ཀླུ་སྨྱོན་ཧེ་རུ་ཀ
གཅིག
དུ་ཞགས་ཀྱིས་དཀྲིས་པའི་བལ་ཡུལ་རྒྱལ་ས་ཀ་ཐ་མན་ཀྲུའི་ནུབ་བྱང་གི་ཕྱོགས་སུ་རི་མཐོན་པོ་ཞིག་ཡོད་པའི་མིང་ལ་གླང་རུ་ལུང་བསྟན་ཟེར། རི་དེའི་རྩེ་མོར་འཛེགས་ན་དེར་ལྡིང་ཁང་ཆུང་ཆུང་ཞིག་ཡོད་པ་དང་། དེ་ནས་བྱང་ཕྱོགས་སུ་རྒྱང་བལྟ་བྱེད་རྒྱུར་དགའ་བའི་རྡོ་རྗེ་ལ་མཚོན་ན། བྱང་ཕྱོགས་ཀྱི་ཧི་མ་ལ་ཡའི་གངས་རིའི་ཕྲེང་བ་ཕྱི་བརྩེགས་ནང་བརྩེགས་དེ་ཚོ་ནི་གནའ་བོའི་གཏུམ་འབྲུག་ཏུ་གྲགས་པའི་སྲོག་ཆགས་ཆེན་པོ་དེ་ཚོའི་སྒལ་ཚིགས་ཀྱི་སྟེང་དུ་སྐྱེས་པའི་ཁྲབ་རིས་དེ་ཚོ་ཡང་འདྲ་ཙམ་ཡོད།
རི་རྩེ་འདིར་དབྱར་དགུན་མེད་པར་རླངས་འཁོར་བསྐོར་ནས་ཡོང་མཁན་དང་སྦག་སྦག་ལ་ཞོན་ནས་ཡོང་མཁན་རྒྱུན་ཆད་མེད་ཅིང་། ཉེན་མཆོངས་པ་ལ་ལ་རི་གཤམ་ནས་རི་རྩེ་བར་དུ་གོམ་བགྲོད་ཀྱིས་བསླེབས་པ་ཡང་ཉུང་ཉུང་མིན། རི་འདིའི་སྐེད་ཙམ་ཞིག་ལ་བལ་བོའི་དམག་སྒར་ཞིག་ཡོད་པས། རླངས་འཁོར་དང་སྦག་སྦག་གི་རིགས་རི་རྩེར་འགྲོ་མཁན་ཚོར་ཞིབ་བཤེར་བྱེད་པ་དང་། དེ་ནི་འགྲོ་ལུགས་ཙམ་ཞིག་མ་གཏོགས་འགག་སྒོ་དེ་ནས་མི་ཐར་བའི་དཀའ་ངལ་དེ་ཙམ་ཞིག་མེད།
རྡོ་རྗེ་ལ་རླངས་འཁོར་དང་སྦག་སྦག་གང་ཡང་མེད་པས། ནམ་རྒྱུན་རི་རྩེ་འདིར་ཡོང་འདོད་སྐྱེས་ཚེ་ངོ་ཤེས་གྲོགས་པོ་རེར་ཞུ་བ་འཐེན་ནས། དེ་ཚོའི་རླངས་འཁོར་གྱི་ནང་ངམ་སྦག་སྦག་གི་འཕོང་ལ་ཞོན་ནས་འདིར་ཡོང་གི་ཡོད། རི་རྩེ་འདིར་བསླེབས་ན་མཁའ་དབུགས་དྭངས་ཤིང་སྣང་བ་སྐྱིད་པས། ཕྱིར་འུར་ཟིང་གིས་ཁེངས་ཤིང་དུད་སྨུག་གིས་གཡོགས་པའི་འཕགས་ཤིང་རི་འདབས་དེར་ལོག་འདོད་མེད་པ་ནི་རྡོ་རྗེ་གཅིག་པོ་ག་ལ་ཡིན།
ནམ་རྒྱུན་མི་ཚང་མ་གཉིད་ཀྱི་ཞིང་ཁམས་སུ་ཡོད་པའི་ཞོགས་པ་ཧ་ཅང་སྔ་བོ་རེ་རེར། རྡོ་རྗེ་ཡར་ལངས་ནས་འཕགས་པ་ཤིང་ཀུན་གྱི་སྐོར་བར་འགྲོ་བ་དང་། ཁོང་གིས་སྐོར་ལམ་གྱི་ཁྱི་སྡོམ་ཚོར་ཟ་མ་ཕྲན་བུ་རེ་སྟེར་བ་མ་ཟད། སྤྲེལ་དང་བྱ་རིགས་ལ་ཡང་རྔན་པ་ཕྲན་བུ་རེ་འཁྱེར་ནས་འགྲོ་སྲོལ་ཞིག་ཡོད།
འཕགས་ཤིང་རི་བོའི་ཁོར་ཡུག་ནི་བྱ་རུང་ཁ་ཤོར་གྱི་ཉེ་འདབས་དང་མི་འདྲ་བར་དེ་ཙམ་གྱི་འཁྲུག་ཆ་ཆེན་པོ་ཞིག་མེད་ན་ཡང་། རི་འདབས་ཀྱི་ལམ་ཆེན་སྟེང་གི་རླངས་འཁོར་སྣ་ཚོགས་དང་ཁྲོམ་གཞུང་གི་མི་ཚོགས་ཀྱི་འུར་སྒྲ་ཆེ་ཆུང་ནི་ཞི་བདེའི་སྣང་བ་འཚོལ་བའི་མི་ཞིག་ལ་མཚོན་ན་གཡོལ་འདོད་ཡོད་ཀྱང་གཡོལ་ཐབས་དཀའ་བ་ཞིག་རེད།
མུ་འགོད་།