གཡུ་དྲུག་དཀར། རྡ་ས།
སྐྱེས་སྐར་ནི་ཨ་མའི་འཛུམ་ཞལ་ཆེས་ཐོག་མར་མཐོང་བའི་ཉིན་མོ་དེ་ཡིན་ན། དེའི་འཕྲོ་མཐུད་ཀྱི་ལོ་ཟླ་ནི་སྐྱེས་སྟོབས་ཀྱི་མཐུ་ཡོངས་སུ་རྫོགས་པའི་དུས་ཚིགས་ཤིག་འགོ་རྩོམ་པ་ཡིན་ལ། དེ་ཡི་མིང་ལ་ལང་ཚོ་ཡི་དུས་ཟེར་ཞིང་། དེ་ནི་མི་ཚེའི་དཔྱིད་ཀའོ།།
གཞུང་ལུགས་ཀྱིས་སྤྱི་བསྡོམས་བྱས་པ་ལྟར་ན། བྱིས་པ་ཞིག་རང་ལོ་བཅུ་གཉིས་ནས་བཟུང་ལང་ཚོའི་དུས་སུ་སླེབས་འགོ་རྩོམ་ཞིང་། རང་ལོ་བཅུ་བཞི་ནས་ཉི་ཤུ་བར་ལང་ཚོའི་དུས་རིམ་ངོ་མ་དང་། དེ་ནི་མི་ཞིག་གི་གཤིས་རྒྱུད་ཡོངས་སུ་འགྱུར་དུ་འཇུག་པའི་ཉེན་ཚབས་ཅན་གྱི་དུས་སྐབས་ཤིག་ཏུ་ངོས་བཟུང་ཡོད་ལ། བྱིས་པ་ཕལ་མོ་ཆེ་ལ་མཚོན་ན། ལང་ཚོའི་དུས་ཀྱི་ཆེས་གལ་ཆེ་བའི་དོན་ཞིག་ནི། ཁོས་ངེས་བར་དུ་རང་ཉིད་བྱིས་པ་ཞིག་མ་ཡིན་པར་ར་སྤྲོད་ཐུབ་པ་ཡོང་བ་དེ་རེད་ཅེས་ལང་ཚོའི་དུས་ནི་རི་རབ་ལས་དཔང་མཐོ་ཞིང་རྒྱ་མཚོ་ལས་གཏིང་ཟབ་པའི་སྤྱི་ཁོག་ཅིག་མངལ་དུ་སྦྲུམ་པའི་དུས་ཚིགས་ཤིག་ཏུ་བཞེངས་གདའ་ཡང་། དེ་ནི་གཞན་གྱི་ཆེས་རྒྱུན་ལྡན་གྱི་མི་ཚེའི་གནས་བབ་ཀྱིས་ཐག་བཅད་པའི་གནས་ཚུལ་དུ་སོང་། ང་ལ་གོ་རྒྱུ་ཚོར་རྒྱུ་ཆེར་མ་བསྟབས། ལྷག་པར་དུ་ང་ཡི་ལང་ཚོའི་དུས་ལ་ཕྱིར་ལོག་ནས་མྱོང་རྒྱུས་བླངས་ན། ང་ལ་དེ་བས་ཀྱང་ཡིད་ཆེས་ཤིག་སླེབས་དཀའ་ཚོད་རེད།
ང་ལ་མཚོན་ན་ ཏག་ཏག་ང་ཡི་ལང་ཚོ་ཡི་དུས་སུ་རྒྱ་གར་ལ་བྲོས་བྱོལ་ལ་ཡོང་ཞིང་། བྲོས་བྱོལ་གྱི་སྦྱོར་དངོས་འཇུག་གསུམ་ནི་ཏག་ཏག་ང་ཡི་ལང་ཚོའི་དུས་ཀྱི་ཏན་རྟགས་ཁོ་ན་ཡིན་ཆོག་སྟེ། ཤ་ཁྲག་གདོས་བཅོས་ཀྱི་ལུས་པོ་ཆུང་ཆུང་དེ། ཨ་མའི་སྙིང་ཁོང་ན་མཛེས་སྡུག་གི་རི་རབ་ཏུ་གཏམས་ཤིང་། ཤུལ་ན་ལུས་པའི་རྐང་རྗེས་ཆུང་ཆུང་དེ། ཨ་མའི་སེམས་ཁོང་དུ་་སྡུག་གི་ཁུར་བོ་རུ་བཞག་པ་དེར་ཕྱིར་འདང་བརྒྱབས་ན། ཏག་ཏག་དེ་ནི་ང་ཡི་ལང་ཚོ་ཡི་དུས་ཟེར་བ་དེ་ཡིན་འདུག་ལ། རང་གི་བྲང་ཁོག་གི་རྒྱབ་རི་ལྟ་བུའི་དཔའ་སྙིང་ཐོད་ལ་བཏེགས་ཏེ། རང་གི་གཟུགས་བོངས་ལས་ཀྱང་ཆེ་བའི་ཁྲེས་པོ་རྒྱབ་ལ་ཁུར་ནས། ལ་མཐོན་པོ་བརྒྱབས། རི་མཐོན་པོ་བརྒལ། ཆུ་ཆེན་པོ་བཅད། ཐ་ན་གངས་རིའི་ཁྲོད་ཀྱི་འཇིགས་དངངས་དང་དཀའ་སྡུག་གི་འོབས་རའང་སྟོབས་ཀྱིས་གཤེགས་པ་དེར་བསམ་ན། ང་ལ་རང་གི་དུས་ཚིགས་དེའི་རྨི་ལམ་ཞིག་ཀྱང་བདོག་པ་འདྲ་མོད།
ཐང་བདེ་ས་དང་ལམ་དྲང་ས་རུ་བབས་ནས་སེམས་ལྷོད་ལྷོད་ཀྱིས་སྣེ་ལེན་ཁང་གི་སྒོ་ཐེམ་འགོམ་དུས། ང་ནི་ཐོལ་ཐོལ་ལ་སླར་ཡང་བུས་པ་ཆུང་ཆུང་ཞིག་ཏུ་གཏམས་སོང་བ་འདྲ་ཨང༌། ང་ཡི་ལང་ཚོ་ཡི་དུས་དེ་འཕྲལ་དུ་ཡལ་སོང་བ་རེད་ཨང་།
ཉི་མ་དེ་ནས་ངས་སླར་ཡང་གོ་བརྡ་མ་འཕྲོད་པར་ཁ་སྐད་ཙམ་པོ་ཡང་གཞི་ནས་གསར་དུ་སློབ་དགོས་སོང་ཞིང༌། གཞན་གྱིས་ང་ཡིས་ཟ་མ་ཟ་སྟངས་དང་གཅིན་སྐྱག་གཏོང་སྟངས༌། ཉལ་སྟངས་ལངས་སྟངས་དང༌། འགྲོ་སྟངས་འདུག་སྟངས་མན་ལའང་གཤེ་ཞིང་གཅུན་པས། ང་ནི་བུས་པ་ཆུང་ཆུང་ཞིག་དང་ཅིས་མི་མཚུངས།
དེ་ནས་ད་དུང་ཆུང་དུས་ཕ་མས་པང་ནས་སོང་བ་བཞིན། སྣེ་ལེན་ཁང་གི་རླངས་འཁོར་གྱིས་ཁྲིད་ནས་ཡོང་ཞིང༌། སློབ་གྲྭ་རུའང་གསར་དུ་སློབ་པའི་དབྱིན་ཡིག་གི་དབྱངས་གསལ་ཤ་འབད་རུས་འབད་ཀྱིས་ཤུ་རེ་བྱས་ཏེ་སྦྱངས་ཤིང༌། པ་བ་གཉིས་དང་ཀ་ག་གཉིས་སོགས་ཀྱི་ཀློག་སྟངས་ལ་ནོར་འཕྱུགས་བྱུང་འདུག་པར་བཟོ་བཅོས་རྒྱག་སླད་བསྐྱར་དུ་སློབ་པའི་དབྱངས་གསལ་འུ་ཚུགས་ཀྱིས་རྗེས་བཟླས་བྱས་པ་དང༌། ཨེ་བྷིའི་སི་སྒྲིའི་(ABCD)འབྲི་ཤེས་ན་འ་བྷ་ཁ་སྒྲ་(abcd)སྦྱོང་དགོས་པ་བཞིན། དབུ་ཅན་འབྲི་ཤེས་ཀྱང་རྐང་པ་རིང་པོ་རིང་པོ་ཅན་གྱི་དབུ་མེད་འབྲི་ཤེས་དགོས་པས། དེ་ལའང་འུ་ཚུགས་ཀྱིས་སྦྱོང་བ་བྱས་པ་སོགས་ཡོད་ཚད་དམའ་རིམ་ཞིག་ནས་འགོ་བཟུང་ནས་བུས་པ་ཆུང་ཆུང་ཞིག་ལྟར་ཡོད་ཚད་གཞི་ནས་གསར་དུ་སློབ་སྦྱོང་དང་འབད་བརྩོན་བྱས་པ་སོགས་མདོར་ན་རང་གི་འགྲོ་འཆག་ཉལ་འདུག་ཙམ་པོ་ཡང་གསར་དུ་བཙས་མ་ཐག་པའི་བུས་པ་ཞིག་ལྟར་གཞི་ནས་འགོ་བརྩམས་ལ། བྱིས་པ་ཆུང་ཆུང་ཚོའི་མིག་ལ་མཛེས་ཤིང་སེམས་ལ་རན་པའི་སློབ་གྲྭའི་སྒྲིག་ཆས་གྱོན་ནས་བྱིས་བློར་འཚམ་པའི་སྒྲིག་གཞི་ཞིག་གི་ནང་དུ་ཕར་བསྐོར་ཚུར་བསྐོར་བྱེད་དུས། ངས་རང་གི་ལུས་ཀྱི་ཆ་ཤས་གང་དང་གང་ལ་སྤུ་སྐྱེས་ཡོད་པའང་གཏན་ནས་མ་མཐོང་བ་འདྲ་ཨང་། རང་གི་སྣང་བ་ཕྲ་མོ་འདིའང་དེ་ལྟ་དེ་ལྟར་འཁྲུལ་ནས་རང་ཉིད་བྱིས་པ་ཞིག་ལས་གང་ལ་ཡང་མ་མཐོང་འདྲ་ཨང་།
འདི་ལྟར་ཡང་བསྐྱར་རང་གི་འདས་སོང་གི་ལོ་ཟླ་ལ་སྡོམ་རྩིས་ཤིག་བླངས་ན། རང་གི་མི་ཚེའི་བར་བརྒལ་ཞིག་ལ་འདི་ལྟར་གས་ཆགས་ཤོར་སོང་བ་དང་། ས་ཡི་གོ་ལ་སྒང་རིལ་འདིའི་སྟེང་འགྲོ་བ་མི་ཞིག་ཡིན་ཕྱིན་རང་ཉིད་ལ་ཡོད་ཡོད་ཡིན་པའི་རིན་བྲལ་གྱི་དུས་ཚོད་ཅིག་རང་ཉིད་ལ་མ་ཐོབ་ཅིང་། མི་ཡི་མི་ཚེའི་ལྷན་སྐྱེས་ཀྱི་གོ་རིམ་ངེས་ཅན་ཞིག་རང་གི་མི་ཚེ་འདིར་ཆད་ལྷག་ཤོར་བའི་ཧོར་ཁོང་མིག་གིས་མཐོང་ཞིང་སེམས་ཀྱིས་མྱོང་ཡང་།
རང་ཉིད་ལ་བདག་པའི་གནམ་ས་གཉིས་ཀ་གཞན་གྱིས་བཙན་དང་སྟོབས་ཀྱིས་འཕྲོག་སོང་བའི་མི་ཞིག་ལ། ད་ནི་ས་ཐོག་འདིར་འཚོ་གནས་ཀྱི་བར་བརླག་འདི་འདྲ་བ་ཞིག་ལས་གཞན་ཡོད་དཀའ་རྒྱུ་རེད་ལ། རང་གི་ཕ་ཡུལ་དང་རང་དབང་གི་རྐང་རྟེན་འཕྲོག་སོང་པའི་མི་ཞིག་འཚར་ལོང་འདི་ལས་ལྷག་ཅིག་གང་ནས་འཁྱོང་ཡང་སྙམ་མོ། ལྷག་པར་དུ་ས་མཐའ་ཞིག་ནས་ང་ཚོས་ད་དུང་ཡང་རང་གི་མི་ཚེ་ཡི་གོ་རིམ་ཧྲིལ་བོ་ལོངས་སུ་སྤྱོད་དཀའ་ཚོད་ཡིན་ཨང་།།