གཡུ་དྲུག་དཀར། རྡ་ས།
ཉི་མ་དེར།ཁེར་འགྲོས་ཀྱི་བསང་དུད་ཅིག་གིས་དཀར་བོང་བོང་གི་ངོ་བསོ་མཐོ་རུ་འདོག་དུས།ལྷ་མོ་བླ་མཚོའི་སྔོ་དྭངས་དྭངས་ཀྱི་མེ་ལོང་གིས་ཅི་ཞིག་དྲན་སོས་པ་ལྟར།རེ་ཞིག་འཇམ་ཅག་གེར།ཐག་རིང་ནས་ལྷེམ་ལྷེམ་ལྷེམ་ཧ་ཅང་ཉམ་ཆུང་གིས་མཆེད་ཡོང་ཞིང་།རྒྱལ་ཚབ་ཀྱི་སྤྱན་གྱིས་གཟིགས་ཀྱིན་པའི་མཁའ་དབྱིངས་སུ་ཅི་ཞིག་ཀློག་གིན་པའམ།་ཅི་ཞིག་ལ་གོ་བ་ལེན་གྱིན་པ་ལྟ་བུའི་དུད་སྨུག་ལོང་ལོང་དེའི་གསང་བ་ལ་མནོ་བསམ་བཞེས་པའིགཉེར་རིས་ཀྱིས་ཁྱབ་སོང་སྐད།་སྐབས་དེར།རྒྱལ་ཚབ་ཀྱི་ཞལ་ནས་ཐོན་པའི་སྨོན་འདུན་གྱི་དབྱངས་རྟ་དང་ལྷན།་བར་མེད་དུ་ཕར་ཕར་ལ་ཁུར་གྱིན་པའི་ཆུ་རིས་ཀྱི་བར་བར་དུ།་་ཁྱོད་ཀྱི་ཆེས་ཐོག་མའི་གསེར་མདོག་གི་གཟུགས་སྣང་དེའང་ལྷེམ་ལྷེམ་གྱིས་གཡོ་བཞིན་འགུལ་གྱིན།་འཛུམ་དམུལ་དམུལ་གྱིས་ཇེ་གསལ་ཇེ་གསལ་དུ་སོང་བའི་མཛེས་སྡུག་དེས།་མཐོ་བ་གངས་རི་དང་དམའ་བ་རྩྭ་ཐང་ཀུན་པོའི་མིག་ལས།་ལྷ་མོ་བླ་མཚོ་ལྟ་བུའི་མཆི་མ་ཞིག་དབང་མེད་དུ་ས་རུ་བཤགས་སོང་སྐད།
ང་ཡི་ཨ་ཀ་མ།ཁྱེད་ནི་ནམ་ཡང་བསང་དུད་ཀྱིས་འདྲེན་དགོས་པའི་སྤྲུལ་བའི་ལྷ་དེ་ཡིན་ནམ། ཉི་མ་དེར།་ཁྱིམ་གྱི་ཆེས་རྩ་ཆེར་བརྩི་བའི་རྟ་བོང་དང་བ་ཕྱུགས་མང་པོ་ཤི་སོང་སྐད། ཞོགས་པ་དེར། ཕ་རྒན་གློ་བུར་དུ་བསྙུན་གཞི་ལས་གྲོལ་སོང་སྐད།་ཁང་ཐོག་གི་བསང་དུད་ཀྱིས་མཐོངས་ཡངས་པའི་བར་སྣང་གྱེན་དུ་གཤགས་ནས།་སུ་ཞིག་གི་བཞུད་ལམ་ལ་རྒྱང་ལྟ་བྱེད་དུས།་ཁྲི་ཤོར་རྒྱལ་མོའི་རླབས་སྒྲ་འཇགས་ཤིང་།ཁྱེད་ཀྱི་ཆེས་ཐོག་མའི་ཨག་སྐད་ལ་ཉན་བཞིན།་ཁྱེད་ཚང་གི་ཁང་ཐོག་ནས་ཐག་རིང་ལ་མཆེད་ཀྱིན་པའི་དུང་སྒྲ་ཡི་དབྱངས་རིས་མཚོ་ངོགས་སུ་བྲིས་པ་དེ།་དུས་ད་ལྟའང་འཛུམ་དམུལ་དམུལ་གྱིས་རྦ་རླབས་ཀྱི་བརྩེགས་རིམ་ཁྲོད་དབྱངས་ལ་གྱེར་བཞིན་ཡོད་ཨང་།
ང་ཡི་ཨ་ཀ་མ།ཁྱེད་ནི་ནམ་ཡང་རླབས་ཀྱིས་འདེགས་དགོས་པའི་རྒྱ་མཚོའི་གཏིང་གི་ནོར་བུ་དེ་ཡིན་ནམ།
དུས་ད་ལྟ།་རྒན་རྒོན་དག་གི་བསང་དུད་ཀྱིས་གཡོག་ཅིང་།ཕོ་རྒོད་དག་གི་རླུང་རྟ་ཡིས་བཀབ་པའི་མཚོ་ཆུང་ནོར་བུའི་ཁ་རུ།་ཁྱོད་ཀྱི་དྲན་ཤིང་ལྟ་བུའི་བྱ་ལོང་ཡར་ཡར་འཕུར་ཞིང་།་རྦ་རླབས་མར་མར་འཇག་གིན་ཡོད།་དེ་ལྟ་ནའང་།ཨ་ཁུ་རྟ་རྫིས་མཚོ་ཆུང་ནོར་བུ་དེ་སྐེ་ལ་བཏེགས་ནས་སྲུང་ཡོད།་ཐ་ན་ཁོའི་རྨི་ལམ་གྱི་དཀྱིལ་འཁོར་དེའང་མཚོ་ཆུང་ནོར་བུའི་ཁ་རུ་བཞེངས་ཤིང་།་སང་ཉིན་གྱི་ཉི་ཟེར་ལ་རེ་ལྟོས་བྱེད་ལ།་ཚེ་རབས་རྗེས་མ་དང་རྗེས་མའང་ཡིད་ལ་འཁོར་གྱིན་གདའ།
ང་ཡི་ཨ་ཀ་མ།་ཁྱེད་ནི་ནམ་ཡང་མཚོ་མཁའ་རུ་བརྩེ་བ་ཟབ་ཅིང་རང་བྱོན་གྱི་གསེར་གྱི་ཡི་གེ་དེ་ཁོ་ན་ཡིན་ནམ།།