སྐྱོ་བྲག་དགའ་དབང་།
ཁོ་བོའི་སྤུན་མཆེད་འདན་ཕྲུག་ཟླ་བས་བོད་པ་སྐྱབས་བཅོལ་པ་སྐྱོ་བོའི་གནས་བབ་ཀྱི་ཐོག་ནས་དྷ་སྟེང་བོད་ཁྱིམ་སློབ་གྲྭའི་འོག་ཏུ་ཡོད་པའི་རྒྱ་གར་བའི་ཁང་པ་རྙིང་པ་ཞིག་གླས་ནས་བསྡད་འདུག་པར་ང་རང་ནམ་ཁོམ་ལ་བསྐྱོད་ཀྱིན་ཡོད། ཉིན་ཤས་གོང་ངའི་རྒྱུན་གྱི་སྡོད་གནས་རྒྱུད་སྟོད་དུ་ཉལ་བའི་རྨི་ལམ་དུ་འདན་ཕྲུག་ཟླ་བའི་སྒོར་མོ་བོར་རླག་ཏུ་ཤོར་སྲིད་པ་ཞིག་རྨིས་པའི་རྐྱེན་སེལ་རིམ་གྲོའི་ཆེད་འདན་ཕྲུག་ཟླ་བའི་སར་སོང་སྟེ། ངོ་ཤེས་སྒྲུབ་བླ་ཞིག་གི་ལྷན་གསུར་བསྔོ་དགོང་མོ་འགའ་བཏང་བའི་ཉིན་ཞིག་གི་ང་ཚོའི་གླེང་མོལ་དུ་རི་ལ་སོང་ན་ལེགས་པའི་སྐད་ཆ་བྱུང་བ་བཞིན། སྤྱི་ལོ་ ༢༠༡༣ ཟླ་བ་ ༦ ཚེས་ ༡༨ ཉིན་གྱི་སྔ་དྲོར། ང་དང་སྤུན་མཆེད། ད་དུང་ངོ་ཤེས་སྒྲུབ་བླ་སྟེ་ངེད་གསུམ་པོས་མངར་བག་དང་ཤིང་ཐོག་ཁུ་བ་སོགས་བཟའ་བཏུང་ཕྲན་བུ་རེ་ཉོས་ཏེ་དྷ་སྟེང་རི་གདོང་ནས་ཡར་ལ་འཛེགས། རི་ལ་འགྲོ་ན་སྐྱིད་པའི་སྐད་ཆ་ཙམ་ལས་ས་གནས་འདི་ལ་འགྲོ་ན་ཞེས་པའི་དམིགས་གཏད་ཅི་ཡང་མེད་པར་ཡར་ཡར་འཛེགས་པ་ན། ཕྱི་གླིང་པ་དང་རྒྱ་གར་བ་སོགས་ཕོ་མོ་རྒས་གཞོན་གང་མང་ཞིག་དྷརྨ་ཤཱ་ལའི་རྒྱབ་རི། ཧི་མ་ལ་ཡའི་ལྷོ་ཕྱོགས་ཀྱི་རི་བོའི་གདོང་རྒྱུད་དཽ་ལ་དྷཱར་ལ་སྤྲོ་འཆམ་དུ་བསྐྱོད་ཀྱིན་འདུག་པའི་ལྷན་དུ་ཆས། བྲག་གཡང་གི་ངོས་ན་སྤང་དང་ནགས་ཚལ་འདྲེས་པའི་རི་སུལ་མང་པོ་མཐོ་གསེག་གིས་བྱང་ཤར་དུ་བཅད་པའི་འཕྲང་ལམ་སྐྱི་གཡའ་བ་དག་བརྒལ།
ཉིན་རྒྱབ་དཽ་ལ་དྷཱར་གྱི་རི་རྒྱུད་ཀྱི་གདོང་ཉག་གི་སྤང་སྒང་ཡུལ་སྐོར་སྤྲོ་འཆམ་པ་ཕལ་མོ་ཆེ་འགྲོ་སའི་ས་གནས་སུ་བསླེབས། 
ཧ་ཅང་མཐོ་དྲགས་པས་བྱ་རྒྱལ་རྒོད་པོ་སོགས་རི་སྐེད་ནས་ལྡིང་སྐོར་བྱེད་པ། རྩྭ་གྲུང་འཇམ་པོ་དང་ཁུ་བྱུག་རྐང་སྣམ། མ་མོའི་བོག་ཏོག་སོགས་ས་མཐོའི་སྐྱེ་དངོས་རྣམས་སྐྱེས་པ། བྱང་ངོས་ཀྱི་རྫ་རི་གནམ་འདེགས་ཀྱི་ཀ་བ་འདྲ་བའི་དཽ་ལ་དྷཱར་གྱི་རི་རྩེ་དང་ཐོད་ཐུག་ལ་ཁད་པ། ལྷོ་ངོས་ཀྱི་ནགས་ཚལ་སྒང་གཤོང་རྣམས་ལྗང་སྨུག་ཏུ་མཐོང་བ། རྒྱུན་འབབ་ཀྱི་ཆུ་ཆེན་སྐྱ་བོ་དག་གྱ་གྱུའི་འགྲོས་ཀྱིས་ལྷོ་ནུབ་ཏུ་དལ་བོར་བཞུར་བ། ཁམས་དྭངས་ལ་རིག་པ་གསལ་བས་ལུས་སེམས་གཉི་ག་སྤྲོ་སྣང་གི་ནང་དུ་ནུབ་ནས་རང་གི་སྤྱོད་ལམ་ཅི་ཞིག་ཏུ་ཡོད་པའང་ཚོར་དཀའ་བ་ཡོང་གིན་འདུག
མར་ལོག་ནའང་རང་གནས་སུ་འབྱོར་ཐུབ་མོད། ང་ཚོ་སྐྱིད་ཐག་ཆོད་དེ་རི་འདབས་རྒྱ་གར་བ་འགས་ཟ་ཁང་ཐབས་ཆག་བཟུངས་ནས་ཕྱི་གླིང་བའི་གུར་ཆུང་གླ་རྒྱུ་འདུག་པ་གླས། འབྲས་དང་སྲན་ཐུག་གི་བཟའ་བཏུང་སོགས་རི་འདབས་ཀྱི་རིན་བབ་ལ་བསམ་ན་གོང་ཆེན་ཡིན་མོད། སྐྱི་གཡའ་བའི་བགྲོད་ལམ་ལ་བསམ་ན་སྤྲོད་རིན་འོས་པ་ཞིག་རེད། དྲེག་པ་ཆེ་བའི་ཕོ་ཁེབས་སྲབ་མོས་དྲོས་དཀའ་བ་ལྟ་བུར་ཡོད་མོད། གུར་གྱིས་དབུགས་ཐུམ་བྱས་པས་འཁྱག་མ་སོང་། ཞོགས་པ་མངར་ཇ་ཉུང་ངུ་དང་མངར་བག་ཅུང་ཟད་རེ་ཟ་འཐུང་བགྱིས་ཏེ། རི་རྩེའི་ཁ་བ་ལ་མ་ཐུག་བར་མ་སོང་ན་བློ་བདེ་བོ་མེད་སྐད་ཀྱིས། རྐང་སྟབས་ཕྲན་བུ་རེ་འཁྱལ་ནའང་ཁང་བརྩེགས་སྟོང་ཕྲག་ཡས་མས་ཀྱི་གཡང་རོང་དུ་ཟག་སྟེ། གསོན་པོའི་མི་ཕར་བཞག གཤིན་པོའི་རོ་ཡང་མི་འཐོབ་པའི་བྲག་གཡང་གི་འཕྲང་ལམ་མཐོ་གསེག་བྱང་ཕྱོགས་སུ་རྒྱུག་པ་དག་བརྒལ་བའི་སྤང་གདོང་ནའང་ཟ་ཁང་ཐབས་ཆག་འདུག་པ་ནས་ཕོར་ཐུག་རེ་འཐུངས། རི་ལྟག་གི་གདོང་ཟུར་ཕྲ་མོ་བརྒྱུད་ཡར་རྫ་གསེང་ནས་ཅུང་ཟད་འཛེགས་པས་རི་མགོའི་ཁ་བ་ལ་ཐུག
གངས་སྟེང་དུ་རྒྱུག སྤང་ཐོག་ཏུ་ཉལ། རྫ་ཆབ་བསིལ་མ་འཐུང་། མགོ་རྐང་ལག་བཀྲུ་བ་སོགས་བྱས། ལུས་སེམས་གཉི་གའི་སྤྲོ་སྣང་སྔར་ལས་ལྷག་པ་ནི་ང་ཚོ་ཚང་མའི་སྐྱེ་གནས་དང་འཚར་ལོང་བྱུང་ས་ཕ་ཡུལ་གངས་ལྗོངས་ཡིན་པའི་གནད་ཀས་ཡིན་པ་འདྲ། དུས་ཡུན་ཐུང་ངུ་ལས་སྡོད་ལོང་མ་བྱུང་བར་སླར་ལོག་པ་ན་ཡར་འཛེགས་པའི་དཀའ་ཚེགས་ལྟ་བུ་མེད་ནའང་ཐུར་ཐག་རིང་བ་དང་། འཕྲང་ལམ་འཇིགས་པ། ཆུ་ཅུང་ཟད་རེ་འཐུང་བ་ལས་ཟ་མ་མ་ཟོས་པར་ཤར་རྒྱུག་བྱས་པས། ཐང་ཆད་པ། རྐང་པ་ན་བ། ཕོ་བ་ལྟོགས་པའི་ངང་ཕྱི་དྲོ་དྷ་སྟེང་དུ་འབྱོར་ནས་ཕྱི་གླིང་པའི་བཟའ་བ་ཕིས་རྫ་(Pizza)རྒྱགས་ཚད་རེ་ཟོས་པ་ཡིན།
ས་ཁད་ཆེས་དམའ་བ་ཞིང་གཉིས་འདེབས་ཀྱི་ས་ནས་གློ་བུར་དུ་རྫ་རིའི་རྩེ་མོ་སྲིད་པའི་གངས་རྒན་གྱི་ས་ན་བསླེབས་ཏེ། ཉི་འོད་དང་བསིལ་རླུང་ཕོག་ཅིང། གངས་ཆུ་གྲང་མོས་བཀྲུ་གཤལ་བྱས་པའི་ཉེར་ལེན་གྱིས་གདོང་ལྤགས་སོགས་ཚིག་ནས་དམར་ཞད་ཡོད་པའི་སྔོ་ནག་རྡོག་གེ་བ་རེ་ཆགས་ཤག སྔོན་འཆར་མེད་པའི་གློ་བུར་བའི་རི་འཛེགས་ཡིན་སྟབས་ཉིན་གཉིས་ཀྱིས་ཡར་མར་མགྱོགས་པོར་བསྐྱོད་པ་ལས། དོན་དངོས་ཀྱི་སྤྲོ་འཆམ་པ་ཞིག་ཡིན་ན། ཞག་ཤས་སྡོད་རྒྱུ་བྱས་ཏེ་ཁ་པར་དང་པར་སྒམ་སོགས་ཀྱི་གློག་ལེགས་པར་བསགས། གདོང་པའི་ཞག་རྩི་དང་། རྩམ་པ་སོགས་སྟབས་བདེའི་བཟའ་བཏུང་རེ་ཡང་ཁུར་ནས་སོང་ན་རང་རེ་གངས་ཅན་པ་རྣམས་ལ་མ་ཤི་ཞིང་ཁམས་སུ་བསླེབས་པའི་སྤྲོ་སྣང་རེ་ཡོང་ངེས་འདུག་གོ །
སྤྲོ་བོ་བྱུང་ན་འགྲིགས་བཞག