གློག་མེའི་གསང་བ།

བསེ་རུས།
——
དེ་རིང་རེས་གཟའ་སྤེན་པ་ཡིན་སྟབས། རང་གི་མལ་ཁང་ནང་དུ་གཙང་སྦྲ་བྱས་པ་དང་། དཔེ་དེབ་ཀློག་འཕྲོ་ཡོད་པའི་རིགས་ཁག་ལ་མིག་མྱུལ་བྱེད་པའི་སྐབས། ཕྱི་ལོགས་ནས་སྒོ་བརྡུངས་པའི་སྒྲ་ཞིག་ཐོས་བྱུང་། མྱུར་མོར་ཕྱིར་ལྟ་སྐབས་ངོ་མི་ཤེས་པའི་བོད་པ་ཞིག་དང་། དབྱིན་ཇི་བ་ཞིག་ད་དུང་རྒྱབ་ཏུ་ལྟོ་ཕད་ཆེན་པོ་ཞིག་འཁུར་བའི་རྒྱ་གར་བ་ཞིག་བཅས་མཐོང་བྱུང་། ང་ག་བྱེད་འདི་བྱེད་མེད་པར་ལུས་པ་ལྟ་བུར་གྱུར་པའི་ཚེ། བོད་པ་དེས་ཁྱེད་ཀྱི་མིང་ལ་བསེ་རུ་ཟེར་གྱི་ཡོད་དམ་ཞེས་སྐད་ཆ་དྲིས་བྱུང་། ངས་ལགས་ཡིན། ངའི་མིང་ལ་བསེ་རུ་ཟེར་གྱི་ཡོད་ཅེས་བཤད་པ་ཡིན། ཁོང་གིས་ང་འཚོལ་བར་ཡོང་རྐྱེན་དང་ལས་ཁུངས་ག་གེ་མོ་ཞིག་གི་ངོ་སྤྲོད་འོག་ཁྱེད་ཐུག་པར་འདིར་ཡོང་བའི་སྐོར་བཤད་ནས་དབྱིན་ཇི་བ་དེ་ངོ་སྤྲོད་བྱས་བྱུང་། དེ་ནས་ངས་ཡར་ནང་དུ་ཕེབས་དང་། ཞེས་ཤོད་ཞོར་རང་གི་མལ་ཁང་ནང་དུ་ཁྲིད་པ་ཡིན། དེ་ནས་སྐད་སྒྱུར་བ་དེས་དབྱིན་ཇི་བ་དེ་བོད་དང་ཤིན་ཅང་སོགས་གྲངས་ཉུང་མི་རིགས་ཀྱི་ཐོག་ལ་རྒྱ་ནག་གཞུང་གིས་ཁྲིམས་ལུགས་དང་མཐུན་མི་མཐུན་གྱི་བྱ་སྤྱོད་ཇི་ལྟར་སྤེལ་གྱི་ཡོད་མེད་ཞིབ་འཇུག་བྱེད་མཁན་ཞིག་ཡིན་པ་དང་། ད་ལྟ་བོད་པ་སྐྱབས་བཅོལ་བའི་ཁྲོད་ཆབ་སྲིད་བཙོན་ཟུར་སོགས་ལ་དྲི་བརྩད་ཞིབ་འཇུག་ཏུ་སླེབས་པ་རེད་ཟེར། ངས་ཐོག་མར་ཁོང་ལ་འཚམས་འདྲི་ཞུས་པ་ཡིན་ལ། ཤོད་འདོད་པའི་སྐད་ཆ་ཚིག་ཁ་ཤས་བཤད་པ་ནི་འདི་ལྟར།
ཐོག་མར་ང་རང་བོད་པ་ཞིག་ཡིན་པའི་ངོས་ནས་སྐུ་ཉིད་ཀྱིས་བོད་ཀྱི་གནད་དོན་ཐོག་དོ་ཁུར་ཆེ་བཞེས་ཐོག་རང་ཉིད་ཀྱི་དཀའ་ངལ་དུ་མ་ཁྱད་དུ་བསད་ནས་བོད་མི་མང་པོ་ཞིག་ལ་དྲི་བརྩད་གནང་གིན་ཡོད་པར་ཐུགས་རྗེ་ཆེ་ཞེས་ཞུ་འདོད་བྱུང་ཞེས་དང་། ལྷག་པར་འཛམ་གླིང་འདིར་བདེན་པ་ནི་ནམ་ཡང་བདེན་པ་ཡིན་པས་ཉིད་ཀྱིས་བདེན་དོན་གྱི་གནས་ཚུལ་རྣམས་འཛམ་གླིང་མི་མང་གི་མདུན་དུ་བཤམས་རྒྱུར་འབད་བརྩོན་གནང་གིན་ཡོད་པ་ནི། ཆེས་བསྔགས་འོས་པ་ཞིག་དང་། གནས་སྐབས་བདེན་དོན་གྱི་ལས་དོན་ཐོག་སྤྱི་ཚོགས་དང་ཁོར་ཡུག་གི་འགལ་རྐྱེན་སྣ་ཚོགས་ཤིག་འཕྲད་སྲིད་ཀྱང་བདེན་པ་ནི་ནམ་ཡང་བདེན་པ་ཡིན་སྟབས། ཁྱེད་ཀྱི་བདེན་པ་བདེན་སར་འཁྱོལ་བ་ཞིག་གནང་རོགས་ཞེས་ཞུས་པ་ཡིན། དེ་ནི་ངའི་ཐོག་མའི་རེ་བ་དང་སེམས་གཏིང་གི་སྐད་ཆ་ཞིག་ཀྱང་རེད།

དེ་ནས་ཁོང་གིས་གློག་ཀླད་ཁ་ཕྱེ་སོང་ལ། སྐད་སྒྱུར་བ་དང་། རྒྱ་གར་བ། ཁོ་རང་བཅས་ཀྱི་ལག་ཐོགས་ཁ་པར་གློག་བསད་པ་ཙམ་མ་ཟད། གློག་མེ་ཡང་ཕྱིར་བཏོན་སོང་། ད་དུང་ངའི་ལག་ཐོགས་ཁ་པར་གྱི་གློག་མེ་ཡང་ཕྱིར་འདོན་དགོས་པའི་བརྡ་བཏང་བྱུང་། ང་རང་ཡ་མཚན་སྐྱེས་པ་ཙམ་མ་ཟད་ཚོར་སྣང་དམིགས་བསལ་བ་ཞིག་ཀྱང་བྱུང་། དེར་བརྟེན། ངས་དེའི་རྒྱུ་མཚན་ཅི་ཡིན་ནམ་ཞེས་དྲིས་སྐབས། སྐད་སྒྱུར་བས་གལ་སྲིད་ང་ཚོའི་ལག་ཐོགས་ཁ་པར་གྱི་ནང་གི་གློག་མེ་ཕྱིར་མ་བཏོན་ན། ང་ཚོས་འདིར་དྲི་བ་དྲི་ལན་གང་བྱས་པ་རྣམས་རྒྱ་མིས་ཉན་ཐུབ་པ་མ་ཟད། སྐད་ཆ་གང་ཡོད་པ་རྣམས་སྒྲ་འཇུག་ཀྱང་བྱེད་ཐུབ་པ་ཞིག་བཟོས་ཡོད་པ་རེད་ཅེས་དང་། འཛམ་གླིང་ལག་ཐོགས་ཁ་པར་གྱི་གློག་མེ་ཕལ་ཆེ་བ་རྒྱ་ནག་ནས་བཟོས་ཡོད་སྟབས། གློག་མེ་ཁག་གི་ནང་སྒྲ་ཉན་ཐུབ་པའི་རྫས་ཤིག་ཡོད་རབས་གླེང་བྱུང་། ང་རང་ཁྲོན་པའི་ནང་གི་སྦལ་པ་ལྟ་བུར་གྱུར་པའི་ཚོར་སྣང་ཞིག་ཀྱང་བྱུང་ལ། རྒྱ་ནག་ལ་སྡང་སེམས་ཤིག་ཀྱང་ངང་གིས་སྐྱེས་བྱུང་། དེ་ལྟའི་གནས་ཚུལ་དེ་ནི་ང་ཚོ་བོད་མི་ཕལ་ཆེ་བར་ཡིད་མི་ཆེས་པའི་གནས་ཚུལ་དུ་གྱུར་སྲིད་ཀྱང་། སྔོན་ཐོན་ཅན་གྱི་མི་རིགས་གཞན་ཚོས་ལག་ཐོགས་ཁ་པར་གྱི་གློག་མེའི་གསང་བ་དེ་སྔར་ནས་ཤེས་ཡོད་ཚོད་རེད། གཅིག་བྱས་ན་ཉམས་ཞིབ་པ་ཁོ་རང་གིས་མ་གཏོགས་མི་ཤེས་པ་དེ་འདྲ་ཡང་ཡིན་སྲིད་པ་རེད། དེ་ནི་ཁོ་བོས་ཁ་ཚོན་གཅོད་ཐབས་བྲལ། གང་ལྟར་ང་ལ་དྲི་བ་མ་དྲིས་པའི་སྔ་རོལ་ཏུ་ཡ་མཚན་པའི་གནས་ཚུལ་འདི་ལྟར་བྱུང་།
དེ་ནས་ཁོང་གི་དྲི་བ་ལྟར་ངས་ལན་འདེབས་གང་ཐུབ་བྱས་ཤིང་། དྲི་ལན་འདེབས་སྐབས་ཀྱང་ང་རང་བོད་མི་རིགས་ཀྱི་བདེན་དོན་ཆེད་ལུས་སྲོག་ལོངས་སྤྱོད་བློས་གཏོང་གནང་མཁན་གྱི་ཀུན་གྱི་ཚབ་མཚོན་མི་སྣ་ཞིག་གི་ངོ་བོའི་ཐོག་ནས་དྲི་ལན་ཁག་ལ་ལན་འདེབས་མ་ལན་མ་འགྱོད་པའི་ཐོག་ནས་ལན་འདེབས་བྱས་པ་ཡིན། ང་རང་ཡིད་ཚིམས་པ་ཞིག ་ཤོད་འདོད་བསམས་ཀྱང་། དུས་ཚོད་ལ་སྟངས་འཛིན་ཆེ་བས་དེ་ལྟར་མ་བྱུང་། ཡིན་ན་ཡང་། གང་ཐུབ་ཅི་ཐུབ་ཀྱིས་ལན་འདེབས་ཁག་བྱས་པ་ཡིན། གློག་མེ་མཐོང་ཚད་ལ་ཞིབ་འཇུག་གཅིག་གནང་ན། ཕལ་ཆེར་རྒྱ་ནག་ནས་བཟོས་ཞེས་བཀོད་ཡོད་ཚོད་རེད། མིང་ཁ་གསལ་མ་བཀོད་ཀྱང་ཕལ་ཆེར་རྒྱ་ནག་ནས་བཟོས་པ་ཤས་ཆེ་བ་རེད། ད་དུང་ངའི་ལག་པའི་སོར་མོའི་འོག་ཏུ་ཡོད་པའི་མཐེབ་གཞོང་དང་། ལག་པའི་འོག་ཏུ་ཡོད་པའི་ཙི་ཙི་སོགས་ཀྱང་རྒྱ་ནག་ནས་བཟོས་པ་མང་ཆེ་བ་རེད། ད་ལྟའི་ཆར་ལག་ཐོགས་ཁ་པར་ཐོགས་ཚད་ཀྱི་གནས་ཚུལ་རྣམས་རྒྱ་ནག་གཞུང་ལ་རྩོལ་མེད་ཐོག་རག་པའི་རྒྱལ་ཁ་ཆེན་པོ་ཞིག་ཐོབ་ཡོད་པ་མ་ཡིན་ནམ།
དེ་ལྟའི་གནས་ཚུལ་དེ་འཛམ་གླིང་གིས་མི་མང་ཀུན་གྱིས་ཤེས་ཀྱི་ཡོད་དམ་མེད།
དྲ་གྲོགས་ཚོས་གཟིགས་ན་གང་འདྲ་རེད་དམ། གོང་གི་གནས་ཚུལ་དེར་བདེན་པའི་ཆ་ག་ཚོད་ཙམ་ཡོད་དམ། ང་ནི་དེ་བདེན་པ་རེད་སེམས་བཞིན་ཡོད། ཁྱེད་རྣམས་ལྟར་ན་དགོངས་ཚུལ་རེ་གསུངས་དང་། དེ་ནས་རྙེད་དོན་མང་པོ་ཞིག་རྙེད་སྲིད་པ་རེད། མཚན་མོའི་ཆུ་ཚོད་དང་པོ་ཟིན་སོང་། འདིར་མཚམས་མི་འཇོག་ཀ་མེད་རེད།།