གླུ་མ་ཕུར་བུ་ལྷ་མོའི་གླུ་གཞས་མཚན་ཚོགས།

བདེ་མོའི་ངག་གི་སྨྲ་བརྗོད་དང་། སྙན་མོའི་དབྱངས་ཀྱི་འགྱུར་ཁུགས། ལྡེམ་འགྱུར་འགྲོས་ཀྱི་སྟངས་སྟབས། དྭངས་གཙང་སླད་མེད་ཀྱི་སེམས་པ་དཀར་བོ། སྒང་བ་བོད་ཀྱི་སྣོད་བཅུད་དང་ཀུན་ནས་འདྲེས་པའི་ཨ་སྡོད་གླུ་མ་གྲགས་ཅན། ཕུར་བུ་ལྷ་མོའི་གླུ་དབྱངས་མཚན་ཚོགས་ལ་བཀྲ་ཤིས་རྟེན་འབྲེལ་ཞུ།

གླུ་མ་ཕུར་བུ་ལྷ་མོའི་ངོ་དེབ་ཏུ་གནས་ཚུལ་སྤེལ་བར་གཞིགས་ན། སྤྱི་ལོ་༢༠༡༤ ལོའི་ཟླ་༡༡ ཚེས་༢༣ རེས་གཟའ་ཉི་མའི་དགོང་མོར། ཕུར་བུ་ལྷ་མོའི་གླུ་དབྱངས་ཆེད་བསྒྲིགས “ང་ཡི་རེ་བ”ཞེས་བྱ་བ། འོད་སྡེར་དུ་ཕབ་སྐྲུན་ཟིན་པའི་དབུ་འབྱེད་མཚན་ཚོགས་ཤིག ནོས་ཡོག་གྲོང་ཁྱེར་གྱི་ནང་འཚོག་རྒྱུ་ཡིན་འདུག

མོས་གསལ་བསྒྲགས་ཤིག་སྤེལ་བའི་ནང་བཀོད་པ་ལྟར་ན། “སྤྱིར་ན་བརྡ་འཕྲིན་གྱི་དུས་རབས་འདིར་འོད་སྡེར་བཏོན་པ་ནི་འགྲོ་སོང་ལས་ཡོང་སྒོ་མེད་པའི་ལས་ཤིག་ཡིན་ཡང་། བོད་ཀྱི་ཐུན་མོང་མ་ཡིན་པའི་གླུ་གར་རིག་གནས་རྒྱུད་འཛིན་དང་། བོད་མིའི་སེམས་ཀྱི་རེ་བ་དབྱངས་སུ་གྱེར་རྒྱུ་ནི་གུས་མོས་དགའ་ཕྱོགས་ཡིན”ཞེས་ཆེད་དུ་བརྗོད་འདུག
ངས་ཅི་ཙམ་ཉན་ཡང་སུན་རྒྱུ་མེད་པ་ནི། བོད་ཁམས་རྫ་ཆུ་ཁའི་གླུ་མ་གྲགས་ཅན་སྐྱིད་བྱམས་ཀྱིས་བླངས་པའི་དམངས་གླུ་ “རྫ་ཆུ་ཁའི་འབྲོག་གླུ”ཞེས་པ་དེ་དང་། ཕུར་བུ་ལྷ་མོས་བླངས་པའི་ “ངོ་མཚར་ཆེ། གོང་ས་མཆོག”ཅེས་པའི་གླུ་དེ་གཉིས་ཡིན་ནོ།།

ཕུར་བུ་ལྷ་མོའི་གླུ་གཞས་ཀྱི་འགྱུར་ཁུགས་ཁྲོད། བོད་ཀྱི་སྲོལ་རྒྱུན་གླུ་དབྱངས་ཀྱི་ལེགས་ཆ་འཛོམས་ཤིང་། དུས་རབས་གསར་བའི་རོལ་དབྱངས་ཀྱི་སྙན་ཆའང་འདུ་བས། ད་གཟོད། ང་ཚོ་མོས་བླངས་པའི་གླུ་གཞས་ལ་ཉན་སྤྲོ་ཞིང་། མོས་བཟུང་བའི་ལྷག་བསམ་དང་བརྩེ་སེམས་ལ་ཡིད་འགུལ་ཐེབས་པ་རེད། མོའི་གླུ་གཞས་ཀྱི་ཐོག་མཐའ་བར་གསུམ་དུ། སེམས་ཤུགས་དང་། སྐྱོ་གདུང་། དགེ་སྣང་། ལྷག་བསམ་བཅས་ཀྱི་སྙིང་བོ་མར་ཁུ་ལྟར་འཁྱིལ་ཡོད་པ། ག་ལེར་ཉན་ཞིང་ཞིབ་མོར་བསམས་ན་ཧ་གོ་ཐུབ་པ་ཞིག་རེད། ཕུར་བུ་ལྷ་མོའི་མཚན་ཚོགས་ལེགས་ལམ་ཡོང་བའི་སྨོན་འདུན་ཞུ།

གནས་ཚུལ་ངོ་མ་དྲ་བྱང་འདི་ནས་གཟིགས་ཐུབ། https://www.facebook.com/singerlhamo?fref=tl_fr_box&pnref=lhc.friends

དུས་ཚོད། སྤྱི་ལོ་༢༠༡༤ སྤྱི་ཟླ་༡༡ ཚེས་༢༣ རེས་གཟའ་ཉི་མ།

ཚོགས་ཡུལ། Gulshang Terrace 59-15 37th Ave.
Woodside, New York 11377

འཛིན་བྱང་ཉོ་ས། ནོས་ཡོག་གི་བོད་མིའི་གནས་སྡོད་ས་གནས་སོ་སོར་འགྲེམ་ཚོང་བྱེད་ཀྱི་ཡོད་འདུག