སྤྱི་ལོ་༢༠༡༡ལོའི་ཟླ༡༠པའི་ཚེས་༡༢ཉིན་གྱི་ཕྱི་དྲོའི་ཆུ་ཚོད་༦པའི་ཐོག་སིད་སུར་གནས་བསྡོད་བློ་གྲོས་ལགས་དང་ཆབ་སྲིད་བཙོན་ཟུར་ཕུན་ཚོགས་དང་དཔལ་ལྡན་གསུམ་གྱིས་བཀོད་སྒྲིག་འོག་༼གོང་ས་མཆོག་བོད་དུ་ཕྱིར་ལོག་ཕེབས་ཆེད་སྙིང་ཞེན་དང་ལ་རྒྱ་ཅན་གྱིས་བོད་རིགས་དཔའ་པོ་མང་པོས་བོད་ནང་དུ་རྒྱ་ནག་གཞུང་གིས་གདུག་རྩུབ་མ་བཟོད་པར་རང་ལུས་མེར་སྲེ ག་གིས་ཡ་ང་བའི་ཞི་རྒོལ་བྱས་རྐྱེན་འདས་གྲོངས་སུ་གྱུར་བ་སྐྲ་པེ་ལགས་དང་། གྲྭ་ཕུན་ཚོགས་ལགས། ཚེ་དབང་ནོར་བུ་ལགས། བློ་བཟང་དཀོན་མཆོག་ལགས། བློ་བཟང་སྐལ་བཟང་ལགས། ཆོས་འཕེལ་ལགས། ཉེ་བའི་ཆར་མཁའ་དབྱིངས་ལགས་བཅས་རྒྱལ་གཅེས་དཔའ་བོ་ཁོང་ཚོར་གདུང་སེམས་མཉམ་བསྐྱེད་༽དང་གུས་འདུད་བསྔོ་སྨོན་གྱི་སེམས་འདུན་མཚོན་སླད་ ནོར་བུ་གླིང་གའི་གཙུག་ལག་ཁང་ནས་བཙུན་དགོན་སྒྲོལ་མ་གླིང་དུ་གཡས་སྐོར་གྱིས་ཕྱིར་འཆི་མེད་དགའ་ཚལ་གླིང་བར་དུ་མར་མེའི་ཁྲོམ་སྐོར་གཞི་རྒྱ་ཆེན་པོ་ཞིག་བྱས་ཡོད་འདུག་པ་མ་ཟད། ཤེས་རབ་དགའ་ཚལ་སློབ་གླིང་གི་སློབ་མ་ཚོས་ཀྱང་༼ང་ཚོ་ནམ་ཡང་ཁྱོད་ཚོའི་རྒྱབ་ན་ཡོད་༽སོགས་ཀྱི་འཕྲེད་དར་གང་མང་སྒྲེང་ནས་ཕེབས་ཡོད་འདུག
འདུ་འཛོམས་ཚོགས་ཐོག་ཏུ་ཀིརྟིའི་གྲྭ་ཚང་གི་བོད་གནས་འབྲེལ་མཐུད་པ་ཀ་ཉག་ཚེ་རིང་ལགས་ཀྱིས་བོད་ནང་གི་གནས་སྟངས་དང་སྡུག་དམེ་བཙན་གནོན་སོགས་ཞིབ་རྒྱས་གཏམ་བཤད་དང་བཀའ་ཟུར་བསོད་ནམས་སྟོབས་རྒྱས་ལགས་ཀྱིས་གཏམ་བཤད། བློ་གྲོས་ལགས་ཀྱིས་མཇུག་སྡོམ་བཅས་མཐར་རྒྱལ་བའི་ཞབས་བརྟན་དང་བདེན་ཚིག་སྨོན་ལམ། རྒྱལ་གླུ་བཅས་རེ་རེ་བཞིན་དབྱངས་རྟར་གྱེར་ནས་ཡོངས་སུ་མཇུག་སྒྲིལ་ཡོད་འདུག
སྤྱི་ཚོགས་མེ་ལོང་གི་གསར་འགོད་པ་རྡོ་རྗེ་ཚེ་རིང་གིས
ནོར་གླིང་ཁུལ་གྱི་བོད་མི་རྣམས་མ་བསྐུལ་དང་བླངས་ངང་ནས་ལས་འགུལ་སྤེལ་བར་རྗེས་སུ་ཡི་རངས་ཡོད།
ལྷག་དོན་གསོག་སྒར་སློབ་གྲྭའམ་ཤེས་རབ་དགའ་ཚལ་སློབ་གླིང་གི་སློབ་ཕྲུག་དགེ་ལས་ཡོངས་རྫོགས་མཉམ་ཞུགས་གནང་བ་མ་ཟད།་་་་ང་ཚོ་ནམ་ཡང་ཁྱེད་ཚོའི་རྒྱབ་ཏུ་ཡོད་་་་ཅེས་ཕྲེད་དར་ཤར་ནས་གཞིས་ལུས་རྒྱལ་གཅེས་དཔའ་བོ་རྣམས་ལ་གདུང་སེམས་མཉམ་སྐྱེད་གནང་བ་སྙིང་ནས་དགའ་བསུ་ཞུ་རྒྱུ་ལས་མ་འདས།་