ཁ་བའི་འབྲོག་མོ།
དམའ་མོའི་གཞོངས་ལ་བལྟས་པའི་ཆུ་བུར་མིག །
སེམས་ཀྱིས་བྲིད་པས་སྐད་ཅིག་དབྱིངས་སུ་ཟུག །
སྤྲིན་དང་གློག་དམར་འཁྲུགས་པའི་བར་ཞིག་ནས།།
སུ་ཡི་གཏམ་རྒྱུད་སྦེད་པའི་བང་སོ་གཏོར།།
མིང་བྱང་སྐམ་པོའི་བང་སོར་བརྗིད་ཆགས་པའི།།
རུས་ཀོག་སང་སང་འཐོར་བའི་ཆ་དེ་ལ།།
ཁྲག་དང་རྐང་མར་འབར་བའི་གཏམ་རྒྱུད་དག །
གང་དུ་བཞུགས་སམ་སུ་ཡིས་གཅེས་སུ་འཛིན།།
ནག་ཆུང་ཡིག་འབྲུ་དེ་དག་དེབ་ཐེར་དུ།།
སེམས་ཀྱི་རེ་བ་ཇི་བཞིན་སྤུངས་པ་སྟེ།།
བདེན་པ་ཚིག་ཏུ་བྱས་པ་སུ་ཡིས་བསྙོན།།
ཕྱི་མ་ཕྱི་མའི་རབས་ལ་ལམ་ཞིག་བསྟན།།
ཁྲག་ལམ་རིང་བོ་དེ་ལ་རྣམ་ཤེས་རེ།།
རྣམ་ཤེས་གསོན་པོའི་དགའ་དད་སྤྲོ་བ་ནི།།
གངས་ལྗོངས་ཡུལ་ལ་རྟོགས་བརྗོད་ཟབ་མོ་ཞིག །
གསེར་གྱི་ཉི་མ་འཆར་བ་ཡིན་ནམ་སྙམ།།
སུག་བཞི་རླུང་གི་འཁོར་ལོའི་ངང་ཚུལ་གྱིས།།
རྡུལ་དང་སྨིག་རྒྱུའི་མཚམས་སུ་བསྐྱོད་པ་ཞིག །
ངལ་བ་ཕྲག་ཏུ་ལེན་པའི་སྤོབས་པ་ཞིག །
མ་འོངས་འཚོ་བར་གཟི་འོད་འཕྲོ་བར་བྱེད།།
2016/7/15
ཆུ་མོའི་འགྲན་གྱི་ལྦུ་སོབ་སྤུངས་བ་ལ།།
རྒྱང་ནས་བལྟས་ཚེ་ངང་ཆུང་རྩེ་བ་འདྲ།།
འཁྲེང་བའི་སེམས་ཀྱིས་པང་དུ་ལེན་འདོད་ཀྱང་།།
རེག་མེད་སྟོང་བའི་དབྱིངས་སུ་ཤོར་སོང་ལོ།།
ངག་རིག་བསམ་གཞིག་ཆུ་གཏེར་ཡངས་བ་ལ།།
མཛེས་བའི་ངང་ངུར་རླབས་ལ་རྩེན་པ་ན།།
དུང་སྣང་འདྲེན་པའི་སྙན་ཚིག་སྡུག་གུ་མས།།
འཆར་ཡན་ཀློང་ནས་ད་གདོད་གར་བྱེད་དོ།།
ཕྲན་དཔྱད་ཅིག་གི་ཚུལ་དུའོ།།
རྩེས་ལ་ཆོས།
༅༅། གནས་ལྷོ་ཕྱོགས་རྒྱ་གར་འཕགས་ཡུལ་ན་བཞུགས་པའི།།
མགོན་རྒྱལ་དབང་བསྟན་འཛིན་རྒྱ་མཚོ་ཁྱེད་དྲན་ནས།།
དུས་ནམ་ཡང་བརྗེད་མེད་སྙིང་དབུས་སུ་བཅངས་ན།།
བོད་གངས་ཅན་སེམས་ཀྱི་སྡུག་བསྔལ་དེ་མི་བརྗེད།།
དགུང་ཨ་སྔོན་སྤྲིན་དཀར་བང་རིམ་ན་འཕུར་བའི།།
བྱ་ཁྱུང་ཆེན་གཤོག་རྩལ་གངས་ཕྲུག་ལ་གནང་བའི།།
སྲོག་རྩ་ཆེན་ཤོར་བའི་དཔའ་བོ་རྣམས་དྲན་ནས།
མིག་ཁྲ་ཆུང་མཆི་མའི་དངས་རྒྱུ་དེ་མི་འདུག།
༅༅། ཡར་འགྲོ་སྤྲིན་དཀར་གྱི་ཕུང་པོ། ལྷོ་ཕྱོགས་འཕགས་ཡུལ་ཕྱོགས་ཕེབས་ན།
༧སྐྱབས་མགོན་བསྟན་འཛིན་གྱི་རྒྱ་མཚོར། སྐྱོ་བའི་ཞུ་འཕྲིན་འདི་འབུལ་རོགས།
ང་ཚོ་གངས་ཅན་གྱི་བོད་མི། མ་སྐྱིད་མུན་ནག་ཏུ་ལས་ཀྱང།
ཁྱེད་ཞལ་དཀར་གསལ་གྱི་ཟླ་བ། ནམ་ཕེབས་རེ་སྒུག་དེ་ཞུས་ཡོད།
ཟུས་ཡོད།