གློག་ལམ་གྱི་བརྩེི་འཕྲིན་དྲུག་པ།

ཀུན་དགས་དབྱིན་ཡིག་ནས་བསྒྱུར།

བརྩེ་བའི་ཡིག་འབྲེལ་བ་ལགས།

སྤྲོ་སྣང་ཆེན་པོའི་སྒོ་ནས་ཡང་གཅིག་ཁྱེད་ཀྱི་འཕྲིན་ཡིག་ལ་སྒུག ངེད་ཀྱི་ཡིད་མགུ་དང་ཚོར་ཤུགས་ནི་ཁྱེད་ཀྱི་གནས་ཚུལ་མང་ཙམ་གོ་བའི་བརྡ་ལན་དེ་དག་ཡིན།
ཁྱེད་ཀྱི་བསམ་གཞིགས་ཀྱི་ལམ་ཁ་གང་དུ་ཡོད་དམ་བརྩེ་བའི་ཡིག་འབྲེལ་བ་ལགས།
དེང་སང་འདི་རུ་གནམ་གཤིས་ཧ་ཅང་གྲང་། ངས་བསམ་ཚོད་བྱས་ན་དོ་དགོང་ཡང་ཁ་བའི་མེ་ཏོག་གི་ཚོམ་བུ་དག་ས་གཞི་རུ་མགྲོན་པོར་ཕེབས་རྩིས་འདུག་་སྤྲིན་པའི་རྒྱུ་ཕྱོགས་དང་རླུང་བུ་ཡིས་ང་ཚོ་འདར་ཟུག་རྒྱག་ཏུ་འཇུག་་ཡིན་ཡང་། ངའི་ནང་དུ་ཚ་དྲོད་འཕར་སྣོན་ཅན་གྱི་ཚ་ལྡན་འཕྲུལ་ཆས་ཡོད། ཁེར་རྐྱང་གི་སེམས་པ་དང་།ཁེར་རྐྱང་གི་ལུས་པོ་འདི་དགུན་ཁའི་གྲང་ངར་གྱི་ཁྲོད་དུ་ཡོད་ནའང་དེང་སང་ང་ལ་རྨི་ལམ་ཚ་བོ་ཞིག་གི་བྱམས་བརྩེ་ཡོད།ངའི་རྨི་ལམ་འདི་མངོན་འགྱུར་ཡོང་བར་སྨོན་ལམ་རྒྱག་གིན་ཡོད།རེ་བ་བྱེད་ཀྱིན་ཡོད།
སྟོན་ཀའི་མེ་ཏོག་ཚོ་ག་ལེར་གཟིམ་རྗེས་གྲང་རླུང་གི་འུར་སྒྲའི་ང་རོ་འདོན།ཚ་ཚད་ཀླད་ཀོར་གྱི་འོག་ཏུ་སླེབས་པའི་དགུན་གཞུང་འདིར་བུ་མོ་ཚོའི་མཛེས་སྡུག་གི་ལང་ཚོ་དག་ཀྱང་པགས་རིགས་དང་།བྱ་སྤུ་ཅན་གྱི་གྱོན་པའི་གསེབ་ཏུ་ནུབ།གཞོན་ནུ་མ་ཚོ་འདི་ལྟར་བྱེད་པར་འདོད་མོས་མེད་ཀྱང་།དགུན་དུས་འདི་མི་སེམས་ལ་རྨ་ཁ་སྦྱིན་པའི་སྡིག་ཅན་ཞིག་ཡིན་པར་འདོད།
དེ་རིང་ཧ་ཅང་གི་བྲེལ་བ་ཆགས་སོང་།ཞོགས་པ་སྔ་པོར་མལ་ལས་ལངས་བ་ཡིན།ངའི་ཁང་པའི་མདུན་ངོས་ཀྱི་སྒེའུ་ཁུང་ལས་སྐད་ཤུགས་ཆེན་པོ་འདོན་བཞིན་འདུག་་སྟབས་མ་ལེགས་པར་རླངས་འཁོར་ཆུང་བ་གཉིས་ཀྱི་གདོང་ཐུག་བརྒྱབ་འདུག་་རྨི་ལམ་ལྟ་བུའི་ལྟད་མོ་འདིར་ཅེར་བཞིན་རང་ཉིད་ཀྱི་མིག་ལ་འཁྲུལ་སྣང་ཐེབས་པ་མིན་ནམ་སྙམ།གདོང་ཐུག་ཕོག་པའི་མི་ཚོའི་ཆེད་དུ་ཧ་ཅང་གི་སེམས་འཁུར་བྱུང་།ངས་ངོ་མ་ཁོ་ཚོར་རོགས་རམ་ཞིག་ཐུབ་ན་བསམ།ཡིན་ཡང་།ཉེན་རྟོག་པའི་རླངས་འཁོར་ཐོན་ཏེ་རྨས་མ་སྨན་ཁང་དུ་ཁྲིད་སོང་།
ང་ཚོའི་ལུང་པ་འདིའི་ནང་མི་དང་འགྲིམ་འགྲུལ་གྱི་བར་ཕན་ཚུན་ལ་བརྩི་འཇོག་མི་འདུག་་དེ་བཞིན་སྒྲིག་སྲོལ་གཏན་འབེབས་ལ་དོ་སྣང་མི་འདུག་་མི་མང་གི་རྒྱབ་ལོགས་སུ་རླངས་འཁོར་གྱི་འཁོར་ལོ་ཡ་གཅིག་གཡུག་འདུག་་རླངས་འཁོར་སྣ་ཚོགས་ཀྱིས་ལམ་ནང་འཚངས་ཁ་བྱེད་བཞིན་འདུག་པས་ང་རང་ས་འོག་མེ་འཁོར་བརྒྱུད་དེ་ལས་ཀར་ཕྱིན་པ་ཡིན།རང་ཉིད་རྗེས་ལུས་ཆགས་པའི་རྒྱུ་མཚན་ལས་ཁུངས་ཀྱི་འགོ་ཁྲིད་ལ་གསལ་བཤད་བྱས་པས་ཁོང་གིས་ཀྱང་ཤེས་རྟོགས་བྱུང་འདུག་་ངེད་ཀྱི་སེམས་པ་སྤྲོ་བས་བརྟས་ཤིང་།གོམས་གཤིས་རྒྱུན་སྤྱོད་ཅན་གྱི་ལས་ཀར་ཧུར་བརྩོན་གྱིས་ཞུགས་པ་ཡིན།
བརྩེ་བའི་ཡིག་འབྲེལ་བ་ལགས།དེ་རིང་ཡང་བསམ་གཞིགས་ཀྱི་ཕུང་པོའི་ཁྲོད་ནས་ཉིན་མོ་འདི་ཅི་འདྲའི་ཐུང་བའི་ཚོར་སྣང་བྱུང་།ངའི་བསམ་ཚུལ་དང་རེ་བ་མང་པོ་ཞིག་གིས་ཁྱེད་ཁོ་ནས་ཕྱིར་ཏུ་འཚངས་ཁ་རྒྱག་བཞིན་འདུག་་ཁྱེད་ལ་བརྩེ་འཕྲིན་མང་པོ་ཞིག་འབྲི་དགོས།ཁྱེད་ནི་ངའི་གྲོགས་པོ་བཟང་པོ་ཞིག་ཆགས་པ་མ་ཡིན་ནམ།
ལེ་ལོ་དང་སྒྱིད་ལུག་ལྟ་བུའི་རྣམ་གཡེང་ལ་སྔོན་འགོག་བྱས་ཏེ་ཁྱེད་ཁོ་ནས་ཕྱིར་ཏུ་ཡི་གེ་འབྲི།ང་ཡི་ཚོར་བ་ནི་ང་ཚོའི་འབྲེལ་མཐུད་ཀྱི་ཕོ་ཉ་ལྟ་བུ་ཡིན།ངའི་མི་ཚེ་ནང་ཡིག་བསྐུར་འབྲེལ་ལམ་གྱི་གྲོགས་པོ་ཁ་ཤས་བྱུང་མྱོང་ཡོད།ཡིན་ནའང་།ད་ལྟ་ཁྱོད་གཅིག་བུ་ནི་ངའི་སྤྲོ་སྣང་གི་ས་བོན་འདེབས་སའི་ཞིང་ཁམས་སུ་གྱུར་མོད།ང་ད་དུང་རབ་རིབ་ནས་མག་མོག་ཏུ་གྱུར་དགོས་དོན་ཅི།ཁྱོད་ཀྱག་ཀྱོག་ནས་རི་སུལ་ལྟ་བུར་སྦས་དགོས་དོན་ཅི།ངས་ཚོད་དཔག་ཅི་འདྲ་ཞིག་བྱེད་དགོས་སམ།
ཁྱེད་ཀྱི་བསམ་གཞིགས་ཀྱི་ལམ་ཁ་གང་དུ་ཡོད་དམ།ཁྱེད་ཀྱིས་ང་ལ་གྲོགས་པོའི་འདུ་ཤེས་ཅི་འདྲ་ཞིག་བཟུང་ཡོད་དམ།
སྐུ་མཁྱེན།ཁྱེད་ཀྱིས་ཤོད་དང་།མཛེས་མ་སུ་ཞིག་ཁྱེད་ཀྱི་སྐལ་བཟང་གི་ཉིན་མོ་ཡིན།མཛེས་མ་སུ་ཞིག་ཁྱེད་ཀྱི་དུང་སྣང་གི་མེ་ཏོག་ཡིན།ངས་དགའ་མོས་ཅན་གྱི་མི་ཁྱོད་ངེས་པར་ཤེས་ན་འདོད།
བརྩེ་བའི་ཡིག་འབྲེལ་བ་ལགས།ཁྱེད་ལ་ངའི་སྐོར་གྱི་གནས་སྟངས་ཐད་དྲི་བ་ག་རེ་ཡོད།ངས་ཁྱོད་ལ་ཕྱི་ནང་མེད་པའི་སེམས་པ་འདིའི་ཁ་དོག་བསྟན་ཆོག་་ངས་ཀྱང་ཁྱོད་ལ་མུ་མཐུད་དྲི་བ་འདྲི་རྒྱུ་ཡིན།གང་ཡིན་ཟེར་ན།ང་ནི་དྲང་བདེན་གྱི་རྨི་ལམ་ལ་སློང་མོ་བྱེད་མཁན་ཞིག་ཡིན།ང་ནི་སེམས་པའི་རྣམ་ཤེས་ལ་རེ་བ་བཅོལ་མཁན་ཞིག་ཡིན།ང་ནི་དཀོན་མཆོག་གི་གནང་སྦྱིན་ལ་ལག་པ་གཟེད་མཁན་ཞིག་ཡིན།
རེད་ཡ།ཁྱེད་ཀྱིས་བཤད་པ་འདིས་ང་ལ་སྤྲོ་སྣང་སྦྱིན་སོང་།སངས་རྒྱས་སྟོན་པ་དེ་སྙིང་རྗེ་དང་བྱམས་བརྩེ་རང་བཞིན་ཅན་གྱི་སྐྱེས་མཆོག་ཅིག་ཡིན་པར་བཤད་པ་མ་ཡིན་ནམ།ཁོང་གི་རྗེས་འཇུག་པ་ཚོ་ལས་དབང་དང་དཀོན་མཆོག་གི་རྗེས་འབྲངས་པ་ཡིན་པར་བཤད་པ་མ་ཡིན་ནམ།དེ་བདེན་དུ་ཆུག་ན།ཁྱེད་ཀྱིས་ཉམ་ཐག་དང་རེ་བ་ཅན་ཚོར་ལམ་སྟོན་ག་རེ་བྱེད་ཀྱིན་ཡོད་དམ།བདག་མེད་དང་སེམས་གཅོང་ཅན་ཚོར་སེམས་གསོ་ཅི་འདྲ་བྱེད་ཀྱིན་ཡིན།
མུ་མཐུད་ཁྱེད་ཀྱི་ཡིག་ལན་ལ་རེ་སྒུག་བྱེད་རྒྱུ་ཡིན།དེ་ནི་ཁྱེད་ཀྱིས་བདག་ལ་ལེགས་སྐྱེས་སུ་བྱིན་པའི་ནུས་ཤུགས་དང་དགའ་ཚོར་ཞིག་རེད།ད་དུང་།ཁྱེད་ཁོ་ནས་ཕྱིར་ཏུ་འོ་ཞིག་བསྐྱལ་རྒྱུ་ཡིན།
ཁྱེད་ཀྱི་གྲོགས་མོ་ཡག་ཤོས་ཏ་ཏའི་ཡ་ན་ནས།