“““`འོ་མ།
ཕ་རྒན་ལགས། འོད་སྣང་གིས་གྲུབ་པའི་འཇིག་རྟེན་ཐོག ཁྱོད་ཀྱི་རུས་རྐང་གིས། ང་ལ་ངའི་གཟུགས་ཤིག་བྲིས་ཡོད། འོན་ཀྱང་། ངས་དེ་རིང་ཁྱོད་ཀྱི་བྱད་གཟུགས་མིག་ཆུས་འབྲི་བ་ལས། ང་ལ་ཅི་ཡང་མེད། ངའི་མི་ཚེའི་ཐོག་མ་དེ་ནས། འཛུམ་མདངས་མེད་པའི་ཁྱོད་ཀྱི་ངོ་གདོང་ལ་བྲོས་སོང་བའི་ཉི་མ། དེ་རིང་འུ་གཉིས་ཀྱི་མགོ་ཐོག་ན་ཡང་བསྐྱར་དམར་ཀོ་རེ་ཤར་ཡོད། འདི་ནི་ཞེན་ཆགས་ཤིག་གིས་ཡིན་ནམ། ལས་དབང་ཞིག་གིས་ཡིན། ཕ་རྒན་ལགས། ཁྱོད་ཀྱིས་ང་ལ་གཟིགས་ནས་ཤུམ་ན། ངས་ཁྱོད་ལ་བལྟས་ནས་ངུ་།
ཡོད་ཚད་བྱེ་རྡུལ་གྱིས་ཟོས་སོང་བའི་སྐྱ་ཐང་ཐང་གི་ཁོར་ཡུག་འདི་ནས། “རང་སེམས་ཁྱོད་ལ་མཁྲེང་ཞིང་།། ཁྱོད་སེམས་ང་ལ་ཆགས།།’’ཚོར་སེམས་ཀྱི་སྡོང་བོས་འདི་ལྟར་ཡལ་ག་གནམ་ལ་གཟེངས་ནས། མི་རབས་གཉིས་ཀྱི་ན་ཟུག་ང་དང་ཁྱོད་ཀྱི་བར་ཐག་ནས་བཤད་ཀིན་ཡོད།
ཕ་རྒན་ལགས། ངའི་ཕྱི་འདང་གི་ལྟེབ་གཉེར་རེ་རེའི་ཁྲོད་ནས། ལྡོག་ཏུ་མེད་པའི་ལས་དབང་བཙན་པོ་ཞིག་གི་མནར་གཅོད་མཐོང་སོང་། ངའི་མདུན་བསྐྱོད་ཀྱི་གོམ་སྒྲ་རེ་རེའི་གསེང་ནས། དྲང་བདེན་མ་ཡིན་པའི་མི་ཚེའི་ངུ་སྐད་རེ་རེ་གོ་ཀི། ཕ་རྒན་ལགས། ཚོར་བ་ཡོད་ཀྱང་ཤེས་པ་མེད་པའི་སེམས་ཤ་འདི་ན་ཟུག་གིས་སྦྲིད་ཀྱང་། ངས་ཁྱོད་ལ་དགོངས་དག་མི་ཞུ་ལ། ཁྱོད་ཀྱིས་ཀྱང་ང་ལ་དགོངས་དག་ག་ལ་ཞུ།
ཕྱི་ལོ་༢༠༡༤།༣།༢༨། ཉིན་བྲིས།