ཨ།
ཆགས་འཇིག་གཉིས་གང་ལ་གཏོགས་འགྲོ་མིན།།
ཀུན་མཁྱེན་པའི་སངས་རྒྱས་ཁོང་མིན་པ།འ
མི་གཞན་གྱི་བསམ་བློར་འོང་དཀའ་བའི།།
བོད་ལས་དབང་སྡུག་པོས་ཁྱེད་དྲན་འདུག །
གཞོན་བྱིས་པ་རྒན་གོག་སུ་ཡིན་ཡང་།།
སེམས་བསམ་པས་ཡིད་བཞིན་ནོར་བུ་ལ།།
མཇལ་ཐུབ་པའི་རེ་བ་འདོན་འདོན་མཁན།།
གཞིས་ཡུལ་གྱི་མི་ཚོས་ཁྱེད་དྲན་འདུག །
བོད་རང་གི་ཛ་དྲག་གནས་ཚུལ་འདིར།།
དོན་ངོ་མ་བོད་ལ་སྨན་པའི་ཇུས།།
གནད་གལ་དོན་ཆེ་སར་བསམ་ཐུབ་པའི།།
རིགས་མཐུན་གྱི་སྤུན་ཚོས་ཁྱེད་དྲན་འདུག །
དབུའི་སྐྲ་ལོར་ཁ་བའི་མདངས་བབས་རུང་།།
བོད་ལ་རྒྱའི་སེམས་པ་མཐོར་འདོགས་མཁན།།
དྲིན་ཕ་མ་གཉིས་དང་གཞན་ནུ་མོ།།
ཁྱེད་ཚང་གི་ནང་མིས་ཁྱེད་དྲན་འདུག །
སྐུ་ཉིད་ཀྱི་ཤ་ཁྲག་ལས་གྲུབ་པའི།།
ཡིད་འོང་བའི་མེ་ཏོག་ཟུང་གཅིག་གི །
བུ་བུ་མོ་གཅེས་ཕྲུག་ཆ་གཉི་ཀས།།
འཇིག་རྟེན་གྱི་ཨ་ཕ་ཁྱེད་དྲན་འདུག །
ཤ་རུས་པའི་མཆེད་ཁུངས་མི་གཅིག་ཀྱང་།།
ལས་དབང་གིས་ཁྱེད་ལ་ཚུར་སྤྲད་པ།།
སྙིང་ཉེ་བའི་སྐུ་ཟླ་མཛའ་མོ་ཡིས།།
ཚེ་གཅིག་གི་སྐྱ་ཡ་ཁྱེད་དྲན་འདུག །
དུས་ཉེ་སྔོན་ངོ་དེབ་དྲ་བ་ནས།།
ཉིན་རེ་རེའི་ཁྱེད་ཀྱི་གནས་ཚུལ་རྣམས།།
གཅིག་མ་ཆད་གཉིས་ཀྱང་མ་ལུས་པར།།
མཐོང་མྱོང་མཁན་ཚང་མས་ཁྱེད་དྲན་འདུག །
ཁྱེད་དྲན་པའི་སྡུག་ཡུས་ཨ་ཙ་མ།།
ཉམ་ཆུང་བའི་མི་ངས་མལ་ཐོག་ནས།།
མགུར་ཞིག་གི་ལྟ་བ་བྱས་ཚར་དུས།།
བོད་ཁ་བའི་སྐྱེས་ཆེན་ཁྱེད་དྲན་འདུག །
དཔའ་རྒོད་ཁྱེད་རྟག་ཏུ་སྙིང་ནས་དྲན་བཞིན་མཆིས། སྨོན་ལམ་ཡང་ཞུའོ།