བློ་བཟང་།
ཉིན་ཞིག་སློབ་གྲྭའི་སློབ་གཙོ་མཆོག་གིས་རྣམ་བཅུ་དབང་ལྡན་གྱི་ཚོན་ལྡན་རི་མོ་ཞིག་སློབ་གྲྭའི་སྒོ་བྱང་དུ་འབྲི་དགོས་པའི་བརྡ་ཞིག་འབྱོར། ངས་མ་དཔེ་ཐབས་ཤེས་བྱེད་པར་དྷ་སར་བསྐྱོད། དྷ་རམ་ས་ལའི་རྣམ་རྒྱལ་གྲྭ་ཚང་གི་ཡིག་ཚང་སྒོ་བརྒྱབ་པ་དང་འཁེལ་ཏེ་ཡིག་ཚང་སྒོ་བྱང་དུ་བཀལ་བའི་རྣམ་བཅུ་དབང་ལྡན་དེ་པར་ཞིག་བརྒྱབས་ནས་རང་ཁྱིམ་དུ་ལོག དེ་སྔོན་པར་བརྒྱབ་པའི་རྣམ་བཅུ་དབང་ལྡན་དེ་དང་། དེ་རིང་རྣམ་རྒྱལ་གྲྭ་ཚང་གི་སློབ་གཉེར་ཁང་ཞེས་པའི་སློབ་དེབ་ཕྱི་ཤོག་སྟེང་བཀོད་པའི་རྣམ་བཅུ་དབང་ལྡན་དེ་གཉིས་མི་འདྲ་བ་ཞིག་འདུག་པས། ཡང་སྙིང་ཁོ་ཚང་གིས་ང་དཀའ་རུ་འཇུག་འདོད་ནི་མིན་ནམ།
ངས་དེ་གཉིས་ལས་གང་ཞིག་དཔེར་བྱ་དགོས་མིན་མི་ཤེས། དེ་གཉིས་ལས་གང་ཞིག་ཁོ་ཚང་གི་རང་ལུགས་ཡིན་ནམ། གཉིས་ཀ་རང་ལུགས་ཡིན་ཟེར་ནི་མིན་ནམ། ཡང་ན་རང་ལུགས་ཤིག་གཏན་ནས་མེད་ནི་རེད། ཁོང་ཚང་འདི་བ་་་་་་་་་
རྡོག་རྡོག་དེ་ཉི་ཟླའི་མདོག་དང་ན་དཱ་འཇོག་སྟངས་མ་འདྲ་བ་དེ་རེད་དམ། དེ་མ་གཏོགས་རང་ལུགས་དང་གཞན་ལུགས། ཡང་ན་རང་ལུགས་མེད་པ་སོགས་བརྗོད་ས་ཞིག་རྙེད་ཀྱི་མི་འདུག ཉི་ཟླའི་མདོག་ལ་ཁྱད་པར་ཡོད་རྒྱུ་ཉག་གཅིག་རེད། ཉི་མ་དཀར་པོ་དང་ཟླ་བ་དམར་པོ་ཡིན་པ་དེ་ལ་དོགས་པ་ཡོད་ས་ཞིག་རེད། དེ་མ་གཏོགས་གཞན་དེ་འདྲའི་ཛ་དྲག་འདྲ་ཨེ་ཡོད་ན།
ནཱ་ད་ཞེས་བཅོས་དགོས།
རྣམ་བཅུ་དབང་ལྡན་།
ཝ་ལ་རི་རབ་གཞལ་ཡས་ཁང་བཅས་པ་མ་བརྟེན་པ་སྐུ་གསུང་ཐུགས་ཀྱི་ལྷ་ཀྵ་།
ཐུགས་དཀྱིལ་གྱི་ལྷ་རྣམས་ཧ་།
བདེ་ཆེན་འཁོར་ལོའི་ལྷའི་སྐུ་གསུང་ཐུགས་ཟླ་ཚེས་ཐིག་ལེ་ནཱ་ད་
སྟེ་རྟེན་བརྟེན་པའི་ལྷ་རྣམས་མཚོན་པར་བྱེད་པའོ་།
སྨོན་ལམ་ཚིག་མཛོད་ལས་བཏུས་།
རྣམ་བཅུ་དབང་ལྡན་བོད་ཡིག་ཏུ་བརྩེགས་ནས་འབྲི་ན། ཧྐྑྨླྭྲྭྭྲྲྱྱྱྨ ཡི་གེ་དག་ལེགས་པར་བརྩེགས་པར་ཡིད་བརྟན། དོནདུ། ཧཀཀྑམལཝརཡམ། ཞེས་སོ།
གོང་གསལ་རྣམ་བཅུ་དབང་ལྡན་གྱི་ཡི་གེ་དག་སྲོག་མེད་ཡིན། མཐའ་ན། དབྱངས་ཡིག་གཅིག་པུ་ནི། དབྱངས་ཡིག་བཅོ་ལྔ་པ། ཨང་། ཞེས་པ་ཡིན། དབྱངས་ཡིག་གིས་དབེན་པའི་གསལ་བྱེད་དག་ཕ་རོལ་གྱི་གསལ་བྱེད་སྦྱར་དགོས་ཏེ། སྒྲའི་གཞུང་ལས། དབྱངས་ཀྱིས་དབེན་པ་དག་ཕ་རོལ་དང་སྦྱར་བར་བྱའོ། ཞེས་སོ།
རྣམ་བཅུ་དབང་ལྡན་གྱིས་ཕན་ཡོན་སྐོར་ལ་འབྲེལ་བཤད་གནང་མཁན་ཡོད་ན་དགའ་བསུ་ཡོད་ཐུགས་རྗེ་ཆེ་བཀྲིན་ཆེ་།
དཔལ་དུས་ཀྱི་འཁོར་ལོའི་ལྷ་ཚོགས་ཐམས་ཅད་དེར་འདུས་ཡོད་པའི་དག་སྣང་དགོས། དེ་ཡང་དད་པ་ལ་རག་ལས་པ་ཡིན། ཁོ་བོ་ལྟ་བུ་དད་པས་དབེན་པ་ཞིག་ལ་དེ་ཙམ་གྱི་ཕན་ཡོན་མེད་ཀྱང་། ཆུང་དུས་ནས་བག་ཆགས་བསགས་པས་རྣམ་བཅུ་དབང་ལྡན་མཇལ་བ་ཙམ་གྱིས་སེམས་དགའ་ན། དཔལ་དུས་འཁོར་ལྷ་ཚོགས་ཀྱི་བྱིན་རླབས་འཇུག་པར་ངེས་སོ།
ཐུགས་རྗེ་ཆེ་བཀྲིན་ཆེ་།
ད་དུང་རྣམ་བཅུའི་རྒྱས་འབྲེལ་དང་དབང་ལྡན་གྱི་རྒྱས་འབྲེལ་ཕན་ཡོན་འདི་དང་འདི་རེད་ཅེས་ཁ་གསལ་གོ་བདེ་ཞིག་གསུང་ཐུབ་ན་ང་དང་ང་འདྲ་བའི་ས་ཁུག་ལུང་ཁུག་དུ་སྡོད་མཁན་ཚོར་ཕན་ཐོག་ཆེན་པོ་ཡོང་བ་འདུག་
ཐུགས་རྗེ་ཆེ་བཀྲིན་ཆེ་།
གོང་གི་རྣམ་བཅུ་དབང་ལྡན་གཉིས་ལ་ཁྱད་བཞི་ལྔ་ཙམ་འདུག ༡༽ཉི་ཟླའི་ཁ་མདོག་ཁྱད་པར་འདུག ༢༽ཡི་གེ་སྔོན་པོ་དང་ལྗང་ཁུ་གཉིས་ཀྱི་འོག་མ་ཡི་གེ་དམར་པོ་གསེར་པོ། དཀར་པོ་ནག་པོ་བཞི་ཚང་བའི་ནག་པོ་དེ་ཡར་ལྗོང་ཁུ་དེ་ལ་ཐུག་ཡོད་མེད་ཀྱི་ཁྱད་པར་ཞིག་འདུག ༣༽ དེའི་འོག་གི་ཡི་གེ་དཀར་པོ་དེ་ཁ་ཡར་ལྟས་མར་ལྟས་ཀྱི་ཁྱད་པར་འདུག ༤༽གཡས་གཡོན་གྱི་ཡི་གེ་གཉིས་གཅིག་ལ་གཉིས་ཆ་གསེར་པོ་རེད་འདུག གཞན་པ་དེ་ལ་གཅིག་སྔོན་པོ་དང་གཅིག་ལྗང་ཁུ་རེད་འདུག མདོར་ན་ཡི་གེ་འབྲི་སྟང་ཆ་ནས་ཁྱད་པར་གཉིས་འདུག མཚོན་མདོག་གི་ཆ་ནས་ཁྱད་པར་གཉིས་དུ། ད་ལྟ་ང་དྲན་གྱི་མི་འདུག་ ཡིག་རེའི་མཚོན་མི་འདྲ་བ་ཡོད་པ་རྣམས་ལ་མཚོན་མདོག་དང་ཡི་གེ་སྟེང་ནས་འགྲེལ་བཤད་སོ་སོ་ཡོད་པས་རྣམ་བཅུ་དབང་ལྡན་གཅིག་མཚུངས་དགོས་པ་གལ་ཆེན་པོ་རེད་བསམ་གྱི་ཡོད།
#3 ལ་དྭགས་བློ་བཟང་འཇམ་དཔལ་ ་ལགས་ཀྱིས་སྤེལ་དོན།:
August 17th, 2014 at 10:14 am
དེ་ཡང་སྤྱིར་རྣམ་བཅུ་དབང་ལྡན་ཞེས་པ་ནི་དཔལ་དུས་ཀྱི་འཁོར་ལོའི་སྣོད་བཅུད་ཕྱི་ནང་གཞན་གསུམ་གྱི་སྙིང་པོ་གཅིག་ཏུ་བསྡུས་པའི་ལཉྫའི་སྔགས་ཡིག་ཧཀྵ་མ་ལ་ཝ་ར་ཡ་བཅས་ཡི་གེ་བདུན་དང་། ཡིག་གཟུགས་འགྱུར་བ་ལས་སྣ་ལྡན་ནམ་ཟླ་ཚེས། ཐིག་ལེ། སྲོག་ཡིག་ཨ་མཚོན་པའི་ཎཱ་ད་དང་བཅས་པའི་ཡི་གེ་བརྩེགས་མའི་ཡིག་སྲོལ་ཐུན་མོང་མ་ཡིན་པའི་འབྲི་སྟངས་ཤིག་ཡིན།
འདི་ལ་ལེགས་སྦྱར་དག་པར་བཀླག་ན། ཧ་ཡིག་ནས་ཡ་ཡིག་བར་ཡི་གེ་བརྒྱད་དང་། འོག་ཤོས་ཡ་ཡིག་ལ་སྣ་ལྡན་ཐོབ། ཡ་ཡིག་གི་སྣ་ལྡན་དེ་ཉིད་རྒྱས་པར་བྱས་ཏེ། དེ་དག་གི་སྟེང་ཟླ་ཚེས་དང་། ཐིག་ལེ་གཉིས་བསྣན་པས་རྣམ་བཅུ་དབང་ལྡན་ཆགས། སྣ་ལྡན་ཉིད་རྫོགས་པར་འབོད་པ་ན། ན་ད། སྟེ་སྒྲ་མི་ཐོས་པའི་ཚུལ་དུ་ཡོད་པ་དང་། ཧ་ནས་ར་བར་དུ་ཡི་གེ་སྲོག་མེད་ཡིན་པས། རྗེས་ཀྱི་ཡི་གེ་དག་དང་སྦྱར་ཐུབ། དེ་ཡང་སྒྲའི་བསྟན་བཅོས་ལས། དབྱངས་ཀྱིས་དབེན་པ་ཕ་རོལ་དང་སྦྱར་བར་བྱ། ཞེས་དང་། ཡ་ཡིག་ལ་སྣ་ལྡན་ཏེ། ཨཾ་སྲོག་ཏུ་ཡོད་པས། སྲོག་མེད་ཀྱི་ཡི་གེ་མ་ཡིན་པར་འདོད་དགོས་སོ། དེ་ཡང་བརྩེགས་མེད་པར་འབྲི་ན། ཡི་གེ་དེ་དག་ལ་སྲོག་མེད་ཀྱི་རྟགས་འཐེན་དགོས།
དེ་ཡང་བདུན་ཞེས་པ་ནི། ཀྵ་ལ་ཡི་གེ་གཉིས་ཡོད་པ་དེ་གཅིག་ཏུ་བརྩིས་པ་ལ་དེ་ལྟར་ནོར་འཁྲུལ་བྱུང་བར་སེམས་སོ།
དེ་སྔ་ཕྱི་ལོ་ ༢༠༡༤ ལོར་སྐྱིད་བྱམས་བསྟན་འཛིན་དགའ་ཞེས་པ་ཞིག་གིས་འདི་ལྟར་འབྲིས་འདུག
དེ་ཡང་སྤྱིར་རྣམ་བཅུ་དབང་ལྡན་ཞེས་པ་ནི་དཔལ་དུས་ཀྱི་འཁོར་ལོའི་སྣོད་བཅུད་ཕྱི་ནང་གཞན་གསུམ་གྱི་སྙིང་པོ་གཅིག་ཏུ་བསྡུས་པའི་ལཉྫའི་སྔགས་ཡིག་ཧཀྵ་མ་ལ་ཝ་ར་ཡ་བཅས་ཡི་གེ་བདུན་དང་། ཡིག་གཟུགས་འགྱུར་བ་ལས་སྣ་ལྡན་ནམ་ཟླ་ཚེས། ཐིག་ལེ། སྲོག་ཡིག་ཨ་མཚོན་པའི་ཎཱ་ད་དང་བཅས་པའི་ཡི་གེ་བརྩེགས་མའི་ཡིག་སྲོལ་ཐུན་མོང་མ་ཡིན་པའི་འབྲི་སྟངས་ཤིག་ཡིན། དེ་དག་གི་མཚོན་དོན་སོགས་ནི་ཁོ་བོས་གཞན་དུ་ཞིབ་པར་བཤད་ཟིན་ན་འདིར་ཡིག་ཚོགས་ལ་འཇིགས་ནས་མ་བྲིས་ཤིང་། ཡི་གེ་དེ་དག་ལས་སྔ་མ་རྣམས་ཀྱི་ཁ་དོག་དང་མཚོན་དོན་སོགས་ལ་མི་འདྲ་བའི་ཁྱད་པར་དེ་ཙམ་མ་མཆིས་རུང་། ཡི་གེ་ཕྱི་མ་རྣམ་བཅད་དང་ཐིག་ལེ་གཉིས་ཀྱི་ཁ་དོག་ཐད་འབྲི་སྲོལ་མི་མཐུན་པ་ཆེན་པོ་ཡོད།
ཡི་གེ་དེ་གཉིས་ཀྱི་ཁ་དོག་ཐད་སྔོན་གྱི་འབྲི་སྲོལ་འགའ་ཞིག་ཏུ་རྣམ་བཅད་དཀར་པོ་དང་། ཐིག་ལེ་དམར་པོར་བྲིས་ཡོད་ལ་དེར་འགྲེལ་བཤད་རྒྱག་སྟངས་ཀྱང་མི་འདྲ་བ་ཡོད། དེ་ལྟ་བུའི་འབྲི་སྲོལ་དེ་འགྲིག་མིན་ཇི་ལྟར་ཡང་། འགྲེལ་ཆེན་དྲི་མེད་འོད་སོགས་ཀྱི་དགོངས་པ་མིན་ཞེས་ཁོ་བོས་སྨྲ་བར་འདོད་དེ། བསྟན་འགྱུར་རྒྱུད་ཐ་པའི་འགྲེལ་ཆེན་དྲི་མེད་འོད་ཀྱི་ཁམས་ཀྱི་ལེའུའི་ནང་།[1] ཧ་ཡིག་ལས་རྣམ་པར་བཅད་པ་ཉི་མ་དང། ཐིག་ལེ་ཟླ་བ་ཞེས་གསལ་བ་མ་ཟད། སྐྱེ་གནས་བཤད་པའི་སྐབས་སུ་ཡང་ཟླ་བ་ལས་ཐིག་ལེ། ཉི་མ་ལས་རྣམ་པར་བཅད་པའོ་ཞེས་གསུངས་ཡོད།
དེ་ཙམ་དུ་མ་ཟད་ཡི་གེ་དེ་གཉིས་ཀྱི་གཟུགས་དབྱིབས་ཀྱི་རྣམ་པ་ཇི་ལྟར་ཡོད་མེད་ཀྱི་སྐོར་ལ་ཡང་འདི་ལྟར་གསུངས་ཏེ། རྣམ་པར་བཅད་པ་ཟླ་བ་ཕྱེད་པའི་རྣམ་པའོ། །ཐིག་ལེ་ཟླུམ་པོའོ། །ཡེ་ཤེས་རྩེ་མོའི་རྣམ་པའོ་ཞེས་ཡི་གེ་དེ་དག་གི་གཟུགས་དབྱིབས་ཇི་ལྟར་ཡིན་མིན་ཡང་གསུངས་ཡོད། གནད་དོན་འདིའི་ཐོག་ནས་གསལ་བཤད་གང་བྱས་ཡོད་དམ་ཞེ་ན། འགྲེལ་ཆེན་དྲི་མེད་འོད་ཀྱི་དགོངས་པ་དེ་རྣམ་བཅད་ཀྱི་ཁ་དོག་དམར་པོ་དང་། ཐིག་ལེའི་ཁ་དོག་དཀར་པོ་ཡིན་པ་མ་ཟད། དེ་དག་གི་གཟུགས་དབྱིབས་ཀྱང་རྣམ་བཅད་ཟླ་བ་ཕྱེད་པའི་རྣམ་པ་དང་། ཐིག་ལེའི་གཟུགས་དབྱིབས་དེ་ཟླུམ་པོ་ཡིན་པ་དེ་རེད། དེ་བས་ན་གོང་གི་འབྲི་སྲོལ་དེ་འགྲེལ་ཆེན་དྲི་མེད་འོད་ཀྱི་དགོངས་པ་མིན་པ་དེ་མདང་སྐྱེས་བྱིས་པས་ཀྱང་རྟོགས་སླ་པ་ཞིག་རེད།
འགྲེལ་ཆེན་དྲི་མེད་འོད་དང་བསྡུས་རྒྱུད། རྩ་རྒྱུད་དང་བཅས་པ་ནི་༸སྟོན་པའི་གསུང་ཉིད་དུ་འདོད་ལ། ཕྱིས་སུ་དུས་འཁོར་ལ་མཁས་པའི་རྒྱ་བོད་ཀྱི་མཁས་པ་དུ་མ་ཞིག་བྱོན་ཡོད་པ་དེ་དག་ཐམས་ཅད་ཀྱིས་ཀྱང་དུས་འཁོར་གྱི་རྩ་བའི་ཁུངས་གཏུགས་ས་དེ་གོང་ཞུས་ཀྱི་གཞུང་དེ་དག་ལས་གཞན་དུ་མེད་ཅིང་། གཞུང་དེ་དག་གི་ནང་དངོས་སུ་ཚིག་ཟིན་ལ་གསལ་ཡོད་ན་དེ་ལྟར་དང་མ་གསལ་ཡང་དོན་གྱི་དགོངས་པ་ཇི་ཡིན་ནི་ཕྱིས་བྱུང་གི་ཚད་མའི་སྐྱེས་བུ་གཞན་གྱིས་བཀྲལ་བ་ལ་བརྟེན་དགོས་ཤིང་། དེ་ནི་རྒྱུ་ཕ་རོལ་དུ་ཕྱིན་པའི་ཐེག་པའི་སྐབས་མདོ་སྡེའི་དགོངས་པ་ཀླུ་སྒྲུབ་ཡབ་སྲས་ཀྱི་བཀྲལ་བའི་གཞུང་ལུགས་ལ་བརྟེན་ནས་མདོ་དེ་དང་དེའི་དགོངས་པ་རྟོགས་པར་བྱེད་དགོས་པ་དང་སྒོ་ཀུན་ནས་མཚུངས་པ་ཞིག་ཡིན།
དེས་ན་འདིར་དཔྱད་པ་བྱ་བ་དེ་དག་ནི་འགྲེལ་ཆེན་དྲི་མེད་འོད་ཀྱི་ནང་དངོས་སུ་ཚིག་ཟིན་ལ་གསལ་བའི་ཕྱིར་ན་ཕྱིས་བྱུང་གི་བསྟན་བཅོས་གཞན་ནང་ཇི་ལྟར་གསལ་མིན་ལ་གཙོ་བོར་ལྟོས་མི་དགོས་རུང་། ཚིག་ཟིན་ལ་གསལ་བ་ལྟར་དོན་གྱི་དགོངས་པ་ཡང་དེ་ལྟར་དུ་གནས་ཡོད་པ་ཤེས་ཕྱིར་ཕྱིས་བྱུང་གི་ཚད་མའི་སྐྱེས་བུ་གཞན་གྱི་གསུང་ལ་ཡང་ལྟ་དགོས་པ་གལ་ཆེར་མཐོང་བས། གཤམ་དུ་ང་ཚོས་ཚིག་ཟིན་ལ་དེ་ལྟར་བསྟན་ཡོད་པ་ལྟར་དོན་གྱི་དགོངས་པ་ཡང་དེ་ལྟར་དུ་གནས་མིན་ཕྱིས་བྱུང་གི་ཚད་མའི་བསྟན་བཅོས་གཞན་ལ་ལྟ་བར་བྱ་སྟེ། དེ་ཡང་བུ་སྟོན་རིན་པོ་ཆེས་གོང་གི་ཚིག་ཟིན་དེའི་ཐད། རྣམ་པར་བཅད་པ་ཕྱིར་ཉི་མ་དང་ནང་དུ་རྡུལ་ལོ། །རྗེས་སུ་ང་རོ་ཕྱིར་ཟླ་བ་དང་ནང་དུ་ཁུ་བའོ་[2]ཞེས་གསུངས་པ་ལས་རྣམ་བཅད་ཀྱིས་ཕྱི་རོལ་གྱི་ཉི་མ་དང་། ནང་རྡོ་རྗེ་ལུས་ཀྱི་རྡུལ་མཚོན་ཞིང་། ཐིག་ལེའམ་རྗེས་སུ་ང་རོས་ཕྱི་རོལ་གྱི་ཟླ་བ་དང་། ནང་རྡོ་རྗེའི་ལུས་ཀྱི་ཁུ་བ་མཚོན་པར་གསུངས་ཡོད།
དེ་བཞིན་དུ་མཁས་གྲུབ་རིན་པོ་ཆེས་ཀྱང་ཉི་མ་དང་རྡུལ་མཚོན་པར་བྱེད་པའི་རྣམ་པར་བཅད་པ་ཚེག་དྲག་བྲི་བར་བྱའོ། །ཟླ་བ་དང་ཁུ་བ་མཚོན་པར་བྱེད་པའི་ཐིག་ལེ་བྲི་བར་བྱའོ་[3]ཞེས་གསུངས་ཡོད་པ་མ་ཟད། རྒྱལ་ཚབ་རྗེའི་གསུང་འབུམ་ཀ་པའི་ནང་དུའང་རྣམ་བཅད་ནི་རྡུལ་གྱི་རང་བཞིན་གཏུམ་མོའི་མེ་དང་། ཐིག་ལེ་ནི་ཁམས་དཀར་པོ་[4]ཡིན་པར་གསུངས་ཡོད། དེ་བཞིན་དུ་ཇོ་ནང་ཏཱ་ར་ནཱ་ཐ་སོགས་ཀྱིས་ཀྱང་གོང་ཞུས་དེ་དག་དང་དགོངས་པ་གཅིག་ཏུ་མཐུན་པར་གསུངས་ཡོད། གསུངས་ཚུལ་འདི་དག་གིས་འགྲེལ་ཆེན་དྲི་མེད་འོད་ཀྱི་ནང་ཚིག་ཟིན་ལ་དངོས་སུ་གསུངས་པ་དེ་དག་གི་དོན་གྱི་དགོངས་པ་ཡང་དེ་ལྟར་དུ་གནས་ཡོད་པར་གསལ་བཤད་བྱས་ཡོད། དེས་ན་རྣམ་བཅད་དཀར་པོ་དང་། ཐིག་ལེ་དམར་པོར་འབྲི་སྲོལ་ཡོད་པ་དེ་དག་ནི་གོང་དུ་དྲངས་པའི་ཚད་མའི་བསྟན་བཅོས་དེ་དག་གི་དགོངས་པ་དང་ཤར་ནུབ་ལྟ་བུའི་མི་མཐུན་པ་ཆེན་པོར་གནས་ཡོད།
དེ་ལྟར་འགྲེལ་ཆེན་དྲི་མེད་འོད་སོགས་ཀྱི་དགོངས་པར་གནས་པའི་རྣམ་བཅད་དམར་བོ་འོག་དང་ཐིག་ལེ་དཀར་པོ་སྟེང་དུ་བྱས་ནས་བརྩེགས་དགོས་དོན་ཡང་། གཏུམ་མོ་འོག་ནས་འབར་བ་རྣམ་བཅད་དང་། ཁུ་བ་སྟེང་དུ་འབབ་པ་ཐིག་ལེ། སེམས་བདེ་བའི་ངོ་བོར་སྐྱེས་པ་ནཱ་དས་མཚོན་ཞིང་། མཚོན་དོན་དེ་ནི་སྔགས་བླ་མེད་ཀྱི་ཐུན་མོང་བ་མ་ཟད། ལུགས་འདིའི་ཐུན་མོང་མ་ཡིན་པ་ཡང་རྣམ་བཅད་འོག་ཏུ་བྱས་པས་ཁམས་དམར་པོ་ཐུར་དུ་བརྟན་པ་དང་། ཐིག་ལེ་སྟེང་དུ་བྱས་པ་དེས་ཁམས་དཀར་པོ་གྱེན་དུ་བརྟན་པ་དང་། དེ་ལ་བརྟེན་ནས་སེམས་མི་འགྱུར་བའི་བདེ་བའི་ངོ་བོར་སྐྱེས་པ་ནཱ་དས་མཚོན་པ་ཡིན།[5]
དེས་ན་རྣམ་བཅད་འོག་དང་ཐིག་ལེ་སྟེང་དུ་བྱས་ནས་བརྩེགས་པ་དེས་གཏུམ་མོའི་མེ་འོག་ནས་འབར་ཏེ་ཁམས་དཀར་པོ་ཁུ་བ་སྟེང་ནས་འབབ་པ་མཚོན་པར་བྱེད་ཅིང་། ཧ་སྲོག་གི་ཨ་དང་བཅས་པ་དེའི་འོག་ཏུ་བཞག་པ་ནི་གཏུམ་མོའི་མེས་ཁམས་བཞུས་པའི་དབང་གིས་རླུང་གི་བཞོན་པ་ཅན་གྱི་རྣམ་པར་ཤེས་བ་བདེ་བ་ཆེན་པོའི་ཡེ་ཤེས་ཀྱི་ངོ་བོར་སྐྱེས་པ་མཚོན་ནོ། །[6] མཚོན་ཚུལ་འདི་ནི་པཎ་ཆེན་བློ་བཟང་ཆོས་རྒྱན་གྱི་བསྡུས་རྒྱུད་ཀྱི་རྒྱས་འགྲེལ་དང་། ༸རྒྱལ་བ་དགེ་འདུན་རྒྱ་མཚོའི་འཇམ་དཔལ་མཚན་བརྗོད་ཀྱི་འགྲེལ་བ་སོགས་ཀྱི་ནང་དུ་ཡང་དེ་བཞིན་དུ་གཅིག་མཚུངས་གསུངས་ཡོད།
དེས་ན་གཅིག་འོག་གཅིག་སྟེང་དུ་བཞག་པའི་མཚོན་དོན་དང་། ཁ་དོག་གི་གོ་རིམ་ངེས་པའི་མཚོན་དོན་དེ་དག་ནི་མཛེས་ཆོས་ལྟ་བུ་མིན་པར་རྣལ་འབྱོར་པས་བསྐྱེད་རྫོགས་ཀྱི་ལམ་རྒྱུད་ལ་བསྐྱེད་རིམ་གྱི་དབང་དུ་བྱས་ནས་གསུངས་པ་ཞིག་ཡིན་ལ། གཞི་དངོས་པོའི་གནས་ཚུལ་གྱི་ཆ་ནས་ཀྱང་། བདེ་བའི་རྟེན་ཁམས་དཀར་པོ་ནི་སྤྱི་བོ་ན་གནས་ཡོད་པ་དང་། དྲོད་ཀྱི་རྟེན་གཏུམ་མོའི་མེ་ཁམས་དམར་པོ་ལྟེ་བ་ན་གནས་[7]ཡོད་པ་ནི་དེང་དུས་ཚན་རིག་པས་ཀྱང་འདོད་པའི་ཕྱིར་ན། རྣམ་བཅད་དམར་པོ་འོག་དང་ཐིག་ལེ་དཀར་པོ་སྟེང་དུ་བྱས་པ་ནི་གཞི་ལམ་འབྲས་གསུམ་གྱི་རྣམ་གཞག་དང་ཡོངས་སུ་མཐུན་པ་ཞིག་ཡིན། མདོར་ན་འགྲེལ་ཆེན་དྲི་མེད་འོད་ཀྱི་དགོངས་པ་དང་མཐུན་པའི་ཕྱོགས་ནི་རྣམ་བཅད་དམར་པོ་འོག་དང་ཐིག་ལེ་དཀར་པོ་སྟེང་དུ་ཡོད་པ་དེ་ཡིན་ཞིང་། འདོད་ཚུལ་གཞན་ནི་འགྲིག་མིན་ཇི་ལྟར་ཡང་གཞུང་དེའི་དགོངས་པར་མི་འདོད་དོ། །
དེ་ལྟ་ནའང་འགའ་ཞིག་གིས་འདི་སྙམ་དུ་བསམ་སྲིད་དེ། འགྲེལ་ཆེན་དྲི་མེད་འོད་ཀྱི་དགོངས་པ་དེ་ནི་གཞན་དུས་ཀྱི་འཁོར་ལོའི་སྐབས་སུ་དགོངས་ནས་དེ་ལྟར་གསུངས་པ་ཡིན་གྱི་ཕྱི་དུས་ཀྱི་འཁོར་ལོའི་སྐབས་སུ་དགོངས་ནས་དེ་ལྟར་གསུངས་པ་མིན་ནོ་ཞེ་ན།
སྤྱིར་དེ་ལྟ་བུའི་དོགས་པ་དེ་རྟོགས་ལྡན་ལ་སྐྱེ་བའི་གནས་ཤིག་མིན་པ་ནི་གོང་དུ་ཁམས་ཀྱི་ལེའུ་ནང་ཞེས་པ་དེས་གསལ་བཤད་བྱས་ཡོད་པ་མ་ཟད། དཔལ་དུས་ཀྱི་འཁོར་ལོའི་ཕྱི་ནང་གཞན་གསུམ་འགྲེལ་དུས་ཀྱང་མཚོན་དོན་གཅིག་གི་ཐོག་ནས་ཕྱི་ནང་གཞན་གསུམ་གྱི་དོན་མཚོན་གྱི་ཡོད་པ་ལས། ཕྱི་རུ་བཤད་པའི་མཚོན་དོན་ཞིག་དང་། དེས་མཚོན་མི་ནུས་པའམ་ནང་སོགས་སུ་སྦྱོར་མི་རུང་བའི་མཚོན་དོན་ཞིག་མེད་ལ་བཤད་པ་ཡང་མེད་དོ། །
གལ་ཏེ་དེ་ལྟར་ཡོད་ན་རྣམ་བཅུ་དབང་ལྡན་ཡང་གཅིག་གི་སྟེང་ནས་གཅིག་ཤོས་གོ་མི་ཐུབ་པར་ཕྱི་ནང་གཞན་གསུམ་ལ་རྣམ་བཅུ་དབང་ལྡན་རེ་རེ་ཡོད་དགོས་པར་འགྱུར་ལ། དེ་ལྟར་ན་རྩ་རྒྱུད་ལས། །ཇི་ལྟར་ཕྱི་རོལ་དེ་བཞིན་ལུས། །ཞེས་སོགས་རྩ་རྒྱུད་དགོངས་འགྲེལ་དང་བཅས་པའི་རྣམ་གཞག་ཐམས་ཅད་བཤིག་པར་ཐལ་བར་འགྱུར་བའི་ཕྱིར་རོ། །དེས་ན་ཁོ་བོས་ནི་རྩ་རྒྱུད་དགོངས་འགྲེལ་དང་བཅས་པ་དེ་དག་གི་རྗེས་སུ་འབྲངས་ནས་རྣམ་བཅད་དམར་པོ་འོག་དང་ཐིག་ལེ་དཀར་པོ་སྟེང་དུ་འདོད་པའི་ལུགས་དེ་འཐད་ལྡན་དུ་འདོད་དོ། །
ཡང་དྲ་རྒྱ་ཞིག་ན་འདི་འདྲ་འདུག
རྣམ་བཅུ་དབང་ལྡན་ནི། དཔལ་ལྡན་དུས་ཀྱི་འཁོར་ལོའི་སྣོད་བཅུད་ཕྱི་ནང་གཞན་གསུམ་གྱི་སྙིང་པོ་གཅིག་ཏུ་བསྡུས་པའི་ལཉྫའི་ཡེ་གེ་ཧཀྵམལཝརཡཾབཅས་ཡི་གེ་བདུན་དང་ཡི་གེ་གཟུགས་འགྱུར་བ་ལས་སྣ་ལྡན་ནམ་ཟླ་ཚེས། ཐིག་ལེ། སྲོག་ཡིག་ཨ་མཚོན་པའི་ནཱ་ད་དང་བཅས་པའི་ཡི་གེ་བཅུ་བརྩེགས་མར་གནས་པ་སྣ་ཚོགས་པདྨའི་གདན་བཞི་དང་བཅས་པ་སྟེ། དེའི་རིམ་པ་སྣ་ཚོགས་པདྨའི་སྟེང་དུ་ཟླ་བ་དཀར་པོ། ཉི་མ་དམར་པོ། སྒྲ་གཅན་སྔོན་པོ། དུས་མེ་སེར་པོ་བཅས་ཀྱི་གདན་བཞིར་བྱུང་བ་རིམ་བརྩེགས་ཀྱི་རང་མདོག་སྟེ། རླུང་གི་ས་བོན་ཡ་ནག་པོ།（འདི་ལ་ལྗངས་ཁུ་ཞེས་ཀྱང་གསུངས།）མེའི་ས་བོན་ར་དམར་པོ། ཆུ་ཡི་ས་བོན་ཝ་དཀར་པོ། སའི་ས་བོན་ལ་སེར་པོ། མ་འདོད་ཁམས་འདོད་ཡོན་ལྔ་མཚོན་བྱེད་ཁ་དོག་ལྔ་ལྡན་ནམ་བརྟན་པ་རི་རྒྱལ་གྱི་ས་བོན་ཕྱོགས་མདོག་སྟེ་ཤར་ནག ལྷོ་དམར། བྱང་དཀར། ནུབ་སེར། དབུས་ལྗངས་གུའོ།། གཡོ་བ་འདོད་གཟུགས་དང་སྣ་ཚོགས་པདྨའི་ས་བོན་ཀྵ་ལྗང་གུ།（དཀར་པོར་ཡང་གསུངས།）གཟུགས་མེད་བཞི་ནི་ས་བོན་ཧ་མགོ་བོ་དང་བཅས་པ་སྔོན་པོ་ཟླ་ཚེས་ལྔ་ལྡན་སྲོག ཟླ་བའི་ས་བོན་དཀར་པོ། ཐིག་ལེ་རོ་ཉི་མའི་ས་བོན་དམར་པོ། ནཱ་ད་ནམ་མཁའི་ས་བོན་སྔོན་པོས་མཚན་པའོ།། ཡང་རྟེན་གཞལ་ཡས་ཁང་གི་འོག་གཞི་རླུང་མེ་ཆུ་སའི་དཀྱིལ་འཁོར་བཞི་ཡ་ར་ལ་ཝ། རི་རབ་གཞལ་ཡས་ཁང་བཅས་པ་མ། བརྟེན་པ་སྐུ་གསུང་ཐུགས་ཀྱི་ལྷ་རྣམས་ཀྵ། ཐུགས་དཀྱིལ་གྱི་ལྷ་རྣམས་ཧ། བདེ་ཆེན་འཁོར་ལོའི་ལྷའི་སྐུ་གསུང་ཐུགས་ཟླ་ཚེས་ཐིག་ལེ་ནཱ་ད་སྟེ་བརྟེན་པའི་ལྷ་ཚོགས་མཚོན་པར་བྱེད་པ་སོགས་དཔག་མེད་འབྱུང་ཞིང་འདི་ནི་ཁམས་གསུམ་འཇིག་རྟེན་སྣོད་བཅུད་ཐམས་ཅད་བསྡུས་པའམ་མཚོན་བྱེད་ཡིན་པས། གཙུག་ལག་དང་ཁང་ཁྱིམ་གྱི་རྩེར་བཏགས་པས་ས་དཔྱད་ངན་པ་གནོན། གཟའ་སྐར་ངན་པའི་གནོད་པ་སྲུང་། ཁྱིམ་དུ་འཆང་ན་རྐྱེན་ངན་དང་བར་ཆད་བཟློག་ནས་དགེ་ཞིང་བཀྲ་ཤིས་པར་བྱེད་པར་གསུངས་སོ།།
རྣམ་བཅུ་དབང་ལྡན་གྱི་ཕན་ཡོན་ངོ་སྤྲོད་གནང་བ་ཐུགས་རྗེ་ཆེ་བཀྲིན་ཆེ་ཕན་ཐོག་ཆེན་པོ་བྱུང་།