ང་ཡི་རྨི་ལམ་དང་མཉམ་དུ་བཞུར་བའི་ཁྱོད།

Comments (33) on “ང་ཡི་རྨི་ལམ་དང་མཉམ་དུ་བཞུར་བའི་ཁྱོད།”

1. ལེགས་པར་བརྩམས་ཤིང་བྲིས་པར་ཡིད་དགའ།

   ང་ནི་དགུང་སྔོན་ན་འཕྱོ་བའི་ཆུ་འཛིན་ཕུན་པོ་བཞིན།
   འདིའི་ནང་གི་ཕུན་པོའི་དོན་ཅི།
   ང་ཡི་འཁོར་ཡུག་ནས་རྒྱང་ལ་ཆས་དུས།
   ཆས་ཞེས་པ་དེ་འགྲོ་བའི་དོན་ཡིན་ནམ། མདོ་རྒྱ་ཆེར་རོལ་པའི་ཚིག་བཞིན་༧རྒྱལ་བ་དགེ་འདུན་གྲུབ་ཀྱིས།
   ལྷ་མོ་ལུམབུའི་ཚལ་དུ་ཆས་པ་ལ། ཞེས་པའི་ཆས་དེ་ད་ལྟ་ལ་དྭགས་པའི་ཁ་སྐད་དུ་བཀོལ་བའི། ཆ། འདས་ཚིག་ཡིན་ནམ། ངེས་པ་བརྟན་པོ་མ་རྙེད། གླེ་རུ་ཆ་ཡོད་དང་། ཆ་ཡིན་ཞེས་ད་ལྟ་དང་མ་འོངས་པ་ལ་བཀོལ། དེའི་འདས་པ་དང་། སྐུལ་ཚིག་ལ་སོང་། ཞེས་དཀོལ་ལོ།།

2. རྒན་ལ་དྭགས་པ་མཆོག་ཕེབས་པར་དགའ་ནས་ཡོད་ལགས།
   ཕྲན་གྱི་ཕུན་པོའི་ཞེ་འདོད་ནི་ནམ་མཁར་ཆགས་པའི་སྤྲིན་པ་དག་ཁྱུ་དང་ཁྱུ་བྱས་པའམ།
   ཡང་ན་དུམ་བུ་དུབ་བུར་གནས་པ་ཞིག་ལ་བསམ་པ་ཡིན།
   ཆས་ནི་སོང་བའི་ཞེ་འདོད་ཡིན་ལགས།

3. དུམ་བུ་དུམ་བུར་གནས་པ་ལ་ཕོན་པོ་ཟེར་བ་ལས་ཕུན་པོ་མི་ཟེར། སྙན་ངག་གི་ནང་དུ་སྤྲིན་པའི་སྐོར་འབྲི་དུས་ཕོན་པོ་ལས་ཕང་ཕུང་ཞེས་བྲིས་ན་ཚིག་གི་ཉམས་ཐོན་པའི་ཁྱད་པར་ཞིག་ཀྱང་འདུག

4. ཕང་ཕུང་དང་ཀྱག་ཀྱོག ཆལ་ལེ་ཆོལ་ལེ་དང་རབ་བེ་རིབ་བེ་སོགས་བྱ་བ་དང་དངོས་པོའི་ཉམས་འདོན་སྟངས་ཁྱད་མཚར་ཞིང་བྲོ་བ་ཆེ་བ་འདི་འདྲ་དག་ནི་དབྱིན་ཡིག་དང་རྒྱ་ཡིག་སོགས་ཀྱི་ནང་དུ་མེད་པའི་རང་རེའི་བོད་ཡག་གི་ཁྱད་ཆོས་ངོ་མཚར་ཆེ་བ་ཞིག་རེད།

5. ཨ་ལགས་ཚང་གིས་ལམ་སྟོན་གནང་བར་ཐུགས་རྗེ་ཆེ་ཞུ།

6. སྙན་དངགས་མཁན་པོ་དོལ་སྨྱོན་ལེགས་ཀྱང་སི་ཏུ་པཎ་ཆེན་གྱིས་གསུངས་པའི་ལུང་པ་འདི་ལྟ་བུ་ཞིག་ནས་བྱོན་པ་ཡིན་ནམ།

   ཁམས་ཕྱོགས་ཀྱི་ཡུལ་གྲུ་འགའ་རེ་ན་ན་རོ་དང་འགྲེང་བུ་ཡོད་མེད་ཀྱི་ཀློག་ཚུལ་ཐམས་ཅད་དུ་མི་འབྱུང་བ་དང་། འགའ་ཞིག་ན་ཞབས་ཀྱུ་དང་ན་རོ་ཀློག་ཚུལ་གཅིག་ཏུ་བྱེད་པ་སོགས་ཀྱིས་མཚོན་མ་དག་པར་འདོན་པ་མང་ཞིང་། དེས་ཡིས་ཡི་གེ་འབྲི་བ་ནའང་མ་དག་པ་ཁོ་ནར་འགྱུར་བའི་ཕྱིར་རོ། ཞེས་དཧ་ས་སྤར་མ་ཤོག་གྲངས་༡༥༩ན།

7. ལ་དྭགས་འཇམ་དཔལ་ཟེར་བ་འདིས་ཅང་མི་ཤེས་པའི་ཁར་ཁ་མང་ཞིང་རང་དགར་སྡོད་མི་ཚུགས་པའི་བྱིས་པ་སྣབས་བླུག་ཞིག་ཨ་ན་མ་ན་རེད། མིའི་སྐད་ཆ་ནི་མི་དང་མིའི་བར་གོ་བརྡ་འཕྲོད་པར་ཆེད་དུ་བཟོས་པ་ཞིག་མ་ཡིན་པར་དགོས་མཁོ་དེའི་ཆེད་དུ་རང་བཞིན་གྱིས་བྱུང་བ་ཞིག་ཡིན་ལ། མིས་ཀླད་པ་བེད་སྤྱོད་བཏང་ནས་ཤེས་ཡོན་གྱིས་སྤྱི་ཚོགས་འཕོ་འགྱུར་གཏོང་བཞིན་ཡོད་ལ། སྤྱི་ཚོགས་ཡར་རྒྱས་ཀྱི་འགྲོས་དང་བསྟུན་ནས་མི་དང་མིའི་བར་བགོ་བརྡ་སྤྲོད་བྱེད་ཀྱི་སྐད་ཆ་ལའང་འགྱུར་བ་འགྲོ་དགོས་པ་ཆོས་ཉིད་ཡིན། ལ་དྭགས་ཀྱི་གྲོང་དུ་ཆས་སོང་ལ་ཆ་སོང་ཟེར་གྱི་ཡོད་སྲིད་ཀྱང་དེ་བརྡ་སྤྲོད་ཀྱི་འགྲོས་དང་མཐུན་པའི་སྐད་ཆ་འམ། ཡང་ན། ཡིག་སྐད་དང་སྤྱི་སྐད་གང་ཡང་མ་རེད། ཉོབ་སོང། ཁྱོད་འདྲ་བོ་ཞིག་ལ་གསལ་བཤད་རྒྱུ་འདི་ལས་སླ་བོ་མ་རེད། ལོ་ཁ་ཤས་ལ་སློབ་སྦྱོང་གྱིས་ལོ། གཞན་གྱི་སྙན་ངག་ལ་གོ་བ་ལེན་མ་ཤེས་པར་ལོག་འགྲེལ་བྱ་མི་རུང་།

8. འཕགས་ཁོ་ལེགས།
   བོད་ཀྱི་བརྡ་སྐོར་ལ་བགྲོ་གླེང་བྱེད་པ་ལ། ཁྱེད་དོན་མེད་ལ་ཁྲོང་ཁྲོ་ལངས་འདུག ང་ཅག་གི་བོད་བརྡ་སྤྲོད་བགྲོ་གླེང་ལ་ཁྱེད་ཁྲོ་ལངས་ན་རང་གི་སེམས་འཁྲུགས་པ་ལས། ང་ལ་གནོད་པ་ཅི་ཡང་མེད། ང་ཡིས་ཕུན་པོའི་དོན་མི་གོ་འདུག་ཟེར་བ་ལ། དེ་ལ་དོལ་སྨྱོན་གྱིས་ལན་བྲིས་པ་ལ། ཀླུ་སྨྱོན་གྱིས། དུམ་བུ་དུམ་བུར་གནས་པ་ལ་ཕོན་པོ་ཟེར་བ་ལས་ཕུན་པོ་མི་ཟེར། སྙན་ངག་གི་ནང་དུ་སྤྲིན་པའི་སྐོར་འབྲི་དུས་ཕོན་པོ་ལས་ཕང་ཕུང་ཞེས་བྲིས་ན་ཚིག་གི་ཉམས་ཐོན་པའི་ཁྱད་པར་ཞིག་ཀྱང་འདུག ཅེས་གསུངས་པར། དོལ་སྨྱོན་གྱིས། ཨ་ལགས་ཚང་གིས་ལམ་སྟོན་གནང་བར་ཐུགས་རྗེ་ཆེ་ཞུ། ཞེས་བྲིས་སོ།
   ་ངའི་ལུང་པོའི་ཁ་སྐད་དུ། རྩྭ་སོགས་བརྔས་ནས་བཅིངས་པ་ལ་དེ་ལ། ཕོན་པོ། ཟེར་བས་ཀླུ་སྨྱོན་གསུངས་པ་བདེན་པར་ངེས། གཞན་ཡང་། ཆས་ཞེས་པ་དེ། དིང་སང་ལ་དྭགས་པས། ཆ་ཞེས་པའི་འདས་ཚིག་ཡིན་ནམ་ཞེས་པར། དོལ་སྨྱོན་གྱིས། ཆས་ནི་སོང་བའི་ཞེ་འདོད་ཡིན་ལ། ལན་གསུངས་པ་འཐད་པར་མཐོང་། འོན་ཀྱང་ལ་དྭགས་པས། དེ་ལྟར་མི་བཀོལ་བར་ཆ་ཞེས་པ་ད་ལྟ་བ་དང་མ་འོངས་པ་བཀོལ་ཀྱང་། དེའི་འདས་ཚིག་དང་། སྐུལ་ཚིག་ལ་སོང་ཞེས་གོང་དུ་སྨྲས་པ་བཞིན་ཡིན།
   ཁྱེད་ད་དུང་ལོ་མང་དུ་སློབ་སྦྱོང་བྱོས་དང། གལ་ཏེ་ཁྱེད་མཁས་པར་ཆགས་ན། ཐོག་མེད་དུས་ནས་གཏི་མུག་ལ་གོམས་པ་སེལ་ཕྱིར། བདག་མ་ཤི་བར་ཚེ་རིང་པོ་བྱུང་ན། ཁྱེད་འགྲམ་ལ་སློབ་སྦྱོང་བྱེད་པར་འོང་སྲིད་དོ།།
   བློ་ཆུང་སེམས་ལ་འཁོན་འཛིན་ཅན།
   གནོད་པ་བས་ཀྱང་རྣམ་འགྱུར་སྔ།
   ཁྱི་ངན་དགྲ་བོ་མཐོང་ན་ཡང་།
   རྨུགས་པའི་ཐོག་མར་ཀུ་ཅོ་འདོན།།

9. ང་ཁོང་ཁྲོ་ལངས་མེད། ནད་མཁྲིས་པའི་སྨན་ལ་ཞིམ་པོ་མེད། ཤ་ཚ་བའི་གཏམ་ལ་སྙན་པོ་མེད། ཟེར་བ་ཞིག་གོ་ཨེ་མྱོང་། སྐད་ཆ་བསམས་ནས་ཤོད། ཁྱོས་གཞན་གྱི་རྩོམ་ཡིག་ལ་མཆན་འབྲི་ཁུལ་གྱིས་གཞན་གྱི་སྐྱོན་འདོན་འོས་པའི་ཚད་དུ་སླེབས་མི་འདུག ཁྱེད་ཀྱིས་བྲིས་པའི་མཆན་གྱི་ནང་དུའང་དུས་གསུམ་དང་དག་ཆ་ནོར་བ་གྲངས་གྱིས་མི་ལངས་ན་ཡང། སུས་ཁྱེད་ལ་ལམ་སྟོན་བྱས་སོང་། ངས་ཁྱེད་ལ་དྲང་པོར་བཤད་པ་ཡིན། ཁྱེད་ཀྱིས་བགྲོ་གླེང་ཞེས་སྐད་ཆ་རྫིག་པོ་བཤད་མ་བཤད་མི་འདུག ད་དུང་། ལོ་ཁ་ཤས་རིང་ངའི་ཀླད་པའི་ནང་དུའང་ཁྱེད་ལ་མཁོ་སྤྲོད་བྱ་དགོས་པའི་ཤེས་བྱ་མང་པོ་ཡོད་ཐག་ཆོད་རེད།

10. འཕགས་ཁོ་ལ།
    ཁོང་ཁྲོ་ལངས་མེད་ན། ཚིག་ངན་ལབ་དགོས་པའི་་རྒྱུ་མཚན་གང་ཡིན་ནམ། ལ་དྭགས་འཇམ་དཔལ་ཟེར་བ་འདིས་ཅང་མི་ཤེས་པའི་ཁར་ཁ་མང་ཞིང་རང་དགར་སྡོད་མི་ཚུགས་པའི་བྱིས་པ་སྣབས་བླུག་ཞིག་ཨ་ན་མ་ན་རེད། འདིའི་ནང་གི་ཨ་ན་མ་ན་ཞེས་པ་དེ་ངས་མི་ཤེས་འདིའི་དོན་འབྲི་དགོས། ངས་དེ་འདྲ་བྲིས་པ་དེ་དག་བོད་ཀྱི་སྐད་གཅིག་སྒྲིལ་འབྱུང་བར་བསམས་ཏེ། དཀའ་བསྟན་སོགས་ཀྱི་ཚིག་དང་བསྟུན་ནས་བྲིས། ངའི་ཡི་གའི་དག་ཆ་རྣམས་རྣམ་དག་ཡིན་པ་ངས་ནམ་ཡང་སྨྲས་མེད། འདི་དང་འདི་འགྲིག་མི་འདུག་ཅེས་ཁྱེད་ལ་འབྲི་རྒྱུ་ཡོད་ན། ་ངས་ང་རང་གི་ནོར་བའི་མུན་པ་སེལ་བ་ལ་ཁྱེད་ལ་དགའ་བསུ་བྱེད་ངེས། གཅིག་གིས་གཅིག་ལ་དམའ་འབེབས་བྱེད་པའི་ཚུལ་མ་ཡིན་པར་བོད་ཀྱི་སྐད་དང་རིག་གཞུང་གོང་འཕེལ་བྱེད་པ་ལ་སྐྱོན་བརྗོད་ངེས་པར་དུ་བྱེད་དགོས་པ་ཡིན། དེ་ཡིས་བོད་ཀྱི་སྐད་ཉམས་པ་སོར་ཆུད་མི་ཉམས་གོང་འཕེལ་ལ་ཕན། ཁྱེད་ཁོང་ཁྲོ་ལངས་པ་མ་ཡིན་ན། ང་ལ་ཚིག་རྩུབ་སྨྲ་བའི་ཚབ་ཏུ་འདི་དང་འདི་འགྲིག་མི་འདུག་ཅེས་སྨྲ་དགོས་པ་ལས། དེ་འདྲ་མ་སྨྲས་པར་།
    ཁྱོས་གཞན་གྱི་རྩོམ་ཡིག་ལ་མཆན་འབྲི་ཁུལ་གྱིས་གཞན་གྱི་སྐྱོན་འདོན་འོས་པའི་ཚད་དུ་སླེབས་མི་འདུག
    ཅེས་པར་འདི་དང་འདི་འགྲིག་མི་འདུག་ཅེས་་རྒྱུ་མཚན་བཤད་པ་མཁས་པའི་ལུགས་ཡིན། དེ་འདྲ་ཁྱེད་ལ་བཤད་རྒྱུ་ཡོད་ན། ད་བཤད་རན་པ་ཡིན། ངས་བཤད་པ་དེ་དག་བཀའ་བསྟན་སོགས་ཀྱི་དག་ཆ་དང་བསྟུན་ནས་བཤད་པ་ལ་ནོར་བ་ཡོད་ན། བདག་རང་གི་ནོར་བ་དང་དུ་བླངས་ཏེ། དགོངས་དག་ཞུ་ངེས། དག་ཆ་ནོར་བ་དག་ལ་འདི་དང་འདི་ནོར་འདུག་ཅེས་སྔོན་དུ་སྟོན་མཁན་འབྱུང་བ་དག་ལ་དགོངས་དག་ཅེས་ཞུས་པ་ཡིན། ད་དུང་མ་འོངས་པ་ན་ཡང་ཞུ་ངེས།

11. སྤྱོད་འཇུག་ལས། ཐམས་ཅད་བོར་ཏེ་ཆ་དགོས་པ།། ཞེས་པའི་ཆ་ཞེས་པ་འགྲོ་བའི་མ་འོངས་བ་ཡིན་ས་རེད། ལ་དྭགས་ཀྱི་སྐད་དུ། གང་དུ་འགྲོ་འམ་ཞེས་པ་ལ་ག་རུ་ཆ་ག་ཟེར་བ་དང་འདྲ། ལམ་དུ་ཆས་ཟིན། ལམ་དུ་ཆ་དགོས། ལམ་དུ་ཆས་ཤིག་ལྟ་བུའོ།།

12. རྒན་ལ་དྭགས་པས་མཆན་བུ་བཏབ་པ་དག་ལ་གོ་རྒྱུ་ཆེན་པོ་མཐོང་སོང་ལ། གཅིག་ནས་འདི་ལྟར་དོགས་སློང་བྱེད་ན་ཕན་ཐོགས་རྒྱ་ཆེན་པོ་ཡོང་ངེས་རེད། དཔེར་ན། ༼རྩྭ་སོགས་བརྔས་ནས་བཅིངས་པ་ལ་དེ་ལ། ཕོན་པོ་ཟེར། ༽ཞེས་པ་ལྟ་བུ་བོད་ཆོལ་ག་གསུམ་གང་དུ་སོང་ཡང་ཚིག་གི་དག་ཆ་ལ་ངེས་བར་གཟབ་དགོས་པ་ལས་གང་བྱུང་གིས་ཁ་སྐད་དང་མཐུན་པར་སྦྱར་བ་ཡིན་ན་བོད་ཀྱི་བརྡ་སྤྲོད་རིག་གནས་ཀྱི་རྣམ་བཞག་གཏད་སོ་མེད་པ་ཆགས་རྒྱུའི་ཉེན་ཁ་ཉག་གཅིག་རེད།

13. རྒན་ལ་དྭགས་པ་མཆོག
    གཞན་གྱི་བསྟོད་སྨད་ཇི་ལྟར་བྱས་ཀྱང་རུང་།
    ངས་ནི་ཁྱེད་ཀྱི་གནང་ཕྱོགས་དེ་ལ་ཤིན་ཏུ་དགའ་ནས་ཡོད།
    ང་ལ་མཚོན་ན་སྙན་ངག་ཐར་ཐོར་རེ་འབྲི་ཤེས་པ་ཙམ་ལས།
    བརྡ་སྤྲོད་པའི་གཞུང་ལ་སྦྱང་པ་དཔྱིས་ཕྱིན་པ་ཞིག་བྱེད་ཐུབ་མེད།
    དེས་ན་ཁྱེད་ཀྱི་ཞིབ་འཇུག་གནང་བ་དེ་དག་གིས་ཕན་ཐོགས་ཆེན་པོ་འདུག
    རྗེས་ཕྱོགས་མུ་མཐུད་ནས་གནང་རོགས་ཞུ།
    ངས་རེ་བསྐུལ་ཞུ་བ་ཡིན།

14. མིག་བརྒྱད་པ་ལེགས་དང་། དོལ་སྨྱོན་ལེགས།
    ཁྱེད་གཉིས་ཀྱི་གསལ་བཤད་ཀྱིས་ཆས་དང་ཆ་ལ་དོགས་སེལ་ལེགས་པ་བྱུང་།
    མཁས་པ་བརྩད་ཅིང་མ་དྲིས་པ།
    དེ་ཡི་བར་དུ་གཏིང་མི་དཔོགས།
    རྔ་ལ་དབྱུ་གུས་མ་བསྣུན་པ།
    དེ་སྲིད་གཞན་དང་ཁྱད་ཅི་ཡོད།།

15. རྒན་ལ་དྭགས་པ་ལགས། སྐུ་ཉིད་ཀྱིས་སེམས་དཔའ་ཆེན་པོ་ཁུ་ནུ་བླ་མ་བསྟན་འཛིན་རྒྱལ་མཚན་གྱི་དྲུང་ནས་མཁས་དབང་གར་ཞྭ་དངོས་གྲུབ་དང་ལྷན་དུ་དག་ཡིག་ཟ་མ་ཏོག་དང་དག་ཡིག་ངག་སྒྲོན། དེ་མིན་གཞན་ཁྲིད་རྒྱུན་གང་དང་གང་ཞུས་ཡོད་མེད་ཀྱི་མིང་ཐོ་ཞིག་གནང་རོགས་ཞུ། འདི་ཕྱོགས་སུ་བརྡ་སྤྲོད་རིག་གནས་དོན་གཉེར་ཅན་འགས་དེ་དག་གི་ཁྲིད་རྒྱུན་དཀོན་པར་གྱུར་བའི་དབང་གིས་བརྩད་གཅོད་བྱེད་བཞིན་འདུག་ལགས་ན། བདག་གིས་དག་ཡིག་ངག་སྒྲོན་རྩ་འགྲེལ་གྱི་ཁྲིད་རྒྱུན་སྐུ་གཤེགས་གར་ཞྭ་དངོས་གྲུབ་ལགས་ཀྱི་དྲུང་ནས་ཞུས་ཡོད་ལ་ཁོང་གིས་ཁུ་ནུ་བླ་མའི་དྲུང་ནས་ཞུས་འདུག ཡིན་ན་ཡང་དག་ཡིག་ཟ་མ་ཏོག་གི་དཔེ་ཁྲིད་ཆ་ཚང་ཐོབ་ཡོད་ཀྱང་དེའི་ཁྲིད་རྒྱུན་ཡོད་མེད་ཀྱི་གསལ་ཁ་མ་བྱུང་བས་སྐུ་ཉིད་ཀྱིས་གསལ་བཤད་གནང་རོགས་ཞུ།

16. མིག་བརྒྱད་པ་ལེགས།
    དག་ཡིག་ཟ་མ་ཏོག་ཞུ་མ་མྱོང་། སྐུ་གཤེགས་དངོས་གྲུབ་དང་མཉམ་དུ་སི་ཏུ་པཎ་ཆེན་གྱི་སུམ་རྟགས་ཀྱི་འགྲེལ་པ་དང་། གསེར་ཀོང་མཚན་ཞབས་རིན་པོ་ཆེ་ལ་ཞབས་ཕྱི་ཞུ་བ་དང་འབྲེལ་ངག་སྒྲོན་དབུ་ནས་ཕྲན་བུ་་ཞིག་དང་། བདག་རང་གིས་བསྐུལ་མ་ཞུས་ཏེ། སྙན་དངགས་མེ་ལོང་མ་རྩ་བ་དང་། རྗེ་བཙུན་བླ་མ་ཉིད་ཀྱིས་མཛད་པའི་བྱང་ཆུབ་སེམས་ཀྱི་བསྟོད་པ་བཅས། ཝཎ་ལེགས་སྦྱར་སློབ་གྲྭ་པ་ཁ་ཤས་དང་མཉམ་དུ་སྤྱི་ལོ་༡༩༦༤སྐབས་ཞུ་བའི་སྐལ་བཟང་ལགས།

17. བློ་བཟང་འཇམ་དཔལ་ལགས། ད་བར་དུ་བཟོད་སྒོམ་བྱས་པ་ཡིན་ཡང་ཁྱོད་ཀྱིས་གཞན་ལ་ཞུ་དག་བྱེད་རྒྱུ་ཡིན་ཟེར་ནས་སྡོད་ཚུགས་ཀྱི་མི་འདུག དེས་ན་དེ་རིང་བཟུང་ངས་ཁྱོད་ལ་ཞུ་དག་ཅིག་བྱེད། མིག་བརྒྱད་པ་ལེགས་མ་རེད་ལགས་རེད། མེ་ལོང་མ་ཡིན་ན་རྩ་བ་དེ་ཡིན་ངེས་པས་མེ་ལོང་མ་རྩ་བ་ཟེར་ནས་ཡང་བཟློས་བྱེད་དགོས་ནི་མ་རེད། ༡༩༦༤སྐབས་ཟེར་རྒྱུ་མ་རེད། ༡༩༦༤ལོར་ཟེར་རྒྱུ་རེད། དེ་ཡང་ཡིག་ཐོག་ཏུ་བྲིས་ན་གཅིག་སྟོང་དགུ་བརྒྱ་རེ་བཞིའི་སྐབས་ཟེར་བ་ལས་ཅིག་སྟོང་དགུ་བརྒྱ་རེ་བཞིའི་ལོར་ཞེས་བྲིས་ན་མི་ཡག་གམ། དེ་རིང་ནས་ལ་དྭགས་པའི་སྒང་ལ་ལ་དྭགས་པ་གཅིག་ཡོད་སྙམ་པ་འདི་མ་བརྗེད་ལོ།

18. བློ་བཟང་འཇམ་དཔལ་ལགས། ད་བར་དུ་བཟོད་སྒོམ་བྱས་པ་ཡིན་ཡང་ཁྱོད་ཀྱིས་གཞན་ལ་ཞུ་དག་བྱེད་རྒྱུ་ཡིན་ཟེར་ནས་སྡོད་ཚུགས་ཀྱི་མི་འདུག དེས་ན་དེ་རིང་ནས་བཟུང་ངས་ཁྱོད་ལ་ཞུ་དག་ཅིག་བྱེད། མིག་བརྒྱད་པ་ལེགས་མ་རེད་ལགས་རེད། མེ་ལོང་མ་ཡིན་ན་རྩ་བ་དེ་ཡིན་ངེས་པས་མེ་ལོང་མ་རྩ་བ་ཟེར་ནས་ཡང་བཟློས་བྱེད་དགོས་ནི་མ་རེད། ༡༩༦༤སྐབས་ཟེར་རྒྱུ་མ་རེད། ༡༩༦༤ལོར་ཟེར་རྒྱུ་རེད། དེ་ཡང་ཡིག་ཐོག་ཏུ་བྲིས་ན་གཅིག་སྟོང་དགུ་བརྒྱ་རེ་བཞིའི་སྐབས་ཟེར་བ་ལས་གཅིག་སྟོང་དགུ་བརྒྱ་རེ་བཞིའི་ལོར་ཞེས་བྲིས་ན་མི་ཡག་གམ། དེ་རིང་ནས་ལ་དྭགས་པའི་སྒང་ལ་ལ་དྭགས་པ་གཅིག་ཡོད་སྙམ་པ་འདི་མ་བརྗེད་ལོ།།

19. གཏུམ་ཆེན་རྡོ་རྗེ་མེ་འབར་ལེགས།
    ཁྱེད་ཀྱིས་ངའི་བྲིས་ལ་ཞུས་དག་མཛད་པར་དངོས་གནས་དགའ། འདིས་ང་ལ་ཁེ་བཟང་མ་གཏོགས་གྱོང་མི་འོང་། ངའི་ལུང་པར་ལགས་ལ་ལེགས་ཟེར། དེ་ཡང་ལུང་པ་གཞན་དང་འབྲེལ་པ་ཆེར་མེད་པས། གནའ་བའི་འདོན་ཚུལ་དེ་ལུས་པ་ཡིན་འདུག ལགས་ལས་ལེགས་ཞེས་པ་དེ་དག་ཆེའོ། མེ་ལོང་མ་ཞེས་པར་རྩ་བ་ཞེས་མེད་ན་ལེགས། ཁྱེད་བདེན་ནོ། གོང་དུ་སྤྱི་ལོ་ཞེས་བྲིས་མེད་ན། ༡༩༦༤ལོར་ཞེས་བཀོད་པ་ལེགས་ཀྱང་། ཟློས་སྐྱོན་མི་འོང་ཆེད་དུ། སྐབས་སམ་དུས་གང་རུང་ཞིག་འབྲི་དགོས་པར་བསམ། ལེགས་སོ། ངས་ཞུས་དག་བྱེད་པ་བཞིན་དུ་ཁྱེད་དང་གཞན་རྣམས་ཀྱིས་ཀྱིས་ཀྱང་མཛད་དགོས་པ་ཡིན། དེ་ཡང་ཕ་རོལ་པོ་དམའ་འབེབས་པའི་ཕྱིར་དུ་མ་ཡིན་པར་བོད་ཀྱི་སྐད་གོང་འཕེལ་ཉམས་པ་སོར་ཆུད་མི་ཉམས་གོང་འཕེལ་ལ་ཕན། ངའི་ཞེ་འདོད་དེ་ཉིད་ཁྱེད་རྣམས་ཀྱིས་ལོན་མི་འདུག ངའི་ཡིག་བྲིས་ལ་ཡིག་ནོར་མང་དུ་མང་དུ་འབྱུང་བ་ཡོད་པ། སྔར་ངས་ཞུས་ཟིན་པ་ཡིན། ད་ཡིན་དང་ཡིན། ཁྱེད་ཀྱི་ཞུས་དག་ལ་ང་ལོང་དུས་སྒུག་ངེས། རང་རེ་ཕན་ཚུན་སུ་ཡིན་ཀྱང་སོ་སོའི་་ལུང་སྐད་མ་ཤོར་བ་བྱེད་དགོས་པ་གལ་ཆེའོ།

20. རྒན་ལ་དྭགས་པར་ཐུགས་རྗེ་ཆེ། ཁྱེད་དང་སྐུ་གཤེགས་གར་ཞྭ་དངོས་གྲུབ་སོགས་མང་པོ་ཞིག་རང་གི་སྐད་ཡིག་ལ་ཧ་ཅང་གཅེས་སྤྲས་དང་གསེར་ལ་གསེར་དུ་ངོ་སྤྲོད་མཁན་རེད་ཅེས་ཞུ་འདོད་བྱུང་། མཁས་དབང་ཁོང་གིས་ནམ་རྒྱུན་དུས་གསུམ་དང་དག་ཆའི་སྐོར་ལ་ཧ་ཅང་གི་གཟབ་ནན་ཆེ་བ་དང་བརྩམས་ཆོས་སྐོར་ཉེར་བསྒྱུར་ཉི་ཤུ་བ་ཟེར་བ་ཞིག་དང་བྱིངས་ཀྱི་རྣམ་བཞག ཁུ་ནུ་རིན་པོ་ཆེའི་མཛད་རྣམ། ལྕགས་རི་སྨན་པ་བཀྲ་ཤིས་ཚེ་རིང་གི་ལོ་རྒྱུས། སྙན་རྩོམ་དང་གཞས། བསྒྱུར་རྩོམ་སོགས་མང་པོ་ཞིག་གདའ། ཉིན་ཞིག་ཁོང་གིས་རྩེད་མོ་དང་སྦྲགས་ནས་གསུངས་དོན། ང་ཚོའི་ལུང་བར་གཞས་ཚིག་ཡོད་པ་མ་རེད། སྐྱབས་མགོན་རིན་པོ་ཆེ་ཕེབས་དུས། ཡུལ་མི་ཚོས་གཞས་ཚིག་འདི་ལྟར་བཏང་། ༧གོང་ས་ཏཱ་ལའི་བླ་མ། ༧གོང་ས་ཏཱ་ལའི་བླ་མ། ང་ཚོའི་ལུང་བར་ཕེབས་སོང་། ང་ཚོའི་ལུང་བར་ཕེབས་སོང་། ང་ཚོའི་ལུང་བར་ཕེབས་ནས། བི་ཇི་ལི་དཀར་སོང་། ཞེས་བི་ཇི་ལི་ཟེར་བ་གློག་ལ་ཟེར། དོན་དག་གློག་དཀར་སོང་ཟེར་བ་རེད།

21. མིག་བརྒྱད་པ་ལགས། ང་ལ་སེམས་དཔའ་ཆེན་པོ་ཁུ་ནུ་བླ་མ་རིན་པོ་ཆེའི་མཛད་རྣམ་ཞིག་མཁོ་གལ་ཆེ་བས། ཉིད་ཀྱིས་དེབ་དེ་འདྲ་ཞིག་ལ་བསྐུར་ཐུབ་བམ། སྐུ་དྲིན་ཆེ།

22. གཅིག་བརྗེད་འདུག རྒན་ལྭ་དགས་པ་ལགས། ལ་དྭགས་ལྟ་བུའི་ལུང་པ་ཆུང་ཆུང་ཞིག་གི་ཡུལ་སྐད་ལུང་སྐད་མ་ཡིན་པར་ཨ་མདོ་ལྟ་བུའི་ས་ཆེན་པོ་རྒྱ་ནག་གིས་ཞིང་ཆེན་གསུམ་གྱི་ནང་དུ་བགོ་དགོས་པར་ཐུག་པ་ཞིག་གི་ཡུལ་སྐད་ད་དུང་ལུང་སྐད་ལས་ཐར་མི་ཐུབ་པ་འདི་ཅི་ཞིག་གིས་ནོངས་པ་ཡིན་ནམ། ལུང་སྐད་དང་ཡུལ་སྐད་གཉིས་ཀྱི་ཁྱད་པར་གང་ཡིན།

23. གླུ་སྨྱོན་ལགས། ཁྱེད་ཀྱི་སྦྲགས་ཁང་ཁ་བྱང་ཞིག་བསྐུར་གནོངས་དང་ངས་ཐབས་ཤེས་ཅི་ཡོད་འདོན་ཆོག མཛད་རྣམ་དེ་ཝ་ན་བོད་ཀྱི་མཐོ་སློབ་ཁང་ནས་དཔར་བསྐྲུན་བྱས་འདུག་པ་དང་འདི་གར་དཔེ་ཆ་དེ་རིགས་གསེར་ལས་ཀྱང་དཀོན།

24. མིག་བརྒྱད་པ་ལགས། ཁྱེད་རྡ་ས་ན་ཡོད་ན་ང་ལ་དེ་གར་ལག་ཏུ་འཇོག་སའི་མི་ཞིག་ཡོད།

25. གླུ་སྨྱོན་ལགས། ང་རང་རྡ་ས་ན་མེད། འབྲས་སྤུངས་ན་ཡོད། འདི་གར་དཔེ་དེབ་དེ་རིགས་མཐོང་དཀོན། གཅིག་བྱས་ན་རྡ་ས་ཤེས་རིག་པར་ཁང་ངམ་བོད་ཀྱི་དཔེ་མཛོད་གང་རུང་ཞིག་ན་ཡོད་ངེས།

26. ཀླུ་སྨྱོན་ལེགས།
    ཁྱེད་ཀྱི་དྲི་བ་དེ་དག་ཤིན་ཏུ་ལེགས། ལ་དྭགས་ཀྱི་ལུང་སྐད་ཀྱི་ཚིག་བཀའབསྟན་སོགས་ཀྱི་དག་ཆ་དང་མཐུན་པ་དེ་དག་ལེན་གྱི། བཀའ་བསྟན་སོགས་ཀྱི་དག་ཆ་དང་མི་མཐུན་པ། དཔེར་ན། ལ་དྭགས་དབུས་ཀྱི་སྐད། ཁྱེད་ཅག་དང་ང་ཅག་ལྟ་བུ་ལ། ཁྱེ་ཞ་དང་ང་ཞ་ལྟ་བུ་སྐྱུགས་བྲོ་བའི་ཚིག་བཀའ་བསྟན་གྱི་དག་ཆ་དང་མི་མཐུན་པ་ལྟ་བུ་ཞིག་འབྲི་ན། བོད་སྐད་དག་ཆ་ལ་གནོད་པ་མི་འདུག་གམ། ངའི་དམིགས་ཡུལ་གཙོ་བ་ནི་བཀའ་བསྟན་སོགས་ཀྱི་སྐད་ཡིག་གི་དག་ཆ་དེ་དག་རང་རེ་བོད་རིགས་ཡོངས་ལ་གཅིག་འགྱུར་འབྱུང་བ་ལ་འབད་པ་དེ་ཡིན། མ་ཤེས་པ་དང་སྐྱེན་པའི་དབང་གིས་ང་རང་གི་བྲིས་ནང་དུ་བཀའ་བསྟན་སོགས་ཀྱི་དག་ཆ་དང་མི་མཐུན་པ་ཤོར་བ་དག་ལ་སྐྱོན་བརྗོད་མཛད་དགོས་པ་ཡིན།

    བོད་སྤྱི་སྐད་དང་ལུང་སྐད་ཀྱི་དག་ཆ་དག་ལ་ཁྱད་པར་མཁྱེན་འདོད་དང་བླང་དོར་དངོས་མ་ཡོད་ན། དཔེར་ན། བདག་སྒྲ་ལྟ་བུ་ལ། སྔོན་གྱི་མཁས་པ་དག་གི་གསུང་རྩོམ་དག་ཕྱིས་ཀྱི་ལྷད་མ་ཞུགས་པ་དག་ལྟ་ཅི། བདག་གི་མི་ཚེ་འདིའི་བསྟོད་དུ་བཞུགས་པ། མདོ་སྨད་པ་དགེ་བའི་བཤེས་གཉེན་རྡོ་བིས་ཤེས་རབ་རྒྱ་མཚོའི་ཞབས་དང་། མཁས་དབང་དགེ་འདུན་ཆོས་འཕེལ་མཆོག་གི་གསུང་འབུམ་ཤིང་སྤར་དུ་འཐོན་པ་དག་ལ་གཟིགས་པར་ཞུ།
    ཁ་སང་གཏུམ་ཆེན་རྡོ་རྗེ་མེ་འབར་ཟེར་བ་ཞིག་གིས་ཁོ་བའི་ཚིག་བརྗོད་ཀྱི་འགྲོ་སྟངས་ལ་སྐྱོན་བརྗོད་བྱས་འདུག་པར་དགའ་བསུ། དོན་དངོས་་རང་རེས་ཡི་གེའི་དག་ཆ་ལ་རྩོད་པས། ཚིག་དག་་གི་དག་ཆ་ལ་སྐྱོན་བརྗོད་དགོས་པ་ཡིན་གྱི། ཚིག་རྩོམ་སྟངས་ལ་མ་ཡིན། ཚིག་གི་རྩོམ་སྟངས་ལ་བོད་ཀྱི་མཁས་པ་དག་གི་རྩོམ་དག་ལ་ཡང་མི་འདྲ་བ་མི་འདྲ་བ་ངེས་པར་དུ་ཡོད་དགོས། དཔེར་ན། ཀློང་ཆེན་རབ་འབྱམས་པ་དང་མཁས་གྲུབ་རྗེ་གཉིས་ལ་རྩོམ་སྟངས་ལ་མི་འདྲ་བ་ཡོད་ཀྱང་། དག་ཆ་ལ་མཐུན་པ་དཔེར་ན། དིང་སང་ཞེས་པ་གཉིས་ཀའི་གསུང་དག་ཏུ་མཐུན་པར་འདུག དེ་བཞིན་རྒྱ་གར་དུ། སངས་རྒྱས་པའི་སྙན་དངགས་པ་མང་པོ་བཞུགས་པ་ནས། སློབ་དཔོན་རྟ་དབྱངས་དང་། རྒྱ་གར་ན་གྲགས་ཆེ་བའི་སྙན་དངགས་པ་ནག་མོ་འཁོལ་རྩོམ་སྟངས་འདྲ་བ་འདུག་ཟེར། གཉིས་ཀ་དུས་སོ་སོར་བྱུང་། རྟ་དབྱངས་སྔ་མ་དང་ནག་མོ་འཁོལ་ཕྱིས་སུ་བྱུང་། བར་དུ་ལོ་ངོ་བཞི་བརྒྱ་ཙམ་ཡོད་འདུག དེས་ན་ཁྱེད་ཅག་གིས་བདག་གི་ཡི་གེའི་དག་ཆ་ལ་ཡི་གེ་མ་དག་པ་བཀའ་བསྟན་གྱི་དག་ཆ་དང་འགལ་བ་དག་གཟིགས་ཚེ་ངེས་པར་དུ། བོད་གངས་ཅན་པའི་སྐད་ལ་གཅེས་པ་དག་གིས། བོད་ཀྱི་ཡི་གེའི་དག་ཆ་དག ཤར་མདོ་སྨད་ཡུལ་གྲུ་ཆེན་མོ་ནས་ནུབ་མངའ་རིས་བར་དུ་གཅིག་འགྱུར་འབྱུང་བ་ལ་འབད་པར་འཚལ་ཞེས་ཞུ་བ་ལགས་སོ།།
    སྐྱར་ཞུ་སྔོན་མ་དྲ་རྒྱ་བརྒྱུད་ཆེད་དུ་བརྗོད་པའི་ཚོམས། ཞུས་དག་མ་སོང་བ་ཞིག་ཕུལ་ཡོད་པ་དེ་ན། བདག་རང་གིས་ཨིན་སྐད་དུ་སྒྱུར་སྐབས་སུ་མ་དག་པ་མང་དུ་མཐོང་བ་དཔེ་གཞན་དང་བསྡུར་ནས་བཅོས་པ་དེ་ལ་ཡང་མཁས་པ་དག་ཞུས་དག་མཛད་པར་འབུལ་ངེས་ལགས། དི་རིང་དེ་ཉིད་ཨིན་སྐད་རྫོགས་པར་བསྒྱུར་ཟིན་པ་ཨ་རི་པ་མཁས་པ་ཚིག་དག་པ་དང་སྙན་པོ་གང་ཐུབ་བྱེད་པར་གཏོང་ངེས་ཀྱི་གནས་ཚུལ་ཞུ།

27. དགེ་ཆོས་ཀྱི་གསུང་འབུམ་༡༩༩༠ལོར་སྤར་པ་ལ་ཕྱིས་ཀྱི་འགྱུར་བཅོས་པའི་ལྷད་མ་ཞུགས་པར་མངོན་དེ་དག་ལ་གཟིགས།

28. ཡི་གེ་གང་ཞིག་ཡིན་ཡང་ཞབས་ཞུ་ཞུ་ས་དེ་ནི་ཡིག་རིགས་དེའི་བདག་པོར་གྱུར་པའི་མི་རིགས་དེ་ཡིན་དགོས་པས། བཀའ་བསྟན་སྒྱུར་དུས་ཀྱི་མི་རིགས་དེས་བཀའ་བསྟན་དག་དེ་དུས་ཀྱི་མི་རབས་དེའི་ཁ་སྐད་ལྟར་བྲིས་པ་ཞིག་ཡིན་པ་དང་། དེང་སྐབས་ཀྱི་མིས་བཀའ་བསྟན་དག་དེང་སྐབས་ང་ཚོས་རྗོད་བཞིན་པའི་སྐད་འདིའི་ནང་དུ་ཚུར་གདན་འདྲེན་ཞུས་ཏེ་ལོ་སྔོན་སྟོང་ཕྲག་གཅིག་གི་ཡས་མས་སུ་བོད་དབུས་གཙང་གི་ཕྱོགས་སུ་བེད་སྤྱོད་བྱེད་བཞིན་ཡོད་ཀྱང་དེང་སྐབས་སྤྱི་ཁྱབ་ནས་སྐད་ཆ་འཆད་བཞིན་པའི་སྐབས་སུ་བེད་སྤྱོད་མི་བྱེད་པའི་རིགས་འདོར་དགོས་ངེས་རེད། དེ་ལྟར་མ་བྱས་པར་བཀའ་བསྟན་གྱི་ཚིག་རེད་ཅེས་རྩ་ཆེན་པོར་བརྩིས་ནས་འདོར་ལེན་ཅི་ཡང་བྱེད་མ་ནུས་པར་བསྡད་ན་ང་ཚོའི་མི་རབས་འདིའི་རིང་ལ་བཀའ་བསྟན་དག་བེད་མེད་ཆགས་འགྲོ་བ་ནི་དེང་སང་མཐོང་བཞིན་པ་འདི་རེད། དེ་ལས་བཀའ་བསྟན་དག་གནའ་སྔ་མོའི་དབུས་པའི་སྐད་དུ་ཡོད་པ་དེ་དེབ་སྐབས་ཀྱི་དབུས་པའི་སྐད་དུ་བྲིས། དེ་ནས་དེང་སྐབས་ཀྱི་ཨ་མདོ་བ་དང་ཁམས་པའི་སྐད་དུ་ཡང་འབྲི་ཐུབ་ན་བཀའ་བསྟན་ལ་དེ་ལས་ལྷག་པའི་གཅེས་སྤྲས་བྱེད་སྟངས་ཤིག་མི་འདུག བཀའ་བསྟན་རྒྱ་ཡིག་དང་དབྱིན་ཡིག་སོགས་ཡིག་རིགས་གཞན་པར་བསྒྱུར་ཆོག་ན། བཀའ་བསྟན་ཨམ་སྐད་དང་ཁམས་སྐད་སོགས་བོད་ནང་ཁུལ་གྱི་སྐད་རིགས་མི་འདྲ་བའི་སྟེང་དུ་འབྲི་མི་ཆོག་པའི་གནས་ཤུགས་ཤིག་གང་ནས་རྙེད། བཀའ་བསྟན་གྱི་སྙིང་པོ་ངོ་མ་དེ་ནི་བཀའ་བསྟན་གྱི་བརྗོད་བྱའི་ནང་དོན་དེ་དག་རེད་མ་གཏོགས་རྗོད་བྱེད་ཀྱི་སྐད་ཡིག་ནི་གང་ཞིག་གིས་མི་དམངས་ལ་ཕན་འདོག་ཐུབ་ན་དེ་དང་དེའི་སྐད་དང་ཡིག་རིགས་སུ་བསྒྱུར་མི་ཆོག་པ་་ཞིག་རྩ་བ་ནས་མེད་པ་ནི། བཟང་སྤྱོད་སྨོན་ལམ་ལས། ལྷ་ཡི་སྐད་དང་ཀླུ་དང་གནོད་སྦྱིན། །སོགས་གསུངས་པས་ཤེས་ཐུབ། དེ་བས། ལོ་ངོ་གཅིག་སྟོང་སྔོན་དུ་བསྒྱུར་པ་ཡི། །རྒྱལ་བའི་བཀའ་དང་མཁས་པའི་བསྟན་བཅོས་རྣམས། །དབུས་གཙང་སྐད་དང་ཨ་མདོ་ཁམས་པའི་སྐད། །སྐད་རིགས་སྣ་ཚོགས་ནང་དུ་འབེབ་ནུས་ཤོག །ཅེས་སྨོན་ལམ་འདེབ་དགོས་པ་མ་ཟད་ལག་ལེན་དུ་འང་འབེབ་དགོས་ཀྱི་འདུག དེ་མིན་དབུས་སྐད་གཅིག་པོས་བོད་ཁམས་ཡོངས་ཀྱི་སྐད་ཡིག་ལག་ལེན་གྱི་དབང་ཆ་སྒེར་གཅོད་བྱས་ནས་བསྡད་ན་འགྲིག་ཐབས་རྩ་བ་ཉིད་ནས་མི་འདུག དཔེར་ན། ཨམ་སྐད་དུ་ཕུང་པོ་ལ་ཧུང་ངོ་ཟེར་བས། བཀའ་བསྟན་ནང་གི་ཕུང་པོ་ལྔ་ཞེས་པ་དེ་ཨམ་སྐད་ཀྱི་ཧུང་ངོ་ཞེས་པར་བྲིས་པ་ཡིན་ན་ཨམ་མདོ་བ་ཞིག་གིས་དེ་ལ་གོ་རྒྱུ་ཞིག་ཡོད་པ་མ་གཏོགས། ཨ་མདོ་རིག་གནས་མི་ཤེས་པ་ཞིག་གི་རྣ་ལམ་དུ་ཕུང་པོ་ལྔ་ཞེས་ལོ་ངོ་སྟོང་ཕྲག་ལ་བཏོན་ཡང་དེ་ལ་གོ་རྒྱུ་གང་ཡང་མི་འདུག དེ་བཞིན་བཅོམ་ལྡན་འདས་ཀྱིས་བཀའ་བསྩལ་ཏོ་ཞེས་པ་ཡང་ཨམ་སྐད་ཀྱི་སངས་རྒྱས་ཀིས་བཀའ་གནང་ནི་རེད་ལྟ་བུར་འབྲི་དགོས་ཀྱི་འདུག དེ་ལྟར་གནའ་སྔ་མོའི་དབུས་པའི་ཡིག་སྐད་དུ་ཡོད་པའི་བཀའ་བསྟན་རིགས་ཆོལ་ཁ་རེ་རེའི་སྐད་དུ་མ་ཕབ་བར་དུ་བཀའ་བསྟན་འདི་ཚོ་གྲྭ་པ་ཨ་ནེ་དེ་དང་སློབ་མའི་སྡེ་རུ་བེད་སྤྱོད་ཕྲན་བུ་ཞིག་བྱེད་ཐུབ་པ་མ་གཏོགས་མི་དམངས་སྤྱི་ལ་ཕན་ཐོགས་པའི་དངོས་པོ་ཞིག་ཏུ་འགྱུར་རྒྱུ་ནི་ཧ་ཅང་དཀའ་བར་འདོད། ཕྱག་མཆོད་ཙམ་བྱས་ན་ཡང་ཕན་ཡོན་ལོས་ཡོད་དེ་དེའི་དགོས་པ་གཙོ་བོ་དེ་མ་ཡིན་པའི་ཕྱིར།

29. དེབ་སྐབས་་་་དེང་སྐབས་་་
    ཨ་ནེ་དེ་དང་་་་་་་་་་་་ཨ་ནེ་དེ་ཚོ་དང་་་་

30. ལོ་སྔོན་་་་་་་ལོ་ངོ་་་་

31. ལ་འཇམ་ལགས། སྐད་ཡིག་གཅིག་གྱུར་གྱི་སྐད་ཆ་བཤད་མི་ཆོག་པ་ག་ལ་ཡིན། སུས་བཤད་ན་རྗེས་སུ་ཡི་རངས་ཡོད། དངོས་གནས་སྐད་ཡིག་གཅིག་གྱུར་གྱི་ལས་དོན་བསམས་ནས་ལས་ཀ་བྱེད་བཞིན་ཡོད་ན། ད་ཐེངས་ངས་ཁྱེད་ཀྱི་ནོར་འཁྲུལ་ཁ་ཤས་མ་གཏོགས་འབྲི་ཁོམ་མི་འདུག མི་ཚེའི་བསྟོད་ལ་མི་ཚེའི་སྟོད། ཤིང་སྤར་ལ་ཤིང་དཔར་ཞེས་ཕྲིས། ཡང་། ཞུས་དག་ལ་ཞུ་དག་ཞེས་བྲི་དགོས་ཏེ། ཞུ་དག་ནི་མིང་ཚིག་བརྗོད་པ་གསུམ་ལས་མིང་དུ་གྱུར་ཟིན་པས་མིང་བཟོ་སྐབས་དག་ཆ་ཐག་ཆོད་བྱེད་སྟངས་དང་མཐུན་པས་སོ། ཁྱོད་ཀྱི་ལུང་པའི་སྐད་ཡིན་ན་དག་ཆ་ནོར་བ་བྲིས་ཆོག་གི་ཡོད་ན་ཡ་མཚན་རེད། ངོ་མ་བཤད་ན། རྩོམ་ཡིག་གི་ལམ་ནས་བོད་ཀྱི་སྐད་ཡིག་གཅིག་གྱུར་གྱི་སྐད་ཆ་བཤད་རྒྱུ་སྔ་དྲགས་འདུག ངས་བལྟས་ན། ཁྱེད་ཀྱི་ཀླད་པའི་ནང་དུ་སི་ཏུ་འགྲེལ་ཆེན་གྱི་ཁྲིད་རྒྱུན་ཟིན་བྲིས་ཤོག་ལྷེ་འགའ་ལས་ཅི་ཡང་མེད་པ་ཟུར་བལྟས་ལེབ་མཐོང་རེད། ཁྱེད་ལས་ངེད་ཚང་གི་ཨ་ཁུ་ཀླུ་སྨྱོན་སོགས་ཀྱིས་ཀྱང་སྐད་ཡིག་གཅིག་གྱུར་ཐད་གྲུབ་འབྲས་གང་འཚམ་བཞག་ཡོད་པ་ཚང་མས་མཁྱེན་གསལ་རེད། བདེ་མོ།

32. དགེ་བཤེས་ཤེས་རབ་རྒྱ་མཚོས། ལུང་བ་རེ་ལ་སྐད་རེའི་དཔེ་དོན་བཞིན་ཕལ་སྐད་མཐའ་དག་གི་རྗེས་འདེད་བགྱིད་པར་སུ་ཞིག་གིས་སྤོབས། འོན་ཀྱང་རང་སྐད་བསྒྱུར་རྒྱུ་དང་གཅིག་སྐད་ཀུན་གོ་ཧ་ཅང་དཀའ་ངལ་ཆེ་བས་གང་ལ་གང་འོས་སུ་ཡུལ་སོ་སོའི་བརྡའང་མ་བཀོལ་ན་མཐར་གང་ལ་ཡང་ཕན་མི་ཐོགས་པའི་ཡ་མ་ཆ་ཞིག་ཏུ་བསྒྱུར་ཉེན་མཆིས། དེའི་ཕྱིར་བཀའ་དང་བསྟན་བཅོས་ལ་གྲགས་པའི་ཡུལ་དབུས་ཀྱི་མིང་ཚིག་རྣམ་དག་གང་ཐོན་སྲོག་ཏུ་བཟུང་ནས་སྟེང་ནས་མཁན་པོ་འཇམ་པའི་དབྱངས་ཀྱི་ཞལ་གསལ་གོང་དུ་སྨྲས་པ་དེ་དག་དང་། བདག་གཞན་དུས་གསུམ་གྱི་གསང་གནད་གོ་རྟོག་དཔྱིས་ཕྱིན་རྨ་ལ་བཙགས་ཚུགས་ཟུང་དུ་འབྲེལ་བས་གདམ་ང་ཧྲལ་ཧྲོལ་དང་ཕལ་སྐད་རང་ལྟ་མཆོག་འཛིན་གྱི་རིགས་དོར་ན་ལེགས། ཞེས་དང་། མཁས་དབང་དགེ་ཆོས་ཚང་གིས། དེས་ན་ད་དུང་ཡང་རང་རེ་རྣམས་ཇི་སྲིད་བསྟན་བཅོས་ཀྱི་ཐ་སྙད་དང་ཆོས་སྐད་ལ་ཆ་འཇོག་བྱེད་པ་དེ་སྲིད་དུ་བོད་ཡུལ་ཡོངས་རྫོགས་ཀྱི་སྐད་རིགས་ཀྱང་གཅིག་ཏུ་གནས་པ་ཡིན་ཞིང་། དཔེར་ན། ཆོས་སྐད་དུ་བྲིས་པའི་གླེགས་བམ་ཞིག་མངའ་རིས་ནས་ཨ་མདོའི་བར་དུ་འཁྱེར་ཡང་། ཐམས་ཅད་ཀྱིས་ལྷོགས་ཤིང་གོ་ཐུབ་པ་ཡིན། དེ་མིན་དིང་སང་མཐའ་མི་འགའ་ཞིག་གིས། དབུས་ཀྱི་ཕལ་སྐད། བླ་དྭགས་ཀྱི་ཕལ་སྐད་སོགས་སྣང་བར་གང་དྲན་གྱི་སྡ་མཛོད་དང་གླེགས་བམ་དུ་བསྡེབས་པ་འདི་རིགས། བརྒྱ་ལ་དར་སོ་ཆེ་རུ་སོང་ན། ཡུལ་སོ་སོའི་ཕལ་སྐད་མིའདྲ་བའི་རྐྱེན་གྱིས། བོད་ཀྱི་སྐད་སྤྱི་ཡང་དུམ་བུར་ཆད་དེ། ནམ་ཞིག་ན་ཡུལ་སོ་སོའི་སྐད་དང་ཡི་གེ་ཕན་ཚུན་བརྡ་མི་འཕྲོད་པ་ཞིག་འོང་ངེས་ལ། སྐད་ཡིག་སོ་སོར་གྱེས་པས། བསམ་འཁྱེར་དངསྤྱོད་ལམ་སོགས་ཀྱང་ཀྱང་ཐ་དད་དུ་སོང་སྟེ། མཐར་བོད་ཀྱི་རིགས་དང་རྒྱལ་ཁམས་རྩ་བ་ཉིད་ནས་སིལ་བུར་འཐོར་བའི་རྐྱེན་དུ་འགྲོ་བ་ལགས། གལ་ཏེ་ཕལ་སྐད་གསར་བ་དེ་འདྲ་ཞིག་བོད་ཡུལ་ཀུན་དུ་དར་བའི་དབང་དུ་བྱས་ན་ཡང་། རང་ཅག་གི་ཆོས་སྐད་དུ་བྲིས་པའི་མདོ་རྒྱུད་རིག་གནས་ཀྱི་གཙུག་ལག་རྒྱ་མཚོ་ལྟ་བུ་འདི་ཀུན་རིམ་གྱིས་སུས་ཀྱང་མི་གོ་བའི་གླེགས་བམ་གྱི་ཕུང་པོ་ཙམ་དུ་འགྲོ་ངེས་པས། སྲོལ་ངན་འདི་འདྲའི་ཕྱོགས་ལ་ཐམས་ཅད་ཀྱིས་བག་ཟོན་དགོས་པ་ལགས། ཞེས་གསུངས་པ་ལྟར་ཧི་མ་ལའི་ཕར་ཕྱོགས་ཀྱི་བོད་མི་རིགས་དང་ཚུར་ཕྱོགས་ཀྱི་བླ་དྭགས་སོགས་སྐད་རིགས་གཅིག་གི་འོག་ཏུ་གནས་པའི་མི་རིགས་ཚང་མས་གོང་སྨོས་མཁས་དབང་འདི་གཉིས་ཀྱིས་གསུངས་པ་དེ་ལ་གཙིགས་སུ་འཛིན་དགོས་བར་མཐོང་ངོ།

33. དགོངས་དག གོང་ནས་ཡིག་ནོར་ཁག་གཉིས་བྱུང་འདུག་པ། ༼སྲོག་ཏུ་བཟུང་བའི་སྟེང་ནས༽ ༼སྐད་མཛོད༽ཞེས་བར་བཅོས་རོགས་གནང་།