ཨ་འདུས་པ།
ཧི་མ་ལ་ཡི་གོང་ན།། གློ་བོ་ཆོས་ལྡན་ཞིང་ཡོད།། རྨི་ལམ་ནང་གི་གོམ་སྟབས།། ཡུལ་དེར་ཡང་ཡང་ཤོར་མྱོང་།།
མེས་པོས་བརྩིགས་པའི་ཕ་མཁར།། དགེ་ཀར་གཙུག་ལག་མཇལ་པས།། སྲོང་བཙན་པོའི་སྙིང་སྟོབས།།སྨོན་ཐང་གྲོང་ན་ལུས་ཡོད།།
ས་དེ་ཁ་མདོག་སྐྱ་བས།།ས་སྐྱར་སླེབས་པ་འདྲ་བ།།སྨོན་ཐང་ཐུབ་སྐུ་མཇལ་བས།།གཙང་གི་བྱམས་ཆེན་དྲན་སོང་།།
མཚོ་ཤར་བྲག་ཕུག་ནང་གི། མེས་པོའི་གསུང་རབ་མཇལ་ཚེ།།མེ་ལོང་ནང་གི་བཞིན་རས།། རང་ཉིད་མིན་པ་རྟོགས་བྱུང་།།
སྐུ་ཚབ་གཏེར་ལྔ་མཇལ་ཏེ།།ཆུ་མིག་བརྒྱ་རྩ་བཏུང་ཡིན།།སློབ་དཔོན་པདྨའི་ཞབས་རྗེས།།སེམས་ཀྱི་གཏིང་ན་བཞག་ཡོད།།
ཞིང་དེའི་ཁ་མདོག་ཡག་སོང་།། སོ་ནམ་གླུ་གཞས་སྙན་སོང་།། ཞལ་རས་སྨུག་པོའི་གསེང་ན།། འཛུམ་པའི་མེ་ཏོག་བཞད་ཡོད།།
མགུལ་གྱི་གཡུ་ཆུང་མཇལ་དུས།།སེང་ལྕམ་འབྲུག་མོ་འདྲ་བ།། རྐྱང་རྒོད་ཐུར་ལ་བཅིབས་པས།། སེང་ཆེན་མིན་ནམ་བསམ་བྱུང་།།
སྟོད་ན་གངས་དཀར་བཀྲ་བ།།བར་ན་བྲག་རི་བརྗིད་པ།།སྨད་ན་གྲོ་ནས་འཛོམས་པ།།།གློ་བོ་ཆོས་ལྡན་ཞིང་རེད།།
རྩམ་པའི་རོ་བཅུད་བཟང་པ།། ཟན་སྒོང་ཁ་ལ་ཞིམ་པ།།ཀུ་ཤུ་མངར་ཁ་ཆེ་བ།།གློ་བོའི་ཡུལ་ན་ཡོད་རེད།།
རི་ཚོགས་ཁ་དོག་མང་བ།། ཆུ་བོའི་གླུ་སྒྲ་སྙན་པ།། གཡུ་ལས་སྔོ་བའི་ནམ་མཁའ།།གློ་བོའི་ཡུལ་ན་ཡོད་རེད།།
དབྱིངས་སུ་འཐེན་པའི་རྨུ་ཐག། ལས་ཀྱི་རླུང་གིས་གཡོས་སོང་།།རྨི་ལམ་ནང་གི་གློ་བོ།།ནམ་ཡང་བརྗེད་ཐབས་མི་འདུག།
——ཨ་འདུས་པས་གློ་ལྗོངས་ཀྱི་སྣང་བརྙན་འགའ་མཇལ་རྗེས་ཤར་མར་བྲིས་སོ།།