བསེ་རུ།
མི་འཇོན་འཇོན་མདོག་སྟོན་མཁས་ང་།།
མ་ཤེས་ཤེས་མདོག་སྟོན་མཁས་ང་།།
མི་རིག་དགུ་རིག་རིག་མཁས་ང་།།
མ་མཐོང་དགུ་མཐོང་མཐོང་མཁས་ང་།།
འཇོན་པའི་འཇོན་ཐང་ངོམས་མཁས་ཁྱེད།།
ཤེས་པའི་ཤེས་ཚད་སྟོན་མཁས་ཁྱེད།།
རིག་པའི་རིག་ངོ་སྤྲོད་མཁས་ཁྱེད།།
མཐོང་བའི་མཐོང་ལམ་མཐོང་མཁས་ཁྱེད།།
བྱས་པའི་བྱས་ཡུས་ཤོད་མཁན་ཁོ།།
བཏང་བཏང་བྱུགས་བྱུགས་ངོམས་མཁན་ཁོ།།
རི་རབ་རྒྱབ་ཏུ་འཁུར་མཁན་ཁོ།།
རྒྱ་མཚོ་ཧུབ་ཀྱིས་འཐུང་མཁན་ཁོ།།
ཤེས་རིག་རྒྱ་མཚོའི་དེད་དཔོན་ཁོང་།།
ཞ་བོའི་ལམ་འདྲེན་མཆོག་གྱུར་ཁོང་།།
ལོང་བའི་དམིགས་བུ་གཅིག་པུ་ཁོང་།།
རིག་པའི་རྐང་མིག་སྩོལ་མཛད་ཁོང་།།
ང་དང་ཁྱེད་དང་ཁོ་དང་ཁོང་།།
དབང་པོ་སྒོ་ལྔ་ཁག་ཁག་རེད།།
རྣམ་ཤེས་ཚོགས་དྲུག་སོ་སོ་རེད།།
ཡུལ་དང་ཡུལ་ཅན་ཐ་དད་རེད།།
ང་ནི་དབང་ལྔའི་རྗེས་སུ་འགྲོ།།
དབང་ལྔ་ཡུལ་གྱི་གཡོག་པོ་ཡིན།།
བྱ་བྱེད་འདུ་འཕྲོ་རྒོད་དྲགས་ཀྱང་།།
འདི་ཕྱིའི་ལམ་རྒྱགས་གཏད་སོ་བྲལ།།
ཁྱེད་ནི་རིག་པའི་དཔའ་བོ་ཡིན།།
ཐོས་བསམ་སྒོམ་པའི་ལམ་སྣ་ཟིན།།
འཆད་རྩོད་རྩོམ་པའི་གྲྭར་ཞུགས་ཏེ།།
མཁས་བཙུན་བཟང་བའི་སྙན་པ་འབར།།
ཁོ་ནི་བྱུར་གྱི་སྣ་འདྲེན་ཡིན།།
ཁ་ཆག་སྣ་རལ་སྒོ་མོ་ཕྱེ།།
ཐི་གུ་སྣེ་ཤོར་ལས་ལ་འབད།།
དགུ་གླུད་གྲོགས་སུ་བསྟེན་ཞེས་གྲགས།།
ཁོང་ནི་འཇིག་རྟེན་ཀ་བ་ཡིན།།
གནམ་སའི་བར་གྱི་སེམས་རྟེན་ཡིན།།
སྣོད་བཅུད་གཉིས་ཀའི་དབང་སྒྱུར་ཡིན།།
བསྐལ་པ་རྒྱ་མཚོར་བཞུགས་སོ་གསོལ།།