གྲིབ་གཟུགས།
—–དོལ་སྨྱོན་གྱི་དགའ་མར་ཕུལ་བ།
ཉམ་ཆུང་བཞིན་རས་གོར་མོ་སྙིང་ལ་རྗེ་བོ།།
འཛུམ་པའི་མེ་ཏོག་གསེར་ཆུང་སེམས་ལ་འབབ་པོ།།
མཐོང་ན་མི་མཐུན་མེད་པའི་རང་གཤིས་འཇམ་པོ།།
ང་ཡི་སེམས་ཀྱི་གཅེན་མོ་མཚམས་གཅོད་སྒྲོལ་མ།།
དལ་འགྲོས་གོམ་པའི་འདེགས་འཇོག་མིག་གི་དཔྱིད་དཔལ།།
དོན་ལྡན་ངག་གི་རྗོད་པ་རྣ་བའི་བུ་རམ།།
གང་ནས་བལྟས་ནའང་སྐྱོན་གྱི་ར་རི་ཉུང་བའི།།
ང་ཡི་སེམས་ཀྱི་གཅེན་མོ་མཚམས་གཅོད་སྒྲོལ་མ།།
མ་བཅོས་ལྷོད་ཤ་དོད་པོའི་རྒྱུན་གྱི་གཤིས་ལ།།
བཅོས་མའི་མཛེས་བཟོ་བྱེད་པའི་སྒྱུ་འཕྲུལ་མེད་ཅིང་།།
རང་བྱུང་མཛེས་པའི་དཔལ་གྱིས་ཡོངས་སུ་ཕྱུགས་པའི།།
ང་ཡི་སེམས་ཀྱི་གཅེན་མོ་མཚམས་གཅོད་སྒྲོལ་མ།།
བལྟས་ན་ལྟ་སྙིང་དྲོ་བའི་སྤྱན་ཟུང་ངོགས་སུ།།
མཛའ་བོའི་སེམས་ཀྱི་བདེ་དྲོད་རླན་ཤར་རུམ་པའི།།
མ་འོང་མི་ཚེ་ཟེར་བར་རེ་བ་ཅན་པོ།།
ང་ཡི་སེམས་ཀྱི་གཅེན་མོ་མཚམས་གཅོད་སྒྲོལ་མ།།
མཛའ་བོའི་ཚོར་བའི་སྙན་ངག་སེམས་ཀྱིས་མྱོང་ཞིང་།།
རང་གི་མིག་ཆུའི་རླན་ཤ་ཟིན་ཐོར་འགོད་པ།།
ཤེས་བྱ་ཡོན་ཏན་ཟེར་བར་བརྩི་མཐོང་ཅན་པོ།།
ང་ཡི་སེམས་ཀྱི་གཅེན་མོ་མཚམས་གཅོད་སྒྲོལ་མ།།
དག་གཙང་སེམས་ཀྱི་ཡོལ་བ་དཀར་པོའི་ངོས་སུ།།
འདོད་ཆུང་ཆོག་ཤེས་རི་མོ་འབུར་དུ་དོད་ཅིང་།།
རང་ལས་གཞན་མཐོང་ཆེ་བའི་བུ་མོ་ཡ་རབ།།
ང་ཡི་སེམས་ཀྱི་གཅེན་མོ་མཚམས་གཅོད་སྒྲོལ་མ།།
རང་གི་ཡོན་ཏན་ནམ་ཡང་བརྗོད་ལུགས་མེད་པ།།
རང་དོན་ཁོ་ན་སྒྲུབ་པའི་ཨུ་ཚུགས་མེད་པ།།
རང་གི་སྡུག་བསྔལ་བཟོད་པའི་སྙིང་སྟོབས་ཅན་པོ།།
ང་ཡི་སེམས་ཀྱི་གཅེན་མོ་མཚམས་གཅོད་སྒྲོལ་མ།།
ང་ཡི་སེམས་ཀྱི་གཅེན་མོ་མཚམས་གཅོད་སྒྲོལ་མའི།།
རང་བཞིན་ལྷུག་པོར་བརྗོད་པའི་སྙན་ཚིགས་འདི་ཉིད།།
སྒྲོ་སྐུར་གཅམ་བུའི་ངག་གི་དྲི་མ་མེད་པར།།
ཡུན་གྱིས་བཤིབས་པའི་སེམས་ཀྱི་མྱོང་སྣང་ཡིན་ནོ།།
2013/2/10
རྩོམ་ཡག་པོ་བཀླགས་སྤྲོ་བ་ཞིག་བྲིས་འདུག འོན་ཀྱང་གཅེན་མོ་ཡིན་ནམ་ཡང་ན་དགའ་མ་ཡིན།
ད་ཡང་དོལ་སྨྱོན་གྱི་དགའ་མ་དེ་གཞན་ཞིག་གི་འཕྲོག་འགྲོ་ཡོད་ས་རེད། དོལ་སྨྱོན་སྙིང་རྗེ།
ད་གཟབ་གཟབ་གྱིས་མ་གཏོགས་ཡང་སྐྱོ་གླུ་ལེན་དགོས་ཐུག་ཡོང་།
འོད་འཆང་མས་སེམས་ཁྲལ་གནང་མི་དགོས།
གྲིབ་གཟུགས་ནི་མ་ཡུམ་གྱི་མངལ་སྒོ་གཅིག་ནས་འགྲིམས་པའི་གུས་པའི་སྤུན་ཐ་ཆུང་དེ་རེད།
སྤུན་ཆུང་ཁྱོད་ཀྱི་སྙན་ངག་སྙན་སོང་། ཐུགས་རྗེ་ཆེ།
ལགས་སོ་གཅེན་པོ། ཕེབས་པར་བཀའ་དྲིན་ཞུ།
ལྷན་རྒྱས་གཞན་གཉིས་ཕེབས་པར་དགའ་བསུ་ཞུ་བ་དང་གོ་ནོར་མི་ཐེབས་པའི་རེ་བ་ཡང་ཞུས་པ་ཡིན།