ལྷ་ཆབ་སྦྱིན་པ།
སྔོན་མོ་རྒྱ་མཚོའི་རླབས་ཀྱི་རྩེ་མོ་ལ།།
རྩེན་པའི་ལྟོ་དཀར་ཉ་མོའི་རང་དབང་འདི།།
བདག་གི་སེམས་ཀྱིས་མྱངས་པའི་གཏམ་རྒྱུད་དེ།།
སྣང་བ་དགུང་ལ་འཕུར་བའི་ལོ་རྒྱུས་ཤིག །
རླུང་དང་སྤྲིན་པ་འཐབ་པའི་ལྡིར་སྒྲ་དེས།།
བདག་གི་སྙིང་ལ་གློག་གི་གར་ཞིག་འཁྱུག།
ངོ་མཚར་སྲིན་པོའི་མིང་གིས་བོས་པ་དེ།།
བདག་གི་སྙན་ངག་ལྟ་བུའི་གཡུ་འབྲུག་ཉིད།།
རྣམ་རྟོག་སྣང་བའི་ལག་པ་རིང་མོ་དེས།།
བདག་གི་དོན་ལྔ་སྣོད་དྲུག་སྤྲུགས་སྤྲུགས་བཏང་།།
བརྩེ་བའི་རི་མོར་འཁྱུག་པའི་དབྱངས་རྟ་འདི།།
ཁྱེད་ཀྱི་རྨི་ལམ་རིང་མོའི་འགུལ་ལ་འཁྱུད།།
ལྷ་དང་ཡི་དྭགས་རྩིས་པའི་ཡ་མཐའ་ནས།།
གདོན་དང་འབྱུང་བོའི་ཁམས་ཤིག་ངས་མ་མཐོང་།།
སྒྱུ་མའི་གར་གྱིས་འཁྱུག་པའི་གློག་འོད་དེ།།
མི་དང་ལྷ་མིན་འཐབ་པའི་རྡོ་ཆར་ཉིད།།
ཕྱི་ཡི་ཁམས་ཤིག་སེམས་ཀྱིས་སྙེག་ནའང་།།
ལག་པས་ཟིན་དུ་མེད་པ་ལུས་ཀྱིས་མྱངས།།
མི་མཐོང་སྡུག་གི་རི་བོའི་རྩེ་མོ་ན།།
བདག་གི་སྒྱུ་འཕྲུལ་དྲ་བའི་གཏེར་ཞིག་ཡོད།།
ངོ་མཚར་གཏེར་གྱི་སྒོ་མོ་མ་ཕྱེས་པས།།
ཀླུ་དབང་གཙུག་ལ་བདག་གི་རྐང་རྗེས་སྤར།།
མུ་སྟེགས་མཁན་པོའི་སེམས་ཀྱི་གནོད་བྱེད་དག།
དཀར་ཕྱོགས་ལྷ་མིར་གཞུས་པའི་འགྲམ་ལྕག་ཉིད།།
མཁས་པའི་བློ་ལ་མེད་པའི་རྨི་ལམ་འདི།།
བདག་གི་མཛུབ་མོའི་སྒྱུ་འཕྲུལ་ཡིན་སོང་ལོ།།
མཛེས་མའི་གདོང་གི་མེ་ཏོག་སར་ལྷུང་བས།།
འཇིག་རྟེན་རྒུད་པའི་ལྟས་ངན་མཐོང་སོང་ངམ།།
བལྟས་པས་ཕ་མཐའ་མེད་པའི་ཐང་ཞིག་ན།།
རི་དྭགས་དགའ་བའི་སྨུག་རྒྱུའི་གྲོང་ཁྱེར་ཡོད།།
འཁྲུལ་བའི་སྣང་བ་རྫོགས་པའི་མཐའ་མ་དེར།།
ཀྱེ་མ་ལྷ་ཚོགས་ཤི་བའི་རོ་ཞིག་མཐོང་།།
མི་ཡི་ཚེ་ཚད་ལྷ་ཡི་མིག་ཆུ་བཞིན།།
བདེན་པའི་རི་ཚོགས་འགུལ་བའི་གསེང་ན་བཞུར།།
འཇིག་རྟེན་མི་རྟག་ཅེས་པའི་ཐ་སྙད་ཅིག།
དཔྱོད་ལྡན་རྒན་པོའི་ལས་ཀྱི་མྱོང་བས་རྙེད།།
དུག་གསུམ་དུད་སྤྲིན་འཁྲིགས་པའི་གསེང་ཞིག་ན།།
བདག་གི་སྙན་ངག་རིང་མོ་དུབ་པས་མནར།།
སྐད་ཅིག་གསོན་པའི་གད་རྒྱངས་དྲག་པོ་འདིས།།
རྒྱང་རིང་དགའ་བའི་གྲོགས་དག་མགྲོན་དུ་བསུ།།
༢༠༡༣ ༥ ༢ ལ་བྲིས།
ཨ་རྒན་པོ། ཁྱོད་ལ་ཅི་ཞིག་འགྲིག་གི་མི་འདུག། ནན་གྱིས་ནར་ཡོད་པ་མ་རེད་དམ།