–བུ་ཟུར་ཁ་ཅན། (རྨ་ཆུ།)
དོ་ནུབ་བོད་ཟླ་བཅུ་པའི་ཚེས་དགུ་རེད།
གནམ་ངོ་ཡང་ཧ་ཅང་དྭངས་ཀི
ཟླ་བ་དང་སྐར་མའི་ཚོགས་ཀྱང་ཁ་རོག་གེར།
ཁྱོད་ཀྱི་སྙིང་གི་འཕར་སྒྲ་དང་སྤོབས་པའི་མེ་ལྕེ་ལ།
གདུང་དབྱངས་ཀྱི་མཆོད་པ་བཤམས་ཤིང་།
མིག་ཆུ་དང་ཕངས་སེམས་ཀྱི་སྙན་ངག་བཞུར་དུ་བཅུག
དོན་ངོ་མ་ཁྱོད་སུ་ཚང་གི་ཡིན།
ཁྱོད་འགྲོ་ཁར། ང་ལ་དབང་མེད་ཀྱི་མིག་ཆུ་སློང་དོན་ཅི་ཡིན།
ཆུང་མ་དང་བུ་ཕྲུག་གཉེན་དགའ་མཛའ། སུ་ལ་ཡང་མ་ཆགས་པར།
དེ་འདྲའི་ངར་སྐད་དང་སེམས་ཤུགས་ཚ་བོས་བཞུད་དོན་ཅི་ཡིན།
ཁྱོད་དཔའ་ངར་གྱིས་ཡར་ཀླུང་ཁོག་ལ་མ་ཤོང་བའི།
ཁྱོད་དམག་ཤུགས་ཀྱིས་མདོ་ཁམས་སྨད་ལ་མ་ཆུད་པའི།
ཁྱོད་རིགས་ཞེན་གྱིས་ས་སྒང་ཧྲིལ་པོས་མ་ཐེག་པའི།
ཁྱོད་རྒྱ་ནག་རྒྱལ་པོ་ཁྲི་ལས་ཕབ་ནི་ཚང་གི་ཨེ་ཡིན།
ཁྱོད་རྒྱ་གར་རྒྱལ་པོར་དམག་གིས་འཇིགས་པ་སྟོན་ནི་ཚང་གི་ཨེ་ཡིན།
ཁྱོད་མཐའ་བཞི་དབང་དུ་བསྡུས་ནས་སྲིད་གསུམ་ཟིལ་གྱིས་གནོན་ནི་ཚང་གི་ཨེ་ཡིན།
ཁྱོད་དོན་ངོ་མ་སུ་ཚང་གི་ཡིན། ཅིའི་ཕྱིར་་་ ཅིའི་ཕྱིར་་་་
འབྲོག་རྩག་གྱོན་ཞིང་ཡིག་ངོ་མི་ཆོད་པའི་གསར་བུ་ཞིག
ཁྱིམ་གཞིས་འཛོམས་ཤིང་གཟའ་ཟླ་མཆིལ་མའི་ཐལ་བ་བཞིན་དོར་བའི་མི་སྐྱ་ཞིག
ཚེ་སྲོག་མེ་རུ་འབར་ཞིང་།
ཁྲག་གིས་ཡི་གེ་བྲིས།
དཔའ་ངར་དང་སྙིང་རུས་ཀྱིས་ས་ཆེན་པོར་འདར་ཤ་བསླངས།
རིགས་ཞེན་དང་བློ་ཁོག་གིས་གནམ་སྔོན་པོར་སྤར་འབྲད་བྱས།
ཁྱོད་ཀྱིས་རུས་པ་སར་བཙུགས་ནས་ཤ་ཁྲག་གི་འབུད་ཤིང་བྱས།
ཁྱོད་ཀྱིས་ཡན་ལག་དཔང་པོར་བཞག་ནས་དོན་ལྔ་སྣོད་དྲུག་གིས་བདེན་པ་བསྟན།
ཁྱོད་སྣོད་བཅུད་གཉིས་ཀྱི་ལོངས་སྤྱོད་གང་ལ་ཡང་མ་ཐོགས་པར།
འདི་ལྟར་གཟི་བརྗིད་དང་ཚུགས་ཐུབ་ཀྱིས་བཞུད་པ་དེས།
ང་ལ་རྒྱ་འགྱུར་ཤེས་ཡོན་པ་ཁྲི་ཕྲག་ལས།
ཁྱོད་ལྟ་བུ་གཅིག་གིས་མཁོ་བའི་སྐུལ་མ་ཐེབས།
ད་འདི་ནས་ཕར་སོང་ན།
ཁྱོད་ལྟ་བུ་ཕ་ཡུལ་ལ་སྐྱེ་རྒྱུ་མེད་འགྲོ་ན་ཐང་།
ངས་ངོ་མ་བཤད་ནི་་་
རྨ་ཆུ་ནས་༢༠༡༦/༡༢/༨ གྱི་མཚན་མོ་འབྲི་འགོ་བརྩམས་ཤིང་། ༢༠༡༦/༡༢/༩ མཚན་མོ་མཇུག་བསྐྱངས།
མི་ངན་འདི་ཚོས་སོ་སོས་ཅི་ཡང་བྱེད་མི་ཐུབ་པའི་ཁར་རང་སྲེག་བྱེད་མཁན་ཚོར་བསྟོད་པ་གནམ་ས་མི་ཤོང་བ་རེ་བྱས་པ་ངོ་རེ་ཚ། རང་བསྲེགས་བྱས་པ་ལས་འཚོ་ན་དགའ། རང་བསྲེགས་བཏང་བ་དེ་དོན་མེད་རེད། དེ་འདྲའི་རིགས་གཏན་ནས་བྱ་མི་རུང་། རང་དབང་ནི་སྐྱིད་པོ་ཞིག་འཚོ་བའི་ཆེད་དུ་ཡིན། རང་བསྲེག་བཏང་ནས་ཤི་སོང་ན་རང་དབང་གིས་ཅི་ཞིག་བྱ། མི་རིགས་ཀྱི་འཐབ་རྩོད་ཆེད་དུ་རང་ཉིད་ངེས་པར་དུ་འཚོ་དགོས་པ་རེད། །
རང་དབང་གི་དོན་དུ་བློས་གཏོང་བྱེད་མཁན་གྱི་མི་སྣ་དག་ལ་གུས་བཀུར་དང་ཡི་རངས་བྱེད་པ་ནི་མིའི་རིགས་ཐུན་མོང་གི་བཟང་སྤྱོད་ཅིག་ཏུ་ཀུན་གྱིས་ངོས་འཛིན་བྱེད་ཀྱི་ཡོད། དེ་ལ་བསྟོད་པ་ཙམ་བྱས་པའང་ནག་ཉེས་སུ་བགྲངས་པ་ནི་ཐལ་ཆེ་བ་ཞིག་ཏུ་བདག་གིས་འདོད། གནའ་ནས་ད་བར་དུ་ཆེ་བ་མིའི་རིགས་ནས་རྒྱལ་ཁབ་དང་མི་རིགས། ཐ་ན་སྐྱེས་བུ་སྒེར་གྱི་རང་དབང་གི་ཕྱིར་དུ་རང་སྲོག་བློས་གཏོང་བྱས་པའི་མི་སྣ་དག་ལ་བསྟོད་ཚིག་གི་མེ་ཏོག་གཏོར་བ་དང་། ཁོ་ཚོའི་མཛད་རྗེས་ལ་རྗེས་དྲན་གྱི་རྡོེ་རིང་བཞེངས་ཏེ་ཁོ་བ་ཚོའི་བདེན་པ་བསུ་བའི་རླབས་ཆེན་གྱི་མཛད་པ་དག་ཇི་སྲིད་དུ་མིའི་རིགས་ཀྱི་དྲན་ངོགས་སུ་བཞག་དང་འཇོག་གིན་ཡོད་པ་མིན་ནམ། དེ་ན་ང་ཚོས་ཀྱང་འུ་ཅག་ཐུན་མོང་གི་ཆེད་དུ་བཞུད་ཟིན་པ་དག་ལ་བསྟོད་པ་ཙམ་ཡང་བྱས་མ་ཆོག་པ་རེད་པས། ངས་ནི་སྐད་ཆ་འདི་རྒྱ་གཞུང་གི་དབང་འཛིན་པ་དག་ཁོ་ནས་ཤོད་ཀྱིན་པའི་སྐད་ཆ་ཞིག་ཡིན་པར་ཡིད་ཆེས་བྱེད་ཀྱིན་ཡོད་མོད། ད་ནི་རང་མིའི་ཁྲོད་དུའང་འདི་ལ་བསྟོད་པ་བྱས་མི་ཆོག་ལབ་ན་འདི་ཡ་མཚར།
མེར་སྲེག་མཁན་ཚོའི་ཁྲག་ཐིགས་པ་གཅིག་ཀྱང་འཕྲོ་བརླག་ལ་འགྲོ་གི་མ་རེད་ཟེར་མཁན་དང་འདི་རིགས་ཀྱིས་བོད་མི་རིགས་བསམ་བཞིན་དུ་མེ་ནང་ལ་འདེད་ཀི་ཡོད་པའི་སྣང་བ་འཆར་གི ང་ནོར་ཡོད་ཀྱང་སྲིད།
མེར་སྲེག་མཁན་ཚོའི་ཁྲག་ཐིགས་པ་གཅིག་ཀྱང་འཕྲོ་བརླག་ལ་འགྲོ་བགྱི་མ་རེད་གསུངས་པ་འདི་སྔར་བྱུང་ཟིནད་པ་གོ་བ་ལས། ད་དུང་ཁྲག་གཏོང་ཤོག་ཟེར་བ་ལ་མི་གོ་སྟེ། གོ་ན་འཚེ་མེད་ཞི་བའི་ཐབས་ལམ་ཉམས་ཟིན་པའི་ཕྱིར་རོ།།
རང་སྲེག་བྱེད་བཅུག་མཁན་དེ་བོད་ནང་གི་བོད་མི་ཚོ་ཡི་ནང་ལ་ཡོད་ན་མ་གཏོགས། བྱེས་ཀྱི་བོད་མི་་སུས་ཀྱང་་སྐུལ་དེད་བྱས་ཡོད་མ་རེད། དེས་ན་རང་སྲེག་གི་འགན་ལེན་རྒྱ་གཞུང་ངམ་དབང་བསྒྱུར་པ་ཚོ་ལ་ཡོད་པ་ལས། ཚད་མེད་ཞི་བའི་ལས་འགུལ་པ་ཚོར་མེད། ཀླུ་སྨྱོན་སྙན་དངགས་སྤེལ་ན་འོས་པ་ལས། ཆབ་སྲིད་བཤད་ན་རང་ཁུངས་ནང་དུ་ཁ་ཕོག་སྣ་ཕོག་འགྲོ་བཞིན་པ་དེ་ཡང་ཤེས་དགོས།