོག་བོད་ཀྱི་ལོ་རྒྱུས་ཀྱི་ཁྲིམས་མཐུན་རང་བཞིན་རྒྱུན་བཅད་པའི་གནས་སྟངས་ཡ་ང་ཤོས་སུ་ངོས་འཛིན་བྱེད་དགོས་པར་སྣང་། དེར་བརྟེན་དཀའ་ངལ་འདི་སེལ་དགོས་ན་༸གོང་ས་མཆོག་གིས་ཡོངས་བསྒྲགས་གནང་བ་བཞིན་བཅའ་ཁྲིམས་ནང་གི་བཀའ་བློན་ཁྲི་པ་ཟེར་བའི་མིང་ཚིག་དེ་སྲིད་སྐྱོང་པར་བསྒྱུར་རྒྱུ་དེ་རེད། མདོར་ན་བཀའ་བློན་ཁྲི་པ་ཟེར་བའི་མིང་ཚིག་དེ་སྲིད་སྐྱོང་པ་རུ་མ་བསྒྱུར་བ་ཡིན་ན་གོང་དུ་བཤད་པའི་གནད་དོན་དེ་དག་ལ་བསམ་བློ་རྩ་བ་ནས་མ་བཏང་བར་གྲོས་ཚོགས་ཀྱི་རྭ་བའི་ནང་རང་ཕྱོགས་དང་གཞན་ཕྱོགས། བཀའ་ཤག་དང་སྤྱི་འཐུས་སོགས་དབྱེ་བའི་འོག་ནས་དབང་ཆ་འཐབ་རྩོད་བྱས་ཏེ་༸གོང་ས་མཆོག་གི་ཐུགས་རེ་དང་།བོད་མི་མང་གི་རེ་བ་མཐའ་དག་སྣང་མེད་དུ་བཏང་བའི་སྒོ་ནས་བོད་དང་བོད་མིའི་འཕྲལ་ཕུགས་གཉིས་ཀར་གཞི་འཛིན་ས་མེད་པ་ཞིག་བྱེད་ཀྱི་ཡོད་པའི་ངོས་འཛིན་མི་བྱེད་ཐབས་མེད་རེད།
མཐའ་དོན།
དེར་བརྟེན་འདི་ལོ་སྤྱི་འཐུས་སྐབས་ ༡༤ པ་དང་ ༡༥ གཉིས་ཀྱི་ངོས་ནས། དང་པོ། ༸གོང་ས་མཆོག་ལ་བོད་ཀྱི་སྲིད་སྐྱོང་འགན་དབང་ཡོད་པའི་སྐབས་སུ་བཙན་བྱོལ་བོད་གཞུང་གི་མིང་བྱང་གི་ཚབ་ཏུ་གནང་བའི་གངས་ལྗོངས་རང་དབང་མང་གཙོའི་སྒྲིག་འཛུགས་སམ། ཡང་ན། གངས་ལྗོངས་རང་དབང་མང་གཙོའི་ལྷན་ཁང་ཞེས་གསོལ་བསྩལ་གྱིས་བཀའ་ནན་ལམ་སྟོན་གནང་བ་བརྩིས་མེད་རྡོག་རོལ་དང་། གཉིས་པ། ༸གོང་ས་མཆོག་གིས་བོད་མིའི་སྒྲིག་འཛུགས་ཟེར་བར་ཆོག་མཆན་མཚན་རྟགས་གནང་བ་དེ་ཡང་འགྲིག་མི་འདུག་མདོག་མདོག་གི་གཞུང་འབྲེལ་གྲོས་འཆར་དང་གསར་འགོད་གསལ་བསྒྲགས། གསུམ་པ། ༸གོང་ས་མཆོག་གིས་བོད་ཀྱི་སྲིད་སྐྱོང་གི་མཚན་གནས་རྗེས་འབྲེལ་གྱི་ཐོག་ནས་བོད་ཀྱི་སྲིད་དབང་ཆ་ཚང་རྩིས་སྤྲོད་གནང་བའི་རླབས་ཆེན་གྱི་དགོངས་པ་ལ་ཡང་གྲོས་ཚོགས་ནས་ངོས་ལེན་མེད་པའི་ཐག་གཅོད་འདི་དག་གི་ཐོག་ནས་སྤྱི་འཐུས་ལྷན་ཚོགས་ཀྱི་འཐུས་མི་ཚོས་ད་ནས་བཟུང་༸གོང་ས་མཆོག་བཀའ་དང་དགོངས་པ་ཟེར་ནས་གསུང་རྒྱུའི་ཐོབ་ཐང་རྩ་བ་ནས་མེད་པའི་ངོས་འཛིན་བྱེད་ཀྱི་ཡོད་ལ། ༸གོང་ས་མཆོག་བཀའ་དང་དགོངས་པ་ཇི་བཞིན་ལག་བསྟར་གནང་རྒྱུ་ནི་བོད་གཞིས་བྱེས་གཉིས་ཀྱི་ཚེ་སྲོག་ལ་ཐུག་ཀྱང་འདོར་མི་སྲིད་པ་ཡིན་པས་སྤྱི་འཐུས་འདི་དག་གིས་བོད་གཞིས་བྱེས་གཉིས་ཀྱི་མངོན་འདོད་རེ་བ་གཏན་ནས་ཁས་ལེན་གྱི་མེད་པ་གསལ་པོ་ཆགས་པ་རེད་ལ། ཁོང་ཚོ་ཡང་སྙིང་སུའི་ཆེད་དུ་རྐུབ་སྟེགས་སྲུང་ཡོད་པ་ཡང་དོགས་པ་ཧ་ཅང་ཆེན་པོ་ཞིག་རེད་བསམ་གྱི་འདུག
འདྲ་བཤུས། བཀའ་ཤག སྤྱི་འཐུས།ཆེས་མཐོའི་ཁྲིམས་ཞིབ་ཁང་། སྐུ་སྒེར་ཡིག་ཚང་། སྤྱི་འཐུས་རྣམ་པ་ཚང་མ། དྲ་རྒྱ་ཁག
jigdrel tenzin la,
Our country is not based on just one people. People like you, the way of your views makes our country backward. Let there be so many opinions and voices and may best will come out and benefit our tibetan people. Please stop using our leaders name. This is 21st century now. It will not bring any benefits for our long term goals.
གྲོས་ཚོགས་ཀྱི་ཐག་གཅོད་ལ་ངོས་ལེན་བྱེད་ཀྱི་མིན་ན།
དངོས་གནས་མང་གཙོའི་ལམ་ལུགས་ཀྱི་ཐོག་ནས་ Anne Hazare ལྟར་འཐབ་རྩོད་བྱ་དགོས།
དེ་མིན་གཞོང་པ་སྟོང་པའི་གཞོང་འཛིངས་མ་རྒྱག
ཚངས་དབྱངས་ཞེས་པ་དང་ yum ཞེས་པ་འདི་གཉིས་དབྱིན་ཡིག་མཁས་མདོག་སྟོན་པ་ལས་གཉིས་ཀ་མགོ་དང་གཟུགས་པོ་གོ་ལྡོག་པ་འདི་ལྟར། ཚངས་དབྱངས་ཀྱི་མགོ་བོད་པའི་མགོ་དང་གཟུགས་པོ་དབྱིན་ཇིའི་གཟུགས་འཁྱེར་བ་དང་། yum གྱི་མགོ་དབྱིན་ཇིའི་མགོ་དང་གཟུགས་པོ་བོད་པའི་གཟུགས་པོ་འཁྱེར་སྟངས་ལ་བལྟས་ན་མི་འདི་གཉིས་གཞན་གྱི་ལད་ཟློས་ལ་དགའ་བའི་ལད་ཟློས་རིང་ལུགས་པའམ། ཡང་ན་རིགས་དབྱིན་མ་བོད། ཆ་ལུགས་ཡ་མ་ཟུང་། སྐད་ར་མ་ལུགས་བཤད་མཁན་གང་ལྟར་ཅི་ཆ་མི་རྟོགས། རྒྱུ་མཚན་བོད་ཡིག་གི་དྲ་རྒྱ་འདིར་དབྱིན་ཡིག་སྲེས་ལྷད་བཏང་ནས་བོད་རིག་པ་ལ་གཏོར་རྒོལ་བྱས་མི་འདུག་གམ།
སྤྱི་མཐུས་གྲོས་ཚོགས་ཟེར་བ་མི་ངན་དག་གིས་ག་དུས་ཡིན་ན་༸གོང་ས་མཆོག་གི་བཀའ་དགོངས་་རྩིས་མེད་གཏོང་བ་དང་བོད་གཞིས་ལུས་མི་མང་མངོན་འ༷དོད་རྡོག་རོལ་གཏོང་བ་བཤད་མ་དགོས་པ་ཞིག་རེད་ད་དུང་ཁོང་ཚོས་ཁ་སྟོང་པ་ཡིས་༸གོང་ས་མཆོག་གི་བཀའ་༸གོང་ས་མཆོག་གིས་གསུང་ངོ་ཚ་ཁྲིལ་མེད་ཆུ་རྒན་དག་རྣམས།།
༡ རྒྱལ་ཡོངས་ཚོགས་ཆེན་ཐེངས་གཉིས་པའི་གྲུབ་དོན་སྙན་ཐོ་༧གོང་ས་མཆོག་གི་མདུན་ཅོག་སྟེང་བཞག་པ་ཁ་མ་ཕྱེས་གོང་། ༼ གངས་ལྗོངས་རང་དབང་མང་གཙོའི་ལྷན་ཁང་ངམ་སྒྲིག་འཛུགས་༽་གསུངས་བ་བདེན་པ་རེད། མཚན་འདི་ཁོང་གི་ཐམས་ཅད་མཁྱེན་པའི་ཐུགས་ནས་བརྡོལ་བའི་གསོལ་རས་རིན་ཐང་བྲལ་བ་ཞིག་ཡིན། དེའི་རྗེས་གྲོས་ཚོགས་ནས་མཚན་གཞན་རྣམས་དང་མཉམ་དུ་༧གོང་ས་མཆོག་ལ་མཚན་གསོལ་སྙན་ཞུ་བསྐྱར་འབུལ་ཞུས་པ་བདེན་པ་རེད། འདིར་གསལ་ཁ་བཤད་དགོས་པ་ཞིག་ནི། རྒྱལ་ཡོངས་ཚོགས་ཆེན་ཐེངས་གཉིས་པའི་ཚོགས་བཅར་བ་རྒྱ་ཆའི་དགུ་བཅུ་གོ་དགུས་༼ བོད་མིའི་སྒྲིག་འཛུགས་༽ལ་འདོད་པ་མེད་པ་༧གོང་ས་མཆོག་ལ་ཕུལ་བའི་སྙན་ཞུར་བྲིས་མི་འདུག བཙན་བྱོལ་བོད་གཞུང་གི་མང་གཙོ་ཟེར་བའི་མང་འདི་མང་པོ་དང་གྲལ་གྱི་མཐའ་ན་གནས་པའི་མི་མང་གཙོ་འདོན་བྱེད་པའི་༧གོང་ས་མཆོག་གི་དགོངས་གཞི་དང་མཐུན་པ་ཡིན་ན། སྐབས་དེར་གང་ལ་མང་པོས་སྤྱི་མོས་བྱས་པའི་ཐག་གཅོད་དེར་མི་རེ་འགས་མཐོང་ཆུང་བཏང་བ་མ་ཟད། མི་རེ་འགའི་རྣམ་དཔྱོད་དང་གཟིགས་རྒྱང་ལ་གཞན་གྱིས་དོ་མེད་པའི་རྣམ་པ་གསལ་སྟོན་གྱིས་མཚན་བྱང་བརྗེ་བསྒྱུར་འདི་ནག་ཁུངས་ནང་གི་ཚོང་ཁོ་ན་ཆགས་ཡོད། གཞན་ཚོགས་བཅར་བ་ཡོངས་རྫོགས་འུ་ཐུག་ནས་གལ་སྲིད་ཡིན་གཅིག་མིན་གཅིག་བརྗེ་དགོས་ན་༧གོང་ས་མཆོག་ལ་མཚན་ཞུ་རྒྱུ་དང་ཁོང་གིས་གང་བཏགས་ལ་སྤྱི་མོས་གནང་ཡང་དེའང་ཐོན་དགོས་སར་ཐོན་མེད།
༢ སྲིད་སྐྱོང་པ་༧གོང་ས་མཆོག་སྐུ་བཞུགས་དུས་སྔ་དྲགས་ཟེར་བ་དང་། བཀའ་ཁྲིའི་མིང་ཐོག་ནས་འོས་བླུགས་པ་མ་གཏོགས་སྲིད་སྐྱོང་པའི་མིང་ཐོག་ནས་འོས་བླུགས་མེད་ཟེར་མཁན་སྐབས་ ༡༥ པའི་སྤྱི་འཐུས་རྣམ་པ་ཚོ་རེད། ཁྲིམས་མཐུན་སྲིད་སྐྱོང་པས་སྲིད་སྐྱོང་བ་གཞན་ཞིག་ཁྲིམས་མཐུན་དུ་བསྒྱུར་བ་རྩིས་མེད་བཀའ་འགལ་བྱས་པ་འཇིགས་བྲལ་ལགས་ཀྱིས་གསུངས་པ་དོན་ལ་གནས་པ་གཅིག་བྱས། གཉིས་ནས་མི་མང་གིས་སྲིད་སྐྱོང་པ་ཡིན་པར་ངོས་འཛིན་གྱིས་འོས་ལྡུགས་དགོས་ན་སྐུ་ཞབས་བློ་སེང་སྲིད་སྐྱོང་དུ་མི་འདེམས་པའི་ཐེ་ཚོམ་གཟས་ནས་བཏོད་པ་ནི་སྤྱི་འཐུས་རེ་འགའ་དམིགས་ཡུལ་གཞན་ཞིག་ཡོད་སྲིད་ཁར། ༧གོང་ས་མཆོག་བར་ལྡིང་དུ་ལྷག་ཏུ་འཇུག་པ་དང་ཁོང་གི་བཀའ་མོལ་རྣམས་དོན་ཐོག་ཏུ་འཁྱོལ་རྒྱུར་སྣང་ཆུང་བྱས་པ། བཀའ་ཁྲི་བློ་སེང་ལ་སྲིད་སྐྱོང་གི་གནས་ཚད་མེད་པར་ངོས་འཛིན་བྱས་པ་གསལ་བོ་རེད་ལ། འདི་ནི་སྐབས་བཅོ་ལྔ་པའི་སྤྱི་ལྷན་གྱིས་ལོ་རྒྱུས་ལ་ཐོག་མར་བྲིས་པའི་ནག་ཉེས་དང་པོ་དེ་རེད། རྒྱ་ཆེའི་བོད་མི་མང་གིས་འདིར་དོ་སྣང་མ་བྱས་པར་རྗེས་འདེད་གཏོང་མཁན་མེད་ཀྱང་། རྒྱ་ནག་གཞུང་གིས་གནང་སྟངས་འདི་ཕྱི་གསལ་ནང་གསལ་མིན་པ་དང་། འགོ་རྔ་མི་མཐུན་པར་མཐོང་སྟེ་ཁོངས་དགོད་ཀྱིས་བཙན་བྱོལ་སྒྲིག་འཛུགས་ལ་སྐྱོན་སྣ་དགུ་བརྩེགས་འགེལ་སྲིད་ལ། སྤྱི་ལྷན་གྱིས་གནང་སྟངས་འདིས། སྐུ་ཞབས་བློ་སེང་གི་རེ་བའི་ཁེངས་པའི་བོད་རྒྱ་འབྲེལ་མོལ་གྱི་ལས་འཆར་མང་པོར་ལམ་དུ་མི་ལྷོངས་རྒྱུའི་ལས་གསོགས་རྒྱུ་ནི་སྔོན་དཔག་ཐུབ་པ་ཞིག་རེད། དེ་བས། སྤྱི་ལྷན་སྐབས ༡༥ པས་རིག་པ་སྒྲིམ་དགོས་ཚོད་གདའ།
ཡང་སྙིང་དྲ་གྲོགས་འགའ་ཞིག་ནས་ག་རེ་ཤོད་ཀྱི་ཡོད་དམ་ངས་ངོ་མ་ཧ་གོ་མ་སོང་སྲིད་གཞུང་མེད་པའི་སྲིད་སྐྱོང་དེ་ངོ་མ་མཚར་ཆེ་མ་ཟད་བོད་མི་མང་གི་སྤྱི་འཐུས་གསར་རྙིང་དེ་ཚོ་ང་ཚོས་འོས་འདེམས་བྱས་པ་མ་ཡིན་ནམ་དེའི་ནོར་འཁྲུལ་དེ་ཚོ་ང་ཚོས་བཟོས་པ་ཞིག་རེད། བྱས་ཙང་སྤྱི་འཐུས་རྣམས་ལ་ཁ་ངན་དང་ཚིག་ངན་དེ་འདྲ་མ་བྱེད་རོགས་གནང་། ད་ལྟའི་ཆར་ང་ཚོས་བཀའ་ཁྲི་མཆོག་གི་དབུས་པའི་བོད་མི་མང་སྤྱི་འཐུས་རྣམས་ལ་ཕྱར་བ་གྲུ་འདེགས་བྱེད་དགོས་པའི་དུས་ཚོད་ཅིག་རེད།
འཇིགས་བྲལ་བསྟན་འཛིན་ཟེར་བའི་མི་འདི་ཆེས་ཁྱད་མཚར་ཞིག་རེད། དུས་རྒྱུན་དུ་ཁོས་༸གོང་ས་མཆོག་གིས་བོད་ཀྱི་ལོ་རྒྱུས་ལ་ནག་ཐིག་ཕབས་ཡོད་ཚུལ་ཡོངས་གྲངས་བཤད་བཤད་པའི་མཐར། ད་ཡང་༸གོང་ས་མཆོག་གི་བཀའ་བསྒྲུབ་དགོས་རབས་རྐྱང་རྐྱང་བཤད་སྟངས་བལྟས་ན། མི་འདིའི་གྲས་ཀྱིས་ག་རེ་བཤད་ཀི་ཡོད་མེད་ཤེས་མ་སོང་། ཆབ་སྲིད་པ་ཟེར་ནི་ཡོད་ཚོད་འདུག དེ་ཡང་ཁག་ཡོད་རྒྱུ་མ་རེད། འདས་པོ་འཇུ་ཆེན་གཤེགས་ཚར་བས་ལོས་ཡོད། ཁོའི་སྐྱབས་མགོན་རེད་པཱ། ད་ཡང་༸གོང་ས་མཆོག་གི་ཐུགས་འགན་བཞེས་ཀྱི་མེད་དུས་ཤིག་ལ། ཁོང་གི་བཀའ་དང་ལེན་བྱེད་དགོས་རབས་བཤད་སྟངས་ལ་བལྟས་ན། ཁོ་ལ་ཉམས་མྱོང་ཞིག་ཐོབ་པ་འདྲ། དེ་མིན་༸གོང་ས་མཆོག་གི་ཐུགས་འགན་བཞེས་བཞིན་པའི་སྐབས་སུ། ཁོས་སྐྱོན་བརྗོད་བྱེད་དོན་ག་རེ་ཡིན་ན།
གཞན་ཡང་། ཤར་ཕྱོགས་ཁུག་རྟ་ཟེར་བ་འདི་ཡང་ཆབ་སྲིད་པ་ཐེབས་ཆག་ཅིག་ཡིན་པ་འདྲ། མཚམས་རེར་སྤྲུལ་སྐུ་ཡིན་པའི་གོ་ཐང་བཙལ་ནས་ལྷ་ཡིན་པའི་རྣམ་འགྱུར་སྟོན་བཞིན་པ། ལན་རེར་འདྲེ་ཞིག་ཡིན་པའི་ཚུལ་བཟུང་ནས་མཐོ་དམན་ཀུན་ལ། སྐྱོན་བརྗོད་བྱེད་མཁན་ཞིག་དེ་རེད། དཔེར་ན། འདྲེ་མགོ་རྡོའི་མིང་ཞིག་འཁུར་ནས་མཐོ་བཤད་དམའ་བཤད་རྐྱང་རྐྱང་གིས་ནམ་དུས་རྫོགས་མཁན་དེ་རེད། བཙན་བྱོལ་ནང་གི་ཆབ་སྲིད་པ་ཐེབས་ཆག་པ་ཁོ་ཚོ་འདྲ་བོ་ཡིན་ནོ།།
ང་ཚོ་བོད་པའི་སྨྱུག་རྩེ་དང་ མཚོན་རྩེ་ཚང་མ་ནང་ཁུལ་མ་གཏོག་ཕྱི་ལ་གཏན་ནས་མི་འགྲོ་བ་འདི་ངོ་མ་སྟག་ཞིམ་ཟེར་བ་འདི་ཡིན་པ་འདྲ། ནང་དུ་སྟག་དང་ ཕྱི་ལ་ཞི་མི།
མཚན་བྱང་ནང་ལ་གལ་ཆེ་ཤོས་ནི། ད་ལྟ་ཡང་རྒྱལ་ཁབ་རང་བཙན་ཡོད་མདོག་མདོག་དང་། ཡང་ན་བོད་རང་བཙན་ལེན་མཁན་ཡིན་མདོག་མིན་པར། བོད་རིགས་ཡོངས་ལ་ཁྱབ་པའི་མིང་ཚིག་ཅིག་དགོས་རྒྱུ་དེ་དོན་གནད་ཆེ་ཤོས་དེ་རེད།