གསར་འགོད་པ། སྐལ་བཟང་ཉི་མ།
སམ་བྷོ་ཊ་སྤྱི་ཁྱབ་ཡིག་ཚང་གིས་གོ་སྒྲིག་འོག་དགེ་སློབ་གླེང་སྟེགས་དྲ་ཚིགས་དོ་དམ་པ་དང་བོད་ཁྱིམ་བོད་དགེ་ཟུར་བ་རྒན་འོད་ཟེར་ལགས་ཉེ་ལམ་ནས་སམ་བྷོ་ཊ་སློབ་གྲྭ་ཁག་ལ་བསྐོར་བསྐྱོད་ཀྱིས་བོད་ཡིག་དགེ་རྒན་ཚོར་ཟབ་སྦྱོང་སྤྲོད་ཀྱིན་ཡོད་པ་བཞིན།ཐེངས་འདིར་ཁོང་ང་ཚོ་ཤེས་རབ་དགའ་ཚལ་སློབ་གླིང་དུ་ཕེབས་ཡོད་པ་དང་།ཁོང་གིས་ཆེས་ཐོག་མར་ང་ཚོ་ལ་ང་རང་འདིར་རང་གི་ཉམས་མྱོང་ཞིག་བརྗེ་རེས་བྱེད་དུ་ཡོང་བ་ཡིན་ཞེས་བརྗོད་པ་བཞིན།སྐབས་འདིར་ཡང་ཁོང་གིས་ང་ཚོ་ལ་རང་ཉིད་ཀྱིས་ལོ་ངོ་དགུ་ལྷག་གི་དགེ་རྒན་གྱི་བྱ་བའི་ཁྲོད་ནས་བསགས་པའི་རིན་ཆེན་གསེར་ལས་ལྷག་པའི་ཉམས་མྱོང་དང་གསར་གཏོད་ཀྱི་གྲུབ་འབྲས་སུ་བགྲང་ཆོག་པའི་བྱ་ཚིག་སློབ་ཐབས་གསར་མ་དང་།ཚིག་རྒྱན་འབྲི་ཐབས།མིང་བརྡ་གྲུབ་སྟངས།ཚིག་གྲུབ་ཇི་ལྟར་བཟོ་དགོས་པ་དང་དེ་རྒྱ་བསྐྱེད་ནས་རྩོམ་རིག་གི་ངོ་བོར་སྤེལ་སྟངས་ཀྱི་རིམ་པ་ཆ་ཚང་སློབ་ཁྲིད་གནང་པ་མ་ཟད།འདས་བའི་བོད་སྐད་ཡིག་སློབ་ཁྲིད་ཁྲོད་ཀྱི་སྐྱོན་དང་བཀག་རྒྱའི་རིགས་ཐེར་འདོན་དང་།མ་འོངས་པའི་རྒྱང་ལམ་ལ་བསམ་འཆར་འདོན་པ་བཅས་ཀྱི་གླེང་བརྗོད་ཀྱང་སྤེལ་ཡོད།མདོར་ན་ཐེངས་འདིའི་ཁོང་གི་ཟབ་སྦྱོང་གི་ནང་དོན་རྒྱ་ཆེ་ལ། རྣམ་པ་ཕུན་སམ་ཚོགས་ཤིང་། ཡང་གཅིག་བཤད་ན་ཐེངས་འདིའི་ཁོང་གི་བསྐོར་བསྐྱོད་ཟབ་སྦྱོང་འདི་ཡིས་ད་བར་བོད་ཡིག་དགེ་རྒན་ཉམས་མྱོང་ཅན་ཞིག་ཕྱིར་འཁོར་ནས་བོད་ཡིག་དགེ་རྒན་ཚོར་ཉམས་མྱོང་བརྗེ་རེས་བྱེད་དུ་ཡོང་མཁན་མེད་པའི་ཧོར་ཁོང་ཞིག་ལྷག་ཡོད་པ་དེ་ཁ་སྐོང་བྱས་པ་ཞིག་ཀྱང་ངོ་།།
ཐེངས་འདིའི་ཟབ་སྦྱོང་གི་དུས་ཡུན་བདུན་ཕྲག་གཅིག་ཧྲིལ་བོ་ཡིན་པ་དང་།ངེད་སློབ་གྲྭའི་བོད་དགེ་དག་གཙོ་བྱས་པའི་དབྱིན་དགེ་རྣམ་དང་། ལས་བྱེད། སློབ་མ་ཁག་ཅིག་ཀྱང་ཉམས་ཞུགས་གནང་ཡོད།།
བྱ་ཚིག་སློབ་ཐབས་གསར་མ་དང་། ཚིག་རྒྱན་འབྲི་ཐབས། མིང་བརྡ་གྲུབ་སྟངས། ཚིག་གྲུབ་ཇི་ལྟར་བཟོ་དགོས་པ་དང་དེ་རྒྱ་བསྐྱེད་ནས་རྩོམ་རིག་གི་ངོ་བོར་སྤེལ་སྟངས་བཅས་ཀྱི་སྐོར་རྒན་འོད་ཟེར་ལགས་ཀྱིས་བརྩམས་པའི་ཕྱག་དེབ་དཔར་ཡོད་མིན་དང་། ཡོད་ན་མཚན་བྱང་གང་ཡིན། གང་ནས་བླུ་ཡོན་ཞུ་རྒྱུ་ཡོད་མིན་སོགས་ཀྱི་གནས་ཚུལ་ཡང་དྲ་སྟེང་དུ་འགོད་རོགས་ཞུ་རྒྱུ་ཡིན།
ཧ་ཅང་ཡག་པོ་རེད་རྗེས་མ་ཡང་དེ་འདྲ་དགོས།
དྲ་གྲོགས་བསྟན་ཆོས་ལགས། ད་ལྟའི་ཆར་དཔེ་དེབ་ཀྱི་ངོ་བོར་བསྐྲུན་མེད། མི་འགྱངས་པར་བྱ་ཚིག་སློབ་ཐབས་གསར་མ་དཔར་སྐྲུན་བྱ་འཆར་ཡོད། དེ་ནི་བོད་ཀྱི་བྱ་ཚིག་ཁག་སྦྱོང་བར་རྟགས་འཇུག་སོགས་གཞུང་སྦྱངས་མི་དགོས་པར་ཨང་གྲངས་འགའ་རེ་སྦྱད་དེ་བྱ་ཚིག་སྦྱོང་བའི་ཐབས་ལམ་གསར་བ་ཡིན། སྟབས་བདེ་ཞིང་གོ་སླ་བ་མ་ཟད་རིགས་བསྒྲེ་བཏང་ནས་སྦྱོང་ཐུབ་པའི་ཐབས་ལམ་གཙོ་བོར་བཟུང་ཡོད།
སོག་ནག་ཚང་ལགས། ལན་འདེབས་གནང་བར་ཐུགས་རྗེ་ཆེ། པར་སྐྲུན་གསལ་བསྒྲགས་ལ་བསྒུག་སྡོད་ཀྱི་
ཡིན།
འངི་འདྲ་སེམས་ཤུགས་ཀྱིས་ལས་འགུལ་སྤེལ་བར་ཐུགས་རྗེས་ཆེ། ཐོག་མར་བོད་ཕྲུག་རྣམས་བོད་ཡིག་ལ་སྤྲོ་བའི་ཐོག་ནས་སྦྱང་འདུན་ཡོད་པ་བཟོ་ཐབས་ལ་འབད་དགོས། དེ་ནས་བྱ་ཚིག་དང་རྒྱན་ཚིག་སོགས་སྦྱངས་ན་གྲུབ་འབྲས་ཐོན་ངེས། ད་དུང་སྔོན་འགྲོ་ནས་བཟུང་འབྲི་ཀློག་གཏན་འབེབས་ཤིག་མ་བཟོས་ཚེ་བོད་ཕྲུག་འདི་དག་ལ་བོད་ཡིག་གོམས་འདྲིས་ཟབ་མོ་ཞིག་ཡོང་རྒྱུ་ཁག་པོ་རེད། དེང་དུས་མི་ལ་བྱ་བ་གང་ཞིག་ཡིན་ཀྱང་ལས་སླ་བོའི་ཐོག་ནས་འགྲོ་མ་ཐུབ་ཚེ་དེ་ལ་གྲུབ་འབྲས་ཐོན་ཁག་པོ་རེད། དེ་འདྲ་སོང་ཙང་བོད་ཡིག་སྦྱོང་སྟངས་ལ་སྔ་མོའི་སྡེ་པ་གཞུང་གི་ཡིག་གཟུགས་འདྲ་མིན་ཐོག་ནས་མི་ཚེ་བསྐྱལ་བསྡད་པ་དེར་འགྱུར་བ་ཞིག་མ་ཕྱིན་ཚེ། དེང་དུས་སློབ་ཚན་སྣ་མང་ཅན་གྱི་དུས་འདིར་བོད་ཡིག་གི་རྨང་གཞི་བརྟན་པོ་བཟོ་རྒྱུ་ཁག་པོ་རེད་སྙམ། ངས་འདི་བཤད་ན་མང་པོ་ཞིག་གི་སྣང་ངོར་མི་འགྲོ་བར་ང་ཚོ་བོད་ཀྱི་རིག་གཞུང་རེད། དེ་བདག་པོ་རྒྱག་དགོས་རེད་ལབ་མདོག་ཁ་བོ་རེད། ང་ཚོ་བོད་ཕྲུག་རྣམས་ཀྱིས་སྔོན་འགྲོ་ནས་ལོ་ངོ་དྲུག་ཙམ་རིང་དབུ་མེད་ཡིག་གཟུགས་ཚུགས་རིང་དང་། ཚུགས་ཐུང་། ཡིག་ཆུང་སོགས་མི་ཚེའི་ནང་བེད་སྤྱོད་དེ་ཙམ་མེད་པ་ཞིག་ལ་སྦྱངས་སྦྱངས་ནས་དུས་ཚོད་བསྐྱལ་དགོས་པ་དང་། དེ་ནས་འཛིན་རིམ་བཞི་པ་ནས་དབུ་ཅན་ཀློག་སྟངས་ལ་གོམས་འདྲིས་བྱ་དགོས་ཤིང་། འཛིན་རིམ་དྲུག་པ་ནས་འཁྱག་མ་ཚུགས་འབྲི་འགོ་འཛུགས་དགོས་པས་སློབ་ཕྲུག་རྣམས་ཀྱི་ཀླད་པར་ཡིག་གཟུགས་གཅིག་བརྟན་པོར་གནས་ཐུབ་རྒྱུ་ཁག་པོར་ཆགས་འདུག ཡིག་གཟུགས་ནི་དེ་འདྲ་གལ་ཆེན་པོ་ཡིན་ན་འཛིན་རིམ་བཅུ་པ་བཅུ་གཅིག་ནས་ལག་བདེ་བོ་ཅན་གང་འཚམས་ཤིག་ལ་ཡིག་གཟུགས་ཀྱི་རིགས་གཅིག་རྐང་འཛིན་པ་བཙུག་ན་མི་འགྲིགས་པ་མེད། སྔོན་འགྲོ་ནས་ཀློག་དེ་དབུ་ཅན་ཁོ་ན་དང་། ཡིག་གཟུགས་དེ་འཁྱུག་མ་ཚུགས་འབྲི་བཅུག་ན་དེས་ལོ་མང་རིང་ཕྲུ་གུ་རྣམས་ཀྱི་སེམས་ལ་རི་མོ་གཅིག་ཁོ་ནའི་བག་ཆགས་བརྟན་པོ་འཇོག་ཐུབ་པར་བརྟེན་བོད་ཡིག་ཡག་པོ་ཤེས་པར་ཕན་ཐོགས་ཆེ་ངེས། དེ་མིན་ཡིག་གཟུགས་གཅིག་སེམས་ལ་བརྟན་པོ་མ་ངེས་གོང་ཡིག་གཟུགས་གཞན་ཞིག་བསླབ་དགོས་པས་བོད་ཡིག་འབྲི་ཀློག་བརྟན་པོ་ཞིག་ཡོང་རྒྱུ་དཀའ། བོད་ཡིག་ལ་ཞེན་ཁོག་བྱས་པ་ཙམ་གྱིས་གང་ཡང་མི་ཕན་པར་དེ་བདག་པོ་རྒྱག་སྟངས་ཐད་ཐབས་ལམ་མ་བཙལ་ན་ད་ལྟའི་དུས་འདིར་བོད་ཡིག་བདག་པོ་རྒྱག་རྒྱུ་དཀའ་ལས་ཁག་པོ་རེད་སྙམ། ཚང་མ་བདག་པོ་རྒྱག་གི་ཡིན་ཟེར་ན་དུས་ཀྱི་རྐྱེན་པས་ཁག་པོ་རེད། དེ་ལས་འོ་མ་འདྲ་བོའི་ནང་ནས་མར་དེ་ལེན་ཨེ་ཐུབ་བལྟས་ན་ཁེ་སང་ཆེ་བ་ཡོད་པ་ཤེས་དགོས། ང་ཚོས་དུས་དང་མཐུན་པའི་འགྱུར་བ་གཏང་དགོས། རྙིང་ཞེན་ཁོ་ནས་བོད་ཡིག་བདག་པོ་རྒྱག་མི་ཐུབ་པ་ནི་དུས་ཀྱིས་ང་ཚོར་གསལ་སྟོན་བྱེད་ཡོང་གི་ཡོད།
ཐུགས་རྗེ་ཆེར་བཅོས་རོགས།